18
Jisasa anjiamino doko
(Mt 26:47-56; Mk 14:43-50; Lu 22:47-53)
Jisasame* pii dutupa latala baanya disaipele dupa-pipa pao endaki Kitone doko yaleami. Dopa petala omotena ee mende siamo ongonya baapi baanya disaipele dupapi pao pyakameami. Jisasa* enge nyiamo akali Jutasa dokome apata ee doko kandengeaka. Doko, Jisasame paa longosa baanya disaipele dupa-pipa dosa limbata pingi. Dopa* pingi dokonyana, Jutasame pitisa mupapi, Patasipi dupanya yanda singipi, yanda singi amii dupa lanyepala lamapi, kiapi, yanda yandatepi dupa minao dosa laminao epea. Jisasame* baa-kisa pitamo dupa masoo etapala pao dokaita lamaiyoo, “Nyakama api kutilyamipi?” lea. Dokaitame yanu pyao, “Nasatete tange Jisasa dokona,” leami. Dokopa baame, “Doko nambana,” lea.
Baa enge nyiamo akali Jutasa doko apata dupa-pipa kateami. Jisasame* dokaita lamaiyoo, “Doko nambana,” lea. Dokopa dokaita maita konakona pilyetala isa yuunya lombapae soo peami. Baame deaka dokaita pisoo, “Nyakama api kutilyamipi?” lea. Dokaitame lao pituu, “Jisasa Nasatete tange dokona,” leami. Jisasame yanu pyao, “Doko nambana lalo doko daape! Nyakamame namba kutatamino kandao doko, akali datupa pena kayalapape,” lea. Baame* dopa leamo dokome, wamba baame lao pituu, “Embame namba akali diino datupanya mendaipi mende yakinala nayona,” leamo pii doko angi jia. 10 Dokopa* Saimone Pitame konjua mende mandeamo doko kolanyetala pitisa mupa dokonya kendemane mendenya kale tolae-kaita pyao taka lanya nepea. Kendemane dokonya kenge doko Malakasa lenge. 11 Dokopa* Jisasame Pita lamaiyoo, “Embanya konjua doko andandanya mandi. Takangeme kapo penge namba natale lao diamo dokonya nanenya kayapengepe?” lea.
Jisasa baa Anasanya enombasa kateamo doko
12 Dokopa* yanda singi amii dupapi, dupanya isingi mupa dokopi, Juta dupanya yanda singi dupapimi Jisasa minatala kendeme yaki piami. 13 Dopa petala wambao Anasa kateasa laminao peami. Doko Anasa doko Kayapasanya imange, Kayapasa doko ee kana dokonya pitisa mupa joo katea. 14 Wamba* Kayapasa dokome Juta dupa lamaiyoo, “Endakali paliuu pelyamo dupa nisoo akali mendai kumatamo kandao doko, epena,” lea.
Pitame Jisasa nakandengena leamo doko
(Mt 26:69-70; Mk 14:66-68; Lu 22:55-57)
15 Dokopa** Saimone Pitapa dee disaipele mendepame Jisasa watao peambi. Disaipele mende doko pitisa mupa dokome kandenge dokonyana, Jisasapa tole pitisa mupa dokonya anda kamapi dokonya kolameambi. 16 Dopaka doko, Pita baa kamanda lome kambu dokonya mee katea. Pitisa mupa dokome kandenge disaipele mende dokome kamanda pyakalyetala enda lome kambu isoo petenge doko lamaitala Pita laminao andaka epea. 17 Dokopa enda lome kambu isoo petenge dokome Pita lamaiyoo, “Emba apata akali dokonya disaipele dupanya mende daape?” lea. Dokopa baame lao pituu, “Namba daana,” lea.
18 Kendemane dupapi yanda singi dupapimi kupa pianya ita yangatala endo soo kateami. Dokonya Pita apata dupa-pipa endo soo katea.
Pitisa mupa dokome Jisasa pisiamo doko
(Mt 26:59-66; Mk 14:55-64; Lu 22:66-71)
19 Pitisa mupa dokome Jisasa baanya disaipele dupanyapi dee baame pii manapi lamaiyamo dupanyapi pisia. 20 Jisasame* yanu pyao, “Nambame yuunya endakali dupa pii panao lamaiyo. Nambame koteaka lao pii lamaiyo doko pitaka Jutamanya losuu andapi losuu anda andakepi dupanya nambame Juta dupa pitaka limbiaminopa lamaiyona, nambame pii mende yalo pyoo laa nayo. 21 Aipuma embame namba pisilipi? Nambame pii lamaiyopa siamino endakali dupa embame pisoo sepe. Dupame nambanya pii doko sepala kalyaminona,” lea. 22 Dopa* lateamopa yanda singi dupanya mende dosa kateamo dokome, “Embame dopa lao pitisa mupa dokonya pii yanu pilipi?” latala kingi kapeme toka lao nyia. 23 Jisasame* yanu pyao, “Nambame pii koo mende lato kandao doko, pii koo doko leeno lao embame naima langi. Nambame pii tolao lato kandao doko, aipuma embame namba pilipi?” lea.
24 Jisasa* kendeme anjiaminoli pipita doko Anasame pitisa mupa Kayapasa doko kateasa pena lea.
Pitame Jisasa nakandengena deaka leamo doko
(Mt 26:71-75; Mk 14:69-72; Lu 22:58-62)
25 Saimone* Pita baa endo soo kateamopa dupame baa pisoo, “Emba apata baanya disaipele dupanya mende daape?” leami. Dopa leaminopa baame tanga lao, “Namba daana,” lea. 26 Pitame* akali mendenya kale taka lanya nepeamo doko tata pitisa mupa dokonya kendemaneaka mendeme Pita kandao, “Nambame emba baapa ee dokonya tole katambinopa nakanjo kanjemape?” lea. 27 Pitame* deaka, “Namba daana,” lea. Dopa lalu piamo dokopaka yaka pauli pii lalu pia.
