8
Enda mendeme akali kepo piamo doko
1 [Endakali dupa pitaka mendai mendai lao nyakamanya andaka peami. Dopaka doko, Jisasa baa Olipimanda yuu dokonya pea.
2 Yongama wamba utunya Jisasa baa losuu anda andake dokonya dee ipao katea. Dokopa endakali dupa pitaka baa kateasa epeaminopa baame pitipala mana lamaiya.
3 Mana setapae masingi akalipi Patasipi dupame enda mendeme akali kepo piamo kandatala laminao baa peteasa ipupala kaina dokonya katena leami.
4 Dupame Jisasa lamaiyoo, “Mana Lenge Akali, enda dakeme akali kepo pyoo palipumu kanjimini lamo.
5 Moseseme pepa piamo dupanya naima langyuu, ‘Enda dopale dupa kaname pyao kumasalapape,’ leana, indupa embame aipa leepe?” leami.
6 Dupame dopa lao pisiamino doko, baa kosimi laanya makande pyoo leami. Dopa leaminoaka doko, Jisasame pongatala kingi kondeme yuunya pepa pia.
7 Dupame baa mee pisoaka kateaminopa baame sakatatala dokaita lamaiyoo, “Nyakamanya koo napingi katatami mendeme enda dake kaname wambao pyalapa,” lea.
8 Baame dopa latala deaka pongatala yuunya pepa pia.
9 Baame dopa leamo doko sepala dupa mendai mendai lao kolao peami. Lyanga dupa wambao kolao peaminopa Jisasapa enda kainanya kateamo dokopa iki kateambi.
10 Jisasame sakatatala enda doko pisoo, “Enda dake, dokaita anja kalyamipi? Mendeme emba kosimi laanya nakalyape? lea.
11 Dokopa enda dokome lao pituu, “Akali Andake, mende nakalyamona,” lea. Jisasame lao pituu, “Nambamepi apata emba kosimi laa naelyoakana, emba pupala indupa pituu koo mende dee napipi,” lea.]
Jisasa isa yuunya tii pipae doko
12 Jisasame dokaita deaka lamaiyoo lao pituu, “Nambamba isa yuunya tii pipae dokona, namba watao ipatamo endakali doko-kisa lete katasingi tii pipae doko seta. Baa iminjetae dokonya dee napayatana,” lea.
13 Patasi dupame baa lamaiyoo, “Embame emba tangenya lao pii leleno doko kiningi nalelenona,” leami.
14 Jisasame yanu pyao, “Nambame namba tangenya lao pii lato kandawapi nambanya pii doko kiningi. Doko, nyakamame namba katao epeo yuu dokopi namba pato yuu dokopi masala naelyamino. Dopaka doko, nambame namba katao epeo yuu dokopi namba pato yuu dokopi masilyo.
15 Nyakamame endakalimi yapengemali pyoo endakali yapelyamino. Nambame endakali mendaipi mende yapala naenge.
16 Nambame endakali yapelyo kandao doko, tolao yapenge. Doko, namba ikimi yapala naenge. Daa, namba puu leamo Takange dokopa tole katao yapenge.
17 Nyakamanya mana setapae dupanya endakali lapomame pii mendai dokoaka latambino doko kiningina lapae singi.
18 Nambame namba tangenya lao pii lenge. Dee namba puu leamo Takange dokome apata nambanya lao pii lengeakana,” lea.
19 Dupame baa pisoo, “Embanya takange doko anja kalyape?” leami. Jisasame yanu pyao, “Nyakamame nambapa nambanya Takangepa nakandelyamino. Nyakamame namba kandamili kandao doko, nambanya Takange doko kandapimiliakana,” lea.
20 Baame losuu anda andake dokonya muni pyasingima penge singi dosa katao pii dutupa mana lamaiyoo lea. Baanya gii doko ipatala nayamo dokonya endakali mendeme baa anjala nayami.
