13
Endakali mona kapilyala naenge dupa alu pitamina leamo doko
1 Gii dokopaka akali kateamino dupanya mendapuame atome pii mende Jisasa lamaiyoo, “Wamba Galili tange mendapuame Gote lao kundi maiyoo kateaminopa akali Pailateme dokaita pyao kumasiana,” leami-pyaa.
2 Dokopa Jisasame dokaita lamaiyoo, “Nyakamame Galili tange dutupanya koo pingi dokome Galili tange waka dupanya koo pingi doko ita miniamosa tenge dokonya kenda pipae doko dokaita-kisa epeana lao masilyamipi?
3 Dokonya etete daana lao nambame nyakama langilyo. Dee nyakama pitaka mona kapilyala nayatamino kandao doko, dopaka pyoo alu pitamiaka.
4 Wamba endaki Silomenya pete sina lao kana anda londe ketae pyoo petae mende takyepala endakali kingi itaka-kisa dee tukulapo piamo dokonya tenge doko endakali dutupanya koo pingi mana dokome Jetusaleme tange waka dupa pitakanya koo pingi mana doko ita miniamosa dokonya piana lao masilyamipi?
5 Dokonya etete daana lao nambame nyakama langilyo. Dee nyakama pitaka mona kapilyala nayatamino kandao doko, dopaka pyoo alu pitamina,” Jisasame lea-pyaa.
Piki ita dii namandenge dokonya lao kongali pii doko
6 Dokopa Jisasame kongali pii mende dapa lea-pyaa: “Akali mendeme baanya getepe ee dokonya piki ita mende pokeamo dokome maitakao dii mandyuu pilyamona lao kanja epeamoaka doko, dii namandea-pyaa.
7 Dokopa baame baanya ee pokakamaingi akali doko lamaiyoo, ‘Kanau! Nambame ee kana tepoma dutupanya piki ita dakenya dii lyao nyalanya epewaka doko dii manja naelyamo doko, aipuma ita dakeme mee ee yuu lyakama pyao katatape? Embame pokanya nepape!’ lea-pyaa.
8 Dopa leamopa ee pokakamaingi akali dokome baanya pii yanu pyao, ‘Akali Andake, embame ee kana mendai ange apata malisa! Dokopa nambame ita tenge dokonya amapapu kunguma mandyuu setato.
9 Dopa pitopa kapa pao dii mandelyape lao kandatamba. Namanditamo kandao doko, embame pokanya nepatena,’ lea-pyaana,” Jisasame lea-pyaa.
Sambasa mendenya Jisasame enda mende tolasiamo doko
10 Sambasa gii mendenya Jisasame Jutamanya losuu anda mendenya katao endakali dupa mana lamaiya-pyaa.
11 Dokopa enda enjele koo paleta mende dokonya petea-pyaa. Enjele koo dokome enda doko yaina maiyamo dokonya pituu ee kana kingi ita-kisa dee tukulapo jia-pyaa. Dopa piamopa enda dokonya maita doko pongao sai pimbilyamosa baa kapa pao too katapenge etete nanjingi-pyaa.
12 Dopa petae enda doko Jisasame kandatala epena lea-pyaa. Ipateamopa baame enda doko lamaiyoo, “Enda, embanya yaina doko mee jekelyamona,” lea-pyaa.
13 Dopa latala baame enda doko-kisa kingi setapeamopa enda doko pupae lao tolao katea-pyaa. Dopa petala enda dokome Gote lao lalyia-pyaa.
14 Dopa piamoaka doko, losuu anda isingi akali dokome Sambasa dokonya Jisasame enda doko auu pisilyamona lao mona koo palyia-pyaa. Dopa petala baame endakali dupa lamaiyoo, “Yuu gii tokange dutupanya iki naimanya kalai pipenge silyamona, nyakamame nyakamanya yaina mende auu pyekena lao masiami kandeno doko, kalai gii dupanya ipupape. Sambasa dokonya dapa pyoo naipupape!” lea-pyaa.
15 Dopa leamopa Kamongo dokome baanya pii yanu pyakamaiyoo, “Nyakamame endakali enombanya sambo epe jili lao paelyamino! Sambasa dupanya nyakama pitakame nyakamanya mena pulumakao anda dupanya pupala mena pulumakawapi mena dongipi dupa liangao minao endaki nena lao napengemape?
16 Kini, pengemaka doko, enda dake Apotakame wanenge mende Sataneme baa ee kana kingi ita-kisa dee tukulapo dupa yaina dokome anjinya palyiamo doko Sambasa giinya mokala nayapengena lao masilyamipi?” lea-pyaa.
17 Dopa leamopa sepala baa kandao yandapipi jingima akali losuu andaka awapa peteamino dupa pitaka elya kayami-pyaa. Gii dokopaka endakali waka awapa peteamino dupa pitakame kalai angi Jisasame piamo dupa kandatala mona yaepeami-pyaa.
