طٜرٜوٛلْ نغٛلْ بُلُسْ وِنْدَنِ
رٛومَنْکٛعٜنْ
حَبَرُ دٛوْ طٜرٜوٛلْ نغٛعٛلْ
بُلُسْ لِلَاطٛ يٜىٰسُ اَلْمَسِيحُ وِنْدَنِ تٛکُّٻٜ يٜىٰسُ وٛنْٻٜ غَرِيرِ رٛومَ طٜرٜوٛلْ نغٛعٛلْ؞ اٛ وِنْدِينغٛلْ دُوٻِ 75 غَطَ دَݧْنغٛلْ يٜىٰسُ؞ طُمْ غَطٛتٛوطُمْ اٛ وِنْدِي طٜرٜوٛلْ نغٛعٛلْ اٜ غَرِيرِ کٛرِنْتِ شَرٜلْ کٛ اٛ وَطِ يَادُ مَاکٛ تَتَوْرُ نغَمْ وَعَجِنْکِ؞
طٜرٜوٛلْ نغٛعٛلْ نغٛلْ وِنْدَا نغَمْ سِرْيَنَاکِ بُلُسْ لَاوٛلْ نغَمْ سُمْڤٛ نغٛ اٛ يِطِ يَارَنْکِ تٛکُّٻٜ يٜىٰسُ غٛنْٻٜ غَرِيرِ رٛومَ؞ کٛ اٛ يِطِ وَطُکِ وٛنِ اٛ حُوَ ندٜرْ تٛکُّٻٜ يٜىٰسُ غٛنْٻٜ رٛومَ نغَمْ شَرٜلْ سٜطَّ، ندٜنْ غَطَ مَاجُمْ، اٜ مٛ يِطِ ٻٜ مبَلَّمٛ نغَمْ اٛ حٜٻَ يَاکِ اَسْبَانِيَ؞ اٛ وِنْدُ طٜرٜوٛلْ نغٛعٛلْ نغَمْ اٛ حٛلَّ کٛ اٛ فَامِ دٛوْ حٛولَاکِ يٜىٰسُ اٜ نٛ حَانِ تٛکُّٻٜ يٜىٰسُ تٛکِّرَمٛ؞ غَطَ بُلُسْ حٛوْنِي تٛکُّٻٜ يٜىٰسُ غٛنْٻٜ غَرِيرِ رٛومَ، اٛ وِعِٻٜ نٛ اٛ وَطِرَنْتَٻٜ دٛعَارٜ؞ ندٜرْ طٜرٜوٛلْ نغٛعٛلْ بُلُسْ وِعِ، «حَبَرُ بٜلْطُمْ اٜ حٛلَّ اَادِلَاکُ اَللَّه کٜٻٜتٜىٰطُمْ بَرْکَ حٛولَاکِ يٜىٰسُ تَنْ؞»
اٜ رٜعِرْدٜ بُلُسْ وِنْدِي دٛوْ نٛ حَانِ تٛکُّٻٜ يٜىٰسُ نجٛوطٛرٛو، کٛ ٻُرِ مَا وٛنِ ٻٜ کٛلِّندِرَ يِدّٜ ندٜرْ سُمْڤٛوتِرْکِ مَٻّٜ اٜ وٛٻّٜ؞ اٛ مٜتِي دٛوْ حُوَنْکِ اَللَّه، اٜ نٛ حَانِ تٛکُّٻٜ يٜىٰسُ تٛکِّرَ اَرْدِيٻٜ، اٜ نٛ حَانِ تٛکُّٻٜ يٜىٰسُ نجٛوطٛرٛو حَکُّندٜ مَٻّٜ؞ اٛ يٛتِّنِ طٜرٜوٛلْ نغٛلْ اٜ حٛوْنُکِ بَنْدِرَاٻٜ اٜ مَنْتُکِ اَللَّه؞
1
کٛوْنٛلْ بُلُسْ
1 مِنْ بُلُسْ وِنْدِ طٜرٜوٛلْ نغٛعٛلْ؞ مِ مَشُّطٛ يٜىٰسُ اَلْمَسِيحُ لِلَاطٛ مَاکٛ شُٻَاطٛ مٛ اَللَّه نٛدِّ وَعَجِنَ حَبَرُ بٜلْطُمْ؞
