3
1 طُمٜ يَحُودَنْکٛعٜنْ ٻُرْدِ يِمْٻٜ نَاع يَحُودَنْکٛعٜنْ؟ طُمٜ نَادُکِ نَفَتَ؟
2 اٜ طُمْ وٛوطِ نَاع سٜطَّ اٜ طَتٜ طُطّٜ؞ اَرَنْدٜ، يَحُودَنْکٛعٜنْ طُمْ حٛکِّ بٛلِيطٜ اَللَّه؞
3 غٛونغَ، وٛٻّٜ مَٻّٜ کٛولَاکِ اَللَّه؞ اَمَّا شِيَ حٛولَاکِ مَٻّٜ وَاوَيْ وَرْتِرَ اَللَّه مٛ حٜبِّنْتَا اَلْکَوَلْ مُوطُمْ؟
4 غٛونغَ طُمْ وَاوَتَا! اَللَّه اٛ غٛودُطٛ غٛونغَ، کٛو ندٜ کٛو مٛيٜ نٜطّٛ اٛ ڤٜوٛووٛ؞ نٛنْ نٛ طُمْ وِنْدِرَا،
«نغَمْ طُمْ تَبِّتِنَ حَالَ مَاطَ اٜ وٛودِ غٛونغَ،
ندٜنْ ندٜرْ کِيتَ کٜٻَا جَالٛرْغَلْ؞»
5 اَمَّا تٛ شِيَ اَادِلَاکُ مٜىٰطٜنْ وَرْتِي لَاوٛلْ تَبِّتِنْکِ اَادِلَاکُ اَللَّه، طُمٜ مبِعٜتٜنْ؟ اٜنْ مبَاوَيْ وِيکِ اَللَّه وَلَا اَادِلَاکُ تٛ اٛ تٛرِّيعٜنْ؟ ﴿اٜ مِ مٜتَ طٛعٛ نٛ يِمْٻٜ مٜتِرْتَ؞﴾
6 طُعُمْ وَطَتَاکٛ! تٛ اَللَّه وَلَا اَادِلَاکُ، نٛ اٛ وَطِرَنْتَ دُونِيَارُ کِيتَ؟
7 طُمْ غَطٛتٛوطُمْ غٛطّٛ وِعَ، «تٛ شِيَ غٛونغَ اَمْ وَلِّي يِمْٻٜ نغِعَ غٛونغَ اَللَّه اٜ نجَيْرِ حَا ٻٜ مَوْنِنِمٛ، نغَمْ طُمٜ حَا جٛونِ اٜ طُمْ وَطَنَيَمْ کِيتَ دٛوْ مِنْ مِ غَطٛووٛ حَکّٜ؟»
8 تٛ نٜطّٛ اٜ ݧُمِرَ نٛنْ، اٛ وِعَيْ، «اٜنْ نغَطُ کٛ وٛوطَا نغَمْ طُمْ وَرْتَ لَاوٛلْ وُرْتِنْکِ غٛطُّمْ بٛطُّمْ؞» غٛونغَ، وٛٻّٜ يِمْٻٜ اٜ مبِعَ اٜنْ مبِعَ نٛنْ، اَمَّا نَاع طُمْ غٛونغَ، طُمْ حُطُکِ تَنْ؞ طُمْ وَطَنَيْٻٜ کِيتَ نٛ حَانَنِٻٜ؞
وَلَا اَادِلِيجٛ
9 تٛو، طُمٜ مبِعٜتٜنْ؟ اٜنٜنْ يَحُودَنْکٛعٜنْ اٜنْ ٻُرِي يِمْٻٜ نَاع يَحُودَنْکٛعٜنْ وٛنْ طٛنْ؟ غٛونغَ نَاع نٛنْ؞ مِ يَادَکٜ مِ حٛلِّي وِيکِ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ ٻٜ فُو لٜيْ لَامُ حَکّٜ ٻٜ نغٛنِ؞
10 نٛنْ نٛ طُمْ وِنْدِرَا،
«وَلَا نٜطّٛ اَادِلِيجٛ، وَلَا کٛو غٛعٛتٛ،
11 وَلَا غٛودُطٛ فَامُ،
وَلَا طَٻُّتُطٛ اَللَّه؞
12 يِمْٻٜ فُو نغَيْلِتَنِي اَللَّه ٻَاوٛ، ٻٜ نغَرْتِي وَلَا کٛ ٻٜ نَفِ؞
وَلَا غَطٛووٛ کٛ وٛوطِ، وَلَا کٛو غٛعٛتٛ؞
13 کٛنْدُطٜ مَٻّٜ طُمْ يٜنَاندٜ اٛمْتِيندٜ؞
اٜ ٻٜ کُوتِرَ طٜمْطٜ مَٻّٜ نغَمْ مَجِّنْکِ يِمْٻٜ اٜ فٜوْرٜ؞
بٛلِيطٜ
14 کٛنْدُطٜ مَٻّٜ اٜ کٜىٰوِ کُلّٜ اٜ بٛلِيطٜ نَوْطٜ؞
15 اٜ ٻٜ نجَاوَ وَرُکِ يِمْٻٜ؞
16 فُو تٛ ٻٜ نجَحِ، حَلْکٜرٜ اٜ تٛرَّ اٜ تٛکِّٻٜ؞
17 ٻٜ اَنْدَا لَاوٛلْ وَدُّکِ جَمْ؞
18 ٻٜ نغَلَا کُلٛلْ اَللَّه؞»
