13
Auu kaenge mana doko
1 Endakali dupanya pii tata wakale lengema dupa nambame latopi dee enjele dupanya pii lengema dupa latopi endakali dupa auu kayao nakatato kandao doko, nambanya pii dokome beto dili dalo lengepi meekota laiyane pii lengepi dopale jeta.
2 Nambame Gotenya pii doko panao lamaitopi, mana kandenge dupa pitakapi Goteme yalo pyoo masingi dupa pitaka kandatopi, dee yuu manda dupa mendasa pilya pena lao tuu lanya pyasepenge tupi joo masoo minatopi auu kayamaiyoo nakatato kandao doko, namba angi mende joo nakatato.
3 Nambame nambanya oapi dupa pitaka mokosoo maiyoo etatopi dee nambame namba yangao kumasina lao kayatopi nambame auu kayamaiyoo nakatato kandao doko, dopa pito dokome namba kukipi mende nisala nayata.
4 Auu kaenge dokome yapa maka nakayao malisoo katao kondo kaenge. Auu kaenge dokome endakali tilya nanyoo, tange lalyala nayao, luiyala naenge.
5 Auu kaenge dokome luiyala nayao, baa tangeaka nisepenge dupanya nisoo nakatao, yapa imbu nakaenge. Auu kaenge dokome baa-kisa mana koo minilyami dupanya masala naenge.
6 Auu kaenge dokome mana koo dupanya mona yaepala naenya, mana tolatae dupanya mona yaepenge.
7 Auu kaenge dokome kenda pipae dupa pitaka nyoo soo, dupa pitakanya kiningina lao masoo, dupa pitakanya masoo malisoo, dupa pitakanya kyoto joo katenge.
8 Auu kaenge mana doko tanga tangapi etala nayata. Gotenya pii panao lamaingi kalai doko silyamoaka doko, etata. Pii tata waka mendepale dupa lenge mana doko silyamoaka doko, soaka nakatata. Dee mana kandenge mana doko silyamoaka doko, etataka.
9 Doko, naimame mana kandenge dokonya mendatupa kandao malata, dee Gotenya pii panao lamaingi dokonya mendatupa lamaiyoo malata pilyamano.
10 Dopaka doko, dopale dupa pitaka kandao etapenge gii doko ipatamopa, malata malata pingi mana doko etata.
11 Namba wane koosa nambame wane koonya pii dupa lao, wane koo mona paliuu, wane koome masingili pyoo masoo kateo. Dopaka doko, namba angi jio dokopa wane koonya mana dupa yakineo.
12 Epapu naimame opale kandelyamano dupa kandakinikini pyoo nakandenya galasanya joo kandelyamano. Dopaka doko, tenda kanjakao kandatama. Epapu nambame kandelyo dupanya yangi kandao malelyo. Dopaka doko, Goteme namba kanjakao kandengeli pyoo tenda nambame kanjakao kandato.
13 Dopana, masoo miningipi, masoo malisingipi, auu kaengepi tepoma dutupa mee soaka katata. Tepoma dutupanya auu kaenge doko etete mupa.