3
Masoo miningi dokonya-kaitape pande mana setapae dokonya-kaitape?
1 Kanau! Nyakama Galasia tange kyakaenge dupa, Jisasa Kataisa ita pokonya yukuotae kateana lapae doko naimame nyakama laitaka peteamano doko apimi nyakama minao lungu petala kyakanya nepapyape?
2 Nambame mendai dake iki nyakama pisilyo: nyakamame mana setapae dupanya lapae silyamoli pyoo katao Oli Sipitisa Gote doko nyiamipi, pande Wai Pii Epe doko soo masoo minao katao nyiamipi?
3 Nyakama aipa petala dopa pyoo kyekelyamipi? Oli Sipitisa dokome lete katasingi kalai doko tee pyao nyakama-kisa petapumopa dee nyakama tangeme pyoo etasemana lao masilyamipi?
4 Wamba nyakama-kisa opale longo epeamo dupa nyakama-kisa mee maa yangatae kalyape? Daa, dupa nyakama-kisa mee maa yangatae nakalyamona lao nambame masilyo.
5 Goteme nyakama Oli Sipitisa doko dyoo, dee baame nyakama-kisa kalai pupu lapae dupa pilyamo doko nyakamame mana setapae dupa watao minapiminosa pilyape, pande Wai Pii Epe doko soo masoo minapimino dokonya pilyape?
6 Masoo minapimino dokonya pilyamo daape! Kini mendai dopaka pyoo, “Apotakame dokome Goteme kiningi lelyamona lao masoo minao kateamo dokonya Goteme baa tolataena lea-pyaana,” lapae silyamo.
7 Ongonya masoo minatamino endakali dupa Apotakamenya ikiningi angina lao nyakamame auu pyoo masalapape!
8 Masoo miningi dokonya-kaita Goteme endakali tata waka dupa tolataena latona lao wamba waka masia-pyaa. Dokonya baame wambao Wai Pii Epe dake Apotakame lamaiyoo dapa lea-pyaa: “Emba-ketae nambame yuunya endakali tata dupa pitaka auu pisetona,” lea-pyaa.
9 Doko, masoo minilyamino endakali dupa Goteme masoo miningi akali Apotakame auu pisiamoliaka pyoo auu pisilyamo.
10 Mana setapae dupa watao minatala auu pyoo katamana lao masilyamino endakali dupa Goteme mana setapae dupanya-kaita watao pyatae kalyamino. Doko aipuma? Pii pepa pyapae singi dokonya dapa lapae silyamo: “Endakali mendeme mana setapae singi buku dokonya pii dupa pitaka watao minawaka payala nayatamo kandao doko, baa watao pyata.”
11 Dee “Masoo miningi dokonya-kaita Goteme tolataena lelyamo endakali doko lete katatana,” lapae silyamo. Dokonya pii dake panao silyamo: mana setapae watao miningi dokonya-kaita Goteme endakali mendaipi mende tolataena nalenge.
12 Mana setapae dupa masoo miningi dokonya mende daa. Ongonya dapa lao pepa pyapae silyamo: “Endakali mendeme mana setapae dupa watao minatatamo kandao doko, baa dokonya lete katatana,” lao pyapae silyamo.
13 Mana setapae dupanya-kaita naima watao pyatana lapae silyamo dokonya Kataisame naima alo pyoo baa watao pina latala naima kii tamao nyia-pyaa. Ongonya dapa lao pepa pyapae silyamo: “Akali itanya yukuotae katatamo doko watao pyatae katatana,” lapae silyamo.
14 Goteme Apotakame auu pisetona leamo doko endakali tata waka dupame Kataisa Jisasa-kisa nyina lao, dee Goteme Oli Sipitisa ditona leamo doko naimame masoo minao nyalapale lao Kataisame naima kii tamao nyia-pyaa.
