☰ 1 PITA 1
PITAME
PEPA WAMBAO PIAMO DOKO
Pii atupa wambao kandapenge
Pitame pepa doko wambao pyapala Goteme yapao nyepae endakali Esia kateamino dupanya pyasakamaiya-pyaa. Wambao pyao pyasiamo doko dupame Jisasa lao masoo minao katataminosa kenda pipaepi tanda nengepi dupa epea kandeno dokopa, kyoto joo katena lao nisoo pyao pyasia-pyaa. Baame lao pituu, Jisasa kumapala malunya dee sakateana baa dee ipatana nyakamame doko masetala malisetae kalyepape lea-pyaa. Leamoli pyoo katataminopa kenda pipaepi tanda nengepi dupanya koyala nayao katatamina lao pia-pyaa.
Pitame pepa wambao piamo dokonya pii lyaa dupa:
1:1-2 Pii wambao pepanya piamo dupa
1:3-12 Goteme nyakama pyoo nyilyamona masalapape
1:13–2:10 Nyakama etete epe joo kalyepape
2:11–4:19 Tanda nengepi kenda pipaepi dupa ipatamopa Kitiseneme aipa pipengepe?
5:1-11 Kitiseneme anasale katao endakali nisingi
5:12-14 Pitame pii etao lasa leamo dupa
1
1 Namba* Pita Jisasa Kataisanya aposele dokome nyakama Goteme yapao nyepae endakali yuu Pondasapi, Galasiapi, Kapatosiapi, Esiapi, Bitiniapi dupanya wakale wakale opone joo kalyamino dupanya pepa dake pyao peekelyo. 2 Takange* Goteme wamba waka pii lanya seteamoli pyoo, Oli Sipitisa endakali etete epe injisingi dokome Goteme nyakama yapao nyia. Nyakamame Gotenya pii doko watao minalapale lawapi, Jisasa Kataisanya taiyoko dokome yonge kaimbu pyalapale lawapi, Goteme dopa pia. Goteme nyakama kandao mona etete epe mende palyetala nyakamanya mona doko etete lyuu lasekena.
Lete etete katenge dokonya leamo doko
3-4 Naimame** naimanya Kamongo Jisasa Kataisanya Gote-kisa Takange doko lao tama pimana. Baame naima eteteaka kondo kayapala Jisasa Kataisa malunya sakatasiamo dokome naima dee ŋaŋa joo mandea. Naima baame epe ditamo doko masoo malisoo katao kuki makapi mende nakayatamina lao dopa pia. Baame epe doko nyakamanyana lao ketae kaitinya isakao kalyamo. Epe doko koyala nayao kaimala napyoo sapualapi naengeaka. 5 Goteme* nyakama etao pyoo nyetamo doko gii etatamo dokopa panasetopa lao depa latae kalyamo. Baame dopa pitopa lao baanya pupu lapae dokome masoo miningi dokonya-kaita nyakama isoo kalyamo.
6 Makande* pingi tata tata dupa nyakama-kisa ipatamopa epapu gii kuki tanda nyepenge. Dopaka doko, nyakamame lete etete katenge doko masetala mona yaepao kalyamino. 7 Makande* pingi epelyamo dupame nyakamanya masoo miningi doko angi jilyape lao makande pilyamo. Masoo miningi angi dokonya-kaita Jisasa Kataisa dee panao ipatamo dokopa tama pingipi, andanda semaingipi, tii pipaepi dupa nyetami. Nyakamanya masoo miningi doko golo itateme yangao makande petae alu pingi dopale daa. Etete epe. 8 Nyakamame* Jisasa Kataisa nakandeaminoaka doko, baa auu kaelyamino. Indupa nyakamame baa nakandelyaminoaka doko, baa lao masoo minilyamino. Masoo minao pituu, nyakamanya mona yaepelyamino doko epe etete auu pipae dopalena lao mendita mendepa etete kapa pao makande pipenge daa. 9 Nyakamame* masoo minao kalyamino dokonya angi doko nyakama pyoo nyepae kalyamino doko. 10 Goteme* nyakama kandao mona epe palitamo doko wamba potopesa dupame lao panao pituu, pyoo nyingi dokonya tenge doko kutokondape pyoo kateami-pyaa. 11 Kataisanya* Sipitisa doko potopesa dupa-kisa palipala lao pituu, Kataisa baa tanda nyetapi maitakao tii pipae nyetapi dupa dopa pitana lao baame akali mendepa yuu gii mendepa dolapo watambao lea-pyaa. Dokopa potopesa dupame akali doko apipi gii doko andukupape lao kutao kateami-pyaa. 12 Dopa* piaminopa Goteme dupa-kisa panasoo pituu, potopesa dupame dupa tange nisalanya dopa napiamina, nyakama nisoo dopa piamina lea-pyaa. Baame Oli Sipitisa kaitinya katao epena leamo dokonya pupu lapae dokome endakali mendapuame Wai Pii Epe doko nyakama langiami. Enjele dupame doko kandawanimi kumao kalyamino.
