12
Oli Sipitisame epe dingi dupanya leamo doko
1 Indupa Oli Sipitisame epe dingi dupanya nambame latoo. Kaimia paluma, epe dingi dupa nyakamame masipimi laka lao masilyo.
2 Nyakama netesa mee kateamino dokopa nyakamame sambo gote ema napingi dupa watao minalapale lao mendeme mendemepi pyalya lao nyia doko masilyamino.
3 Dopana nambame nyakama dake masalapape lelyo: Sipitisa Goteme sakatasilyamo endakali dupanya mendaipi mendeme, “Jisasa baa yuu koo dokonya penana,” nalenge. Dee Oli Sipitisame sakatasilyamo endakali dokome iki kapa pao, “Jisasa baa Kamongona,” lenge.
4 Oli Sipitisame epe tata tata dingi dupa singi. Dopaka doko, Oli Sipitisa mendaimi iki dingi.
5 Kamongonya kalai pyakamaipenge kalai tata tata dupa singi. Dopaka doko, Kamongo mendaimi iki dingi.
6 Dee kalai kapa pao pipenge mana tata tata dupa singi. Dopaka doko, kalai kapa pao pipenge mana doko naima pitaka-kisa Gote mendaimi iki sakatasingi.
7 Endakali mendai mendai lao dupame endakali dupa pitaka nisalapale lao Oli Sipitisame baanya epe mende dingi.
8 Oli Sipitisa dokome endakali mendeme pii masepae dupa lapale lao dingi. Dee Sipitisa dokomeaka endakali mendeme mana kandenge pii dupa lapale lao dingi.
9 Sipitisa mendai dokomeaka endakali mende tupi joo masoo miningi doko dingi. Dee endakali mende yaina pyapae dupa mee injisingi pupu lapae doko dingi.
10 Sipitisa dokome endakali mendeme kalai pupu lapae dupa kapa pao pyepale lao dita, mendeme Gotenya pii doko kapa pao panao lamaiyepale lao dita, dee mendeme sipitisa anduku Gotenyape anduku Gotenya daape lao kandao yapalapale lao pupu lapae dita pingi. Dee endakali mendeme pii tata waka mendepale dupa kapa pao laapale lao dita, mendeme pii dokonya tenge dupa kapilyalapale lao pupu lapae dita pingi.
11 Sipitisa mendai dokomeaka dutupa pitaka pingi. Baame pitoo lao masilyamoli pyoo epe waka mende naima pitaka mendai mendai lao mokosoo dingi.
Yongenya katenge longoaka doko yonge mendai iki katengena leamo doko
12 Yonge mendai dokonya kingipi mokopi dopale dupa longo katengeaka doko, yongenya katenge longo dupa pitaka yonge mendainya iki katenge. Kataisanya apata dopaka pyoo katenge.
13 Doko, Jutapi, tata wakapi, kendemanepi, meepi, naima pitaka yonge mendai doko-pipa pakatae kalyepale lao Sipitisa mendaimi naimanya kaimbu pyekea. Dee naima pitakame Sipitisa mendai doko-pipa pakatae katamana lao nyiama.
14 Yonge dokonya kingipi mokopi dopale dupa longo katenge. Mendai iki daa.
15 Mokome lao pituu, “Namba kingi daa dokonya namba yongenya katenge mende daana,” latamo kandao doko, baa yongenya katenge mende joo nakatatape?
16 Dee kaleme lao pituu, “Namba lenge daa dokonya namba yongenya mende daana,” latamo kandao doko, baa yongenya katenge mende joo nakatatape?
17 Yonge doko pitaka lengeaka pyali kandao doko, aipa petala pii sipyalipi? Dee yonge doko pitaka kaleaka pyali kandao doko, aipa petala tunduma sipyalipi?
18 Dopaka doko, dopa daa. Yongenya katenge dupa pitaka mendai mendai lao Goteme katatoo lao masiamoli pyoo katea-pyaa.
19 Yonge doko pitakanya yongenya katenge mendai iki katenge pyali kandao doko, yonge nakatapyali.
20 Dopaka doko, dopa daa. Yongenya katenge longoaka doko, yonge mendai iki katenge.
21 Dopana, lengeme kingi kandao lao pituu, “Emba yangyala naelyamona,” laa nayapenge. Dee aiyombame moko kandao lao pituu, “Emba yangyala naelyamona,” laa nayapengeaka.
22 Daa, naimame yongenya katenge dupanya mendapua katapenge tenge andake nakalyamona lao masingi dupa katapenge kalyamo.
23 Dee yongenya katenge angi daana lao masingi dupa naimame kandao isingi. Yongenya katenge panala nayapenge dupa naimame auu pyoo sanga pingi.
24 Yongenya katenge panapenge dupa naimame dopa napipenge. Dopaka doko, Goteme yonge doko pyasoo mendai wasoo yongenya katenge dupanya mendapua katapenge tenge andake nakalyamona lao masingi dupa kenge epe sia-pyaa.
25 Yonge doko saa laloo napinya yongenya katenge dupa pitakame mendai dopale joo mende kanda kanda pyoo katena lao baame dopa pia-pyaa.
26 Dopana, yongenya katenge dupanya mende tanda nyilyamo kandao doko, yongenya katenge dupa pitaka awapa tanda nenge. Dee yongenya katenge dupanya mende lalyilyamino kandao doko, yongenya katenge dupa pitaka awapa mona yaepenge.
27 Mendai dopaka pyoo nyakama pitaka Kataisanya yonge joo kalyamino. Dee nyakama mendai mendai lao yonge dokonya kingipi mokopi joo kalyamino.
28 Sosa dokonya Goteme endakali mendapua dapa pyoo katea: mupa doko aposele dupa, laponge doko potopesa dupa, teponge doko tisaa dupa katea. Ongopa pakala endakali dupame kalai pupu lapae dupa pina lao katatala, dee ongopa pakala endakali dupame yaina pyapae dupa mee injisepengepi, endakali dupa nisepengepi, endakali isepengepi, dee pii tata waka mendepale dupa lapengepi dupa ditala katea.
29-30 Dupa pitaka aposele daa. Dupa pitaka potopesa daa. Dupa pitaka tisaa daa. Dupa pitakame kalai pupu lapae dupa pyoo, yaina pyapae dupa mee injisoo, pii tata waka mendepale dupa lao, pii dupanya tenge dupa kapilyoo napingima.
31 Dopaka doko, Oli Sipitisame epe dingi etete andake dupa nyakamame nyowani kayao kalyepape.
Dee indupa nambame nyakama mana etete mupa doko laitaka pitoo.