21
Sarame Aisake Mandeamo Doko
1 Kamongome wamba pii lao yaki piamoli pyoo, Sara minao auu pisia.
2 Abrakame baa akali wambake jeteamopa, Goteme gii seteamo dokonya Sarame wane ane mandea.
3 Dokopa Abrakameme wane doko kenge Aisake lea.
4 Goteme leamoliaka pyoo, Aisake baa yuu gii 8-pela leamopa, Abrakameme Aisake baa Gote tatana lao yanu kepakamaiya.
5 Abrakame baa ee kana 100 leamopa, Sarame Aisake mandea.
6 Dokopa Sarame lao pituu, “Goteme namba-kisa mana etete auu pipae minalame-lamo dokonya, nambame auu kaeyao, gii kaelyo. Pii dake setamino dupa pitakame auu kaeyapae nyetamina” lea.
7 Deaka Sarame lao pituu, “Namba wambakesa wane mende kopyoo andu maiyapeno lao masala naengemaka doko, indupa nambame wane ane dake Abrakame wambakesa manjakamaipuna” lea.
Abrakameme Eka Isamalepa Watao Piamo Doko
8 Wane doko andu pyakeamo gii dokopa, Abrakameme nee andake mende yangakamaiya.
9 Gii dokopa, Injipi tange enda Ekame Abrakamenya wane ane manjakamaiyamo dokopa, Aisakepa, male pyoo kateambinopa, Sarame kandea.
10 Kandatala Abrakame lamaiyoo, “Embanya moeya dupa pitaka nambanya ikiningi Aisakenya ikina, embanya kalai enda Eka ikiningi dokome embanya moeya dupanya mende nanyinana, lapota watao pyaa” lea.
11 Eka ikiningi doko Abrakamenya ikiningiaka dokonya, Sarame pii leamo doko sepala, Abrakame baa etete mona tanda kaeya.
12 Dopaka doko, Goteme Abrakame lamaiyoo, “Embame kalai enda Ekapa, ikiningipa lao mona tanda nakaeyape. Saranya pii latamo doko sepe. Aisakenya puu dokonya, tenda emba tata doko andake joo, palita.
13 Embanya kalai enda dokonya ikiningi doko embanya ikiningiaka. Dokonya tenda baanya mandipaenya mandipae dupa minao, tata andake jotoakana” lea.
14 Oo yongama wamba Abrakameme penge meme yanungimi wasepae mendenya endaki kamuo mandipala, nee dupa mandipala, Ekanya latainya sakamaiya. Dopa petala, Ekapa wane dokopa, lapota pena lea. Pena lateamopa, nyakamba yuu sapu Besiba dokonya patala, kyakao maeko-maeko lao, paeyambi.
15 Paeyambinopa, endaki etapeamopa, wane doko ita yakane tenge mendenya petena lea.
16 Wane doko kumatamopa, nakandato latala, baa tependale joo pupala, ee lao peteamopa, wane doko eaka lea.
17-18 Goteme wane dokonya ee leamo doko sia. Sepala Gotenya enjele mendeme kaiti-kisa katao, wii lao, “Eka, emba aipa pyape? Goteme wane dokonya ee doko salamona, emba paka nakaeyape. Tenda baanya mandipaenya mandipae palitamino dupa, nambame minao andake jotona, emba pupala, wane doko kinginya minao toeya katasa!” lea.
19 Dopa petala, Goteme Eka endaki pete tombapae mende kandena lea. Dokopa, Ekame kandatala, penge dokonya endaki kamuo mandyuu, ikiningi nena maiya.
20-21 Wane doko Gotepa apata katao angi jia. Baa yuu sapu Parane lenge dokonya katao, yanda ipyoo pyao, etete waa katea. Dokonya kateamopa, endangimi enda Injipi tange mende lanyakamaiya.
Abrakame Abimelekepa Pii Yaki Piambino Doko
22 Gii mendepa, Abimelekepa, baanya yanda singi akali mupa Pikolapa, Abrakame kateasa peambi. Pupala, Abimelekeme Abrakame lamaiyoo, “Embanya kalai dupa pitakanya Goteme auu pisoo katenge.
23 Epapu embame nambapi, nambanya mandipaenya mandipae palitamino dupa minakasala naeyatona lao, Gotenya kengenya namba langi. Nambame emba auu pisipuli pyoo, embame nambapi, nambanya tatapi, tisa joo kalyeno yuu dakepi, dutupa auu pisakape” lea.
24 Dopa leamopa, Abrakameme baa lamaiyoo, “Embame leenoli pituna lao, kiningi etete lelyona” lea.
25 Dokopa, Abrakameme Abimeleke pyalanya lao, “Wamba embanya kalai akali dupame nambanya endaki pete tombapae doko nyiamina” lea.
26 Dopa leamopa, Abimelekeme Abrakame lamaiyoo, “Embame namba langya naeyapino dokonya, apimi pipyape lao nambame nakandapu. Enepapuaka nambame silyo dakena” lea.
27 Dopa lateamopa, Abrakameme sipisipipi, bulumakaopi, minao ipupala, Abimeleke maitiamopa, nyakamba pii yaki piambi.
28 Yaki petala, Abrakamenya sipisipi paleamo dupanya yakane ina 7-pela nyepala, waka mendasa palyia.
29 Dokopa, Abimelekeme Abrakame tipa pyoo, “Embame sipisipi ina 7-pela nyepala, waka mendasa palyipi-lamo doko, aipuma pipipi?” lea.
30 Dokopa Abrakameme pii yanu pyao, “Sipisipi yakane 7-pela datupa emba ditoo lao pipu. Embame nyeteno dokome, endaki pete nambame tombeo dake, nambanya-lamo lao panena” lea.
31 Anelyapome pii yaki piambi dokonya, yuu doko kenge Besiba leami.
32 Besiba yuu dokonya pii yaki petala, Abimelekepa, yanda singi Pikolapa, Pilistiamanya yuu dokonya pilyiambi.
33 Anelyapo pateambinopa, yuu Besiba dokonya ita kenge tamatesa lenge mende Abrakameme wai pyatala, dosa katao Kamongo Gote Kataowaka Katenge doko lao mambo pyao, loma sia.
34 Pilistiamanya yuu dokonya Abrakame mendasa pata-pata pyoo, gii longo waka katea.