Nyakama etete epe joo kalyepape
13 Dopana,* nyakamanya masingi sakatatae katao tangeme tange isoo kalyepape. Isoaka katao Jisasa Kataisa panao ipatamo gii dokopa epe ditona leamo doko masoo malisokondape pyoo kalyepape. 14 Nyakama* pii singi wane joo katao pituu wamba nyakamame mana nanyingisa nyipu laka lao masingi koo palyoo payaminoli pyoo napayalapape. 15 Dopa* napinya nyakama ipupa lateamo Gote doko etete epe joo katengeli pyoo nyakamanya mana minatamino dupa pitaka etete epe joaka minao katapenge. 16 Doko,* Gotenya pii pepa pyapae singi dokonya dapa lapae silyamo: “Namba etete epe joo kalyona, dokonya nyakama etete epe joaka kalyepape,” lapae silyamo.
17 Nyakamame* Gote lao tee lao pituu, Takange lengema dokome endakalinya lengelyaapi kandao yapala naenge. Daa, endakali mendai mendai lao dupame mana minilyamili pyoo yapenge. Dopana, nyakama yuu dakenya tisa nao kalyamino gii dakepa Takange doko andanda semaiyoo kalyepape. 18 Nyakama* nyakamanya yumbange dupame mee ambe payaminoli pyoo payao katengema dupanya Goteme silipapi golopi alu pingi dupanya mendeme nyakama sambao nanyiana lao masilyamino. 19 Dopana,* Kataisa doko kaimala napingi koopi mende nasingiaka sipisipi yakane dopale jiamopa, Goteme dokonya taiyoko etete angi baa dokome nyakama sambao nyiana lao masilyamino. 20 Goteme* yuupi kaitipi wapuala nayao pituu, baame Kataisa yapao nyia-pyaa. Yuu etalanya pilyamo gii dakepa baame nyakama nisotopa lao Kataisa doko panasekea. 21 Kataisa* doko mambele nyakamame Gote lao masoo minilyamino. Goteme baa malunya sakatasetala tii pipae maiya. Dopa piamo dokome nyakamame Gote lao masoo minao malisoo kalyamino.
22 Nyakamanya* kaiminingi dupa mee sambo auu kaele nalenya kiningi etete auu kayamana latala, kiningi pii silyamino mana dokome monanya kaimala pipae dupa kunanya nepatala, nyakamame moname auu kayokondape pyoo auu kayaloo pyoo kalyepape. 23 Goteme* nyakama dee mandeamo doko ee wai yapa kumingi mendeme namandea. Ee waingi kumala naenge baanya pii lapae lete katenge etala naenge dokome baame nyakama dee mandea.
24 “Doko,* endakali dupa pitaka tanu joo kalyamino.
Dupanya pupu lapae dupa tanu dii dopale joo kalyamino.
Tanu dupa sapuilyamopa dii dupa isa kopo lenge.
25 Dopaka doko, Kamongo dokonya pii lapae doko etala nayao tanga tangapi sulu soo seta.”
Pii lapae doko Wai Pii Epe nyakama langiamino dokoaka.
* 1:1 Jo 7:35; 2 Ko 5:6; 2 Ti 1:15; Je 1:1 * 1:2 Eke 24:8; Mt 26:28; Lo 8:29; Ep 1:4; 2 Te 2:13; Ip 12:24 * 1:3-4 Jo 3:5; 2 Ko 1:3; 1 Pi 1:23; 1 Jo 2:29; 3:9 * 1:3-4 Mt 6:19-20; Kl 1:5,12; 3:3-4 * 1:5 Jo 10:28; 17:11; Ep 1:19; 1 Jo 2:29; 3:2,9 * 1:6 Jo 16:20; Ip 12:11; Je 1:2-3; 1 Pi 5:10 * 1:7 Jop 23:10; Pot 17:3; Ais 48:10; Sak 13:9; Mal 3:2-3; Lo 2:7; 1 Ko 3:13; Je 1:3 * 1:8 Jo 20:29; 2 Ko 5:7; 1 Jo 4:20 * 1:9 Lo 6:22; Ip 10:39 * 1:10 Mt 13:16-17; Ip 11:39; 2 Pi 1:20 * 1:11 Wee 22; Ais 52:13; 53:12; Lu 18:31; 24:26-27; Ap 1:7; 2:23 * 1:12 Mt 13:16-17; Lo 16:25; Ep 3:10 * 1:13 Lu 12:35-40; 1 Te 5:6 * 1:14 Lo 6:19; 12:2; Ep 2:3; 4:17-18 * 1:15 Lep 11:44-45 * 1:16 Lep 19:2; Mt 5:48; 1 Jo 3:3 * 1:17 Dit 10:17; Mt 6:9; Lo 2:11; 2 Ko 5:6; 2 Ti 4:14; Ip 11:6; Pa 2:23 * 1:18 Ais 52:3; 1 Ko 6:20; 7:23 * 1:19 Jo 1:29; Ap 20:28; Ip 9:12-14; 1 Pi 1:2 * 1:20 Jo 17:24; Ap 2:23; Ga 4:4; Ep 1:4 * 1:21 Jo 14:6; Lo 1:4; 4:24; 5:1-2; 8:11; 10:9 * 1:22 Jo 13:34; 17:17; Lo 12:9-10 * 1:23 Jo 1:13; 3:11; Ip 4:12; Je 1:18; 1 Pi 1:3; 1 Jo 3:9; 5:1 * 1:24 Ais 40:6-8; Je 1:10-11
☰