Jisasa baa Pailatenya enombasa kateamo doko
(Mt 27:1-2,11-14; Mk 15:1-5; Lu 23:1-5)
28 Dupame* Kayapasa yakinatala Jisasa nyoo laminao kapomane andake dokonya andaka yongama utu kolao peami. Dupame nyakama kaimala nyepala Napinya Kayamo Nee doko kapa pao nyoo nanatamana latala kapomane andake dokonya andaka kolandala nayami wandiami. 29 Dopa piaminopa Pailateme kamanda pyakalyetala dokaita kateamino dokonya pupala lamaiyoo, “Nyakamame tenge akinya akali dake kosimi latamipi?” lea. 30 Dokaitame yanu pyao baa lamaiyoo, “Akali dakeme mana koo naminingi pili kandao doko, baa emba katapisa laminao naipumualina,” leami. 31 Pailateme* dokaita lamaiyoo, “Nyakamame baa nyepala nyakama tangenya mana singili pyoo kosimi laapa!” lea. Juta dupame baa lamaiyoo, “Naimame endakali mende pyao kumasalapape lapae nasingina,” leami. 32 Dopa* piamino dokome wamba Jisasame baa dopa pyoo kumatona lao makande pyoo pii leamo doko angi jalanya pia. 33 Pailate* baa dee baanya andaka kolandatala, Jisasa tengesa epena latala pisoo, “Emba Jutamanya Kiŋipi?” lea-pyaa. 34 Jisasame yanu pyao, “Emba tangeme masoo dopa leepe, pande mendeme nambanya lao emba langiminopa leepe?” lea-pyaa. 35 Pailateme* yanu pyao, “Namba Juta jolo kanjemape? Emba tatapi pitisa mupapi dupame emba namba-kisa laminao ipamino. Embame aipa piipi?” lea-pyaa. 36 Jisasame* yanu pyao, “Nambanya isingi doko isa yuu dakenya daa. Nambanya isingi doko isa yuu dakenya pili kandao doko, namba anjoo Juta dupa namaina lao nambanya kalai akali dupame namba nisoo yanda pipimili. Dopaka doko, nambanya isingi doko isa yuu dakenya daana,” lea-pyaa. 37 Pailateme* baa pisoo, “Dopa tamo doko, emba kiŋipi?” lea-pyaa. Jisasame yanu pyao, “Embame lateleno. Kini, namba kiŋi. Tenge dokonya namba endangimi mandeamopa isa yuu dakenya epeo. Dee kiningi pii doko lamaiyanya epeo. Kiningi pii doko watao minilyamo endakali doko pitakame nambanya pii doko singimana,” lea-pyaa. 38 Pailateme* baa pisoo, “Kiningi pii doko akipi?” lea-pyaa.
Jisasa pyao yukuomana leamino doko
(Mt 27:15-31; Mk 15:6-20; Lu 23:13-25)
Baame dopa latala deaka kamanda pyakalyetala Juta dupa lamaiyoo, “Nambame baa-kisa tenge mende sipumu nakandelyo. 39 Dopaka doko, nyakamanya mana singili pyoo Napinya Kayamo Gii dokonya nambame nyakamanya endakali anjetae mende mokokenge. Dopana, nambame nyakama Jutamanya Kiŋi doko mokakapili lao sekelyamipi?” lea. 40 Dokopa* dupame puu lao, “Akali doko daana, Batapasa mokaka,” leami. Batapasa doko pake nao makongao paenge akali mende.
* 18:1 2 Sam 15:23; Mt 26:30,36; Mk 14:26,32; Lu 23:39 * 18:2 Lu 21:37 * 18:3 Jo 7:45 * 18:4 Jo 6:64; 13:1 * 18:6 Jo 8:24 * 18:9 Jo 6:39; 10:28; 17:12 * 18:10 Lu 22:38; Jo 18:36 * 18:11 Mt 20:22; 26:39; Mk 10:38; 14:36; Lu 22:42; Jo 12:27 * 18:12 Mt 26:57; Mk 14:53; Lu 3:2; 22:54 * 18:14 Jo 11:49-51 * 18:15 Jo 20:3; 21:20; Ap 3:1 * 18:15 Mt 26:58; Mk 14:54; Lu 22:54 * 18:20 Ais 45:19; 48:16; Mt 26:55; Lu 19:47; 22:53; Jo 7:26 * 18:22 Ap 23:2 * 18:23 Mt 5:39 * 18:24 Mt 26:57 * 18:25 Mt 26:69-70; Lu 22:54-60 * 18:26 Jo 18:10 * 18:27 Jo 13:38 * 18:28 Jo 11:55 * 18:31 Jo 19:6-7; Ap 18:15 * 18:32 Mt 20:19; Jo 3:14; 12:33 * 18:33 Jo 19:14-15,19,22 * 18:35 Jo 1:11 * 18:36 Mt 26:53; Jo 1:10; 6:15; 8:23; 12:32; 18:10-11 * 18:37 Jo 3:11,32; 8:14,47; 1 Ti 6:13; 1 Jo 3:19; 4:6 * 18:38 Lu 23:22 * 18:40 Ap 3:14