3
Abimangizi baꞌBahisiraheeri bagira amabi
1 Nie nadetaga kwokuno:
«E bimangizi baꞌBahisiraheeri, yuvwagwi!
Mwe mukwaniini ukukizi twa imaaja mu kati koꞌkuli.
2 Kundu kwokwo, si mwe mushombiragi amiija, munakuuziri amabi.
Mwe munagweti mugakizi shaaza uluhu ku bandu baani,
munagweti mugalyosa neꞌminyofu ku mavuha gaabo, banakiri ho!
3 Mugweti mugakizi shulula iminyofu yaꞌbandu baani, noꞌluhu lwabo,
munavune naꞌmavuha gaabo.
Muli mu batenga-tenga nga nyama ízigadeekerwa mu nyungu.
Iyo iminyofu yabo, mukabuli kizi givwajagira.»
4 Aahabi! Mugweti mugakizi takira Nahano, gira amùtabaale.
Kundu kwokwo, atagamùyakula.
Bwo mwâli kizi gira ibitalaalwe,
akolaga agamùbisha amalanga gaage!
5 Nahano adetaga kwokuno:
«Mwe baleevi, si mulyagagi beꞌbibeesha naaho,
munagweti mugakizi yigiriza abandu íbitali nga byo.
Ikyanya muli mu ba muhaabirwi ibyokulya,
munayami deta kwokuno: “Hagaaba mutuula!”
Si iri abandu batangamùheereza byo muloziizi,
munayami deta kwaꞌbagoma baabo, bayami balwisa.
6 Ku yukwo, mukolaga mugayirirwa, ndaakigo mabone mugalonga.
Ikyanya ikihulu kigamùzinga, mutagaki longa ukulagula ku bigaaba.
Mwe baleevi, izuuba ligamùsookeraga,
halinde munabaagage mukola mu mamaata mu kihulu.
7 Abanamabone biinyu, bagagwatwa neꞌshoni.»
Na ngiisi ábali mu gira mbu balagule, bagateteerwa ngana.
Mugaaba mutakiri mu longa ishuvyo imwa Rurema,
kinatume mweshi mugabwikira akanwa noꞌkuboko.
Mika, umuleevi mwemeera wa Rurema
8 Halikago niehe, nyijwiri mweꞌmisi,
na nyijwiri mwoꞌMutima gwa Nahano, noꞌkuli kwage.
Kwokwo, njobwiri ukubwiririra Abahisiraheeri ngiisi kwo bakamúyihindulira,
iri banakizi yifunda mu byaha.
9 Mwe Bahisiraheeri, munyuvwagwe!
Muyamiri mushombiri íbikwaniini, iri munashobania ukuli.
10 Si mugweti mugayubaka i Yerusaleemu mu kuyitana!
Munali mu kizi yifunda mu bitalaalwe.
11 E batwi beꞌmaaja! Si mu kukizi twa imaaja, mugweti mugalooza ibitulire.
Na niinyu, mwe bagingi! Si muli mu yigiriza naaho, mu kulooza imbembo.
Na niinyu, mwe baleevi! Si mutali mu tanga ubuleevi, buzira kuhembwa.
Kundu kwokwo, mweshi mudesiragi mbu: «Si tuyegamiiri Nahano.
Ali hano kuguma na nyiitu, ndaanayo nguuke yo tugalonga.»
12 Hiꞌgulu liinyu, kyo kitumiri akaaya keꞌYerusaleemu kagahingwa nga ndalo,
kanahinduke biguuka!
Na ngiisi ho bayubasiragi inyumba ya Nahano,
hooshi, hagaamera ibishungu-shungu.