2
کِيتَ اَللَّه
1 نغَمْ نٛنْ، اَنْ، شَڤّٛتٛوطٛ کٛ وٛوطَا طُمْ غٛطّٛ وَطِ، اَ وَلَا کٛ مبِعَتَا، کٛو اَنْ اَ مٛيٜ؞ نغَمْ فُو شَرٜلْ کٛ شَڤّٛتٛطَا کٛ وٛوطَا طُمْ غٛطّٛ وَطِ، اَ وَطَنَ حٛورٜ مَاطَ کِيتَ؞ نغَمْ کٛ وٛوطَا طُمْ شَڤّٛرْتٛطَا غٛطّٛ، کَنْجُمْ نغَطَتَا اَنْ مَا؞
2 اٜنْ اَنْدِ کِيتَ اَللَّه طُمْ غٛونغَ دٛوْ غَطٛوٻٜ اِرِ طُمْ طٛنْ فِي؞
3 اَ ݧُمَ اَنْ، اَ حِسَيْ کِيتَ اَللَّه، ندٜ اَ وَطَ کٛ وٛوطَا طُمْ شَڤّٛرْتٛطَا وٛٻّٜ؟
4 کٛو اَنْ اَ يَوَنَ يِدّٜ اَللَّه مَوْندٜ، اٜ شِيَ يَاوُکِ مٛنّٜرٜ مَاکٛ، اٜ مُݧَلْ مَاکٛ؟ اَ اَنْدَا يِدّٜ اَللَّه اٜ فٛوطُمَا تُوبَا؟
5 اَمَّا ٻٜرْندٜ مَاطَ ندٜ شَاتُندٜ غَݧُندٜ تُوبُکِ؞ نغَمْ نٛنْ، اَ حَوْرِتَنَ حٛورٜ مَاطَ مٛنّٜرٜ اَللَّه، ݧَلْندٜ مٛنّٜرٜ مَاکٛ ندٜ اٛ وَطَتَ کِيتَ غٛونغَ؞
6 نغَمْ اٛ وَاتَنَيْ کٛو مٛيٜ کٛ فٛتِّدِ اٜ کٛ وَطِ؞
7 يِمْٻٜ مُݧُٻٜ ندٜرْ وَطُکِ کٛ وٛوطِ، طَٻُّتُٻٜ تٜدُّنغَلْ اٜ مَنْغُ اٜ يٛنْکِ کِ رٜعَتَا، کَمْٻٜ اَللَّه حٛکَّتَ يٛنْکِ کِ رٜعَتَا؞
8 اَمَّا يِمْٻٜ غِطَنْٻٜ کٛعٜ مَٻّٜ تَنْ غَݧُٻٜ غٛونغَ تٛکِّ کٛ وٛوطَا، ٻٜ کَوْرَيْ اٜ مٛنّٜرٜ اَللَّه اٜ حَلْکٜرٜ مَاکٛ؞
9 کٛو مٛيٜ غَطٛووٛ کٛ حَلِّ يَرَيْ تٛرَّ اٜ بٛنٜ، کٛو مٛيٜ، يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ؞
10 اَمَّا فُو يِمْٻٜ غَطٛوٻٜ بٛطُّمْ، اَللَّه وَطَيْ ٻٜ کٜٻَ تٜدُّنغَلْ، اٜ مَنْغُ، اٜ جَمْ؛ اَرَنْدٜ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ،
11 نغَمْ اَللَّه حٛلَّتَا فٜىٰرٛوتِرٛلْ؞
12 کٛو مٛيٜ غَطّٛ حَکّٜ، تٛ اٛ وَلَا لٜيْ اَتَّوْرَ، اٛ وَطَنْتَاکٜ کِيتَ دٛوْ کٛ اَتَّوْرَ وِعِ؞ اَمَّا کٛو مٛيٜ غٛنْطٛ لٜيْ اَتَّوْرَ، تٛ وَطِي حَکّٜ، طُمْ وَطَنَيْمٛ کِيتَ دٛوْ کٛ اَتَّوْرَ وِعِ؞
13 نغَمْ نَاع نَنٛوٻٜ کٛ اَتَّوْرَ وِعِ نغٛنِ اَادِلِعٜنْ يٜىٰسٛ اَللَّه، اَمَّا تٛکُّٻٜ کٛ طُمْ وِعِ، کَمْٻٜ نٛدِّرْتٜىٰ اَادِلِعٜنْ؞
14 تٛ يِمْٻٜ نَاع يَحُودَنْکٛعٜنْ ٻٜ نغَلَا اَتَّوْرَ نغَطِي کٛ اَتَّوْرَ وِعِ ندٜرْ يِدّٜ کٛعٜ مَٻّٜ، ٻٜ کٛلِّي اٜ ٻٜ اَنْدِ کٛ حَانِ طُمْ وَطَ، کٛو ندٜ ٻٜ نغَلَا اَتَّوْرَ؞
15 ٻٜ کٛلِّي کٛ اَتَّوْرَ وِعِ طُمْ وَطَ اٜ وِنْدِي ندٜرْ ٻٜرْطٜ مَٻّٜ؞ ٻٜرْطٜ مَٻّٜ مَا اٜ کٛلَّ طُمْ غٛونغَ، نغَمْ بَنْݧٜ ݧُمٛ مَٻّٜ اٜ حٛلَّٻٜ ٻٜ نغَطِي کٛ وٛوطَا، بَنْݧٜ بٛو اٜ نغٛ سُرَنَٻٜ؞
