20
Abrakameme Abimeleke Minakasiamo Doko
1 Abrakame baa Mamarenya lepa ita balo doko yakinatala, yuu Negepe pea. Pupala yuu Kadesapi, Suapi, kaina dokonya pao katea. Gii mendalapo katapala, baa pao taono Gera katea.
2 Dokonya katao, Abrakameme Gera tange dupa lamaiyoo, Sara baanya pimalengena lea. Dokopa Gera tange kiŋi Abimelekeme Sara kandatala, baanya kalai akali dupame Sara andaka lanyoo epena lea.
3 Lanyiamoaka doko, kuakama Goteme kombeame Abimeleke lamaiyoo, “Embame enda akali katenge nyipi-lamo dokonya, emba kumalapenona” lea.
4 Dopa leamopa, Abimelekeme baa lamaiyoo, “Nambame enda doko yonge tole napyapu. Akali Andake, embame naima endakali tenge nakatenge dupa mee pyao kumasetepe?
5 Abrakameme Sara baanya pimalengena lea. Sarame Abrakame baanya pimalengeakana lea. Dopa leambino dokonya, nambame Sara nambanya enda joo lanyio. Dopana, namba ketae tenge mende nakalyamona” lea.
6 Dopa leamopa, Goteme, “Kiningi leeno. Embame nambanya enombanya koo napyaale lao, kaita lyokapu. Dopa pipu dokonya, embame enda doko yonge tole napyapi.
7 Enepapu enda doko tange maiyakamai. Akalingi doko propeta mendena, dokome embanya loma sakatamopa, emba kumala naeyalapeno. Enda doko pilyina laa naeyateno kandao doko, kiningi embapi, embanya palupi, dupa pitaka kumalaminona” lea.
8 Oo yongama Abimeleke baanya kalai akali dupa pitaka epena latala, Goteme leamo dupa pitaka lamaiya. Lamaiyamopa sepala, paka kaeyami.
9 Dokopa Abimelekeme Abrakame epena latala, baa lamaiyoo, “Embame naima aipuma minao koeyasipipi? Embame nambapi, nambanya endakalipi, dupa aipuma elya andake nyoo dipipi? Embame naima-kisa nalapenge mende lapi-lamona” lea.
10 Dopa latala Abimelekeme Abrakame tipa pyoo, “Embame aipa lao masetala, pii doko lapipi?” lea.
11 Dopa leamopa, Abrakameme pii yanu pyao, “Nambame masio doko, 'Yuu dakenya Gote paka kaenge mende nakatengema dokonya, nyakamame nambanya enda doko kanju katao, namba pyatamina' latala leo.
12 Dopaka doko, Sara nambanya pimalenge. Nalimbanya takange mendai, endangi wakale. Baa nambanya etanenge.
13 Dokopa nambanya takange yakinatala, Goteme puu leamo dokopa, nambame Sara lamaiyoo, “Embame namba auu kaeyateno doko, nalimba patamba yuu dupanya pao pituu, namba embanya pimalengena lape' lao lamaiyona” Abrakameme lea.
14 Dokopa Abimelekeme Sara pena lao pituu, sipisipipi, bulumakaopi, kalai enda akalipi, dupa apata Abrakame maiya.
15 Dopa petala Abimelekeme baa lamaiyoo, “Yuu doko pitaka nambanyana, embanya auu kaengeme katatoo lao masete dosa katape” lea.
16 Dopa latala Abimelekeme Sara lamaiyoo, “Nambame embanya pimalenge doko silipa muni 1,000 mailyo dokome, embanya tata dokaitame emba koo mende napipi-lamo lao, kandena lao pilyona” lea.
17-18 Wamba Abimelekeme Sara lanyiamo dokonya tenge latala, Kamongome Abimelekenya etanengepi, kalai endapi, dupa pitaka wane namandena lao, ingi kyeto jisia. Dopaka doko, Abrakameme Gote lao loma siamopa, Abimelekenya yaina doko etasepa, enda dupa dee wane mandena lao, ingi kaka seta pyakamaiya.