12
Jisasame sambo mana dupa kandao wandyuu kalyepape leamo doko
(Mt 10:26-27)
1 Endakali taosene longo dupa tuu tuu lao epeami-pyaa. Dokopa endakali dupame yango mende panda maipenge nanjoo endakali mendenya moko angoo lakakamaipenge jia-pyaa. Gii dokopa Jisasame wambao baanya disaipele dutupa dapa lamaiya-pyaa: “Nyakame Patasi dupanya sambo mana iisa jepae doko kandao isoo kalyepape. Sambo epe jili pyoo paenge mana doko betesa andasingi iisa dopale lamo.
2 Naima pitaka-kisa tenge yalo petae silyamo dupa tanga panata. Mana sanga pyatae silyamo dupa pitaka tanga lopalyeta.
3 Nyakamame kuka iminjetaenya pii yalo pyoo lelyamino dupa pitaka kotaka niki tatamopa endakali pitakame setami. Dee nyakamame andakote pituu pii kakate lao lelyamino dupa tanga endakalimi puu lao wii lenge dopale joo endakali pitaka-kisa tayatana,” lea-pyaa.
Api kandao paka kayapengepe
(Mt 10:28-31)
4 “Nambanya mona setenge paluma! Endakali mendapuame nyakama pyao kumasetaminopa nyakamame dokaita paka nakayalapape! Dokaitame nyakama pyapala mendita mende waipa soo kapa napitamina lao nambame nyakama langilyo.
5 Dopana, nyakamame paka kayapenge tenge angi doko nambame nyakama panao langitoo: Gote baa paka kayalapape! Baame endakali dupa pyao kumasetala yuu koo dokonya kapa pao soo pyandatana, nyakamame baa lao paka kayalapape lao kiningi langilyo.
6 “Endakali mendapuame muni toya lapomame yaka pimbinakae yuungi kapa pao sambengemaka doko, Goteme yaka yakane dutupanya mendaipi mende kame sala naenge.
7 Dee baame nyakamanya iti apata itaki pyatelyamona paka nakayalapape! Nyakamame yaka longo dupa ita minao alyasale joo kalyaminona,” lea-pyaa.
Namba Kataisanyana lao endakali dupa-kisa lao panenge doko
(Mt 10:32-33; 12:32; 10:19-20)
8 “Endakali mendeme, ‘Namba Kataisanyana,’ lao endakali dupa-kisa lao panatamo kandao doko, Endakalinya Ikiningi dokome Gotenya enjele dupa-kisa endakali doko, ‘Nambanyana,’ lao lao panasetaka.
9 Dopaka doko, endakali mendeme namba kandao endakali dupa-kisa, ‘Baa nambanya daana,’ latamo kandao doko, Endakalinya Ikiningi dokome Gotenya enjele dupa-kisa, ‘Baa nambanya daana,’ latakana lao nambame nyakama langilyona,” lea-pyaa.
10 “Endakali mendeme Endakalinya Ikiningi doko daa latamo kandao doko, Goteme baanya koo doko kunanya nepakamaita. Dee endakali mendeme Oli Sipitisa doko kandao lamba latamo kandao doko, Goteme baanya koo doko kunanya nepakamaiya nayata.
11 “Endakali dupame nyakama kosimi laanya laminao nyakamanya losuu andapi, kapomanenya kanjole limbingipi, isingi akalipi dupanya pataminopa, nyakamame pii aipa lao yanu pyamanape aki pii mende lamanape lao nea nakayalapape!
12 Oli Sipitisa dokome pii lapenge dupa gii dokopaka nyakama ditana,” lea-pyaa.
Oapi longo setenge mona napalenge akali mendenya lao kongali doko
13 Endakali longo kambu pyao peteamino dupanya akali mendeme Jisasa lamaiyoo, “Mana Lenge Akali, embame nambanya kaiminingi doko lamaiyoo, ‘Nalimbanya takangenya moya dupa baame mokosetala yangi namba dina,’ lamaiyakape,” lea-pyaa.