2 حَبَرُ بٜلْطُمْ طُمْ اٛ وَطِ اَلْکَوَلْ کٛ نٜىٰٻِ دَغَ تٛ کٛنْدُطٜ اَنَّبٛعٜنْ مَاکٛ ندٜرْ دٜفْتٜرٜ شٜنِيندٜ؞
3 حَبَرُ طُعُمْ طُمْ دٛوْ ٻِطّٛ مَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ندٜرْ ٻَنْدُ کَنْکٛ دَغَ لٜݧٛلْ دَوْدَ؞
4 اَمَّا اَللَّه حٛلِّي اٜ بَوْطٜ مَوْطٜ يٜىٰسُ اَلْمَسِيحُ جٛومِرَاوٛ مٜىٰطٜنْ اٛ ٻِطّٛ مَاکٛ ندٜ اٛ اُمِّنِمٛ دَغَ مَيْدٜ بَرْکَ رُوحُ مَاکٛ؞
5 بَرْکَ يٜىٰسُ اَلْمَسِيحُ اٜ نغَمْ اِنْدٜ مَاکٛ، اَللَّه بَرْکِطِنِييَمْ وَرْتِرِييَمْ لِلَاطٛ نغَمْ لٜݧِ دُونِيَارُ فُو حٛولٛومٛ تٛکَّ کٛ اٛ وِعِ؞
6 طُعُمْ حَوْتِي اٜ مٛوطٛنْ اٛنٛنْ ٻٜ اَللَّه نٛدِّ نغَمْ نغَرْتَ ٻٜ يٜىٰسُ اَلْمَسِيحُ؞
7 اٜ مِ حٛوْنَعٛنْ اٛنْ فُو مٛوطٛنْ غٛنْٻٜ غَرِيرِ رٛومَ، اٛنٛنْ ٻٜ اَللَّه يِطِ نٛدِّ نغَمْ ٻٜ نغَرْتَ يِمْٻٜ مُوطُمْ؞ اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞
دٛعَارٜ يٜتُّکِ اَللَّه
8 اَرَنْدٜ، اٜ مِ يٜتَّ اَللَّه اَمْ بَرْکَ يٜىٰسُ اَلْمَسِيحُ نغَمْ مٛوطٛنْ اٛنْ فُو، نغَمْ دُونِيَارُ فُو اٜ نَنَ حَبَرُ نٛ کٛولٛرِيطٛنْ يٜىٰسُ؞
9 اَللَّه مٛ کُوَنَيْمِ کُوغَلْ وَعَجِنْکِ حَبَرُ بٜلْطُمْ دٛوْ ٻِطّٛ مَاکٛ اٜ ٻٜرْندٜ اَمْ فُو، کَنْکٛ وٛنِ شٜيْدُوجٛ اَمْ، کٛو ندٜيٜ مِ يٜجِّتَتَاعٛنْ ندٜرْ دٛعَارٜ اَمْ؞
10 اٜ مِ تٛرٛو اَللَّه تٛ اٛ جَٻِي اٛ مَٻِّتَنَيَمْ لَاوٛلْ مِ يَحَ تٛ مٛوطٛنْ جٛونِ؞
11 اٜ مِ يِطِ يِيکِعٛنْ نَاع سٜطَّ نغَمْ مِ وَلَّعٛنْ کٜٻٛنْ بَرْکَ غٛنْطُمْ ندٜرْ رُوحُ اَللَّه شٜمْبِطِنَيْطُمْعٛنْ؞
12 کٛ نغِطُمِ وٛنِ شٜمْبِطِندِرٜنْ؛ حٛولَارٜ اَمْ سٜمْبِطِنَعٛنْ، ندٜنْ حٛولَارٜ مٛوطٛنْ سٜمْبِطِنَيَمْ؞
13 بَنْدِرَاٻٜ اَمْ، اٜ مِ يِطِ اَنْدٛنْ ندٜ طُطُّمْ اٜ مِ سِرْيٛو يَاکِ تٛ مٛوطٛنْ، اَمَّا کٛو ندٜيٜ غٛطُّمْ اٜ حَطَيَمْ يَاکِ؞ اٜ مِ يِطِ مِ حٜٻَ تٛکُّٻٜ يٜىٰسُ ندٜرْ مٛوطٛنْ، نٛنْ نٛ کٜٻِرْمِ تٛکُّٻٜ يٜىٰسُ ندٜرْ غٛطِّ لٜݧِ؞
