9
Akali lenge monda mende
1 Jisasa baa kaitini pao pituu, endangimi akali lenge monda mandea mende kandea.
2 Jisasanya disaipele dupame baa pisoo, “Mana Lenge Akali, apimi koo piamosa akali dake wamba endangimi lenge monda mandeape? Baa tangepe, pande baanya endangi takangepa dolapome koo piambinosape?” leami.
3 Jisasame dokaitanya pii yanu pyakamaiyoo, “Akali dakenya koo piapi dee endangi takangepanya koo piambipi tenge dokonya daana, Goteme baanya kalai dupa akali dake-kisa panasetamopa lao pia.
4 Namba puu leamo dokonya kalai dupa kotaka gii dakepaka naimame pyakamaipenge. Yuu kuala ipatamopa endakali mendeme kapa pao kalai napipenge.
5 Namba isa yuu dakenya katapu dokopa yuunya tii pipae joo kalyona,” lea.
6 Dopa latala yuunya sopakali talyia. Dopa petala yuupa sopakalipa pyasoo minao mandau minatala akali dokonya lengenya katakamaiya.
7 Dopa petala Jisasame akali doko lamaiyoo, “Embame endaki pete Silome dokonya wasawasa pyala puuna,” lea. (Kenge Silome doko kapilyoo pena latae lapenge.) Baa wasawasa pyala pea. Wasawasa pyatala pilyoo epeamopa, baanya lenge dolapo auu pyoo tea.
8 Dokopa akali dokonya anda makisa katengepi dee muni akipi tee lao petelyamopa kandengepi dupame lao pituu, “Akali dake muni akipi tee lao petenge doko daa laa kanjemape?” leami-pyaa.
9 Dopa leaminopa endakali mendapuame lao pituu, “Kini, dokona,” leami-pyaa. Yangi mendapuame lao pituu, “Daa, akali dake mendai dopaleaka lamona,” leami-pyaa. Dokopa akali doko tangeme, “Namba dokokana,” lea-pyaa.
10 Dopa leamopa endakali dokaitame baa lamaiyoo, “Embanya lenge dolapo aipa petala auu pyaape?” leami-pyaa.
11 Dokopa akali dokome dokaitanya pii yanu pyakamaiyoo, “Akali Jisasa lenge dokome yuu mendatupa mandau minatala nambanya lengenya katatakala baame namba langyoo, ‘Endaki pete Silome dokonya wasawasa pyala puu,” laamo. Dokopa namba pao wasawasa pyapupa namba lenge talona,” lea-pyaa.
12 Dopa leamopa dokaitame baa lamaiyoo, “Akali doko anja kalyape?” leami-pyaa. Dopa leaminopa baame, “Namba masala naelyona,” lea-pyaa.
Patasi dupame aipa petala pyaape lao kutao kayamino doko
13 Akali wamba lenge monda doko Patasi dupame kandena lao laminao peami-pyaa.
14 Jisasame yuu mendatupa mandau minatala akali dokonya lenge auu pyakamaiyamo gii doko Sambasa mendenya pia.
15 Dokopa Patasi dupame apata baa pisoo, “Embanya lenge aipa petala talepe?” leami-pyaa. Dokopa baame dokaitanya pii yanu pyakamaiyoo, “Baame yuu mendatupa mandau minatala nambanya lengenya katatakamopa, nambame wasawasa pyanya nepatapu dokopa namba lenge talona,” lea-pyaa.
16 Dopa leamopa Patasi yangi dupame lao pituu, “Doko baame Sambasanya mana setapae doko watao naminalumuna, akali doko Goteme epena laa naya lumuna,” leami-pyaa. Dokopa akali yangi mendapuame lao pituu, “Akali koo pingi mendeme kapa pao kongali tata opale pipyalipi?” leami-pyaa. Dopa lalya lana petala endakali dupa wakale pyoloo piami-pyaa.
17 Dopa petala Patasi dokaitame akali lenge monda doko deaka pisoo, “Baame embanya lenge tasakalamo dokonya embame baa kandao aipa leepe?” leami-pyaa. Dokopa baame lao pituu, “Baa potopesa mendena,” lea-pyaa.
18 Akali wamba lenge monda katenge indupa dee lenge teamo doko Juta dupame masala naenya, baanya endangi takangepa dolapo epena leami-pyaa.
19 Endangi takangepa dolapo ipateambino dokopa dokaitame dolapo pisoo, “Nyalambonya ikiningi dake wamba lenge monda jetae mandeambana lalambino dokope? Doko, indupa aipa petala lenge telyape?” leami-pyaa.
