4
وَرْتُکِ غٛعٛ ندٜرْ رُوحُ اَللَّه
1 نغَمْ نٛنْ، اٜ مِ تٛرٛوعٛنْ، مِنْ شُرَاطٛ نغَمْ حُوَنْکِ جٛومِرَاوٛ مٜىٰطٜنْ، نغَطٜىٰ جٛنْدٜ ڤٛتُّدُندٜ اٜ کٛ اَللَّه نٛدِّرِعٛنْ؞
2 کٛو ندٜيٜ نغَرْتٜىٰ غٛودُٻٜ حَکِّيلٛ، لٜسْتِنٛنْ کٛعٜ مٛوطٛنْ، نغَرْتٛنْ ٻٜ مُݧَلْ، مُݧْمُݧْتِرٛنْ ندٜرْ يِدّٜ؞
3 نغَطٜىٰ کٛ مبَاوٛتٛنْ وَطُکِ نجٛغٛوطٛنْ کَوْتٛلْ حٛورٜ نغٛلْ رُوحُ اَللَّه حٛکِّعٛنْ ندٜرْ جٛنْدٜ جَمْ کَوْتُندٜ کٛعٜ مٛوطٛنْ؞
4 اٜنْ نغَرْتِي بٛ ٻَنْدُ غٛعٛ، اٜنْ نغٛودِ رُوحُ غٛعٛ، نٛنْ مَا اٜنْ نغٛودِ کَمُّندٜ وٛعٛيْرٜ ندٜ اَللَّه نٛدِّرِعٜنْ؞
5 اٜ وٛودِ جٛومِرَاوٛ غٛعٛتٛ، اٜنْ کٛولِي يٜىٰسُ اَلْمَسِيحُ اٜ حٛولَارٜ وٛعٛيْرٜ، اٜ وٛودِ بَڤْتِسْمَ غٛعٛ؞
6 اَللَّه اٛ غٛعٛتٛ، ندٜنْ کَنْکٛ وٛنِ ݧَاکٛ مٜىٰطٜنْ اٜنْ فُو، اٜ مٛ لَامٛو کٛو مٛيٜ، اٜ مٛ حُوتِرَعٜنْ، اٜ مٛ جٛوطٛو ندٜرْ مٜىٰطٜنْ؞
7 طُمْ حٛکِّي کٛو مٛيٜ مٜىٰطٜنْ دٛکَّلْ نٛنْ نٛ اَلْمَسِيحُ سُٻِرِ؞
8 نٛ اَايَارٜ وِعِ،
«ندٜ اٛ يَحِ وِغٜىٰرٜ تٛوْندٜ،
اٛ يَارِي ٻٜ اٛ نَنْغِ،
اٛ حٛکِّي يِمْٻٜ دٛکّٜ؞»
9 کٛ وٛنِ مَعَنَ اٛ يَحِ وِغٜىٰرٜ تٛوْندٜ؟ مَعَنَ مَاجُمْ وٛنِ، اَرَنْدٜ اَلْمَسِيحُ وَرِي ندٜرْ دُونِيَارُ ندُعُ؞
10 کَنْکٛ غَرْطٛ ندٜرْ دُونِيَارُ ندُعُ، کَنْکٛ اٛنْ وٛنِ پٜنْتُطٛ تٛنْ دٛوْ تٛ ٻُرِ کٛو تٛيٜ نغَمْ اٛ حٜبِّنَ کٛو طُمٜ؞
11 اٛ سُٻِي وٛٻّٜ نغَرْتَ لِلَاٻٜ، وٛٻّٜ غَطٛوٻٜ اَنَّبَاکُ، وٛٻّٜ وَعَجِنٛوٻٜ، وٛٻّٜ ڤَسْتٛعٜنْ اٜ اٜکِّتِنٛوٻٜ؞
12 اٛ وَطُ نٛنْ نغَمْ اٛ سِرْيٛو يِمْٻٜ مَاکٛ نغَمْ ٻٜ کُوَ کُوغَلْ مَاکٛ، نغَمْ تٛکُّٻٜمٛ مَوْنَ، شٜمْبِطَ ندٜرْ تٛکُّکِمٛ؞
13 طُمْ وَطَيْ نٛنْ حَا نغَرْتٜنْ غٛعٛ ندٜرْ حٛولَاکِ يٜىٰسُ اٜ ندٜرْ اَنْدَلْ ٻِطّٛ اَللَّه، مَوْنٜنْ ندٜرْ تٛکُّکِ يٜىٰسُ، نغَرْتٜنْ يِمْٻٜ کٜىٰوُٻٜ بٛ اَلْمَسِيحُ؞
14 ندٜنْ اٜنْ ڤُطِّتَتَا نغَطٜنْ جٛنْدٜ بٛ سُکَحٛيْ، اٜنْ نغَيْلِتَ ٻٜرْطٜ مٜىٰطٜنْ دٛوْ کٛ کٛولِيطٜنْ نغَمْ مَجِّنٛوٻٜ يِمْٻٜ پٛيْرِيعٜنْ اٜ اٜکِّتِنٛلْ فٜوْرٜ؞
15 اَمَّا اٜنْ مبِعُ غٛونغَ ندٜرْ يِدّٜ، اٜنْ مَوْنُ اٜ کٛو نغٛلٜ لَاوٛلْ نغَرْتٜنْ بٛ اَلْمَسِيحُ؞ مِسَالُ، تٛکُّٻٜمٛ نغٛنِ بٛ ٻَنْدُ مَاکٛ، کَنْکٛ وٛنِ بٛ حٛورٜ مَيْرُ؞