14 اٜ وٛودِ تٜدّٛرَلْ دٛوْ اَمْ، تٜدّٛرَلْ يِمْٻٜ غَرِيرِ اٜ لَدّٜعٜنْ، اٜ جَنْغُٻٜ اٜ ٻٜ نجَنْغَايِ؞
15 نغَمْ مَاجُمْ، مِ حَاٻِي وَعَجِنَنْکِعٛنْ حَبَرُ بٜلْطُمْ اٛنٛنْ مَا جٛوطِيٻٜ غَرِيرِ رٛومَ؞
بَوْطٜ حَبَرُ بٜلْطُمْ
16 مِ نَنَتَا شٜمْتُطُمْ وَعَجِنْکِ حَبَرُ بٜلْطُمْ، نغَمْ طُمْ بَوْطٜ اَللَّه بَاوَيْطٜ حِسْنَ کٛو مٛيٜ کٛولِيطٛمٛ؞ اَرَنْدٜ طُمْ اَنْدِنِيطُمْ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ؞
17 نغَمْ حَبَرُ بٜلْطُمْ اٜ حٛلَّ اَادِلَاکُ اَللَّه کٜٻٜتٜىٰطُمْ بَرْکَ حٛولَاکِ يٜىٰسُ تَنْ؞ نٛنْ نٛ طُمْ وِنْدِرَا، «اَادِلِيجٛ اٛ وَطَيْ جٛنْدٜ حٛولَاکِ اَللَّه؞»
کٛو مٛيٜ وَطِي حَکّٜ
18 مٛنّٜرٜ اَللَّه اٜ وَنْغَ دَغَ دٛوْ دٛوْ يِمْٻٜ ٻٜ کُلَتَا اَللَّه اٜ دٛوْ کُوطٜ مَٻّٜ کَلُّطٜ طٜ ٻٜ ݧٛعِّرْتَ غٛونغَ؞
19 نغَمْ کٛ طُمْ وَاوَتَ اَنْدُکِ دٛوْ اَللَّه، اٜ نجَيْرِ طُمْ وٛنِ تٛ مَٻّٜ، نغَمْ اَللَّه حٛلِّيٻٜطُمْ؞
20 نغَمْ دَغَ فُطّٛودٜ تَغُکِ دُونِيَارُ، نغِکُّ اَللَّه طُمْ يِعَتَاکٜ، اٜ نجَيْرِ طُمْ وٛنِ، وَاتٛ بَوْطٜ مَاکٛ تَبِتَيْطٜ، اٜ کٛ حٛلِّ اٛ اَللَّه؞ طُمْ يِعَامَ اٜ نجَيْرِ ندٜرْ کٛ اٛ تَغِ؞ نغَمْ مَاجُمْ، يِمْٻٜ نغَلَا کٛ مبِعَ؞
21 کٛو ندٜ اٜ ٻٜ اَنْدِ اَللَّه، ٻٜ مَوْنِنَايِمٛ بٛ اَللَّه کٛو ٻٜ نغٜتَّمٛ، اَمَّا ݧُمٛ مَٻّٜ وَرْتِي مٜىٰرٜ، ٻٜرْطٜ مَٻّٜ طٜ مبَاوَتَا فَامُکِ غٛونغَ طٜ کٜىٰوِ ݧِوْرٜ؞
22 اٜ ٻٜ مبِعَ اٜ ٻٜ نغٛودِ پٛيْرٜ، اَمَّا ٻٜ نغَرْتِي حَاݝَاٻٜ؞
23 اَللَّه تَبِتَيْطٛ حَانِ ٻٜ مَوْنِنَ، اَمَّا اٜ ٻٜ مَوْنِنَ غُنْکِيجِ غَطَاطِ ندٜرْ نَنْدِ نٜطّٛ مَايَيْطٛ، اٜ ندٜرْ نَنْدِ شٛلِّ، اٜ ندٜرْ نَنْدِ مَرْلٜ، اٜ ندٜرْ نَنْدِ کٛ دَسٛتٛو؞