Mana setapae dupapi epe maituna leamo dokopa
15 Kaimia paluma, indupa endakali dupame pingi mana mende makande pyoo lelyo. Endakali mendeme namba kumapatopa nambanya moya dupa enda wanepi dupame dapa pyoo nyetamina lao pii lanya setapatamo doko, endakali mendeme daa lawapi dee pii waka mende waipa sala nayata.
16 Dopaka pyoo Goteme Apotakamepa baanya mandipaenya mandipae paliuu patamo dupanya mandita mendepa dolapo-kisa epe dupa maitona lea-pyaa. Endakali longo kandao, “Apotakamenya mandipaenya mandipae paliuu patamo dupanya manditami dupana,” lao pii pepa pyapae nasilyamo. Mendai mende iki kandao lapae silyamo: “Embanya mandipaenya mandipae paliuu patamo dupanya mandita mendena,” lao lapae silyamo. Akali doko baa Kataisa.
17 Nambame pii lelyo dokonya tenge doko dapa: wambao Goteme endakali dupa-kisa pii lanya setapala dopa pitona lateamo doko ee kana 430 pateamopa mana setapae maitakao epeamo dupame angonya nepatala, Goteme epe maitona leamo doko mee injisala naelyamo.
18 Doko, mana setapae dupanya-kaita epe dupa nyingipyali kandao doko, Goteme epe maituna leamo dokonya-kaita nanyipumali. Dopaka doko, Goteme epe maituna leamo dokonya baame epe dupa Apotakame maiya-pyaa.
19 Aipuma Goteme mana setapae dupa setea-pyaape? Doko Apotakamenya mandipaenya mandipae paliuu patamo dupanya mandita mende-kisa epe maitona leamo doko ipatamo gii dokonya soo tuu latana lao masetala, Goteme mana setapae dupame koo pingi dupa panasina lao konda pyoo setea-pyaa. Goteme enjele dupame Gote endakalipinya kainanya katenge akali mendeme mana setapae dupa minao epena lena lea-pyaa.
20 Akali mendai ikimi kalai pitamo ongopa akali mendeme kainanya katao nyoo pyasoo katapenge nanjeta. Gote baa mendai iki.
Kendemane dupapi ikiningi dupapinya Polome leamo doko
21 Goteme epe maitona leamo dupa mana setapae dupanya daa lapae silyape? Ongo etete daa! Naima lete katasepenge mana setapae mende Goteme diali kandao doko, naimame mana setapae dupa watao minatala endakali tolatae joo katapumali.
22 Dopaka doko Goteme baanya pii pepa pyapae singi dokonya isa yuu dake pitaka koonya pupu lapae dokonya pundipundi anjetae kalyaminona lenge. Jisasa Kataisa lao masoo miningi dokonya-kaita baame epe maitona leamo doko masoo minatamino endakali dupame nyina lao dopa lenge.
23 Dopaka doko, masoo minala naengesa wambao mana setapae dupame naima anjetae joo isiamopa anjetae joaka katao pao Goteme masoo minilyamano doko panasekeamo gii doko kandao nyiama.
24 Kini, naima Kataisa lao masoo minatamino dokonya-kaita Goteme naima tolataena lena lao mana setapae dupame naimanya setao katenge akali joo naima isiamopa baa epeamo gii doko kandao nyiama.
25 Indupa masoo minilyamano doko ipateamo dokonya mana setapae dupame naima dee isala naelyamo.
26 Kataisa Jisasa lao masoo minilyamino dokome nyakama pitaka Gotenya ikiningi joo kalyamino.
27 Doko, nyakama Kataisapa pakatae kalyanya kaimbu nyiamino endakali dupa pitakame Kataisa baa nyakama-kisa nyoo kateami.
28 Juta endakalipi wakapi, kendemane endakalipi mee endakalipi, akalipi endapi, dupa pitaka wakale wakale joo nakalyamino. Kataisa Jisasapa pakatae katao mendai iki joo kalyamino.
29 Nyakama Kataisanya endakali joo kalyamino dokonya Apotakamenya mandipae joaka katao Goteme Apotakame epe maitona leamo doko nyetami.