16 کَنْکٛ حَوْتِ جٛکّٛوطٜ ٻَنْدُ ندُنْ؞ تٛ کٛو طُمٜ اٜ ٻَنْدُ ندُنْ اٜ حُوَ نٛ حَانِ، ٻَنْدُ ندُنْ مَوْنَيْ، سٜمْبِطَ، يِطِندِرَ؞
يٛنْکِ کٜسُمْ ندٜرْ سُمْڤٛوتِرْکِ اٜ يٜىٰسُ
17 اٜ مِ وِعَعٛنْ طُعُمْ، اٜ مِ ٻٜيْدَ وَغِّنْکِعٛنْ ندٜرْ اِنْدٜ جٛومِرَاوٛ، اَلٜىٰ جٛنْدٜ اِرِ ندٜ حٜىٰفٜرْٻٜ ٻٜ ݧُمٛوجِ مٜىٰرٜ؞
18 ٻٜرْطٜ مَٻّٜ اٜ کٜىٰوِ ݧِوْرٜ؞ ٻٜ نغَلَا ندٜرْ کٜٻَيْٻٜ يٛنْکِ کِ اَللَّه حٛکَّتَ، نغَمْ ٻٜ نغَݧِي اَنْدَلْ، اٜ ٻٜ نغٛودِ کٛعٜ شَاتُطٜ؞
19 ٻٜ شٜمْتَتَا، ٻٜ نغَطِي کٛعٜ مَٻّٜ دٛوْ وَطُکِ کٛ ٻَلِّ مَٻّٜ نغِطِ، اٜ ٻٜ نغَطَ کٛو اِرِ طُمٜ نغِکُّ نٜفْنِيطُمْ کٜىٰرٛلْ وَلَا؞
20 نَاع اِرِ طُمْ طٛنْ نغِکُّ اٜکِّتِيطٛنْ ندٜ اَنْدُطٛنْ اَلْمَسِيحُ!
21 مِ تَبِّتِنِي اٛنْ نَنِي حَبَرُ يٜىٰسُ؞ طُمْ اٜکِّتِنِيعٛنْ غٛونغَ نغٛنْکَ ندٜرْ مَاکٛ؞
22 اَلٜىٰ نغِکُّ طُمْ وٛوطَا طُمْ نغَطَيْنٛوطٛنْ ندٜنّٛ، طُمْ سُونٛ دُونِيَارُ وٛنِّ، مَجِّنِ؞
23 اٜ حَانِ ݧُمٛ مٛوطٛنْ اٜ نغِکُّ مٛوطٛنْ وَرْتِرٜىٰ کٜسُمْ؞
24 ڤُطّٜىٰ نغِکُّ کٜسُمْ اِرِ طُمْ اَللَّه ندٜرْ اَادِلَاکُ اٜ شٜنَاکِ؞
25 نغَمْ مَاجُمْ اَلٜىٰ فٜوْرٜ! کٛو مٛيٜ مٛوطٛنْ دٛولٜ وِعَ بَنْدِرَاوٛ مُوطُمْ غٛونغَ، نغَمْ اٜنْ فُو اٜنْ نغَرْتِي بٛ ٻَنْدُ غٛعٛ ندٜرْ تٛکُّکِ يٜىٰسُ؞
26 تَا مٛنِّي، تَاع جَٻُ مٛنّٜرٜ ندٜنْ وَطُمَا نغَطَا کٛ وٛوطَا؞ تَاع اَلُ نَانغٜ يَنَ اَ مٛنِّ؞
27 ندٜنْ تَاع اَلُ شٜيْطَنْ يَارُمَا تٛ نغَطَتَا کٛ وٛوطَا؞
28 کٛو مٛيٜ غُجّٛ دٛولٜ اَلَ نغُيْکَ؞ اَمَّا اٛ حُوتِرَ جُوطٜ مَاکٛ اٛ حُوَ کُوغَلْ بٛنْغَلْ، نغَمْ اٛ حٜٻَ غٛطُّمْ طُمْ اٛ حٛکّٛرْتَ ٻٜ نغَلَنَا؞
29 تٛع اٛنْ اَلُ وٛکَّ حَالَ کَلُّکَ وُرْتٛو ندٜرْ کٛنْدُطٜ مٛوطٛنْ، اَمَّا سٜيْ نِ حَالَ نجَمَ مبَلَّيْکَ يِمْٻٜ نَنَيْٻٜعٛنْ شٜمْبِطِنَ ٻٜرْطٜ مَٻّٜ؞
30 ڤَامٜىٰ، تٛع مٜتِّنَنٛنْ رُوحُ اَللَّه ٻٜرْندٜ، نغَمْ اَللَّه حٛکِّيعٛنْطُمْ نغَمْ حٛلَّ اٛنٛنْ طُمْ ٻٜ مَاکٛ، ندٜنْ ݧَلْندٜ جَانغٛ اٛ رِمْطِنَيْعٛنْ؞
31 اَلٜىٰ کٛو اِرِ ندٜيٜ مٛنّٜرٜ، اٜ مٜتِّنْکِ ٻٜرْندٜ، اٜ مٛنَّنْکِ وٛٻّٜ، اٜ حَوْرٜ، اٜ حُطْحُطْتِرْکِ، اٜ وَطُکِ کٛو اِرِ ندٜيٜ حَلّٜىٰندٜ؞
32 نغِطِندِرٜىٰ، نجُرْمِنِندِرٜىٰ حَکُّندٜ مٛوطٛنْ، نجَافٛوتِرٜىٰ نٛنْ نٛ اَللَّه يَافٛرَنِيعٛنْ بَرْکَ اَلْمَسِيحُ؞