121
Kanto de suprenirado.
Mi levas miajn okulojn al la montoj:
De kie venas al mi helpo?
Mia helpo venas de la Eternulo,
Kiu kreis la ĉielon kaj la teron.
Li ne lasos vian piedon falpuŝiĝi;
Via gardanto ne dormetas.
Jen ne dormetas kaj ne dormas
La gardanto de Izrael.
La Eternulo estas via gardanto;
La Eternulo estas via ombro ĉe via dekstra mano.
En la tago la suno vin ne frapos,
Nek la luno en la nokto.
La Eternulo vin gardos de ĉia malbono,
Li gardos vian animon.
La Eternulo gardos vian eliron kaj eniron,
De nun kaj eterne.