19
Dokopa* Pailateme Jisas konjame*pina leamopa piami-pyaa. Yanda* singi dupame kende nengenenge katapae mendapua langapu petala Jisasanya aiyombanya pee pyakamaiyami-pyaa. Dopa petala yonge pee wene pyapaele mende pyakamaiyami-pyaa. Dopa* petala dupame baanya enombasa katapala, “Emba Jutamanya Kiŋi emba auu pyoo katape!” latala kingi kapeme toka lao nyiami-pyaa.
Pailateme* deaka kamanda pyakalyetala dokaita lamaiyoo, “Nambame baa nyakama katamisa kamanda laminao epelyo doko, baa-kisa tenge mende sipumu nakanjene lamo lao kanjepale lao laminao epelyona,” lea. Kende* nengenenge katapae mendapua langapu petala aiyombanya pee pyakamaiyamino doko pyoo dee yonge pee wene pyapaele mende pyakamaiyamino doko pyoo Jisasa kamanda epea. Dokopa Pailateme dokaita lamaiyoo, “Akali dake kanjepa!” lea. Dokopa* pitisa mupapi yanda singipi dupame Jisasa kandatala puu lao, “Baa pyao yuka! Baa pyao yuka!” leami. Dopa leaminopa Pailateme dokaita lamaiyoo, “Nyakama tangeme nyepala pyao yukalapa. Doko, nambame baa-kisa tenge mende sipumu nakandelyona,” lea. Juta* dupame baa kandao yanu pyao, “Naimanya mana setapae mende singina dokome akali dake kumasepenge jilyamo. Doko, baame baa Gotenya ikiningi jingina,” leami.
Pii dopa leamino doko, Pailateme sepala etete paka kaya. Dopa* petala baa baanya andaka dee kolandea. Kolandatala Jisasa pisoo, “Emba anja tangepe?” lea-pyaa. Dokopa Jisasame yanu pyao mende lamaiya naya-pyaa. 10 Dokopa Pailateme baa lamaiyoo, “Embame namba langya naelepe? Emba mokapenge pupu lapae doko namba-kisa soo dee emba pyao yukuopenge pupu lapae doko namba-kisa soaka pilyamo doko embame masala naelepe?” lea-pyaa. 11 Jisasame* yanu pyao, “Ketae katenge dokome emba pupu lapae nandipyali kandao doko, embanya pupu lapae mendeme kapa pao namba ita minala nayapili. Dopana, namba emba dyomo akali dokonya koo doko etete waipa sowana,” lea-pyaa. 12 Pailateme* pii doko sepala baa mokalanya kaitini kutia. Dopa piamoaka doko, Juta dupame puu lao, “Embame akali dake mokateno kandao doko, emba Kapomane Isingi Mupa dokonya mona setenge daa! Tangeme kiŋi kalyona lenge endakali doko pitaka Kapomane Isingi Mupa dokonya yandapipina,” leami. 13 Pailateme pii dutupa sepala Jisasa laminao kamanda pyakalyia. Pyakalyetala kosa lao petenge Kana Toko lengema dokonya petea. (Doko Iputu pii lao Gapata lengema.)
14 Napinya* Kayamo Nee doko nalanya depa lapenge gii dokopa kotaka andawai pungupungu jia. Dokopa baame Juta dupa lamaiyoo, “Nyakamanya Kiŋi dake kanjepa,” lea. 15 Dopa* leamopa dupame puu lao lao pituu, “Nyoo nepa! Nyoo nepa! Baa pyao yuka!” leami. Pailateme dokaita lamaiyoo, “Nambame nyakamanya kiŋi doko pyao yukuakawape?” lea. Dopa leamopa pitisa mupa dupame yanu pyao, “Naimanya kiŋi mende nakatengena, Kapomane Isingi Mupa doko ikina,” leami. 16 Dokopa Jisasa pyao yukuina lao Pailateme dokaitanya kingilyaka maitiamopa dupame Jisasa nyoo peami.