Masete diipa betesa andasingi iisapanya lao kongali pii doko
(Mt 13:31-33; Mk 4:30-32)
18 Dokopa Jisasame dapa lea-pyaa: “Gotenya isingi doko aki yalepe? Nambame aki mendepa makande pyuape?
19 Doko masetewaingi dopale lamo. Endakali mendeme masete waingi mende nyepala baanya ee dokonya lyandea-pyaa. Maitakao masete dupa andao ita jiamopa wangya dupanya yaka dupame ipao anda piami-pyaana,” Jisasame lea-pyaa.
20 Dopa latala baame lao pituu, “Nambame Gotenya isingi doko dee aki mendepa makande pyuape?
21 Doko enda mendeme iisa mendalapo nyoo palawa longo-pipa kapilya mina-mina pilyamopa, iisa dokome palawa doko pitakanya tayapala andasingi dopalena,” lea-pyaa.
Anda kambu tambukinatae doko
(Mt 7:13-14,21-23)
22 Jisasame Jetusaleme paanya pao pituu yuu taono andakepi yakanepi dupanya endakali dupa mana lamaita pyoo pea-pyaa.
23 Dokopa akali mendeme baa pisoo pituu, “Kamongo, tenda Goteme endakali kuki iki pyoo nyeta laape?” lea-pyaa. Dokopa Jisasame endakali dokaita dapa lamaiya-pyaa.
24 “Endakali longo dupame anda kambu tambukinatae dokonya kolandalanya makande pitaminoaka doko, kapa napata. Dopana, nyakamame puu lao makande pyoo kolandao kanjepape langilyo.
25 “Dee akali anda tange dokome sakatatala wambao kaita pai latatamopa nyakama ipao kamaka katapala anda kaita doko watawata pyoo dapa latami: ‘Kamongo, embame naimanya kaita lumbaka!’ latami. Dopa lataminopa baame nyakamanya pii yanu pyao, ‘Nyakama anja tangepe lao masala naelyona,’ lata.
26 Dopa latatamopa nyakamame anda tange doko lamaiyoo, ‘Wamba naima emba-pipa neepi endakipi awapa naneamape? Embame naimanya yuu taono dupanya katao mana leeno doko akipi?’ latami.
27 Dopa lataminopa anda tange dokome nyakamanya pii doko yanu pyakao, ‘Nyakama anja tangepe lao nambame masala naelyo. Nyakama pitaka koo pingi endakali kalyaminona namba kalyosa naepenya pupa!’ anda tange dokome dopa latana,” lao Jisasame lea-pyaa.
28 Tenda Goteme nyakama watao pyatatamopa kamaka katao Apotakame Aisake Jekopepi dee potopesa dupa pitakapi Gotenya isingi panda dokonya katatamino kandatala nyakama ee lao yamataka lao nenge gilyoo katatami.
29 Gii dokopa endakali yuu yangi yangipi tange dupa Gotenya isingi panda dokonya pituu nee andake nao pititami.
30 Indupa maitasa kalyamino endakali dupa tenda enomba nyoo katatami. Dee indupa enomba nyoo kalyamino endakali dupa tenda maitasa katatamina,” Jisasame lea-pyaa.
Jisasame yuu taono Jetusaleme kandao mona kenda kayao pii leamo doko
(Mt 23:37-39)
31 Gii dokopaka Patasi mendapuame ipupala baa lamaiyoo, “Akali Etoteme emba pyalanya pilyamona, yuu ange yakinatala waka mendasa puu!” leami-pyaa.
32 Dopa leaminopa Jisasame dokaita lamaiyoo, “Nyakamame akali yana kapua joo waa katenge doko dapa lamaiyepape: ‘Indupa taitapa nambame enjele koo dupa watao pyao, yaina paleta dupa auu pisoo katapala gii tepo dokonya nambanya kalai doko pyoo etatona lelyamo,’ lao lamaiyepape.
33 Endakali dupame potopesa mende yuu waka dupanya pyao kumasala naenya, Jetusaleme dokonyaka pyao kumasepenge jipumosa nambame indupapi, taitapi, dumapi dutupanya kaitini pao katapenge jilyamona, patowana,” lea-pyaa.
34 Dopa latala Jisasame dapa lea-pyaa: “Kanau! Kanau! Jetusaleme tange! Nyakamame potopesa dupa pyao kumasoo dee Goteme epena latae akali dupa kaname pyao kumasoaka katengema. Gii longo paka nambame nyakama nyoo limbatala yaka matakaimi yakane dupa papa pundipundi yapu nengeli pitoo lao masoo kalyoaka doko, nyakamame tanga lelyamino.
35 Dokopa nambame nyakamanya anda doko yakinatekelyona, doko mee katakata. Indupa pituu nyakamame namba nakandao katao tenda ipatopa, ‘Akali epelyamo dake auu pisetaena, Kamongo Goteme epena lapumopa epelyamona,’ latamina lao kiningi langilyona!” Jisasame lea-pyaa.