10
Enda watao pingi dokonya Jisasame leamo doko
(Mt 19:1-12; Lu 16:18)
1 Jisasame Kapaneame yuu doko yakinatala Jutia yuu dokonyapi dee endaki Jotane yangitenapi pea-pyaa. Dokopa endakali kambu mendeme deaka ipao baa kateamo dokonya kambu piami-pyaa. Dopa piaminopa baame pingiliaka pyoo endakali dupa deaka mana lamaiya-pyaa.
2 Dopa piamopa Patasi mendapuame ipupala baa minao makande pyoo lao pituu, “Akali mendeme baanya enda doko pena lao watao pyatamopa naimanya mana setapae dupanya kapa patape napatape?” leami-pyaa.
3 Dopa leaminopa baame yanu pyao dokaita lamaiyoo, “Wamba Moseseme nyakamame aipa pyepape lea-pyaape?” lea-pyaa.
4 Dupame lao pituu, “Akali mendeme baanya enda doko watao pyao pituu watao pilyona lao pepa mende pyapala watao pyatamo doko Moseseme kapana lea-pyaana,” leami-pyaa.
5 Jisasame dokaita lamaiyoo, “Nyakamame tuu-tuu piaminosa mana doko nyakamanya pepa pyanya setekea-pyaa.
6 Dopaka doko, Goteme tee pyao yuupi kaitipi wasiamo dokopa endapi akalipi lao wasia-pyaa.
7 Tenge dokonya akalimi baanya endangi takangepa yakinatala, baanya etanengepa kopatambi.
8 Dopa pitamopa dolapo yonge mendai joo pititambi. Dolapo lapoma joo napetenya, yonge mendai joo pititambi.
9 Dopana, Goteme nyoo pyasetae doko endakalimi wakale pyoloo napipengena,” Jisasame lea-pyaa.
10 Dopa lateamopa baanya disaipele dupame pii leamo dokonya deaka andaka Jisasa pisiami-pyaa.
11 Dokopa baame dokaita lamaiyoo, “Akali mendeme baanya etanenge doko watao pyapala enda waka mende lanyetamo dokome enda wambatae doko lyaa minata.
12 Dee enda mendeme baanya akalingi doko yakinatala akali waka patamo kandao doko, kepo kolawaka nyetana,” lea-pyaa.
Wane wanakupi dupa-kisa Jisasame kingi seteamo doko
(Mt 19:13-15; Lu 18:15-17)
13 Jisasa kateamo dokonya endakali mendapuame wane wanakupi koo dupa baame watandena lao laminao epeami-pyaa. Dopaka doko, disaipele dupame dokaita pyalanya leami-pyaa.
14 Dokopa Jisasame kandatala imbu kayapala dokaita lamaiyoo, “Wane wanakupi koo dupa epekena kaita lyokala nayakalapa! Doko, Goteme wane wanakupi dapale joo kalyamino endakali dupa isoo kalyamo.
15 Nambame nyakama kiningi langilyona, wane wanakupi koo dupame nyakama Goteme isina lao katengemali pyoo endakali mende nakatatamo kandao doko, baa kapa pao Goteme isina lao nakatatana,” lea-pyaa.
16 Dopa latala baame wane wanakupi koo dupa kopinyetala kingimi auu pisia-pyaa.
Akali kamongo mende
(Mt 19:16-30; Lu 18:18-30)
17 Dopa petala baa paanya kaitini nyiamopa akali mendeme alo pyao ipao baa kandao luma lakapala baa pisoo, “Mana Lenge Akali Epe, namba lete etete katatopa lao aipa pyuape?” lea-pyaa.
18 Jisasame baa lamaiyoo, “Aipuma embame namba kandao epena leepe? Endakali mendaipi mende epe daa. Gote baa iki epe.
19 Mana setapae dupanya, ‘Embame endakali pyao kumasala nayape. Embame kepo kolala nayape. Embame pake nala nayape. Embame endakali mende minakasalanya sambo laa nayape. Embame endakali mendenya opale mende sambo lao pyalya lao nyakamaiya nayape. Embanya endangi takangepa dolapo andanda semaiyoo katapena,’ lapae silyamo dutupa embame masilinona,” lea-pyaa.
20 Akali dokome baa lamaiyoo, “Mana Lenge Akali, wamba namba wane kolesa pituu mana setapae dutupa pitaka watao minio doko minawaka kalyona,” lea-pyaa.