14 Dokopa Jisasame baa lamaiyoo, “Doko aipuma lee? Apimi namba nyalambonya pii tolasoo oapi mokosingi akali joo kata leape?” lea-pyaa.
15 Dopa latala baame dokaita lamaiyoo, “Endakali mendenya oapi longo setenge dupame baa auu pyoo katena lao nisala naenge dokonya nyakamame oapi putiti kaenge dupanya mendeme koyasetana kandao wandyuu kalyepape,” lea-pyaa.
16 Dopa latala baame kongali pii mende dokaita dapa lao lamaiya-pyaa: “Wamba oapi longo setenge akali mende kateamo dokonya ee dokonya nee longo andea-pyaa.
17 Andeamopa baanya moname dapa lao masia-pyaa: ‘Nambanya nee dupa nyoo setapenge panda nasilyamo doko aipa pito laape?’ lao masowaka katea-pyaa.
18 Dopa lao masetala, ‘Nambame dapa pitoo: indupa nambame nambanya nee setenge anda dupa lakyepala dee andake pyoo petapeta pitoo. Dopa petala nambanya wiisa dupa pitakapi oapi epe dupapi anda dutupanya nyoo setatona,’ lao masia-pyaa.
19 Dopa lao masetala baame baa tange lamaiyoo, ‘Nambanya oapi epe longo dupa ee kana longo dupa-pipa kapa lao silyamo. Namba mee koto katapapu neepi endakipi dupa nao mona yaepao katatoana,’ lea-pyaa.
20 Oapi longo setenge akali dokome dopa leamoaka doko, Goteme baa lamaiyoo, ‘Emba akali mona napalenge lamo! Indupa kuka gii dakenya emba kapa pao kumalapeno. Dokopa oapi embanya nyoo limbateleno dupa pitaka apinya jetape?’ lea-pyaa.
21 Dee nyakamame oapi longo nyoo tangenyaka limbao katao Gotenyana lao epe dupa setakamaiya nayataminopa, makande dopale dupa nyakama-kisa kapa pao ipatana,” Jisasame lea-pyaa.
Moname longo masoo nea kaenge mana doko
(Mt 6:25-34)
22 Dokopa Jisasame baanya disaipele dutupa lamaiyoo, “Nyakamame nyakama tange auu pyoo katapenge dupanya lao masetala, ‘Naima nee aki nao katatama laa kanjemape?’ dee ‘Yonge yati akimi pitamape?’ lao nea kayala nayalapape!
23 Endakali auu pyoo katenge tenge doko neepi, endakipi, yonge yati pingipi dupa mambele daa!
24 Nyakamame yaka wayamu dupa masalapape. Dupame ee pokala naengema. Dupame nee mandyuu ipao nee setenge anda andakepi yakanepi mendenya mau pyala naengemaka doko, Goteme dupa nee maingina, nyakamame yaka dupa etete ita minao kalyamino.
25 Nyakamanya endakali mendeme baa gii longo lao katapu laka lao nea kayapala baa tangeme baanya katapenge gii dupanya ee kana mendapua waipa setape?
26 Nyakamame gii mendatupa apata kalyanya gii etete kukipi mende waipa sala nayapenge tamo kandao doko, aipuma opale waka dupa nea kaelyamipi?” lea-pyaa.
27 “Nyakamame mee tanu dupanya dii yati pipae dupa masalapape. Dupame elyoko ita pyao nuu yambalepi mende napingimaka doko, wamba akali Solomoneme baa tangenya yati tata dupa pitaka petala tanu dupanya dii yati pipae epe dopale mendeme yati pyoo nakateana lao nyakama langilyo.
28 Mee tanu dupa indupa iki katapelyamopa taita pokanya setapala itateme tata yangengemaka doko, Goteme tanu dopale dupa dii yati pipaeme yati pisingi! Dokaita joo baame nyakama yonge yati pingi dupa etete auu pyoo dingina, nyakama kuki iki masoo miningima lamo!