Nyakama kapa pao namba pato dokonya naipatamina leamo doko
21 Baame deaka dokaita lamaiyoo, “Namba patopa nyakamame namba kutatamiaka doko, nyakamanya koo doko sepeta kumatami. Namba pato yuu dokonya kapa pao naipatamina,” lea.
22 Dokopa Juta dupame lao pituu, “ ‘Namba pato dokonya nyakama kapa pao naipatamina,’ lelyamo doko baame baa tange pyao kumasalanya lelya kanjemape?” leami.
23 Baame dokaita lamaiyoo, “Nyakama isa tange. Namba kisa tange. Namba yuu dakenya endakali mende daa. Nyakama yuu dakenya endakali.
24 Tenge dokonya nambame nyakamanya koo doko sepeta kumatamina lao langyo. Nyakamame namba akali dokona lao masoo minala nayatamino kandao doko, nyakama nyakamanya koo doko sepeta kumatamina,” lea.
25 Dupame baa lamaiyoo, “Emba apipi?” leami. Jisasame dokaita lamaiyoo, “Namba nambana lao nyakama tee pyao langio doko.
26 Dopana, nambame nyakama kandao pii longo lao yapato silyamo. Dopaka doko, namba puu leamo dokome kiningi pii leamopa sio dupaka nambame yuunya endakali dupa lamaingina,” lea.
27 Baame Takange lao leamopa dupame nasiami.
28 Dokopa Jisasame dokaita lamaiyoo, “Nyakamame Endakalinya Ikiningi doko minalyetamino dokopa nyakamame namba akali doko lamo lao kandatami. Dee nambame pilyo dupa namba tangeme masoo napii lamo lao kandatami. Nambame pii lenge dupa nambanya Takangeme mana langiamoli pyoo lenge.
29 Dee namba puu leamo doko nambapa tole katenge. Baame namba iki kalyale lao yakinala naenge. Doko, nambame koteaka lao baame masilyamoli pyoo pingina,” lea.
30 Baame dopa leamopa endakali longome baa lao masoo miniami.
Akali kendemanepi meepinya leamo doko
31 Dokopa Jisasame Juta endakali baa lao masoo minateamino dupa lamaiyoo, “Nyakama nambanya pii dokonya ketae katatamino kandao doko, nyakama nambanya disaipele angi joo katatami.
32 Nyakamame kiningi pii doko masetaminopa kiningi pii dokome nyakama mokao nyetana,” lea.
33 Dokaitame yanu pyao, “Naima Apotakame puunya mandipae kalyamanona, paa mendaipi mende naima mendenya kendemane pyoo anjetae nakatengena, aipa pyoo embame naima mokao nyetana leepe?” leami.
34 Jisasame yanu pyao, “Nambame nyakama etete kiningi langilyona, koo pingi endakali doko pitaka koonya kendemane.
35 Kendemane doko baanya akali andake dokonya palu joo etete nakatenge. Ikiningi doko baanya palu dupa-pipa etete katenge.
36 Dopana, Ikiningi dokome nyakama mokao nyetamo kandao doko, nyakama etete mokao nyepae katatami.
37 Nambame nyakama Apotakame puunya mandipaena lao masilyoaka doko, nambanya pii doko nyakama-kisa nasipya dokome nyakamame namba pyalanya pilyamino.
38 Nambame nambanya Takangepa tole katao pituu kandeo dupa lelyo. Dopaka doko, nyakamame nyakamanya takangenya mana siami dupa minilyamino,” lea.
39 Dupame yanu pyao, “Naimanya takange doko Apotakamena,” leami. Dopa leaminopa Jisasame dokaita lamaiyoo, “Nyakama Apotakamenya mandipae pili kandao doko, Apotakameme piamoli pipimili.
40 Dopaka doko, nambame Gote-kisa pii nyio dupa kiningi nyakama langipu dokopa indupa nyakamame namba pyalanya pilyamino. Apotakameme dopa napia.
41 Nyakamame nyakamanya takangenya mana dupa watao minilyaminona,” lea. Dupame yanu pyao, “Naima kepo pyoo mandipaepi mende nakalyamanona, naimanya takange mendai kalyamo doko Gotena,” leami.