21 Dopa leamopa Jisasame akali doko kandokondape petala auu kaya-pyaa. Dopa petala baa lamaiyoo, “Emba mendai iki mende daa jilyamona, emba pupala embanya oapi dupame muni nyepala endakali tipya dupa maipi. Dopa pitinopa embanya epe dupa kaitinya sakatana, embame namba watao ipupi,” lea-pyaa.
22 Dopa leamopa baanya oapi etete longo singi dokonyana, mona etete kenda kayapala lengelyaapi kumao kayapala pea-pyaa.
23 Dopa piamopa Jisasame kandayoko lao baanya disaipele dupa kandatala lamaiyoo, “Kamongo dupa Goteme isina lao kalyanya etete lekeleke tatamina,” lea-pyaa.
24 Dopa leamo doko baanya disaipele dupame sepala mona andeami-pyaa.
Dokopa Jisasame deaka dokaita lamaiyoo, “Wane paluma, endakali dupa Goteme isina lao kalyanya eteteaka lekeleke tengema.
25 Mena kamele mendeme kepo tii mendenya kolandalanya lekeleke tapyaliaka doko, kamongo mendeme Goteme isina lao kalyanya etete lekeleke tapyalina,” lea-pyaa.
26 Dokopa disaipele dupame pii dutupa soo etete walu latala, nyakamalapo mende lamai lamai pyoo, “Dopa tamo kandao doko, api kapa pao pyoo nyepae katatape?” leami-pyaa.
27 Dopa leaminopa Jisasame dokaita kandatae soo yanu pyao, “Endakalimi kapa daaka doko Gote kapa. Goteme dupa pitaka kapa pao pingina,” lea-pyaa.
28 Pitame baa lamaiyoo, “Kandeleno, naimame dupa pitaka yakinatala emba watao payatelyamanona,” lea-pyaa.
29-30 Jisasame lao pituu, “Nambame nyakama kiningi langilyona, nambapa dee Wai Pii Epe dokopa lao masetala endakali dupame nyakamanya anda tamopi, kaiminingi tamopi, pimalenge tamopi, endangi tamopi, takange tamopi, wane tamopi, ee tamopi dupa yakineamino dupame indupa gii dakepa andapi, kaiminingipi, pimalengepi, endangipi, wanepi, eepi dupa andate mende lao nyoo kalyamino. Dee endakali mendapuame dupa watao pilyaminoaka. Dopa petala yuu enenge setamo dokonya lete etete katatami.
31 Dopaka doko, endakali enomba nyoo katenge longo dupa maita-kaita katatami. Maita-kaita katenge longo dupa enomba nyoo katatamina,” Jisasame dopa lea-pyaa.
Jisasame baa kumatapa dee sakatatapa dolaponya tepo pyoo leamo doko
(Mt 20:17-19; Lu 18:31-34)
32 Yuu mende Jisasapi baanya disaipele dupapi Jetusaleme pao pituu Jisasa baa wambea-pyaa. Dokopa disaipele dupame mona andeaminopa, dee endakali waka baa watao peamino dupa paka kayamiaka-pyaa. Dopa piaminopa baame akali kingi ita-kisa dee lapoma dutupa dee lanyepala baa-kisa pitamo dupa dokaita lamaiya-pyaa.
33 “Kandeleno! Naima indupa Jetusaleme pelyamano. Akali mendeme Endakalinya Ikiningi doko enge nyepala pitisa mupapi mana setapae masingi akalipi dupa laitaka pyaapomo. Dokopa dupame baa kosa lao pyao kumasemana latala endakali tata waka dupanya kingilyaka maitami.
34 Dopa pitaminopa dupame baa kandao lamba lao sopakalimi pyao konjame pyao petala angi pyao kumasetami. Dopa petataminopa koto tepo patatamopa dee sakatatana,” Jisasame lea-pyaa.
Jemesa Jonepame Jisasa-kisa tee leambino doko
(Mt 20:20-28)
35 Akali Sepete ikiningi Jemesapa Jonepame ipupala Jisasa lamaiyoo, “Mana Lenge Akali, nalimbame emba-kisa mendita mende tee lambana embame latambanoliaka pyoo pipi laka lao masilyambanona,” leambi-pyaa.
