☰ MATYU 7
7
Endakali mende koo epe lao yapala nayalapape leamo doko
(Lu 6:37-38,41-42)
1 “Nyakamame* endakali mende koo epe lao yapala nayalapape. Dopa pitaminopa Goteme nyakama koo epe lao yapala nayataka. 2 Doko* aipuma? Nyakamame endakali mende koo epe lao yapatamili pyoaka Goteme nyakama koo epe lao yapata. Dee nyakamame endakali mende-kisa mana minataminoli pyoaka Goteme nyakama-kisa minata. 3 Aipuma* embame embanya lengenya ita waiyepae andake silyamo doko nakandenya, embanya endakali yango mendenya lengenya kuni silyamo doko kandakamaiyoo kalyepe? 4 Emba* tangenya lenge dokonya ita waiyepae andake mende setamopa aipa petala embame embanya endakali yango mende kandao, ‘Embanya lengenya kuni silyamona nyakatoo,’ latepe? 5 Emba sambo akali epe jili pyoo kalyeno! Wambao embanya lengenya ita waiyepae andake mende silyamo doko nyoo nepao embanya lenge takondape petala, endakali yango mendenya lenge kuni silyamo doko kapa pao nyoo nepakamaiti.
6 “Nyakamame* epe etete dupa endakali yana jepae dupa namaiyepape. Dee nyakamanya mamaku epe dupa endakali mena jepae dupa katatamisa pyale lao namaiyepape. Maitamino kandao doko, dokaitame moko katanya iki nepatala, kapilyetala nyakama nao indyuu nepatamina,” Jisasame lea-pyaa.
Tee lao kutao kaita watawata pyepape leamo doko
(Lu 11:9-13)
7 “Nyakamame** tee laapape! Kapa pao nyetami. Kutalapape! Kapa pao kandatami. Andakaita watawata pyepape! Kapa pao lumbakata. 8 Tee lelyamino endakali dupa pitakame nyingima. Kutilyamino endakali dupa pitakame kandengema. Andakaita watawata pilyamino endakali dupa pitakanya kaita lumbakamaingi. 9 Nyakamanya mendenya wane mendeme takange kandao mapu mende tee latamopa kana mende maitamipi? 10 Dee baame wapaka mende tee latamopa kanopato koo nanenge mende maitamipi? 11 Dopana,* nyakama takange koo dupame nyakamanya wane dupa oapi epe dupa maingima tamo kandao doko, nyakamanya Takange kaitinya katenge dokome nyakamanya wane mailyamino doko etete ita minao baa-kisa tee lelyamino endakali dupa opale epe dupa maingi.
12 “Endakali* dupame nyakamanya pyakapimili lao masetamili pyoaka nyakamame dupanya pyakamaiyepape! Moseseme pii pepa piapi potopesa dupame pii pepa piamipi dupame pii dokonyaka tenge paliuu lapae silyamona,” Jisasame lea-pyaa.
Kaitini kembo tambukinatae doko
(Lu 13:24)
13 “Koenge** panda koo ongonya penge kaitini doko andake. Kaitini dokonya kembo doko pee latae. Endakali longo dupame kaitini kembo dokonya kolamengema. Dopana nyakama kaitini kembo tambukinatae dokonya kolamalapape. 14 Lete* etete katenge panda dokonya penge kaitini doko yakane. Kaitini dokonya kembo doko tambukinatae. Endakali kuki mendai mendiaimi iki kaitini kembo doko kandasingimana,” Jisasame lea-pyaa.
Ita diipa itangepa
(Lu 6:43-44)
15 “Nyakamame* sambo potopesa dupa kandao isoo kalyepape! Dokaitame mena sipisipi yanu pee petala nyakama katatamisa ipatamiaka doko, monanda-kaita yana kapua joo ipatami. 16 Nyakamame* dokaitanya mana minatamino dupa kandatala dopale lamo lao masetami. Ikililyambu kende dupanya kopi lyingipi? Dee take ita dupanya anga lyingipi? 17 Ita* epe dupa pitakame dii epe mandenge. Ita koo dupa pitakame dii koo mandenge. 18 Ita epe dupame kapa pao dii koo namandenge. Ita koo dupame kapa pao dii epe namandengeaka. 19 Dii* epe namandenge ita dupa pitaka pokapala itatenya soo yangenge. 20 Dopana, nyakamame sambo potopesa dokaitanya mana minatamino dupa kandatala dopale lamo lao masetamina,” Jisasame lea-pyaa.
