5
Kamongo dupa yako lao kalyepape
1 Indupa nyakama kamongo dupa kandao pii mende nambame lelyo. Nyakama-kisa koo kenda pipae andinyala ipatamo dupa lao masetala yako lao ee lao kalyepape.
2 Nyakamanya oapi dupa tamutelyamo. Nyakamanya yongenya pingi dupa neneme napelyamo.
3 Nyakamanya golopi silipapi dupa kaa tao koyatelyamo. Dupanya kaa tapae dokome nyakama koyapae joo kalyamino doko panasetala itateme tengeli pyoo kaa tapae dokome nyakamanya yonge dupa tata. Yuu gii ete pyoo datupanya nyakamame auu pingi dupa setapelyamino.
4 Nyakamanya kalai akali dupame nyakamanya eenya nee mandekeamino dupanya yole nyakama tange nyepala dupa namaimino dokonya dupame yako lao kalyamino. Eenya nee mandekenge akali dupanya yako leamino dupa kaitinya amii dupanya Kamongo dokonya kalenya palipia.
5 Yuu dakenya nyakamame masiamili pyoo luiyami. Nyakamanya monanya sakatea doko mee pyoaka peamino dokonya nyakama kumatami.
6 Nyakamame akali epe tolatae doko-kisa koo tenge silyamona latala pyao kumasiami. Dopa piaminopa baame nyakama kaita lyokala naya.
Malisoo katao yapa maka nakayalapape leamo doko
7 Kaimia paluma, nyakamame yapa maka nakayao malisoo katao Kamongo ipatamo gii dokonya tuu laapape. Ee pokenge endakali mendeme baanya ee dokonya nee epe dupa wambu petena lao malisingi doko nyakamame masilyamino. Baame yapa maka nakayao aiyuwapa nikipa dolapome nee wambu pisetena lao malisetala nee doko mandenge.
8 Dokaita joo nyakamame apata yapa maka nakaenya malisalapape. Kamongo ipatamo gii doko tengesa petelyamona lao masetala nyakamanya mona kyoto jalapape.
9 Kaimia paluma, Goteme nyakama koo pilyaminona laa naena lao nyakamame mende mumu laa laa napyepape. Pii lao tolenge Gote baa ipanya kaita lyaa dokonya katapelyamo.
10 Kaimia paluma, wamba Kamongo dokonya kinginya katao pii lao kateamino akali potopesa dupame mee tanda nyoo katao yapa maka nakayao malisiamino doko masetala nyakamame mana nyalapape.
11 Endakali kenda pipae nyoo kyoto joo kateamino dupa kandao naimame mona yaepao katena lelyamano. Akali Jopome kenda pipae nyoo kyoto joo kateamo atome doko nyakamame sepala, etao baa-kisa Kamongome mana epe miniamo doko masilyamino. Kiningi, Kamongome endakali dupa kandao mona epe paliuu kondo kaenge.
12 Nambanya kaimia paluma, nyakamame dupa pitakanya mupa doko dapa pyepape: nyakamame pii mende pupu lasalanya kaitipi yuupi opale waka mende kenge latala doko mauwana nalalapape. Dopa nalenya Goteme koo pilyaminona nalena lao nyakamame kiningi latamino doko kiningi iki laapape. Daa latamino doko daa iki laapape.
Loma singi dokonya pupu lapae doko
13 Nyakamanya mende kenda pipae nyoo kalyape? Ongome Gote lao loma sina. Nyakamanya mende mona yaepao kalyape? Ongome Gote lao tama pyoo wee lena.
14 Nyakamanya mende yaina pilyape? Ongome Sosanya isingi akali dupa epena lena. Dupame baa lao masetala Kamongo dokonya kenge doko lao loma soo baanya yonge doko olipi ipangeme kai pyakamaina.
15 Masoo minao loma setamino dokome yaina pyapae endakali doko auu pisetamopa, Kamongo dokome baa sakataseta. Dee baame koo mendatupa petatamo kandao doko, Goteme kunanya nepakamaita.
16 Dopana nyakamanya koo dupa nyakamalapo lao panasoloo pyoo kalyepape. Goteme nyakamanya yaina pyapae dupa mee injisina lao nyakamame nyakamalapo lao masetala Gote lao loma soloo pyoo kalyepape. Epe tolao pingi endakali dokonya loma singi dokome etete kyoto joo kalai pingi.
17 Ilainja naima yaleaka dokome aiyuu naepena lao kyoto joo loma siamopa, ee kana tepoma-kisa dee kana tokange dutupanya aiyuu naepea-pyaa.
18 Dee loma siamopa kaitinya aiyuu ipao, yuunya nee napenge dupa pyakalyoo pia-pyaa.
Alu petae endakali dupa dee lanyalapape leamo doko
19-20 Nambanya kaimia paluma, nyakamanya mendeme pii kiningi doko yakinatatamopa endakali mendeme baa nyoo laminao pilyetamo kandao doko, nyakamame dapa lao masalapape: endakali koo pingi baanya sambo mana makandepi dupa yakinena lao nyoo laminao pilyetamo dokome endakali dolonya imambu doko kumala naena lao pyoo nyoo koo pingi longo dupa sanga pyakamaitana lao masalapape.