29 Dopana, nyakama nee aki natamape, endaki aki natamape lao masetala nea nea kayao makandala nayalapape.
30 Isa yuu dakenya kamalya katenge endakali dupame dopale dupa iki lao masetala nea kayao putiti kaelyamino. Dopaka doko, nyakama daa jilyamo dupa nyakamanya Takange dokome masoo kalyamo.
31 Dopana, Goteme isina lao katapenge doko nyakamame kutao nyalapape! Dopa pitaminopa baame oapi dupa nyakama ditakana,” Jisasame lea-pyaa.
Epe dupa kaitinya setenge mana doko
(Mt 6:19-21)
32 “Nyakama tata yakane dupa! Nyakamanya Takange dokome nyakamanya Kamongo Kiŋi katatona lao mona mendai palyetelyamona, paka nakayalapape.
33 Nyakamanya oapi dupame muni sambao nyepala, muni dupa endakali tipya dupa nisoo maiyepape. Nyakamanya muni setapenge pausa yapa lapyoo koyala naenge mende kutao nyalapape. Nyakamanya muni angi dupa alu napitana kaitinya setalapape. Kaitinya setapae dupa pake nenge endakali dupame pake nyala nayapenge. Dee kokalyapi opale mendeme nao koyasala naengeaka.
34 Nyakamanya oapi epe dupa setenge panda dokonyaka nyakamanya mona yukuoo setengema daape!” Jisasame lea-pyaa.
Kendemane akali dupa depa lao katenge mana doko
35 “Nyakamame nyakamanya yambale dupa lakao matapunya muu pyoo mandyuu lama kaiyepala titili petae pilyepape.
36 Nyakamame kendemane endakali dupanya kamongo dokome enda kelyatamo dokonya nee nao pituu ipapomona lao malisoo petengemali pyoo pilyepape. Baa ipupala kaita watawata pitamo dokopa kendemane dokaitame yapa kaita lumbamana lao malisoo petengema.
37 Kamongo doko ipupala kendemane depa latae pititamino dupa kandatamopa dokaitame mona yaepao pititami. Kiningi nambame nyakama langilyo. Kamongo dokome yambale lakao matapunya muu pyoo mandipala dokaita nee nao tokonya petena latala baa tangeme ipao nee setakamaita.
38 Baa kuka andatombe tamopi yuu yongalanya yaka pauli pii tee pyao latamopa tamopi mende ipupala kandatamopa kendemane dupa luu palya nayatamino kandao doko, mona yaepao pititamina,” lea-pyaa.
39 “Dee nyakamame dake masalapape: akali anda tange dokome pake nenge akali mende gii ongopa ipapomo lao wambao masetali kandao doko, baame pake nenge akali dokome anda kalupala andaka kolandena lao kayala nayatali.
40 Dopaka pyoo Endakalinya Ikiningi doko naipapomo lao masetami gii mendenyaka ipatana, nyakama depa latae kalyepape!” lea-pyaa.
Kendemane koopa epepanya lao pii doko
(Mt 24:45-51)
41 Dokopa Pitame baa lamaiyoo, “Kamongo, embame kongali pii doko naima iki kandao leepe, pande endakali pitaka kandao leepe?” lea-pyaa.
42 Dopa leamopa Kamongo dokome lao pituu, “Lelyamoli pyoo kalai pyakamaingi mona palenge kendemane doko apipi? Baa kamongo dokome baanya kendemane waka dupa isoo nee napenge gii dii lao mokosoo maiyoo katena lenge kendemane doko daape.
