☰ MATYU 6
6
Endakali nisingi dupanya lao Jisasame mana lamaiyamo doko
1 “Nyakamame* nyakamanya mana tolatae dupa endakali dupame kandapimili lao minatamane lao kandao kalyepape. Dopa pitamino kandao doko, nyakamanya Takange kaitinya katenge dokome nyakama yole mende nandita.
2 “Nyakamame* opale mende endakali tipya mende nisoo maiyoo pituu dokopa, minakasingi endakali dupame Jutamanya losuu andapi kaitini kembopi dupanya endakali dupame nyakama lalyipimili lao maku longo lengemali pyoo laa nayalapape. Minakasingi endakali dupame nyakama lalyipimi laka lao masingima. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 3 Dopaka* doko, nyakamame endakali tipya mende nisoo pituu dokopa, kingi tolae-kaitame nisetamino doko koya-kaitame nakandena lao nisalapape. 4 Dopa* pyoo nyakamame kondo kaenge mana doko yalo pyoo minataminopa nyakamanya Takange dokome mana yalo pyoo minatamino dupa kandatala nyakama yole mende ditana,” Jisasame lea-pyaa.
Loma sina lao Jisasame mana lamaiyamo doko
(Lu 11:2-4)
5 “Dopana* nyakamame loma setamino gii dokopa minakasingi endakali dupame loma singimali pyoo sala nayalapape! Dupame losuu andapi kaitini kembopi dupanya katao endakali enombanya loma sipuma laka lao masilyamino. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 6 Dopaka* doko, nyakamame loma salanya pituu nyakamanya palenge palo ongonya pao kaita pai lanyetala nyakamanya Takange yalo pyoo katenge doko lao loma salapape! Dopa pitaminopa nyakamanya Takange dokome nyakamame yalo pyoo pitamino doko kandatala nyakama yole mende dita.
7 “Dee* nyakamame loma soo pituu, kamalya katenge endakali dupame pingimali pyoo niminamu lao loma sala nayalapape! Dokaitame pii longo lao loma silyamano doko mambele Goteme setana lao masingima. 8 Nyakama* endakali dopale joo nakalyepape! Nyakamanya Takange Gote dokome nyakamanya daa jilyamo dupa nyakamame tee laa naengesa wambao masingi! 9 Nyakamame* dapa lao loma salapape:
Naimanya Takange ketae kaitinya katenge doko,
Embanya kenge doko auu pyoaka sina lape.
10 Embame* naima isoo ipao katape.
Ketae kaitinya embanya masingili pingimali pyoo, isa yuu dakenya pyepa lape.
11 Indupaka* natamanoli pyoo nee dupa dipi.
12 Embame* naimanya koo dupa kunanya nepakape.
Dopaka pyoo naimanya koo pyekelyamino dupanya yanu dupa kaelyamano.
13 Koo* pyepa lao makande pingi dupanya embame naima laminao napupi.
Koo tata dupanya embame naima pyoo nyepe.
14 Dopana,** endakali mendeme nyakama-kisa koo pitamo dupanya yanu nyala nayatamino kandao doko, nyakamanya Takange kaitinya katenge dokome nyakamanya koo pitamino dupa kunanya nepakataka. 15 Dopaka* doko, nyakamame endakali waka dupanya koo pitamino dupanya yanu dupa kayala nayatamino kandao doko, Goteme nyakamanya koo pitamino dupa kunanya nepakala nayatakana,” Jisasame lea-pyaa.
Gote masalanya nee nanenge dokonya lao Jisasame mana lamaiyamo doko
16 “Nyakamame* Gote lao masalanya nee nanao katatamino dokopa, minakasingi endakali dupame pingimali pyoo enomba kumala nayalapape. Dokaitame nee nanao kalyamini lamo lao endakali dupame nyakama kandena lao enomba kumao lambalu pyapae paengema. Dopa pingi endakali dupame nyakamanya yole doko nyepelyaminona lao nambame nyakama kiningi langilyo. 17 Nyakamame nee nanao katatamino dokopa nyakama lengelyaapi kaimbu pyapala aiyomba dupa kai pyao auu pisalapape. 18 Endakali* dupame nyakama nee nanao kalyaminona lao masala naena lao dopa pyepape. Dopa pitaminopa nyakamanya Takange yalo pyoo katenge dokome iki maseta. Baame nyakamanya yalo pyoo pitamino doko kandatala nyakama yole mende ditana,” Jisasame lea-pyaa.
Epe dupa kaitinya setenge mana doko
(Lu 12:33-34)
19 “Nyakamame** oapi epe dupa yuu dakenya nyoo limbala nayalapape. Yuu dakenya setapaesa kokalyame koyasingi. Dee kaa tao koenge. Pake nenge endakali dupame anda kalupala pake nyingimaka. 20 Dopana,* nyakamame oapi epe dupa nyakamanya jina lao kaitinya limbalapape. Kaiti dokonya kokalyame koyasala nanege. Dee kaa tao koyala naenge. Pake nenge endakali dupame anda kalupala pake nanyingimaka. 21 Nyakamanya oapi epe dupa setenge panda dokonyaka nyakamanya mona yukuoo setengema daape!” Jisasame lea-pyaa.
Yongenya tii pingi doko
(Lu 11:34-36)
22 “Lenge doko yongenya kia joo telyamo. Embanya lenge doko auu pyoo tao payateno kandao doko, embanya yonge doko pitaka etete tii pita. 23 Dopaka doko, embanya lenge lapo tao payateno kandao doko, embanya yonge doko pitaka iminjeta. Tii pipae emba-kisa silyamo doko iminjetamo kandao doko, iminjetae doko etete andaka jetana,” Jisasame lea-pyaa.