20 Dokopa endangi takangepa dolapome yanu pyao, “Baa nalimbanya wane lenge monda jetae mandeambano doko masilyambano.
21 Dopaka doko, baanya lenge dolapo aipa petala talape dee apimi lenge tasalape ongo nalimba masala naelyambanona, nyakamame baa pisalapa. Baa akali angina, tangeme laapomona,” leambi-pyaa.
22 Endangi takangepa dolapome pii dutupa leambino doko, Juta dupa paka kayapala leambi-pyaa. Endakali mendeme Jisasa doko Kataisana lao lao panatamo doko Juta dupame nyakamanya losuu anda dokonya watao pyatamana lanya seteami.
23 Tenge dokonya minao, endangi takangepa dolapome, “Baa akali angina, nyakamame baa pisalapa,” leambi-pyaa.
24 Dee lapo pyoo dokaitame wamba lenge monda kateamo akali doko epena latala lamaiyoo, “Embame Gote lao lalyepe. Akali doko koo pingi naimame kandengena,” leami-pyaa.
25 Baame dokaitanya pii yanu pyakamaiyoo, “Baa koo pingipi napingipi namba masala naelyona, mendai mende iki masilyo doko, wamba namba lenge monda kateo doko, indupa dee lenge telyo doko iki masilyona,” lea-pyaa.
26 Dokopa dokaitame baa pisoo, “Baame emba aipa pyaape? Baame aipa petala emba lenge tasalape?” leami-pyaa.
27 Dokopa baame dokaitanya pii yanu pyakamaiyoo, “Wamba nambame nyakama langitalo doko, nasepala aipuma nyakamame deaka sowani kaelyamipi? Nyakama apata baanya disaipele jowani kaelyamipi?” lea-pyaa.
28 Dokopa dokaitame pii koo lao yanu pyao, “Emba baanya disaipele. Dopaka doko, naima Mosesenya disaipele.
29 Goteme Mosese pii lamaiyamo dupa naimame masilyamano. Dopaka doko, akali dake anja tangepe naima masala naelyamanona,” leami-pyaa.
30 Baame yanu pyao dokaita lamaiyoo, “Baame nambanya lenge tasakalamoaka doko, nyakamame baa anja tangepe lao masala naelyamino dokonya nambanya mona andelyamo.
31 Goteme endakali koo pingi dupanya pii nasakamaingi. Dopaka doko, Gote minao katao baanya masingili pingi endakali dupanya baame pii sakamaingi doko naimame masilyamano.
32 Wamba wambapi akali mende endangimi lenge monda jetae mandelyamo doko dee akali mendeme lenge tasiana lapae pii mende nasilyamo.
33 Goteme akali dake epena naleali kandao doko, baame kapa pao opale mende napipyalina,” lea-pyaa.
34 Dokaitame yanu pyao baa lamaiyoo, “Emba koo sepeta mandipae etete koo dokome naima mana leepe?” latala baa Jutamanya losuu anda dokonya watao piami-pyaa.
Masoo minala naenge endakali dupa monanya lenge mondana leamo doko
35 Jisasame akali doko watao pyalamino lapae doko sia. Sepala baame akali doko kutao pupala baa lamaiyoo, “Embame Endakalinya Ikiningi doko lao masoo minilipi?” lea.
36 Baame Jisasanya pii yanu pyakamaiyoo, “Akali Andake, Endakalinya Ikiningi doko apipi? Embame langitinopa, nambame masoo minatoana,” lea.
37 Dokopa Jisasame baa lamaiyoo, “Embame baa kandatalenona, epapu pii lao kalyambino dake baana,” lea.
38 Akali dokome lao pituu, “Kamongo, nambame masoo minilyona,” lea. Dopa latala baame luma lakapala Jisasa lao tama pia.
39 Dokopa Jisasame lao pituu, “Namba isa yuu dakenya epeo doko, endakali lenge monda dupa lenge tena lao lenge tengema dupa monda jina lao yapalanya epeona,” lea.
40 Jisasame dopa leamopa Patasi mendapua baa-pipa kateamino dupame sepala baa lamaiyoo, “Naima apataka lenge mondape?” leami.
41 Dokopa Jisasame dokaita lamaiyoo, “Nyakama lenge monda pyali kandao doko, nyakama-kisa koo mende nasipyali. Dopaka doko, nyakama lenge telyamanona lalamino dokome nyakamanya koo dupa mee silyamona,” lea.