14
Jisasame akali mendenya yonge andapae mende mee jakamaiyamo doko
1 Sambasa gii mendenya Jisasame Patasi dupanya isingi akali mendenya andaka nee nala epeamopa, Jisasame aipa pilyape lao akali dupame isokondape piami-pyaa.
2 Gii dokopaka akali yonge andao koyapae mende Jisasa peteamo tengesa dosa sia-pyaa.
3 Dokopa Jisasame mana setapae masingi akalipi Patasipi dupa pisoo, “Sambasa dupanya endakali yaina pyapae dupa mee injisemape, pande sina kayamape? Naimanya mana setapae dupanya aipa lapae silyape lea-pyaa.
4 Dopa leamopa dokaita nengekaita piti piaminopa Jisasame akali doko minatala mee injisetala baa pena lea-pyaa.
5 Pena latala Jisasame dokaita pisoo pituu, “Sambasa mendenya nyakamanya akali mendenya wane tamopi mena pulumakao tamopi mende endaki yuli tombapae mendenya pyakatamopa akali tange dokome pupae pyalya lao ketae nanyetape?” lea-pyaa.
6 Dokopa dokaitame pii doko kapa pao yanu napiami-pyaa.
Tange lalyala naengepi dee endakali nee nala epena lengepi mana dolapo
7 Patasi dokonya andaka nee nala epena leamo dupame panda enomba nyoo dupanyaka pitimana lao masiaminosa Jisasame kandatala kongali pii mende dokaita lamaiya-pyaa:
8-9 “Akali mendeme enda lanyepala watapae pyao nee andake yawata mendenya nee nala ipu lao wii latamopa embame panda enomba nyoo dupanya napitipi. Aopyoo latala akali andake emba ita minao mende apata wii latala baame laminao ipao pituu emba langyoo, ‘Emba pilyeno dosa akali dake petena panda mai!’ latamopa emba elya andake kayapala etete maita-kaita pao pititi.
10 Embame dopa napitina akali mendeme, ‘Nee nambana ipu,’ lao wii latamopa pee kandeno doko, emba pao etete maita-kaita joo pitipi. Embame dopa pitinopa akali emba wii latamo dokome ipupala emba langyoo, ‘Kaimia, emba tengesa dasa pitipoko,’ lata. Baame dopa latamopa endakali nee nao pitatamino dupa pitakanya enombasa embanya kenge andake seta.
11 Dokaita joo endakali mende baa tangeme alyasale joo katatamo doko, anasale joo katena lata. Dee endakali mende baa tangeme anasale joo katatamo doko, alyasale joo katena latana,” lea-pyaa.
12 Dopa latala Jisasame baa nee nala epena leamo akali doko lamaiyoo, “Aopyoo latala embanya kaita miningipi, kaiminingipi, emba tatapi, makisa katenge kamongopi dupanya nee mende yawatakamaitala nala epena lao pituu dokaitame nee itingi yawatala emba wii lao lanyepala yanu pyakatamina lao masoo wii laa nayape.
13 Embame nee andake mende yawatakamaitala dokopa endakali tipyapi, papa tambotaepi, moko koyapaepi, lenge mondapi dupame nala epena lao wii lape.
14 Dokaitame kapa pao embanya nee itingi yanu pyakala nayataminopa emba mona yaepao katate. Tenda Goteme endakali tolatae dupa malunya sakatasetamo gii dokopa baame yole angi doko emba ditana,” lea-pyaa.
Nee andake dokonya lao kongali pii doko
(Mt 22:1-10)
15 Akali mende nee dokonya awapa nao petea mendeme pii dutupa sepala Jisasa lamaiyoo, “Gotenya isingi panda dokonya katao nee nao katatamino endakali dupa mona yaepao katena,” lea-pyaa.
16 Dopa leamopa Jisasame baa lamaiyoo, “Gii mendepa akali mendeme nee andake mende endakali dupanya yawakamaitopa latala wambao nee natamino endakali longo dupa epena lea-pyaa.
17 Nee napenge gii doko epeamopa baanya kendemane mendeme endakali wamba epena lateamo dupa lamaiyakala pena lao pituu, ‘Embame dapa lape,’ lea-pyaa. ‘Dupa pitaka depa latae sepelyamona nee nala epena lamaipi,’ lea-pyaa.
