2
Aposele dupame Polo aposele yangona lao kingi nyiamino doko
1 Ee kana kingi ita mende-kisa dee kitomende pateamopa Banapasa nalimba Jetusaleme dee peamba. Nambame akali Taitesa lenge doko awapa laminao peo.
2 Goteme namba pupili lao masiamo doko panasiamopa peo. Pupala Wai Pii Epe lapae nambame endakali tata waka dupa lamaiyoo katenge doko aipa lamaingipi lao Jetusaleme tange masoo miningi endakali dupame sina lao lamaiyo. Dee nambame nyakamanya akali andake joo kateamino dupa elyakao lamaiyo. Kalai indupa pilyopi, dee wamba piopi, dupa aopyoo latala angi jala nayatame lao dopa pio.
3 Nambapa tole peambano akali Taitesa doko Gitiki. Dopaka doko, dokaitame baanya elya pingi kambu kaketenaka naleami.
4-5 Kini, sambo masoo miningi kaiminingi mendapuame naima Kataisa Jisasame mokao nyepae kalyamano mana doko aipa pyoo kalyamipi lao kandalanya waa katao ipao naima konda petala dupame Taitesanya elya pingi kambu kaketena leami. Dopa pyoo dupame naima kendemane akali injisalanya piaminopa, naimame dupanya pii leamino dupanya etete kukipi mende ŋee lao nasiama. Wai Pii Epe kiningi lapae doko nyakama-kisa koteaka lao auu pyoo sekena lao dopa piama.
6 Akali andake joo kateamino dupa akali andake aipalepe lao nambame itakinya nasilyo. Goteme lengelyaapi kandao endakali dupa mokosala naenge. Akali andake dupame namba masingi waka mende waipa soo langya nayami.
7 Dopa napinya Goteme Wai Pii Epe doko Juta endakali dupa Pitame lamaina leamoliaka pyoo nambame endakali tata waka dupa lamaipi lea lamona lao kandeami.
8 Doko Pita Juta endakali dupanya aposele katena lea Gote dokome namba endakali tata waka dupanya aposele kata leaka.
9 Akali andakena lao kenge singi Jemesapi, Pitapi, Jonepi, akali dutupame kalai doko pipenge pupu lapae doko Goteme namba dia lamona lao masetala mona setao katamana lao Banapasa nalimba kingi nyiami. Kingi nyepala nalimba endakali tata waka dupanya kainanya kalai pimbana nyakama Juta endakali dupanya kainanya kalai pina lao pii wasiama.
10 Dokaitame pii mendai iki latala nyilyambome naima tata endakali tipya dupa nisokondape pyoo nisalapape leami. Nambame kalai dokonyaka kyoto joo pyoo kateo.
Andioko yuu dokonya Polome Pita pyalanya leamo doko
11 Dopaka doko, maitakao Pitame Andioko yuu dokonya ipao mana miniamo dokome baa-kisa koo silyamona lao panasiamosa nambame baa enomba kandao pyalanya leo.
12 Endakali mendatupa Jemesame epena leamo dutupa naepeaminopa, Pitame kaiminingi tata waka dupa-pipa awapa nee nao katea. Akali dutupa ipateaminopa baame akalinya elya pingi kambu kepapimili lao masingi akali dupa paka kayapala, dee dupa-pipa nee awapa nanenya baa waka katea.
13 Pitame minakasoo koo piamo doko Juta yango dupame awapa piamiaka. Dopa piamino dokonya mana dokome Banapasa apata pyalya lao nyiaka.
14 Dopaka doko, nambame kandeopa dupame Wai Pii Epe kiningi lapae singi dokonya tolao watao minao payala nayaminosa, endakali dupa pitakanya enomba dokonya Pita kandao dapa lamaiyo: “Emba Juta pyomo doko embame Jutamanya mana doko naminao endakali tata waka dupanya mana dupa minao kalyeno doko embame aipa petala endakali tata waka dupame Jutamanya mana minao katengeli pyoo katena leepe?” leo.
Masoo miningi dokonya iki Goteme endakali dupa pyoo nyingi
15 Kini naima Jutamanya mandipae. Naima koo pingi endakali tata waka dupanya mandipae daa.
16 Dopaka doko endakali mendeme mana setapae dupanya lapae silyamoli pingi dokonya-kaita Goteme baa tolataena nalenya, Jisasa Kataisa lao masoo miningi dokonya Goteme baa tolatae lengena lao masilyamano. Mana setapae dupanya lapae silyamoli pingi dokonya daa, Kataisa lao masoo miningi dokonya Goteme naima tolataena lena lao naimame Kataisa Jisasa lao masoo minateama. Doko aipuma? Mana setapae dupanya lapae silyamoli pingi dokonya-kaita Goteme endakali mendaipi mende tolataena nalatana lapae silyamo.
17 Dopaka doko, Goteme naima Kataisa-kisa tolataena lena latala dokopa koo pingi endakali tata waka dopale joo naima katatamano kandao doko, Kataisame koo pyepa lao mapisingina latamape? Ongo etete daa!
18 Nambame wamba anda lakyoo nepeo dupa deaka nyoo pito kandao doko, dokome namba koo pingi akali joo kalyeno lao panaseta.
19 Dopaka doko, namba mana setapae dupanya kumapae joo kalyo. Mana setapae dupameaka namba pyao kumasetea. Dokonya namba Gotenya joo paelyo. Namba Kataisapa awapa ita pokonya yukuotae katao kumio.
20 Dokonya nambame namba tangenya masingi doko dee watao pyoo nakalyo. Daa, Kataisa namba-kisa koko kalyamo. Gotenya Ikiningi dokome namba nea kayapala baame namba alo pyoo baa tangeme kumia-pyaa. Indupa namba kalyo angepa nambame baa lao masoo minao paelyo.
21 Goteme naima kandao mona epe palenge doko nambame daa nalelyo. Mana setapae dupanya-kaita Goteme endakali dupa tolataena lapyali, Kataisa mee kumiali!