21
Enda walyakae mendeme Gotenya lao epe mende pyasakamaiyamo doko
(Mk 12:41-44)
1 Jisasame kandeamopa endakali kamongo dupame losuu anda andake dokonya muni pyasingi penge dokonya pyasiami-pyaa.
2 Dokopa enda walyakae etete tipya mendeme muni etete yakane lapoma pyasiamo kandea-pyaa.
3 Kandatala baame lao pituu, “Nambame nyakama kiningi langilyona, enda walyakae tipya dokome endakali waka dupame muni pyasalamino dupa pitaka etete ita minao pyasalamo.
4 Endakali dokaita pitakame nyakamanya muni sipumu dupanya kakana nyoo pyasalamino. Dopaka doko, enda dokome baa daa jipumupa baa-kisa sipumu doko pitaka pyasalamo. Baa tange nao pitipenge doko pitaka pyasalamona,” lea-pyaa.
Losuu anda andake doko kalunya nepatamina Jisasame leamo doko
(Mt 24:1-2; Mk 13:1-2)
5 Endakali dutupanya mendapuame losuu anda andake doko kana auu pipae dupame yati pyoo petae kateapi dee endakalimi Gote lao tama pyoo losuu anda andake doko yati pyoo oapi seteamino dupapi dupa kandatala auu pipaena leami-pyaa. Dopa leaminopa Jisasame kandatala dapa lea-pyaa.
6 “Nyakamame indupa kandelyamino datupa tenda gii mende ipatamopa, ae kaname petae kalyamo datupanya mendaipi mende kalyamoli petae katena lao kayala nayao, pitaka kalunya nepatamina,” lea-pyaa.
Kenda pipae longo dupa ipatana Jisasame leamo doko
(Mt 24:4-14; Mk 13:3-13)
7 Dopa leamopa dokaitame baa pisoo pituu, “Mana Lenge Akali, embame leeno dupa gii andukupa pitana lao leepe? Naimame kongali aki mende kandatala dutupa pipenge gii doko tengesa petelyamona lao masetama laape?” leami-pyaa.
8 Dokopa Jisasame lao pituu, “Endakali longome nyakama minao kyakasetamina kandao kalyepape. Dupame namba epele lao ipupala, ‘Namba akali dokona,’ latami. Dee dupame, ‘Yuu etenge gii doko ipatelyamona,’ latamiaka. Dopa latamiaka doko, nyakamame dupanya pii doko watao minala nayalapape.
9 Tenda nyakamame yanda andake mendapua pilyamona lawapi endakali dupame nyakamanya kapomane doko yanda pimailyaminona lawapi pii dopale dupa sepala walu laa nayalapape. Dopale dupa wambao kapa pao pitamoaka doko, yuu etenge gii doko dokopaka naipatana,” lea-pyaa.
10 Dopa latala baame dokaita lamaiyoo, “Akali tata mendeme tata mende yanda pimaita kiŋi mendenya isingi tata mendeme kiŋi mendenya isingi tata mende yanda pimaita pitami.
11 Dee yuu yangi dupanya titiwali andake dupa minao lopo andake dupa soo, yainame endakali longo dupa-kisa andinyoo pita. Dee endakali dupa paka pisepenge makandepi kongali andakepi dupa kaiti-kisa kaita ipantana,” lea-pyaa.
12 “Dopaka doko, mana dopale dupa pitaka ene ipanya pitamopa, wambao endakali mendapuame nyakama anjoo kenda pisetami. Dupame dupanya losuu anda dupanya nyakama kosimi latala anjingi anda dupanya anjinya palyetami. Dee nyakamame namba watao payataminosa dupame kapomane isingi akali andakepi kiŋipi dupa-kisa laminao patami.
13 Laminao patamino dokonya-kaita nyakamame nambanya lao pii lamaitami.
14-15 Namba tangeme nyakama pii epepi masingi epepi ditopa nyakamanya yandapipi dupa pitakame kapa pao nyakama ita minao pii tanga lao yanu pyala nayatami. Dopana, nyakamame walu laa nayao dupanya pii yanu pyakamaipenge pii mende wambao depa laa nayalapape.
16 Nyakamanya endangi takangepi, kaiminingipi, kaita miningipi, palupi dupame nyakama nyakamanya yandapipi dupanya kingilyaka maitami. Dopa petala nyakamanya mendapua pyao kumasetamiaka.
