22
Jisasa pyao kumasemana lao kambuiyamino doko
(Mt 26:1-5,14-16; Mk 14:1-2,10-11; Jo 11:45-53)
1 Isataelemanya betesanya iisa napalyoo nenge Napinya Kayamo Gii epe doko ipanya tengesa pia-pyaa.
2 Dokopa pitisa mupapi mana setapae masingi akalipi dupame endakali dupa paka kayapala, naimame Jisasa aipa pyoo pyao kumasemape lao kaita kutao kateami-pyaa.
3 Gii dokopaka Satane dokome disaipele kingi ita-kisa dee lapoma dutupanya mende Jutasa kenge mende Isaketiote lenge doko-kisa ipao palea-pyaa.
4 Palipiamopa baame pao pitisa mupapi losuu anda andake isingi akalipi dupa-pipa pitipala nambame Jisasa doko dopa pyoo nyakama laitaka pitona lea-pyaa.
5 Dopa leamopa dokaitame auu kayapala, “Naimame muni mendapua emba ditamana,” leami-pyaa.
6 Dopa leaminopa Jutasame pii doko kapana latala Jisasa endakali dupa-pipa nakatenya, baa iki katata mendasa dokaita laitaka pitoana lao masetala malisoo katea-pyaa.
Napinya Kayamo Nee neamino doko
(Mt 26:17-25; Mk 14:12-21; Jo 13:21-30)
7 Betesanya iisa napalyoo nenge gii dokopa Napinya Kayamo Gii dokonya mena sipisipi dupa pingi gii doko epea-pyaa.
8 Dokopa Jisasame Pitapa Jonepa lamaiyoo, “Napinya Kayamo Gii dakenya nee doko nengeli pyoo namanalena, depa laa pupa,” lea-pyaa.
9 Dopa lateamopa dolapome baa lamaiyoo, “Nalimbame andusa pupala depa laapale lao embame masilipi?” leambi-pyaa.
10 Dopa leambinopa baame dolapo lamaiyoo, “Kandeleno! Nyilyambome yuu taono Jetusaleme dokonya patambinopa akali mendeme penge mendenya endaki kambuoo soo ipao nyilyambo kaitinisa kandanyalapomona doko watao pupala baa andaka kolandatamo dokonya awapa kolandalapape.
11 Kolandatala nyilyambome akali anda tange doko lamaiyoo, ‘Mana Lenge Akali dokome emba kandao, “Nambanya disaipele dupa-pipa Napinya Kayamo Nee doko palo andukunya namape?” lelyamona,’ lamaiyepape.
12 Dokopa baame anda namba pyoo petae ketae mendenya toko akipi dupa singi palo andake mende laitaka pyaapomona, dokonya depa laapape,” lea-pyaa.
13 Dopa lateamopa dolapome pao Jisasame leamoli pyoo kandatala Napinya Kayamo Nee doko depa leambi-pyaa.
Jisasame baanya nee doko tee pyao nena leamo doko
(Mt 26:26-30; Mk 14:22-26; 1 Ko 11:23-25)
14 Napinya Kayamo Nee napenge gii doko ipateamopa, Jisasapi baanya aposele dupa-pipa awapa nee nalanya tokonya peteami-pyaa.
15 Peteaminopa baame dokaita lamaiyoo, “Namba tanda andake nalanya pituu wambao nyakama-pipa Napinya Kayamo Gii dakenya nee dake etete napuma laka lao masoo katapu.
16 Tenda nambame nee dake mee etete nala naenya Goteme isala ipao pituu Napinya Kayamo Nee dokonya tenge angi doko panasetatamopa nambame Napinya Kayamo Nee dakenya etete napengena lao nyakama langilyona,” lea-pyaa.
17 Dopa latala baame kapo penge mende nyepala Gote lao yaka pilino latala dokaita lamaiyoo, “Dake nyakamame nyepala kapa kapa lao mokosoo nalapa.
18 Nambame getepe ipange dake indupa nanawaka katao Goteme isala ipatamo gii dokopa natona lao nyakama langilyona,” lea-pyaa.
19 Dopa latala baame betesa mende nyepala Gote lao yaka pilino latala konjia-pyaa. Konjepala dokaita maiyoo pituu, “Dake nambanya yonge doko [nyakama lao masetala Gote kundi mailyona, nyakamame namba masoo dopa pyoo kalyepapena,” lea-pyaa.