18 Leamoli pyoo kendemane dokome pao endakali dokaita lamaitiamopa dokaita pitakame pii mendai dopaleaka lao, ‘Kapa napumana lumuna,’ leami-pyaa. Mendeme kendemane doko lamaiyoo, ‘Nambame yuu mende sambapuna doko kanja patoo, naipapo lumuna pipitana maka nakayape,’ lea-pyaa.
19 Dee mendeme baa lamaiyoo, ‘Nambame mena pulumakao kalai pipenge kingi ita mende sambapuna dutupame kalai pina lao makande pyaa patoo, naipapo lumuna pipitana maka nakayape,’ lea-pyaa.
20 Dee mendeme baa lamaiyoo, ‘Enda mende nambanya lanyipu dokome kapa naipapo lumuna,’ lea-pyaa.
21 “Dokopa kendemane dokome baanya kamongo doko lamaiya pea-pyaa. Lamaitiamopa anda tange dokome imbu kayapala kendemane doko lamaiyoo, ‘Embame alo pyao yuu taono dakenya kaitini andakepi yakanepi dupanya pupala endakali tipyapi, papa tambotaepi, lenge mondapi, moko koyapaepi dupa nambanya andaka laminao ipupi!’ lea-pyaa.
22 Dopa lateamopa kendemane dokome leamoli petala kamongo doko lamaiyoo, ‘Embame lapinoli petapupaka doko, andaka pitipenge panda mendapua mee silyamoakana,’ lea-pyaa.
23 “Dokopa kamongo dokome kendemane doko lamaiyoo, ‘Embame yuu taono dake yakinatala kaitini andakepi ee kame kilikilipi dupanya pupala endakali dupanya katatami dupa nambanya anda dake tumbinalena longo lao laminao ipupi!
24 Wamba epena lateo akali dutupanya mendaipi mendeme nee depa lakamaiyo dakenya naa nasetana lao nambame nyakama langilyo,’ lea-pyaana,” lao Jisasame lea-pyaa.
Endakalimi Jisasa watao minalanya mendapua yakinapenge dupa
(Mt 10:37-38)
25-26 Endakali longo dupa Jisasa baa-pipa awapa pao pituu, baame kandapilyetala dokaita lamaiyoo, “Endakali mendeme namba watao payala ipanya baanya endangi takangepi, enda wanepi, kaiminingi pimalengepi, dee baa tange nea kaengepi dupa yandapipili joo wakale nakatenge doko nambanya disaipele joo kapa pao nakatenge.
27 Endakali mendeme baanya ita poko doko nyoo soo namba watao napaenge doko baa kapa pao nambanya disaipele nanjingina,” lea-pyaa.
28 “Dee nyakamanya akali mendeme anda londe mende pyoo ketae pyakalyetoo lao masetamo kandao doko, wambao baa isa pitipala anda doko pipenge muni yaka silyape lao masokondape pipenge daape!
29 Aopyoo latala baame muku minao tee pyao petala malatae sina kayatamopa, endakali dupame kandatala akali doko kandao dapa lao lamba latami:
30 ‘Akali dokome anda dake tee pyao petala baame kapa pao pyoo etasala nayana,’ latami.
31 “Dee akali kiŋi mendeme kiŋi waka mende yanda pimaiya paanya pituu, nambanya yanda singi taosene kingi ita mende kalyamino dupame kiŋi waka mendenya yanda singi taosene kingi ita lapoma katatamo dupa kapa pao watao pyapala ita minatamape aipa pitamape lao auu pyoo wambao tolasepenge daape!
32 Baame masilyamopa kapa nanjilyamo kandao doko, baanya akali yanda pipili doko kalyasa tengesa naipao ene pilyamopa yanda doko kayambana lao akali mendapuame akema lao wii lakala pena lenge daape!
33 Dokaita joo endakali nyakamanya mendeme baanya oapi dupa pitaka maita maiya naenge dokome kapa pao nambanya disaipele nanjingiakana,” lea-pyaa.
Aipi tende napingi doko
(Mt 5:13; Mk 9:50)
34-35 “Aipi doko epe. Epeaka doko, tende napitamo kandao doko, aipa petala dee tende pisepengepe? Aipi tata dopale dupa kunguma-pipa ee yuu dupa auu pisoo tamuina lao setalapi naenya mee nepatala kaenge. Nyakama kale-kaita singi dupame pii doko salapapena!” Jisasame lea-pyaa.