Jisasa ita pokonya pyao yukuiyamino doko
(Mt 27:32-44; Mk 15:21-32; Lu 23:26-43)
17 Baa* tangeme baanya ita poko doko soo yuu kenge Matenakulimanda lenge dokonya pea. (Iputu pii lao kenge doko Golokota lengema.) 18 Yuu* dokonya baa pyao yukuiyami. Dee akali mendalapo baa-pipa awapa yukuiyamiaka. Jisasa kainanya yukuotala mendalapo dolapo lemba dolaponya yukuiyami. 19 Pailateme* pii mende pepa pyanya ita poko dokonya ketae katea. Pepa pyao kateamo doko dapa latae katea: JISASA DOKO NASATETE TANGE. BAA JUTA DUPANYA KINI DOKO. 20 Jisasa* pyao yukuiyamino yuu doko taono Jetusaleme tengesa dokonyana, Juta longome pepa pyatae kateamo doko itaki pyao kandeami. Baame pepa doko Iputu pii lawapi, Loma pii lawapi, Gitiki pii lawapi pyanya katea. 21 Dopa* latae kateamopa, Juta dupanya pitisa mupa dupame Pailate kandao, “Embame, ‘Baa Juta dupanya kiŋina,’ lao pepa pyala naenya, ‘Akali dakeme, “Namba Juta dupanya Kiŋina,” leana,’ lao pepa pyaa,” leami-pyaa. 22 Dokopa Pailateme yanu pyao, “Pepa nambame pyalo doko pyapalona,” lea-pyaa.
23 Yanda singi amii dupame Jisasa pyao yukuotala dokopa baanya yonge pee akipi dupa nyepala mokosoo malu kitomende palyiami. Dopa petala yanda singi amii dupa malu mendai mendai lao nyiami. Dee baanya yonge pee isa pingi doko apata nyiamiaka. Baanya yonge pee isa pingi doko mendasa kii napingi mee wasoyoko latae. 24 Dokopa* yanda singi amii dupame nyakamalapo lao pituu, “Naimame kanguala naenya, api-kisa palelyape lao kandamana kana yakane pyasingidupa pyasema,” leami. Yanda singi dupame dopa piamino doko pii pepa pyapae singi dokonya,
“Nambanya yonge pee akipi dupa dokaitame mokosoo nyiami.
Nambanya yonge pee doko api-kisa palelyape lao kanjanya
kana yakane pyasingi dupa pyasiamina,” lapae singi doko angi jia.
25 Jisasa* yukuotae kateamo dosa baanya endangi dokopi, endanginya kakingi dokopi, enda Matia lenge Kolopasa etanenge dokopi, dee enda Makatala tange Matia dokopi dutupa kateami. 26 Jisasame* baanya endangi dokopa dee baanya disaipele auu kaenge dokopa tengesa kateambino kandatala endangi doko lamaiyoo, “Enda, dolo embanya ikiningi dokona,” lea. 27 Dopa latala disaipele doko lamaiyoo, “Dolo embanya endangi dokona,” lea. Dokopaka disaipele dokome enda doko laminao baanya andaka pea.
Jisasa kumiamo doko
(Mt 27:45-56; Mk 15:33-41; Lu 23:44-49)
28 Dutupa* etapeamopa Jisasame dutupa pitaka etapelyamo lao kandatala pii pepa pyapae singi doko angi jina lao baame, “Namba endaki nanu pyumu,” lea. 29 Dosa* penge mendenya waene kaa pipae tumbatae sia dokonya dupame koma jepaemendeme poyanyetala waeneme tumbatae doko itakali mendenya tuku petala Jisasa nena lao makapusiami. 30 Dopa* piaminopa Jisasame waene kaa pipae doko napala, “Etalamo,” lea. Dopa latala baanya mange doko tukyenatala baanya imambu doko pena kaya.
Jisasanya patali dokonya kapua katao nyiamo doko
31 Taita* dopa pyoo Sambasa gii doko etete andake mende. Gii dokonya akali dutupa mee yukuotae nakatataminopa latala indupa opale depa lenge gii dokonya Juta dupame akali dutupanya moko dupa pyao lakapala kondao nyina lao Pailate lamaiyami. 32 Dokopa yanda singi amii dupame ipupala Jisasa-pipa awapa pyao yukuiyamino akali dolaponya wambao dokonya moko dolapo pyao lakapala mende dokonya pyao lakeami. 33 Dopa petala Jisasa yukuotae kateasa ipupala kandeaminopa baa wamba kumatala siasa baanya moko dolapo pyao lakala nayami. 34 Dopaka* doko, yanda singi mendeme baanya patali dokonya yandateme kapua katao nyia. Dokopa awapa taiyoko ipangepa epea. 35 Dopa* piamopa kandeamo akali dokome piamo dokonya lao pii lea. Baanya pii leamo doko kiningi. Dee baa tangeme baame pii leamo doko kiningina lao masilyamona nyakamame apata pii doko masoo minapenge. 36 Dopa* piamo dupame pii pepa pyapae singi dokonya, “Dupame baanya kuli mendaipi mende lakala nayatamina,” lapae singi doko angi jina lao pia. 37 Pii* pepa pyapae singi dokonya dee pii mende, “Baa kapua katao nyiamino doko endakali dupame kandatamina,” lapae singi.