17 Nyakamame namba watao payataminosa endakali dupa pitakame nyakama kandao etete imbu kaengitami.
18 Dopaka doko, nyakamanya aiyomba iti mendaipi mende alu napita.
19 Nyakama kyoto joo katatamino dokome auu pyoo lete katatamina,” Jisasame lea-pyaa.
Yuu taono Jetusaleme doko koyatana Jisasame leamo doko
(Mt 24:15-21; Mk 13:14-19)
20 “Tenda yanda singi amii dupame yuu Jetusaleme dokonya ipao katao kakopataminopa nyakamame kandatala taono dokonya koyapenge gii doko tengesa ipatelyamona lao masetami.
21 Gii dokopa Jutia yuu dokonya katatamino endakali dupa yuu manda dupanya paka pyakao pupenge jeta. Yuu taono dokonya katatamino endakali dupame taono doko yakinatala waka mendakaita pupenge jetaka. Dee yuu londatili katatamino endakali dupa taono dokonya etete napupenge jeta.
22 Goteme yanu nyetana latae baanya pepanya pyapae silyamo dupa pitaka gii dokopa etete kiningi jeta.
23 Dee kenda pipae etete andake doko yuu dakenya ipatamopa Goteme endakali datupa kandao imbu kayao yanu nyeta. Gii dokopa enda wane tongatapi enda wane andu nengepi dupa etete kondo pita!
24 Yandapipi dupame endakali yangi dupa uaa pepome kepatami. Dee yangi dupa anjetala laminao yuu wakale wakale dupanya puu puu pitami. Gii dokopa endakali tata waka waka dupame mende alo peta peta pyoo yuu Jetusaleme doko moko katao waima lyoo koyasoaka katao etapenge gii doko ipatali pyoo kayatamina,” lea-pyaa.
Endakalinya Ikiningi doko dee ipata dokonya Jisasame leamo doko
(Mt 24:29-31; Mk 13:24-27)
25 “Tenda nikipi, kanapi, buipi dupa makande mende peta peta pita. Dee solowata pete andake dupa oo lao buu minao ipatamopa isa yuu dakenya endakali tata dupa pitakame mona etete koyao pakame kumatami.
26 Kaitinya kuingi dupa ema-ema pitamosa kandatala makande dopale dupa yuu pitakanya ipapome lamo lao masoo yamataka lao pakame kumao lenge kolatami.
27 Dutupa petatamopa Endakalinya Ikiningi doko etete pupu lao tii pyoo kopa tambetambe ipatamo kandatami.
28 Tenda makande dutupa tee pyao pitamo gii dokopa Goteme naima lanyetamo gii doko tengesa ipatelyamona lao masoo nyakama toya katao kandalyetae kalyepape,” Jisasame lea-pyaa.
Piki itapa makande pyoo kongali pii doko
(Mt 24:32-35; Mk 13:28-31)
29 Dokopa baame kongali pii dake dokaita lamaiyoo, “Nyakamame piki itapi ita wakapi dupa masalapape.
30 Nyakama tangeme ita dupanya mende yoko ŋaŋa pyakalyilyamo doko kandatala aiyuu kana palyanya petelyamona lao masingima.
31 Dopaka pyoo pitamo dupa nyakamame kandatala Goteme isingi doko tengesa ipatelyamona lao masetami.
32 Nambame nyakama kiningi langilyona, endakali indupa palelyamino dupa kumao etapala nayataminopa, dutupa pitaka pita.
33 Yuupi kaitipi dupa kapa pao alu pitamoaka doko, nambanya pii dupa kapa pao alu napitana,” lea-pyaa.
34 “Nyakamame oapi dupa pyuaniaka kayao pingipi, bia akipi longo lao nao kyakao katengepi, yuunya auu pingi dupa nea kaengepi mana dutupanya nyakamanya masingi patamopa aopyoo latala Goteme isala epenge gii doko nyakama-kisa etete alo pyao walu lasala ipatame lao tangeme tange isoo kalyepape.
35 Gii doko yui pandu lokalyingili pyoo yuu pitakanya endakali dupa-kisa ipata.
36 Nyakama kandao isoaka kalyepape! Opale pitamo dupanya wandinya nepatamana lao, dee Endakalinya Ikiningi dokonya enombanya elya nakayao toya katatamana, Gote embame naima pupu lasepe lao loma soaka kalyepape,” lea-pyaa.
37 Jisasame losuu anda andake dokonya kotaka dii lao endakali dupa mana lamaitala yuu kuala epeamopa baame yuu taono doko yakinatala Olipimanda dokonya palya pata pia-pyaa.
38 Dopa piamopa endakali dupa pitakame yongama wamba sakatatapu baanya pii salanya losuu anda andake dokonya ipata piami-pyaa.