Endakali mendeme kapa pao kamongo lapomanya kalai napipenge
(Lu 16:13)
24 “Endakali* mendeme kamongo lapomanya kalai pakao pyakamaipenge nanjilyamo. Dopa pitoo lao masetamo kandao doko, tenda baame mende doko auu nakayapala mende doko auu kayata. Dee baame mende doko mona setapala mende doko maka kayata. Dopana nyakamame Gotepa munipa lapota mona setapenge nanjetana,” Jisasame lea-pyaa.
Moname longo masoo nea kaenge doko
(Lu 12:22-31)
25 “Dopana* nyakamame nyakama tange auu pyoo katapenge dupanya lao masetala, ‘Naima neepi endakipi aki nao katatama laa kanjemape?’ dee ‘Yonge yati akimi pitamape?’ lao nea kayala nayalapape. Endakali auu pyoo katenge tenge doko neepi endakipi, yongenya yati pingipi dutupape? 26 Nyakamame** yaka dupa kanjepape! Dupame ee pokala naengema. Dupame nee mandyuu ipao nee setenge anda dupanya mau pyala naengemaka. Dopaka doko, nyakamanya Takange kaitinya katenge dokome dupa nee maingi. Dopana nyakamame yaka dupa etete ita minao nakalyamipi? 27 Nyakamanya* endakali mendeme baa gii longo lao katapu laka lao nea kayapala baa tangeme baanya katapenge gii dupanya ee kana mendapua waipa setape?
28 “Angi aipuma nyakamanya yongenya pingi dupa lao masetala nea kaelyamipi? Nyakamame mee tanu dupanya dii yati pipae dupa aipa pyoo pyakalyingipi lao masokondape pyepape. Dupame kalai mende pyaa naengema. Dee yonge peepi mende wasala naengemaka daape! 29 Wamba* akali Solomoneme baa tangenya yati tata dupa pitaka petala tanu dupanya dii yati pipae epe dopale mendeme yati pyoo nakateana lao nambame nyakama langilyo. 30 Mee* tanu dupa indupa iki katapelyamopa taita pokanya setapala itatenya yangengemaka doko, Goteme tanu dopale dupa dii yati pipaeme yati pisingi! Dokaita joo baame nyakama yonge yati pingi dupa etete auu pyoo nandingipi? Nyakama kuki iki masoo miningima lamo! 31 Dopana nyakamame ‘Neepi endakipi aki nalamane laa kanjemape, yonge pee aki pyaamane laa kanjemape?’ lao nea nakayalapape! 32 Mana* dopale dupa pitaka kamalya katenge endakali dupame watao miningima. Dopaka doko, nyakamanya Takange kaitinya katenge dokome nyakama daa jilyamo dupa pitaka masetelyamo. 33 Dopana,* Goteme isina lao katapengepa baanya mana tolataepa dolapo nyakamame wambao kutao nyalapape. Dopa pitaminopa baame oapi dupa pitaka nyakama ditaka. 34 Tenge* dokonya minao nyakamame taitanya lao masetala nea nakayalapape. Taita doko taitanya kalai. Kenda pipae yuu mendai doko gii dokopa ikiaka jingina,” Jisasame dopa lea-pyaa.
* 6:1 Mt 23:5; Lu 16:14-15 * 6:2 Pot 20:6; Emo 4:5; Mt 15:7; 22:18; 23:13-15; Jo 5:44; 12:43 * 6:3 Mt 25:37-40 * 6:4 Wee 139:2-3; Kl 3:23-24 * 6:5 Pot 20:6; Mt 23:5; Mk 11:25; Lu 18:10-14; Je 4:3 * 6:6 2 Kiŋ 4:33; Ais 26:20; Dan 6:11 * 6:7 1 Kiŋ 18:26-29; Ekl 5:1; Ais 1:15 * 6:8 Mt 6:32; Lu 12:30 * 6:9 Jo 17:6,26 * 6:10 Mt 7:21; 26:39,42; Lu 22:42 * 6:11 Pot 30:8-9; Jo 6:32-35 * 6:12 Pot 24:29; Mt 6:14-15; 18:21-35 * 6:13 Mt 26:41; Lu 22:40; Jo 17:11,15; 2 Te 3:3; 2 Ti 4:18; 1 Jo 2:14 * 6:14 Mk 11:25-26 * 6:14 Mt 5:7 * 6:15 Pot 21:13; Ep 4:32; Kl 3:13; Je 2:13 * 6:16 Pot 20:6; Ais 58:5-9 * 6:18 Ais 58:3; Mt 6:4,6 * 6:19 Jop 22:24-26; 1 Ti 6:17-19; Je 5:1-3 * 6:19 Wee 62:10 * 6:20 Mt 19:21; Mk 10:21; Lu 18:22; Kl 3:1-2 * 6:24 Jop 31:24-25; Wee 62:10; Mt 5:3; 19:21,26; Ep 5:5 * 6:25 Wee 145:15-16; Lu 10:41; 12:11; Pl 4:6; 1 Ti 6:6-8; Ip 13:5; 1 Pi 5:7 * 6:26 Mt 10:29-31; Lu 12:6-7 * 6:26 Wee 147:9 * 6:27 Wee 39:5 * 6:29 1 Kiŋ 10:1-19; 2 Ktl 9:1-28 * 6:30 Mt 8:26; 14:31; 16:8 * 6:32 Mt 6:8 * 6:33 1 Kiŋ 3:13-14; 2 Ktl 1:12; Wee 37:4,25; Mt 19:28; Mk 10:29-30; Lu 18:29-30; Lo 14:17; Je 4:3 * 6:34 Eke 16:4,19; Mt 6:11; Je 4:13-14
☰