19 جٛونِ اٜنْ اَنْدِ کٛو طُمٜ کٛ اَتَّوْرَ وِعِ، طُمْ وِعَ نغَمْ ٻٜنْ طٛنْ غٛنْٻٜ لٜيْ اَتَّوْرَ، نغَمْ کٛو مٛيٜ مَٻَّ حٛنْدُکٛ مُوطُمْ، کَدِنْ فُو يِمْٻٜ دُونِيَارُ اَنْدَ لٜيْ کِيتَ اَللَّه ٻٜ نغٛنِ؞
20 نغَمْ وَلَا نٜطّٛ نٛدّٜتٜىٰطٛ اَادِلِيجٛ يٜىٰسٛ اَللَّه نغَمْ تٛکُّکِ اَتَّوْرَ، نغَمْ کٛ اَتَّوْرَ وَطَتَ وٛنِ طُمْ حٛلَّ نٜطّٛ حَکّٜ مُوطُمْ؞
وَرْتُکِ اَادِلِيجٛ
21 اَمَّا جٛونِ اَللَّه وُرْتِنِي لَاوٛلْ نغٛلْ طُمْ تٛکَّتَ طُمْ وَرْتَ اَادِلِيجٛ يٜىٰسٛ مَاکٛ؞ طُمْ حٜٻَتَا اَادِلَاکُ طُمْ نغَمْ تٛکُّکِ اَتَّوْرَ؞ اَتَّوْرَ اٜ اَنَّبٛعٜنْ کٛکِّي شٜيْدَ دٛوْ مَاجُمْ؞
22 طُعُمْ اَادِلَاکُ اَللَّه اٜ طُمْ حٜٻٜىٰ بَرْکَ حٛولَاکِ يٜىٰسُ اَلْمَسِيحُ؞ فُو کٛولِيطٛ يٜىٰسُ، اَللَّه وَرْتِرَيْمٛ اَادِلِيجٛ، نغَمْ اٛ حٛلَّتَا فٜىٰرٛوتِرٛلْ؞
23 کٛو مٛيٜ نٜطّٛ وَطِ حَکّٜ وٛطِّتَکٜ کٛ اَللَّه يِطِ اٛ وَطَ؞
24 اَمَّا جٛونِ اَللَّه وَرْتِرِيعٜنْ اَادِلِعٜنْ؞ اٛ وَطَنِيعٜنْ نٛنْ شَاحُ نغَمْ يِدّٜ مَاکٛ بَرْکَ رِمْطِنْکِ کٜٻٜتٜىٰکِ لَاوٛلْ يٜىٰسُ اَلْمَسِيحُ؞
25 اَللَّه لِلِي يٜىٰسُ اَلْمَسِيحُ وَرْتَ شَکِّرِ، نغَمْ تٛ يِمْٻٜ کٛولَکٜمٛ طُمْ يَافَنٛوٻٜ حَکّٜ مَٻّٜ بَرْکَ پِيپَمْ مَاکٛ؞ اَللَّه وَطِي طُعُمْ نغَمْ حٛلَّ اَادِلَاکُ مُوطُمْ؞ نغَمْ ندٜنّٛ اٛ مُݧَنِي غَطُٻٜ حَکّٜ اٛ تَپَنَايِٻٜ کِيتَ؞
26 اٛ وَطُ نٛنْ نغَمْ اٜ شَرٜلْ نغٜلْ اٛ حٛلَّ کَنْکٛ اٜ حٛورٜ مَاکٛ اٛ اَادِلِيجٛ، ندٜنْ اٜ مٛ وَطَ کٛو مٛيٜ کٛولِيطٛ يٜىٰسُ وَرْتَ اَادِلِيجٛ؞
27 نغَمْ نٛنْ، وَلَا غٛطُّمْ طُمْ غٛطّٛ مَنْتٛرْتٛو؞ نغَمْ طُمٜ؟ نغَمْ اٜنْ نغَرْتَايِ اَادِلِعٜنْ نغَمْ کُوطٜ مٜىٰطٜنْ، سٜيْ نِ نغَمْ اٜنْ کٛولَکٜ يٜىٰسُ؞
28 نغَمْ اٜنْ اَنْدِ نٜطّٛ وَرْتَيْ اَادِلِيجٛ يٜىٰسٛ اَللَّه تٛ حٛولَکٜ يٜىٰسُ، نَاع نغَمْ تٛکُّکِ اَتَّوْرَ؞
29 کٛو اَللَّه اٛ اَللَّه يَحُودَنْکٛعٜنْ تَنْ؟ نَاع فُو کَنْکٛ وٛنِ اَللَّه يِمْٻٜ نَاع يَحُودَنْکٛعٜنْ؟ غٛونغَ، اٛ اَللَّه يِمْٻٜ نَاع يَحُودَنْکٛعٜنْ، کَمْٻٜ مَا؞
30 اَللَّه اٛ غٛعٛتٛ، غَرْتِرَيْطٛ يَحُودَنْکٛعٜنْ اَادِلِعٜنْ يٜىٰسٛ مَاکٛ تٛ ٻٜ کٛولَکٜ يٜىٰسُ؞ نٛنْ مَا يِمْٻٜ نَاع يَحُودَنْکٛعٜنْ، اٛ وَرْتِرَيْٻٜ اَادِلِعٜنْ تٛ ٻٜ کٛولَکٜ يٜىٰسُ؞
31 تٛ طُمْ نٛنْ، اٜنْ اَلَيْ تٛکُّکِ اَتَّوْرَ نغَمْ اٜنْ کٛولَکٜ يٜىٰسُ؟ طُمْ وَطَتَاکٛ! سٜيْ نِ، اٜنْ تَبِّتِنَطُمْ؞