19
Goteme Sodomo Gomorapa Yangeamo Doko
1 Yuu kuiyala peamopa, Lote baa Sodomo lome kambu dokonya peteamopa, enjele lapoma epeambi. Epeambino kandatala, baa sakatao pao enjele dolaponya enombanya luma lakapala, langalu yuunya sia. (Enjele dolapo wamba Abrakame kanja epeambino dolapoaka.)
2 Dopa petala, baame lao pituu, “Nambanya akali andake dolapo, namba nyakambanya kalai akali dakenya andaka nyakambanya moko wasa pyapala, luu palipala, yongama wamba paanya ipambino dokonya patambina, nambanya andaka mona ipupa” lea. Dopa leamopa, akali dolapome pii yanu pyao, “Nalimba endakali kambu pingi panda dokonya palimbanana” daa leambi.
3 Dopaka doko, Loteme etete kongo leamosa, akali dolapome yakana latala, baanya andaka peami. Pupala Loteme neepi, betesa yisa napalengepi, dupa yangapeamopa, neami.
4 Nee napala, ene luu palyanya peteaminopa, Sodomo tange wane kolepi, akali angipi, pitakame Lotenya anda doko katao kakopeami.
5 Kakopatae katao dokaitame Lote lao wii lao, “Akali lapoma embanya andaka ipambino dolapo anja pilyambipi? Naimame dolapo elya pingi pimana, laminao kamaka pyakalya” leami.
6 Dokopa Lote baa akali kateamino dokonya kamaka pupala, kaita paii lanyia.
7 Paii lanyetala dokaita lamaiyoo, “Kaimia paluma, mana kopeta dopale dupa kaeyalapa.
8 Nambanya wanenge mapukae dolapo nyakama masetamili pyepale ditoo. Akali dolapo nambanya andaka ipambino dokonya, nyakamame mende pyaa naeyapengena” lea.
9 Dopa leamopa, Sodomo tange dupame, “Lote embame kaita lyokala naeya!” leami. Dee nyakamalapo laloo pyoo, “Akali tata waka dakeme naima mana lelyape?” leami. Dopa latala, Lote lamaiyoo, “Naimame emba minao etete koeyasalamanona” leami. Dopa latala, Lote puu lao, tuu lanya nepatala, anda kaita doko kalunya pyandalanya piami.
10 Dokopa enjele dolapome kingi kamaka pyasetala, Lote andakote pyalya lanyetala, kaita paii lanyiambi.
11 Kaita paii lanyetala, enjele dolapome wane kolepi, akali angipi, kamaka kateamino pitaka lenge minao iminjiambino dokome, nyakama kaita kutao kaeyami.
12-13 Dokopa enjele dolapome Lote lamaiyoo, “Taono dakenya mana koo tata longo pilyamino lapae Kamongome sepala, nalimbame taono dake koeyasala pupa laamo. Dokonya nalimbame yuu dake koeyasalanya pilyambano. Dopana, embanya enda wanepi, wanengenya lakuingipi, dupa lanyoo, yuu dake yakinao, paka puu” leambi.
14 Dopa lateambinopa, Lote kamaka pyakalyetala, baanya wanenge dolaponya lakuingi dolapo lamaiyoo, “Kamongome taono dake koeyasotoo lelyamona, nyakamba taono dake yapa yakinao, paka pupa!” lea. Pii leamo doko, male pyoo lelyamo lao masiambi.
15 Yuu yongalanya piamopa, enjele dolapome Lote lamaiyoo, “Embanya enda dokopi, wanenge dolapopi, yapa lanyoo puu. Endakali waka dupa koeyatami kainanya nyakama koeyala naeyalapalena” leambi.
16 Dopa leambinoaka doko, Lote nembo tele peteamopa, enjele dolapome Lotepi, etanengepi, wanengepinya kinginya minatae katao, taono yakinao kamaka peami. Kamongome Lote kondo kaeyamo dokonya, dopa piambi.