16 نٛنْ نٛ حَبَرُ بٜلْطُمْ طُمْ نغَعَجِنْمِ وِعِ، نٛنْ وَطَيْ ݧَلْندٜ ندٜ اَللَّه وَطَنْتَ ݧُمٛوجِ شُوطِيطِ طِ يِمْٻٜ کِيتَ لَاوٛلْ يٜىٰسُ اَلْمَسِيحُ؞
يَحُودَنْکٛعٜنْ اٜ اَتَّوْرَ
17 اَمَّا تَا نٛدِّرَ حٛورٜ مَاطَ يَحُودَنْکٜىٰجٛ، تَا مَنْتٛرٛو اَتَّوْرَ، تَا فِيَ غَبَارٜ دٛوْ سُمْڤٛ مَاطَ اٜ اَللَّه،
18 تَا اَنْدِ کٛ اَللَّه يِطِ نغَطَا، تَا سُٻِي کٛ ٻُرِ وٛوطُکِ نغَمْ اَ اٜکِّتِنَامَ اَتَّوْرَ،
19 تَا تَبِّتِنِي اَنْ وٛنِ کٛلَّيْطٛ بُمْطٛ لَاوٛلْ، اَنْ وٛنِ جَيْنغٛلْ نغَمْ غٛنْٻٜ ندٜرْ ݧِوْرٜ،
20 تَا اٜکِّتِنٛووٛ ٻٜ نغَلَا اَنْدَلْ کٛ حَانِ، تَا اٜکِّتِنٛووٛ سُکَاٻٜ، تَا تَبِّتِنِي اَ اَنْدِ کٛو طُمٜ، ندٜنْ فُو کٛ مبِعَتَا طُمْ غٛونغَ نغَمْ اَ وٛودِ اَتَّوْرَ –
21 اَنْ اٜکِّتِنٛووٛ وٛٻّٜ، اَ اٜکِّتِنْتَا حٛورٜ مَاطَ؟ اَنْ نغَعَجِنٛووٛ دٛوْ طُمْ اَلَ نغُيْکَ، اَنْ اَ وُجَّتَا؟
22 اَنْ بِعٛووٛ تٛع يِمْٻٜ نغَطَ نجٜىٰنُ، اَنْ اَ وَطَتَا نجٜىٰنُ؟ اَنْ نٜفٛووٛ غُنْکِيجِ، اَنْ اَ وُجَّتَا ندٜرْ سُودُ غُنْکِيجِ؟
23 اَنْ ڤِيٛووٛ غَبَارٜ دٛوْ دٛوکَ اَللَّه، اَ يَوَنْتَا اَللَّه لَاوٛلْ يٜوُکِ دٛوکَ مَاکٛ؟
24 نٛنْ نٛ طُمْ وِنْدِرَا، «نغَمْ مٛوطٛنْ يَحُودَنْکٛعٜنْ، يِمْٻٜ نَاع يَحُودَنْکٛعٜنْ اٜ مٜتَ حَالَ کَلُّکَ دٛوْ اَللَّه؞»
25 تَا تٛکِّي کٛ اَتَّوْرَ وِعِ، نَادُکِ مَاطَ اٜ نَفِ؞ اَمَّا تَا يٜوِي کٛ اَتَّوْرَ وِعِ، نَادُکِ مَاطَ وَرْتِي بٛ اَ نَادَاکَ؞
26 تٛ نٜطّٛ مٛ نَادَاکَ تٛکِّي کٛ اَتَّوْرَ وِعِ، نَاع اَللَّه يِعَيْمٛ بٛ اٛ نَادَاطٛ؟
27 نٜطّٛ مٛ نَادَاکَ، تٛ اٛ تٛکِّي اَتَّوْرَ، اٛ حٛلَّيْ اٛنْ نغَطِي کٛ وٛوطَا، نغَمْ اٛنْ نغٜوِ اَتَّوْرَ کٛو ندٜ اٛنْ نغٛودِطُمْ بِنْدَاطُمْ ندٜنْ اٛنْ نَادَاٻٜ؞
28 يَحُودَنْکٜىٰجٛ مٛ غٛونغَ نَاع اٛ يَحُودَنْکٜىٰجٛ اٜ ٻَنْدُ تَنْ، کَدِنْ نَادُکِ کِ غٛونغَ نَاع اٜ ٻَنْدُ تَنْ کِ وٛنِ، کٛو اٜ تَپُکِ لَرَلْ؞
29 نغَمْ مَاجُمْ، يَحُودَنْکٜىٰجٛ مٛ غٛونغَ، کَنْکٛ وٛنِ يَحُودَنْکٜىٰجٛ دَغَ ندٜرْ ٻٜرْندٜ، ندٜنْ نَادُکِ کِ غٛونغَ، کَنْکِ وٛنِ نَادُکِ ٻٜرْندٜ کِ رُوحُ وَطَتَ، نَاع نغَمْ تٛکُّکِ اَتَّوْرَ بِنْدَاطُمْ؞ اِرِ اٛعٛ نٜطّٛ نَاع يِمْٻٜ مَنْتَتَمٛ، اَللَّه مَنْتَتَمٛ؞