20 Napinya Kayamo Nee doko napeaminopa baame kapo penge doko nyepala dopaka pyoo nyakama maiyoo pituu, “Nambanya taiyoko kapo penge dakenya nyakamanya kai lekelyo dokome Goteme pii enenge lao setekelyamona,” lea-pyaa.]
21 “Anematupa! Namba kandao yandapipi jingima akali dupa namba laitaka pitamo akali doko nambapa awapa nee nao toko dakenya pilyamo.
22 Kini, Endakalinya Ikiningi dokome Gotenya makande seteamo kaita dokonyaka watao minilyamo. Dopaka doko, enge nyilyamo akali doko baa koyata iki lamo!” lea-pyaa.
23 Dopa lateamopa dokaitame nyakamalapo lao pituu, “Naimanya akali apimi mana doko minalanya pilyape?” leami-pyaa.
Api alyasale joo kalyamape lao pii yanda pyoloo piamino doko
24 Dokopa disaipele dupame naimanya mende api alyasale joo kalyamape lao pii yanda pyoloo piami-pyaa.
25 Dopa piaminopa Jisasame dokaita lamaiyoo, “Endakali tata dupanya kiŋi kalyamino dupame endakali dupanya alyasale joo katengema. Dee endakali dupame tangenya isingi akali dupa kandao akali epena lao lalyingima.
26 Dopaka doko, nyakamame dopa napinya, nyakamanya akali andake joo katenge doko anasale joo katapenge. Dee nyakamanya isingi akali dokome nisingi akali joo katapengeaka.
27 Api alyasale joo kalyape?’ Nee nao petenge akali doko alyasalepe, pande baanya nee yangao setakamaiyoo nisingi akali doko alyasalepe? Nee nao petenge akali doko alyasale joo katenge daape! Dopaka doko, namba nyakama-pipa katao nisingi akali joo kalyo.
28 “Namba-kisa makande pingi koo dupa ipata pilyamopa nyakamame namba mona setao awapa katengema.
29 Dopana, nambanya takange dokome namba kiŋi joo isoo katape leamoli pyoo, nambame nyakama kiŋi joo kalyepape langilyo.
30 Nyakamame nambanya isingi panda dokonyaka katao nambanya nee nao petenge toko dokonya pitipala neepi endakipi nao pititami. Dee nyakamame kiŋi dupanya petenge toko dupanya pitipala Isataele tata kingi ita-kisa dee lapoma dupanya pii tolasakamaitamina,” lea-pyaa.
Jisasame Pita kandao embame namba nakandengena laapeno leamo doko
(Mt 26:31-35; Mk 14:27-31; Jo 13:36-38)
31 Jisasame Saimone kandao, “Saimone! Saimone! Kandeleno! Ee pokenge endakali dupame wiisa angi imbupi yapengemali pyoo Satane dokome nyakama pitaka makande pyaanya anali latelyamo.
32 Dopaka doko, nambame embanya masoo miningi doko etete koyala naena lao loma sepekelyo. Tenda emba mona kapilyeteno gii dokopa embanya kaiminingi dupa kyoto injisepe,” lea-pyaa.
33 Dopa leamopa Pitame Jisasa lamaiyoo, “Kamongo, namba embapa awapa anjetae palitambanopi dee awapa pao kumatambanopi dupa kapakana lao masetelyona,” lea-pyaa.
34 Dopa lateamopa Jisasame Pita lamaiyoo, “Indupa kuka gii dakenya yaka pauli pii laa nayatamopa embame paa tepomasa, ‘Nambame baa nakandengena,’ laapeno lao nambame emba langilyona,” lea-pyaa.
Muni pausapi mandipi konjuapi dupanya lao Jisasame leamo doko
35 Jisasame dokaita lamaiyoo, “Wamba nambame nyakama pupa lao pituu, ‘Munipi, nokainapi, moko peepi mende namandyuu mee pupape,’ leo dokopa, nyakama pupala opale mende daa joo kateamipi?” lao pisia-pyaa. Dokopa dokaitame baa lamaiyoo, “Naima mende daa nanjoo kateamana,” leami-pyaa.
