3
کُوغَلْ بُلُسْ ندٜرْ يِمْٻٜ نَاع يَحُودَنْکٛعٜنْ
1 کَنْجُمْ وَطِ مِنْ، بُلُسْ، طُمْ مَٻِّيَمْ ندٜرْ سُودُ شُرَلْ نغَمْ اٜ مِ وَعَجِنَ حَبَرُ يٜىٰسُ اَلْمَسِيحُ تٛ اٛنٛنْ يِمْٻٜ نَاع يَحُودَنْکٛعٜنْ؞
2 غٛونغَ اٛنْ نَنِي اَللَّه حٛکِّييَمْ کُوغَلْ نغَعَلْ مِ حُوَنغَلْ نغَمْ ٻٜيْدَارِ مٛوطٛنْ؞
3 اَللَّه حٛلِّييَمْ سِرُّ مُوطُمْ، نٛنْ نٛ مبِنْدِرْمِ سٜطَّ ندٜرْ مَاجُمْ؞
4 تٛ اٛنْ جَنْغِي کٛ مبِنْدُمِ، اٛنْ اَنْدَيْ اٜ مِ وٛودِ فَامُ دٛوْ سِرُّ اَلْمَسِيحُ؞
5 ندٜنّٛ يِمْٻٜ مبِعَاکَ سِرُّ طُعُمْ، اَمَّا جٛونِ اَللَّه وَنْغِنَنِيطُمْ لِلَاٻٜ مَاکٛ اٜ اَنَّبٛعٜنْ مَاکٛ شٜنِيٻٜ بَرْکَ رُوحُ مَاکٛ؞
6 سِرُّ طُمْ وٛنِ بَرْکَ حَبَرُ بٜلْطُمْ دٛوْ يٜىٰسُ اَلْمَسِيحُ يِمْٻٜ نَاع يَحُودَنْکٛعٜنْ کٜٻَيْ کٛو طُمٜ کٛ اَللَّه حٛکَّتَ يَحُودَنْکٛعٜنْ؞ ٻٜ نغَرْتِي بٛ ٻَنْدُ غٛعٛ اٜ يَحُودَنْکٛعٜنْ؞ حَوْتِ اٜ يَحُودَنْکٛعٜنْ ٻٜ کٜٻَيْ کٛ اَللَّه وَطِ اَلْکَوَلْ بَرْکَ يٜىٰسُ اَلْمَسِيحُ؞
7 بَرْکَ يِدّٜ اٜ بَوْطٜ اَللَّه، مِ حٛکَّامَ دٛکَّلْ حٛکُّکِ حَبَرُ بٜلْطُمْ دٛوْ يٜىٰسُ؞
8 کٛو ندٜ مِ ڤَمَرٛ ندٜرْ يِمْٻٜ اَللَّه فُو، اَللَّه سُٻِييَمْ مِ وَعَجِنَنَ يِمْٻٜ نَاع يَحُودَنْکٛعٜنْ دٛوْ بَرْکَ طُمْ لِمَتَاکٛ کٜٻٜتٜىٰطُمْ تٛ اَلْمَسِيحُ؞
9 ندٜنْ مِ وَطَ يِمْٻٜ فُو نغِعَ نٛ دَبَرٜ اَللَّه شُوطِيندٜ حٜىٰوِرْتَ؞ اَللَّه تَغُطٛ کٛو طُمٜ سُوطِي سِرُّ طُمْ دَغَ جَامَنُوجِ پَٻِّيطِ؞
10 اٛ وَطُ نٛنْ نغَمْ ندٜرْ جَامَنُ طُعُمْ، بَرْکَ کَوْتَلْ تٛکُّٻٜ يٜىٰسُ، مَلَاعِکَعٜنْ غٛودُٻٜ لَامُ اٜ بَوْطٜ دٛوْ، ٻٜ اَنْدَ دَبَرٜ اَللَّه مَوْندٜ؞
11 طُعُمْ طُمْ وَطَامَ نٛنْ نٛ اَللَّه يِطِ وَطِرْکِطُمْ دَغَ اَرَنْدٜ، اٛ حٜبِّنِيطُمْ بَرْکَ کٛ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ؞
12 بَرْکَ يٜىٰسُ اٜ حٛولَاکِ کِ کٛولِيطٜنْمٛ، جٛونِ اٜنْ مبَاوِ يَاکِ يٜىٰسٛ اَللَّه کُلٛلْ وَلَا، اٜنْ تَبِّتِنَ اٛ جَٻَيْعٜنْ؞
13 نغَمْ نٛنْ، اٜ مِ تٛرٛوعٛنْ، تٛع اٛنْ نغٜوْرُ دٛوْ تٛرَّ کَ نجَرَيْمِ نغَمْ مٛوطٛنْ، نغَمْ تٛرَّ کَنْ وَرْتَنَيْعٛنْ فِي بٛطُّمْ؞
يِدّٜ يٜىٰسُ اَلْمَسِيحُ
14 نغَمْ مَاجُمْ، اٜ مِ دِشّٛو اٜ مِ تٛرٛو ݧَاکٛ مٛ دٛوْ؞
15 فُو لٜݧِ غٛنْطِ دٛوْ اٜ لٜيْ، کَنْکٛ حٛکِّطِ يٛنْکِ؞
16 اٜ مِ تٛرٛومٛ دَغَ ندٜرْ رِسْکُ مَنْغُ مَاکٛ اٛ سٜمْبِطِنَعٛنْ، اٛ حٛکَّعٛنْ بَوْطٜ لَاوٛلْ رُوحُ مَاکٛ نغَرْتٛنْ شٜمْبِطْٻٜ ندٜرْ ٻٜرْطٜ مٛوطٛنْ،
17 نغَمْ اَلْمَسِيحُ جٛوطٛو ندٜرْ ٻٜرْطٜ مٛوطٛنْ بَرْکَ حٛولَاکِمٛ؞ اٜ مِ تٛرٛو اَللَّه نغَمْ يِدّٜ لُغَّ سٜمْبِطَ ندٜرْ ٻٜرْطٜ مٛوطٛنْ،
18 نغَمْ يِمْٻٜ اَللَّه فُو مبَاوَ اَنْدُکِ نٛ يِدّٜ اَلْمَسِيحُ يَاجِرِ، اٜ نٛ ندٜ جُوتِرِ، اٜ نٛ ندٜ تٛوِرِ، اٜ نٛ ندٜ لُغِّرِ؞
19 کَدِنْ اٜ مِ يِطِ اَنْدٛنْ يِدّٜ اَلْمَسِيحُ ندٜ ٻُرِي سٜمْبٜ اَنْدَلْ، نغَمْ کٜٻٛنْ کٜىٰوٛنْ نغِکُّ اَللَّه؞
20 اَللَّه وَاوَيْ وَطُکِ کٛ ٻُرِ کٛ تٛرِيطٜنْمٛ کٛو کٛ ݧُمٜتٜنْ بَرْکَ بَوْطٜ مَاکٛ کُوٛوجٜ ندٜرْ مٜىٰطٜنْ؞
21 مَنْغُ تَبِّتَ تٛ اَللَّه بَرْکَ يٜىٰسُ اَلْمَسِيحُ اٜ تٛکُّٻٜمٛ ندٜرْ جَامَنُوجِ فُو حَا اَبَدَا اَبَدِنْ! اَامِنْ؞