36 Baame dolapo lamaiyoo, “Nambame nyilyambo aipa pipi laka lao masilyambipi?” lea-pyaa.
37 Dokopa dolapome baa lamaiyoo, “Emba embanya tii pipae dokonya ipatenopa nalimbanya mende embanya kingi tolae-kaita kalyepa mende koya-kaita kalyepa lapena,” leambi-pyaa.
38 Dopa leambinopa Jisasame dolapo lamaiyoo, “Nyilyambome lelyambino doko masokondape napilyambino. Nambame kapo penge nelyo dokonya nyilyambome kapa pao natambipi? Nambame kaimbu nyilyo dokonya nyilyambome kapa pao nyetambipi?” lea-pyaa.
39 Dolapome baa lamaiyoo, “Nalimba kapana,” leambi-pyaa. Jisasame dolapo lamaiyoo, “Kini, nambame kapo penge nelyo dokonya nyilyambome natambiaka.
40 Nambame kaimbu nyilyo dokonya nyilyambome nyetambiaka. Dopaka doko, nambanya kingi tolae-kaita katena lengepi koya-kaita katena lengepi doko nambanya kalai daa. Goteme katatamina lao yapao nyiamo endakali dupa katatamina,” lea-pyaa.
41 Dopa pilyambino lapae doko disaipele kingi ita dutupame sepala Jemesa Jonepa dolapo imbu kayami-pyaa.
42 Dopa piaminopa Jisasame dokaita epena latala lamaiyoo, “Endakali tata dupanya yuu isingi akali kenge singi kalyamino dupame nyakamanya endakali dupanya alyasale joo katengema doko nyakamame masilyamino. Dee dupanya akali andake dupame nyakamanya pii watao minakena lao kyoto jingima doko nyakamame masilyaminoaka.
43 Dopaka doko, nyakamame dopa napinya nyakamanya mende akali andake joo katapuli lao masetamo kandao doko, nyakamanya kalai akali joo katapenge.
44 Dee nyakamanya mende enomba nyoo katapuli lao masetamo dokome endakali pitakanya kendemane joo katapenge.
45 Doko, Endakalinya Ikiningi dokome baanya kalai pyekena lao naepenya, baame endakali dupa nisalanya epea. Baame endakali dupa kii tamao nyalanya baa tangeme kumala epeana,” lea-pyaa.
Jisasame akali lenge monda mende lenge tasiamo doko
(Mt 20:29-34; Lu 18:35-43)
46 Dokopa dokaita yuu taono Jeteko dokonya epeami-pyaa. Jisasapi baanya disaipele dupapi, dee endakali kambu andake mendepimi Jeteko yuu doko yakinatala peaminopa, Timiasa ikiningi Batimiasa lenge akali lenge monda muni akipi tee lao petenge doko kaitinisa petea-pyaa.
47 Baame Nasatete tange Jisasa doko ipao kalyamo lapae sepala baame puu lao ae lao, “Dapiti Yumbange Jisasa, embame namba kondo kaya,” lea-pyaa.
48 Dopa leamopa endakali longo dupame baa pii kaena lao pyalanya leami-pyaa. Dopaka doko, baame etete puu lao ae lao, “Dapiti Yumbange, embame namba kondo kaya,” lea-pyaa.
49 Dopa leamopa Jisasa baa ipao katapala, “Baa epena laapa,” lea-pyaa. Dopa leamopa endakali dupame akali lenge monda doko epena latala lamaiyoo, “Baame emba ipu lelyamona mona yaepatala sakata!” leami-pyaa.
50 Dokopa baanya yonge pee ketae pingi doko lyokanya pyale latala pupae sakatao Jisasa kateamo dokonya pea-pyaa.
51 Dokopa Jisasame baa lamaiyoo, “Nambame embanya aipa pyakapili lao masilipi?” lea-pyaa. Akali lenge monda dokome baa lamaiyoo, “Mana Lenge Akali, namba lenge dee tapuli lao masilyona,” lea-pyaa.
52 Dopa leamopa Jisasame baa lamaiyoo, “Embame masoo minapino dokome embanya lenge dee auu pisilyamona, puu!” lea-pyaa. Dopa leamo dokopaka akali dokonya lenge auu pyoo talu pia-pyaa. Dopa peteamopa baame Jisasa peamo ongonya watao pea-pyaa.