36 Dokopa baame dokaita lamaiyoo, “Mende daa nanjoo kateaminoaka doko, indupa nyakamanya akali mendeme muni pausapi mandipi mende setamo doko tange nyoo pupenge jilyamo. Dee akali mende konjua daa jetamo kandao doko, baanya yonge pee saketa dokome muni nyepala konjua mende sambapenge jilyamoaka.
37 Nambame nyakama langilyona, nambanya lao pii pepa pyapae singi dupa angi jina! Pii pepa pyapae singi dokonya dapa lapae silyamo: ‘Mana setapae nepenge akali dupa-pipa baa pyasoo itaki pyatamina,’ lapae silyamo pii doko indupa namba-kisa angi jalanya petelyamona,” lea-pyaa.
38 Dokopa dokaitame lao pituu, “Kamongo, konjua lapoma silyamo kanda!” leami-pyaa. Dokopa baame dokaita lamaiyoo, “Kapa lumuna kayalapa!” lea-pyaa.
Jisasame Olipimanda dokonya loma siamo doko
(Mt 26:36-46; Mk 14:32-42)
39 Dopa latala Jisasame yuu taono doko yakinatala Olipimanda dokonya pengeliaka pyoo peamopa baanya disaipele dupa awapa peami-pyaa.
40 Baame yuu dokonya lai petala dokaita lamaiyoo, “Makande pingi dupanya nyakama pao koyatamane lao loma soo kalyepape,” lea-pyaa.
41 Dopa latala baa kuki umbisale yandate pee mendai pyapengeli joo pupala luma lakao dapa lao loma sia-pyaa:
42 “Apane, embame namba-kisa kenda pipae silyamo dake nyoo nepakape! Dopaka doko, nambame masilyoli napinya, embame masetenoli pipina,” lea-pyaa.
43 [Dokopa kaitinya enjele mendeme ipupala baa kyoto injisia-pyaa.
44 Dopa piamoaka doko, Jisasa baa mona kendame kumapala etete puu lao loma soo kateamopa baa-kisa enaputi piamo doko taiyokome endaki lee kuili pyoo yuunya dopa lea-pyaa.]
45 Dopa piamopa baame loma soo etapala sakatao ipao disaipele dupa kandeamopa, dokaitame baa kandao mona kenda kayapala luu paliuu kateami-pyaa.
46 Dokopa baame dokaita lamaiyoo, “Nyakama aipuma luu paliuu kalyamipi? Makande pingi dupanya pao koyatamane lao sakatatala loma soo kalyepape,” lea-pyaa.
Jutasame Jisasa dokaita laitaka piamo doko
(Mt 26:47-56; Mk 14:43-50; Jo 18:3-12)
47 Jisasame dopa lao dutupa lamaiyoo kateamopa, baanya disaipele kingi ita-kisa dee lapoma dutupanya mende Jutasa lenge dokome akali kambu mende laminao baa wambao epea-pyaa. Baame Jisasa kateamo dosa tengesa ipupala Jisasa nunu pyaanya pia-pyaa.
48 Dokopa Jisasame baa lamaiyoo, “Jutasa, embame Endakalinya Ikiningi doko yandapipi dupa laitaka pyoo nunu pyaa epelepe?” lea-pyaa.
49 Dopa lateamopa akali epeamino dokaitame Jisasa-kisa pitamino dupa baanya disaipele awapa kateamino dupame kandatala, “Kamongo, naimame dokaita uaa pepome pokamape?” leami-pyaa.
50 Dopa latala disaipele mendeme pitisa mupa dokonya kendemane mendenya kale tolae-kaita taka lanya nepea-pyaa.
51 Dopa piamosa Jisasame kandatala, “Kayalapa!” lea-pyaa. Dopa latala akali dokonya kale doko watandateamopa katengeli pyakamaiya-pyaa.
52 Dokopa Jisasame pitisa mupapi, losuu anda andake isingi akalipi, Jutamanya isingi akalipi baa anjala epeamino dupa lamaiyoo, “Nyakamame akali pake nao makongao paenge mende anjala epele lao konjuapi kolyepepi dupa minao epelyamipi?