Jisasa malu piamino doko
(Mt 27:57-61; Mk 15:42-47; Lu 23:50-56)
38 Dutupa* peteamo dokopa akali Josepe lenge Atimatia tange dokome Jisasa nyoo malu pitoo lao Pailate-kisa tee lea-pyaa. Josepe doko Jisasanya disaipele mendeaka doko, baame Juta dupa paka kayapala baanya masoo miningi doko yalo pia-pyaa. Pailateme kapana nyina lateamopa Josepeme pao Jisasa nyia. 39 Dee* akali Nikotimasa lenge mende wamba Jisasa peteasa kuka epeamo doko apata epa. Baame ita tunduma epe pingi molo ipangepi alusa ipangepi pyasilya pyasena petae mende soo epea. Dokonya kenda pipae doko§kingi ita tepoma-kisa wakao tepoma. 40 Dolapome* Jisasa nyepala Juta dupame endakali malu pyaanya pingimali pyaoo opale tunduma pingi dupa palyeta pyoo lapalapame Jisasa yaki piambi. 41 Jisasa pyao yukuiyamino tengesa dosa ee mende sia. Ee dokonya endakali malu pipenge yuli tumbyepae enenge mende sia. Dokonya endakali mende malu petala nayami. 42 Yuu gii dokonya Juta dupanya Sambasa gii doko kandatama lao depa lengema dokonyana kananda tumbyepae tengesa siamo dokonya Jisasa malu piambi.
* 19:1 Mt 27:27-31; Mk 15:16-20; Lu 22:63-65 * 19:1 konjame Jutapi Loma tange dupapi dupame kende mendapua elyambu pyoo minatala puna dupanya kana kuli akipi mendapua anjilyamipi dee puna dupa pongo pongo pilyamipi petala pingima-pyaa. * 19:2 Lu 23:11 * 19:3 Jo 18:22 * 19:4 Lu 23:4; Jo 18:38; 19:6 * 19:5 Jo 1:29,36 * 19:6 Jo 18:31 * 19:7 Lep 24:16; Mk 14:61-64; Jo 5:18; 10:33 * 19:9 Mt 26:62-63; 27:12; Lu 23:9; Jo 7:28 * 19:11 Jo 3:27; 10:8; Ap 2:23; Lo 13:1 * 19:12 Lu 23:2; Ap 17:7 * 19:14 Mt 26:17; Mk 15:42; Jo 18:33-37; 19:31,42 * 19:15 Lu 9:14 * 19:17 Jen 22:6 * 19:18 Ais 53:12 * 19:19 Jo 18:33 * 19:20 Ip 13:12 * 19:21 Lu 19:14 * 19:24 Wee 22:18 19:24 kana yakane pyasingi Naimame opale mende ita minao nyalanya masisa pyao male pingili pyoo yanda singi amii dupame Jisasanya yonge pee nyalanya kana yakane dupa pyasoo ita minao nyiami-pyaa. * 19:25 Mt 27:55-56; Mk 3:31; 15:40-41; Lu 23:49; 24:18; Jo 2:3; 20:1,18 * 19:26 Jo 2:4; 13:22-23; 20:2; 21:20 * 19:28 Wee 22:19; Jo 4:7 * 19:29 Wee 69:21 19:29 koma jepae Koma jepae doko naimanya koma kakataesa palenge dopaleaka doko, koma dake endaki solowatanya koko singi tata mendepale mende-pyaa. * 19:30 Jo 4:34; 10:18; 17:4 * 19:31 Dit 21:23; Ga 3:13 * 19:34 Nam 20:11; Sak 13:1; Jo 7:37-38; 1 Jo 5:6-8 * 19:35 Jo 15:27; 20:27; 21:24; 1 Jo 1:1-2 * 19:36 Eke 12:46; Nam 9:12; Wee 34:20 * 19:37 Nam 21:9; Sak 12:10; Pa 1:7 * 19:38 Jo 7:13 * 19:39 Jo 3:1-2; 7:50 § 19:39 kenda pipae doko Dokonya kenda pipae doko laisa beke andake mendainya kenda pilyamo dopale. * 19:40 Mk 14:8; 16:1; Jo 11:44; 20:7