43 Baame kalai auu pyoaka pyoo katatamopa baanya kamongo doko andaka pilyoo ipatamopa, baa mona yaepata.
44 Nambame nyakama kiningi langilyo, kamongo dokome baanya oapi dupa pitaka baanya kendemane dokome isoo katena lata.
45-46 Dopaka doko, kendemane dokome nambanya kamongo doko yapa naipapomona lao masetala, awapa kalai pingi kendemane enda akalipi dupa pyapapu neepi waenepi dupa longo nao kyakao katatamo kandao doko, baanya kamongo doko naipapomo lao masoo ambe lao katatamo gii dokopaka ipata. Ipupala baame kendemane doko etete pyao indyepala pii tanga lenge endakali dupa-pipa kalya pena latana,” Jisasame lea-pyaa.
47 “Kendemane mendeme baanya kamongo dokome mende pipyali lao masetamo doko kandatala, watao naminao baa tangepi kalaipi dupa depa laa nayatamopa kamongo dokome baa longo lao konjame pyata.
48 Dopaka doko, kendemane mendeme baanya kamongo dokome mende pipyalina lao masetamo doko nakandao mana koo minatala kenda pipae nyepenge jetamoaka doko, isingi dokome baa konjame kuki pyata. Endakali mendeme oapi epepi mana epepi longo lao endakali mende-kisa nyepala tange longo lawaka yanu pyakamaingi. Dee endakali mendeme oapi mendapua endakali mende-kisa longo setapala mendapua apata konda pyoo yanu pyekena lengena,” Jisasame lea-pyaa.
Endakali wakale pyoloo pingi tenge doko Jisasa
(Mt 10:34-36)
49 “Nambame isa yuu dake tena lao ita lelya pyaanya palyala epeona yapa tapapya laka lao masilyo.
50 Nambanya kaimbu mende pyakapenge doko pyakatamino gii dokonya tuu lao mona kenda kayao kalyo.
51 Nambame endakali dupa pitaka mona mendai paliuu katena lao epe yuu yongasala epeepe lao masilyamipi? Daa, nambame endakali dupa tale pisala epeona lao nyakama langilyo.
52 Indupapi tendapi anda mendenya endakali yuungi palitamino dupa wakale pyoloo petala tepomame lapoma dolapo kandao yandapipi jetami. Dee lapomame tepoma dutupa kandao yandapipi jetambiaka.
53 Ikiningi takangepa wakale pyoloo pitambi. Endangi wanengepa wakale pyoloo pitambi. Dee ayangepa wakale pyoloo pitambiakana,” Jisasame lea-pyaa.
Mendita mende pyaanya pilyamopa masingi mana doko
(Mt 16:2-3)
54 Baame endakali dupa dapa lamaiyaka-pyaa: “Nyakamame niki landa pingisa-kaita kopa silyamo kanju petala gii dokopaka aiyuu ipame lamona lengema. Kini, dopaka pyoo aiyuu epenge.
55 Nyakamame poo pupu lapae mende mendakaita-kaita lao epelyamopa, kandatala indupa paina pyapome lamona lengema. Dokopa kiningi paina pingi daape!
56 Nyakama sambo mana miningi akali dupame yuunya makandepi kaitinya makandepi dupa kandatala yapengemaka doko, aipuma indupa gii dakepa makande silyamo dake masokondape napilyamipi?” lea-pyaa.
Kosimi laanya pilyamo akali dokopa pii lao tolenge doko
(Mt 5:25-26)
57 “Aipuma nyakama tangeme masokondape napyoo mana tolatae doko yapao nyala naelyamipi?
58 Akali mendeme emba kosimi laanya pitamopa nyilyambo katinisa patambino gii dokopaka baa-pipa pii doko lao tolasalapape. Aopyoo latala baame emba laminao pao pii tolasingi akali jasa doko maitamopa akali dokome emba yanda singi doko maita. Maitamopa yanda singi dokome emba anjingi anda dokonya pyandata.
59 Dopa pitamopa emba dokonya anjetayaka paliuu saandi andakepi yakanepi dupa pitaka yanu pyao etatena lao nambame emba kiningi langilyona,” Jisasame lea-pyaa.