42 Dokopa Jisasame dokaita lamaiyoo, “Gote nyakamanya takange pili kandao doko, nyakamame namba auu kayapimili. Doko, namba Takangepa tole katao ipao kalyo. Baame puu leamopa epeona, namba tangeme masoo naepeo.
43 Aipuma nyakamame nambanya pii lelyo doko masala naelyamipi? Nyakamame nambanya pii doko kapa pao nasepengema dokome masala naelyamino.
44 Nyakamanya takange doko Satane. Nyakamame nyakamanya takange dokome auu kaengeli pyoo pipuma laka lao masilyamino. Baa endakali pyao kumasingi akali mende wamba tee piamo dokopa katea. Baame kiningi pii doko lao nakatenge. Doko, baame kiningi pii lenge mana doko minala naenge. Baame sambo pii lelyamo doko baanya monanya palelya doko lenge. Baa sambo lenge akali. Baa sambo piinya tenge.
45 Dopaka doko, nambame kiningi pii langipupa nyakamame namba lao masoo minala naelyamino.
46 Nyakamanya akali apimi namba-kisa koo seta mende lao panasetamipi? Nambame kiningi pii langito kandao doko, aipuma nyakamame namba lao masoo minala naelyamipi?
47 Gotenya mandipae dokome Gotenya pii singina, nyakama Gotenya mandipae daa dokomena, baanya pii nasilyaminona,” Jisasame lea.
Jisasapa Apotakamepa
48 Juta dupame Jisasanya pii yanu pyao, “Naimame emba kandao emba akali Samatia mendena, dee emba-kisa enjele koo mende palelyamona lelyamano doko kopeta lelyamape?” leami.
49 Jisasame yanu pyao, “Namba-kisa enjele koo mende napalelyamo, daa. Dopaka doko, nambame nambanya Takange lao tama pipupa nyakamame namba lao tama pyaa naelyamino.
50 Nambame namba tange lalyalanya pyoo nakalyo. Mendeme namba yapao nyepala lalyalanya pilyamo.
51 Nambame nyakama etete kiningi langilyona, endakali mendeme nambanya pii doko watao minatamo kandao doko, baa tendapi kumala nayatana,” lea.
52 Dopa leamopa Juta dupame baa lamaiyoo, “Indupa naimame emba-kisa enjele koo mende palelyame lamo lao kandelyamano. Apotakame kumata potopesa dupa kumata piamina, dee embame lao pituu, ‘Endakali mendeme nambanya pii doko watao minatamo kandao doko, tendapi kumala nayatana,’ leeno.
53 Dopa leeno doko embame naimanya yumbange Apotakame ita minao kalyepe? Apotakame kumata dee potopesa dupa kumata piamina embame emba tange apina lao masoo leepe?” leami.
54 Dopa leaminopa Jisasame yanu pyao, “Nambame namba tange lalyoto doko angi mende nanjeta. Nambanya Takange nyakamame nyakamanya Gotena lengema dokome namba lalyingi.
55 Nyakamame baa nakandengemaka doko, nambame baa kandenge. Nambame baa nakandengena lapuli kandao doko, namba sambo lenge nyakama yale joo katapuli. Dopaka doko, nambame baa kandatala baanya pii doko watao miningi.
56 Nyakamanya yumbange Apotakameme namba ipatena lapae doko sepala baa mona yapepao auu kayana,” Jisasame lea.
57 Dopa leamopa Juta dupame baa lamaiyoo, “Embanya ee kana kingi ita yuungi patala naelyamo doko, embame aipa petala Apotakame kandeepe?” leami.
58 Jisasame dokaita lamaiyoo, “Nambame nyakama etete kiningi langilyona, Apotakame manja naengesa namba kateo doko kalyona,” lea.
59 Dopa leamosa dupame baa pyalanya kana nyiami. Dopa piaminopa Jisasa baa losuu anda andake kame doko yakinatala kamanda kolao pea.