Jisasame endakali mendapua kandao nambame nyakama masala naengena latamo doko
(Lu 13:25-27)
21 “Namba* kandao, ‘Kamongo, Kamongo,’ lenge endakali dupa pitaka Kaitinya Katenge dokome isingi dokonya napatami. Nambanya Takange kaitinya katenge dokome masingili pingima dupa iki patami. 22 Gii* andake doko ipatamopa endakali longo dupame namba kandao, ‘Kamongo, Kamongo, naimame embanya kenge doko lao Wai Pii Epe doko lamaiyama. Naimame embanya kenge doko lao enjele koo longo watao piama. Naimame embanya kenge doko lao kalai pupu lapae longo dupa piamana,’ latami. 23 Gii* dokopa nambame dokaita lamaiyoo, ‘Nambame nyakama kukipi masala naengena, nyakama endakali koo pingi dupa namba kalyosa naepenya pupa!’ latona,” Jisasame lea-pyaa.
Akali lapomame anda lapoma piambino doko
(Lu 6:47-49)
24 “Dopana,** nambanya pii dutupa sepala watao minatamino endakali dupa pitaka, akali masepae mendeme baanya anda yuu kyotonya piamo dopale. 25 Aiyuu* ipao endaki lyoo poo pupu lao lao anda doko pyao takyalanya pia-pyaa. Dopa piamoaka doko, baame muku minapala yuu kyotonya piamo dokome takyala naya-pyaa. 26 Nambanya* pii datupa sepala watao minala nayatamino endakali dupa pitaka, akali masala naenge mendeme anda muku minala naenya mee yuu tambo lapaenya piamo dopale. 27 Aiyuu* ipao endaki lyoo poo pupu lao lao piamo dupame anda doko pyao takiamopa etete takyoo pandu pyambea-pyaana,” Jisasame lea-pyaa.
28 Jisasame* pii dutupa lao etapeamopa endakali kambu longo peteamino dupame, baame mana leamo doko sepala walu lao paka kayami-pyaa. 29 Nyakamanya mana setapae masingi akali dupame mana lengemali pyoo baame laa nayao baa tange-kisa pupu lapae singina lao mana lea-pyaa.
* 7:1 Pot 11:25; Lo 2:1-2; 14:10; 1 Ko 4:5; Je 4:11-12 * 7:2 Mk 4:24 * 7:3 Wee 36:2 * 7:4 Jo 8:7 * 7:6 Pot 23:9; Mt 10:11 * 7:7 Pot 8:17; Jet 29:13-14; Mt 18:19; Mk 11:24; Jo 14:13-14 * 7:7 Dit 4:30; Lu 18:1-8; Jo 15:7; 16:23-24; Je 1:5; 4:3; 1 Jo 3:22; 5:14-15 * 7:11 Je 1:5,17; 1 Jo 3:22; 5:14-15 * 7:12 Pot 3:27; Mt 22:39-40; Lu 6:31; Lo 13:8-10 * 7:13 Wee 1:1; Jet 21:8; Jo 14:6 * 7:13 Dit 30:15-19 * 7:14 Mt 19:24; Jo 10:7-10; Ap 14:22 * 7:15 Ese 22:27; Mt 24:4,11,24; Jo 10:12; Ap 20:29; 2 Pi 2:1; 1 Jo 4:1; Pa 13:11; 19:20 * 7:16 Mt 12:33-35; Ga 5:19-24; Je 3:12 * 7:17 Mt 12:33 * 7:19 Mt 3:10; Lu 3:9; Jo 15:6 * 7:21 Ais 29:13; Emo 5:21; Mt 21:31; Lu 6:46; Lo 2:13; Je 1:22-25; 2:14-17; 1 Jo 3:18 * 7:22 Jet 14:14; Mt 25:11-12 * 7:23 Wee 5:5; 6:8; Mt 10:33; 13:41-42; 25:41; 2 Ti 2:19 * 7:24 Pot 10:8 * 7:24 Je 1:22-25 * 7:25 Pot 10:25 * 7:26 Pot 12:3,7; Ese 33:31; 1 Jo 2:17 * 7:27 Jop 8:15; Ese 13:10-14 * 7:28 Mt 11:1; 13:53; 19:1; 26:1; Mk 1:22; 5:20; Lu 4:32; Jo 7:15,46
☰