17 Dopa petala, enjele dokonya mendeme lamaiyoo, “Nyakama tatamina, yuu manda silyamo omonya yapa pupa. Pao pituu, maitakaita kandapilyala naeyalapape. Yuu lama-lama dupanya mendasa nembo tao napilyapape” lea.
18-19 Dokopa Loteme lao pituu, “Akali andake, embame namba kondo kaeyao niseteleno. Yuu manda omo londati waka-lamona, ene patopa, taono koeyasete dokonya apata koeyalapu-lumu.
20 Namba taono yakane mende tengesa joo silyamo dokonya puu lateno doko, namba yaka kalyapona” lea.
21 Dopa leamopa, enjele dokome baa lamaiyoo, “Doko yakalumuna, nambame taono yakane doko koeyasala naeyatoo, emba dokonya puu.
22 Nyakama kaitinisa pao katataminopa, nambame mende napitoana, nyakama yapa patae katao pupa” lea. Loteme taono doko yakanena leamo dokonya, kenge Soa maiyami.
23 Niki pyakaeyamopa, Lote Soa pao kalyu pia.
24 Dokopa Kamongome kana yuli taputa dupa kaitinya katao, taono Sodomo Gomorapa-kisa aiyuu joo kaii lao yangea.
25 Yangeamo dokome, taono dolaponya yuu lama-lama makisa singi dupa pitakanya endakalipi, kaka itapi, pitaka yangao koeyasia.
26 Lote etanenge paka pao pituu, dee maitakaita kandalyulu piamopa, baa sole kuli jia.
27 Oo yongama wamba Abrakame sakatatala, wamba Kamongopa pii lao kateambino dosa pao katea.
28 Dokonya katao, Abrakame taono Sodomo Gomorapi makisa yuu lama-lama singi dokaita kandaneamopa, anda telyamopa kena pingili pia.
29 Goteme yuu lama-lama dokonya taono Lote katenge dupa pitaka yangao etasia. Dopaka doko, Goteme Abrakame masetala, endakali koeyamino kaina dupanya, Lote koeyala naena latala, baa nyoo lemba pia.
Lote Baa Tata Moaba Amonapanya Yumbange Jiamo Doko
30 Lote baa taono Soa kalyanya paka kaeyapala, wanenge dolapo lanyoo, yuu manda mendenya pea. Dokaita pao kananda koko mendenya paliu kateami.
31 Dokonya kateaminopa, Lote wanenge mupa dokome kakingi kole doko lamaiyoo, “Nalimbanya takange lyanga jetelyamo. Akali mendeme nalimba lanyepala, wane mandyuu dita mende yuu dakenya nakalyamo.
32 Dopana, nalimbanya takange waene longo nena maitala, baa masala naeyatamopa, palimaitala, baa-kisa wane mandyuu nyembana. Nyetambano dokome, naima tata doko paliuwaka patana” lea.
33 Leambinoli pyoo, kuka dokonya nyakambanya takange waene longo nena maiyambi. Baa napala, masala naeyamopa, wanenge mupa dokome baa palimaiya. Oo yongama wanengeme piamo dupanya mende takangeme masala naeya.
34 Yuu gii mende dokonya wanaku mupa dokome kakingi kole doko lamaiyoo, “Kuakama nambapa tole palyambanona, indupa kuakama embapa tole palyepale, deaka waene longo nena maimbana. Dopa pitambano dokome, naima tata doko etala naeyao paliuwaka patamina” lea.
35 Dopa latala, nyakambanya takange deaka waene longo nena maitala, wanaku kole dokome takange pao palimaiya. Oo yongama wanenge kole dokome piamo dupanya mende takangeme masala naeya.
36 Dopa piambino dokome, Lote wanenge dolapo wane tongota peteambi.
37 Wanaku mupa dokome wane ane mandipala, kenge Moaba lea. Epapu akali tata Moaba lao palelyamo.
38 Wanaku kole dokome wane aneaka mandipala, kenge Benami lea. Epapu akali tata Amona lao palelyamo.