4
Umugazi gwa Nahano
1 Mu siku zeꞌmberuuka, umugazi úguyubasirwi kweꞌnyumba ya Nahano,
gwo gwâye gingikwe ukuhima igindi yoshi.
Gwâye shuume bweneene ukuhima utugangazi,
halinde abandu booshi banakizi gushololokera.
2 Ibinyamahanga bingi bigakizi guyija kwo, iri binadeta:
«Muyije, tuzamuukire ku mugazi gwa Nahano,
halinde mu nyumba ya Rurema wa Yakobo.
Mango twahika, agatuyigiriza injira zaage,
halinde tukizi zikulikira.»
Iyo munda i Sayuni, yaꞌmigirizo hiꞌgulu lya Nahano gagakizi lyoka.
Ee! Igambo lya Nahano, haaho i Yerusaleemu ho tugaliyigirizibwa.
3 Yibyo binyamahanga bingi, kundu biryagagi mwoꞌbushobozi, binatuuziri hala,
haliko Nahano agakizi bihambuula.
Ingooti zaabyo zigaatulwa mweꞌfuka zoꞌkuhinga.
Kiri naꞌmatumu, gagaatulwa mweꞌmigushu.
Ndaagwo mulala úgugaki gendi lwisa ugwabo,
batanâye ki yikomereze kwiꞌzibo.
4 Si ngiisi mundu agakizi luhuukira mwiꞌdako lyeꞌmizabibu yage, neꞌmizehituuni yage.
Ndaakiye mundu úgaki bateera ikyoba.
Yaga gooshi, Nahano woꞌbushobozi bwoshi, ye gadesiri.
5 Ibinyamahanga, kundu bagweti bagakulikira imizimu yabo,
haliko twehe tugakizi kulikira Rurema Nahamwitu, halinde imyaka neꞌmyakuula!
Ubutwali bwa Nahano bwasikama
6 Nahano adetaga kwokuno: «Ku yikyo kyanya, nâye kuumanie ibirema.
Na ngiisi ábakayimulwa, kundu nienyene nꞌgabayingiza mu makuba,
haliko ngashubi bakuumania.
7 Ee! Balya ábakalemaha, ngakizi balanga.
Na kundu bâli yimwirwi, ngashubi bakania, gube mulala gweꞌmisi.
Nie Nahano ngaaba mwami wabo ku mugazi gweꞌSayuni,
ukulyokera zeene, halinde imyaka neꞌmyakuula!
8 Na naawe, e mugazi gweꞌYerusaleemu, we mu laliira abandu,
ugashubi longa ubwami nga kwokulya kwa kare.
Unashubi twala hiꞌgulu lyaꞌbandu.»
Kituma kiki Abahisiraheeri bakwaniini bagende i Babeeri
9 Aahago! Kituma kikagi mugweti mugabanda akashiba?
Ka mutaki hiiti mwami?
Ka keera mwateera abitegeereza?
Si mukoli lyaniirwi, nga mukazi úkoli gweti úgaliibwa noꞌmukero!
10 E batuulaga beꞌYerusaleemu! Mugenderere noꞌkugongeera,
iri munabululuka nga mukazi úkola mu liibwa noꞌmukero.
Si mukola mugashaagaga mu kano kaaya,
munagendi tuula mu mbinga.
Ee! Mukola mugatwalwa hala, i Babeeri.
Halikago mango muba mukola iyo munda,
Nahano agayiji mùkiza, anamùguluule mu maboko gaꞌbagoma biinyu.
11 Si buno, ibinyamahanga bingi bigweti bigayiji mùteera.
Bagweti bagaadeta kwokuno: «E balya, tugendi shereeza akaaya keꞌYerusaleemu.
Neꞌkyanya tugaaba keera twakasindaga,
tugakizi kaloleera, iri tunashambaala.»
12 Kundu kwokwo, yabo bandu batayiji ngiisi byo Nahano atoniri,
batanasobanukiirwi neꞌshungi zaage.
Si Nahano agweti agabakuumania nga mihuli yeꞌmbuto ízigagendi komwa.
13 Nahano adetaga kwokuno: «E bandu beꞌYerusaleemu,
muyimuke, gira mubakubule.
Ngamùshoboleesa, mube nga muhiiti amahembe geꞌbyuma
neꞌbinogosho byoꞌmulinga.
Kwokwo, yibyo binyamahanga mugabitema-tema bitolo-bitolo.
Noꞌbugale bwabo, munayiji bundangira nie Nahano,
bwo nie ndwaziri amahanga gooshi.»
14 E Yerusaleemu, akaaya keꞌndwani!
Mukuumanie abasirikaani biinyu haguma!
Si abagoma bakoli kuzungulusiri, gira bayiji mùteera.
Bagakoleesa ingoni, mu kushulikira umutwali waꞌBahisiraheeri i malanga.