24 نغَمْ نٛنْ، اَللَّه اَلِيٻٜ ٻٜ تٛکَّ سُونٛوجِ ٻٜرْطٜ مَٻّٜ نٜفْنِيطِ نغَمْ ٻٜ نغَطِندِرَ کٛ سٜمْتِنِي اٜ ٻَلِّ مَٻّٜ؞
25 ٻٜ نغَيْلِتِ غٛونغَ اَللَّه وَرْتِ فٜوْرٜ؞ اٜ ٻٜ مَوْنِنَ کٛ تَغَا حَا اٜ ٻٜ کُوَنَطُمْ، اَمَّا اَللَّه تَغٛووٛ تَنْ حَانِ ٻٜ مَوْنِنَ؞ کَنْکٛ وٛنِ کَانُطٛ مَنْتٜىٰکِ حَا اَبَدَا! اَامِنْ؞
26 نغَمْ نٛنْ، اَللَّه اَلِٻٜ ٻٜ تٛکَّ سُونٛوجِ مَٻّٜ شٜمْتِنِيطِ؞ رٜوْٻٜ مَٻّٜ نغَيْلِتِ کٛ طُمْ اَنْدِ، رٜوْٻٜ اٜ مبَلْدَ اٜ رٜوْٻٜ؞
27 نٛنْ مَا وٛرْٻٜ اَلِ کٛ طُمْ اَنْدِ، ٻٜ اَلِ وَلْدُکِ اٜ رٜوْٻٜ، سُونٛ وٛرْٻٜ نَنْغِٻٜ؞ وٛرْٻٜ اٜ مبَلْدَ اٜ وٛرْٻٜ؞ نغَمْ نٜفْنِيطُمْ طُمْ ٻٜ نغَطَتَ، ٻٜ کٜٻِ حَلْکٜرٜ نٛ حَانَنِٻٜ؞
28 ندٜ ٻٜ نغَݧِي ٻٜ اَنْدَ اَللَّه، اَللَّه اَلِيٻٜ ٻٜ تٛکَّ ݧُمٛوجِ کَلُّطِ نغَمْ ٻٜ نغَطَ کٛ حَانَا طُمْ وَطَ؞
29 اٜ ٻٜ کٜىٰوِ کٛو اِرِ طُمٜ فِي طُمْ وٛوطَا، اٜ حَلّٜىٰندٜ، اٜ يِطُکِ کٛ ٻٜ نجٜيَايِ، اٜ نغِکُّ کَلُّطُمْ، اٜ لَوْلِيرُ، اٜ وَرٜ‑وَرٜ، اٜ حَوْرٜ، اٜ مَجِّنْکِ يِمْٻٜ، اٜ ٻٜرْطٜ ٻَلٜىٰجٜ؞ اٜ ٻٜ مٜتَ دٛوْ وٛٻّٜ،
30 اٜ ٻٜ مٜتَ کَلُّکَ دٛوْ وٛٻّٜ، اٜ ٻٜ نغَݧَ اَللَّه، اٜ ٻٜ کٛلَّ مَنْغُ، اٜ ٻٜ نغٛودِ مَنْغُ حٛورٜ، مَوْنِنٛوٻٜ کٛعٜ مَٻّٜ، اٜ ٻٜ طَٻِّتَ لَاوٛلْ وَطُکِ کٛ حَلِّ، ٻٜ مَوْنِنْتَا دَݧٛوٻٜ؞
31 ٻٜ نغَلَا حَکِّيلٛ، ٻٜ کٜبِّنْتَا اَلْکَوَلْ، ٻٜ نغَلَا يِدّٜ، ٻٜ نجُرْمِنَنْتَا يِمْٻٜ؞
32 اٜ ٻٜ اَنْدِ اَللَّه وِعِي يِمْٻٜ غَطٛوٻٜ اِرِ کُوطٜ طٜنْ طٛنْ اٜ حَانِ ٻٜ کَلْکٜىٰ؞ فُو اٜ نٛنْ، نَاع کُوطٜ طٜنْ تَنْ ٻٜ نغَطَتَ، حَا مَا اٜ ٻٜ مبِعَ غَطٛوٻٜ کُوطٜ طٜنْ اٜ نغَطَ کٛ وٛوطِ؞