53 Koteaka lao namba nyakama-pipa losuu anda andake dokonya katengeaka doko, nyakamame namba anjala nayami. Indupa iminjingi dokome kalai isoo pipenge gii doko ipatelyamona, nyakamame dokonya kalai pyakamaiyepalena,” lea-pyaa.
Pitame namba Jisasa nakandengena leamo doko
(Mt 26:57-58,69-75; Mk 14:53-54,66-72; Jo 18:12-18,25-27)
54 Jisasame dopa lateamopa dokaitame baa puu lao minatala laminao pitisa mupa dokonya andaka peami-pyaa. Peaminopa Pitame dokaita watao tependale joo pea-pyaa.
55 Anda kamapisa ita yangatala endakali peteamino dokonya Pita pao konda pia-pyaa.
56 Dopa petala ita petesa peteamopa kalai pyakamaiyoo petenge enda mendeme baa kandokondape petala lao pituu, “Akali dake Jisasapa awapa katengembana,” lea-pyaa.
57 Dopa leamopa Pitame tanga lao, “Wanaku! Nambame baa nakandengena,” lea-pyaa.
58 Dopa lateamopa kuki tendale akali mendeme baa kandatala, “Emba akali dupanya mendeaka lamona,” lea-pyaa. Dopa leamopa Pitame lao pituu, “Akali yaa! Namba dupanya mende daana,” lea-pyaa.
59 Dee kiloko gii mendai jowapi mende pateamopa, akali mendeme, “Kini etete, baa akali dokopa awapa kateambina, baa Galili tangeakana!” lao kyoto joo lea-pyaa.
60 Dopa leamopa Pitame baa lamaiyoo, “Akali yaa! Embame pii leleno akali doko namba nakandengena,” lea-pyaa. Dopa leamo awapa yaka pauli pii mende lalu pia-pyaa.
61 Dopa lateamopa Kamongo dokome kapilyetala Pita kandokondape pia-pyaa. Dopa piamopa Kamongome baa kandao, “Indupa kuka gii dakenya yaka pauli pii nalatamopa paa tepomasa embame namba nakandengena laapenona,” leamo pii doko Pitame masia-pyaa.
62 Masetala kamaka pupala etete yamataka lao ee lea-pyaa.
Dokaitame Jisasa kandao pii koo lao piamino doko
(Mt 26:67-68; Mk 14:65)
63 Dokopa Jisasa minatae kateamino akali dupame baa minoko pyoo minakaseta pyapa pyoo kateami-pyaa.
64 Dokaitame baanya lengelyaapi yaki petala pyao pituu, “Emba pilyamo doko dokome pilyamo lao naima langipi!” leami-pyaa.
65 Dee dupame baa kandao lamba lao pii koo longo waipa soo leami-pyaa.
Jisasa kosimi leamino doko
(Mt 26:59-66; Mk 14:55-64; Jo 18:19-24)
66-67 Yuu yongemaopa Jutamanya isingi akalipi, pitisa mupapi, mana setapae masingi akalipi dupa pyasoo kambuiyami-pyaa. Dokopa akali yangimi Jisasa laminao nyakamanya kanjole dupa kambuiyamino dokonya epeami-pyaa. Ipateaminopa dokaitame baa pisoo, “Emba Kataisa doko tamo kandao doko, naima langi!” leami-pyaa. Dokopa Jisasame dokaita lamaiyoo, “Nambame pii doko yanu pyato kandao doko, nyakamame kiningina lao masala nayatami.
68 Dee nambame nyakama pii mende pisoto kandao doko, yanu pyakala nayatamiaka.
69 Dopaka doko, indupa pituu tanga tangapi Endakalinya Ikiningi dokome Gote etete pupu lapae dokonya kingi tolae-kaita katatana,” lea-pyaa.
70 Dopa leamopa dokaita pitakame lao pituu, “Dopa tamo doko, emba Gote Ikiningi taa aipape?” leami-pyaa. Dokopa baame dupa lamaiyoo, “Nyakama tangeme namba kandao latelyamino dokokana,” lea-pyaa.
71 Dopa lateamopa dokaitame nyakamalapo lao pituu, “Aipuma naimame endakali mendapuanya pii deaka nyetamape? Baame pii lapumu dutupa naimame sepelyamanona!” leami-pyaa.