3
Nenemú Ómasímini agómulaló Zuta vegená leza hetoka vegená kivilegeko noupe. Itó lugupeló Ómasímini anosa nemó nene ha hetá nehe. Lá oko nomive. Nenémo haitopaitolíminoko netá gihila neve. Ómasi eza Zuta vegená haitopaitó netá lehizeletonoikutí nene Ómasímini gakó lehizeletamó nenémo iteko neve. Itó Zuta vegená lugáa keza Izesukumú gili alévolé amakumú nene nanave litune. Gili alévolé amatímo nene Ómasi eza nónohá zeletative loko lo mola gakó ale ahulokahe. * Óve, lá oko nomive. Vegená mukitó keza sozaló ve minatamóza, Ómasímo eza lokago alévolé oaká ve noive loko gilitune. Nenemú monó gotolaú Ómasimú láa liki gizinamóma neve:
Gakó makó nolako, gelekinake, nene gihilave loko gelekinake hize lé itune.
Mogonakamú lotuva ligikikoma nene, géisi kiviliginogo ane.
Zuta vegená leza oko moloko nounimó nene hee lamitímo Ómasímini mogona hee limó nenémini mogona ale utó oaká noinazo, nenemú nanave litune. Ómasímini mogona lá oko minokanazo, nenemú eza nogosani limitimó nene etaminogo ive loko litupe. Mikasiuka vete láa liki liaká niamó nenéminoko gakó láa loko nolumóza, mogonáa lá oko nomive. Ómasímini mogona hee loko minamilina, mikasiuka vegená nana oko goní oletoko nogosani limiline.
Loko lokugo ve makolite láa liki litave: Soza mogonate nenémo Ómasímo gakó lokago alévolé oaká noitímini mogona ale utó okago Ómasímini lapaná ale oteaká noinazo, Ómasímo lihimatemú nanamú goní oletative. Geí gakó nene gihila netimó nene lihima netá golesa loló oloko vosakutí Ómasímo miluma geleletatímo lelitoka vaí okiko agepoka lituni netá lamaná goha utó itive liki litave. Nenikumú nene láa loko loaká noane liki lotoka hiziki avetó iki lili ali iaká niave. Némika liki liaká nia vegená nene Ómasímo hee loko goní oketanogo ive.
Hehe liki nia vegená ma niamave
Nenemú nana ive. Ómasímini agómulaló Zuta vegenalita hetoka vegená kivilegeko noupe. Nenémini oko nomive. Zuta vegenaki hetoka vegenaki leza mukitó lihima netalímini gelekeleláa noune loko lo utó oko lo lekemekuve. 10  * Nenémini mogonamú monó gotolaú gakó makó lá oko neve:
Ve makolímo hee hee loko minamive, keké.
11 Makolímo gele vevesoko minamive.
Makolímo Ómasimú sele loko vitagá osá amive.
12 Mukitó Ómasímini kemegesa amikave.
Pisila nomimokó niave.
Makolímo hee loko oko moloko osá amive. Ma nomive keké.
13  * Kigikagutí gakó golesa iteaká noimó nenémo gonosi anuva nenéminoko neve.
Genezáini nenémo ali viligá aligá ikago, kogoka kagaka vizeaká gakó iteaká noive.
Kegepagutí nene gipe lakegusa gakó utó oaká noive.
14  * Kegepagú nene usí vizeaká gakó, ekesá gakó vávani oko utó oaká noive.
15  * Lova ali utó iki kipilinigi kigisa agilaló lisiaká niave.
16 Mihina atoka vauna hizeaká noive.
17 Hulu gapo lamaná nene gili vevesisá amave.
18  * Ómasimú lelegesá ligitive liki kagata gilisá amave.
19 Itó láa loko geleaká noune: Monó gotolaú gakó gizinamó nenémo Ómasímo lo huka gakó amelagitoka vo aleaká noive. Lá okago nene, vegená mukitoka mogonate lotuva legekago, gakó litunimoláa nomive. Itó Ómasímini avogisaló mikasigú vegená mukitoka lihimategi noune. 20  * Ómasímo lo huka gakó nenémo lihimavate lelepizeaká noimó nenazo, nenemú ve makolímo Ómasímo lo huka gakó gele alekiko nenémo lihimavala asú omiakaláa nomive.
Gele alévolé unikumule loko lihimate asú olimikago minatune
21 Lá oko noimóza, itínasa nene Ómasímo lihimate asú oletati gapo ale utó onoimóza, Ómasímo lo huka gakó ámegetoaká gapogutí nomive. Nene gapomú nene Moseki Ómasímini agepagutí gakó lili ali vete luhuva gizi miliake hizi lé amóza, itína utó o lamaná okave. 22  * Lá oko neve: Izesu Kilistokumú gili alévolé amómave loko lihimáini asú okimikago niave loko loaká noive. Gili alévolé a vegená mukitoka lá okimiaká noive. Zuta vegenaki hetoka vegenaki mogonate haitopaitolíminoko nomive. Hamolímini oko neve. 23 Mukitoka netá golesa alunikeve loko gonanalivagi lapanakú vo holosá amune. 24 Izesu Kilistó eza lelí lihima meina hizeletamómave loko Ómasímo hagitana oko nasahilí oletatímo lihimate asú olimikago minanogo une. 25 Aí nene ale utó oko lelepizekago, Izesú eza golani lepike Ómasi guguni gizo amike, golesa netate nene nagamí zelimikago, aikumú gili alévolé ita vegená mukitoka nenémini gihiláa utó oaká noive. Itó lá imó nene Ómasímo golesa netá nene gamena hána ale-loko voko minuhá gamena zou loko minake asele zelimiake nogosani lememike mino-loko voko noitímini mogona nene vevesave loko lelepizimó. 26 Lá noike Izesukumú gili alévolé itamó keza lihimáini asú okimikiko minata mogona itó ezáa vevesoko oko moloko oaká noi mogona imane gamenaló utó itive loko lá olimiaká noive.
27 Mosé lo huka gakó gele aleakakú negopa, Izesukumú gele alévolé oakakú lihimate asú olimikago minatune. Nenemú lugupe aleko iteakaláa nene asú okamóma neve. Ámina gapo nene Ómasímo hize lí okamóma neve. 28 Nene gakokumú láa loko gilitunize: Izesukumú gele alévolé osatímo Ómasímo gelekiko, lihimavate asú olimikiko minanogo une. Ómasímo lo huka gakó gele aleakakú nomive. 29-30  * Ómasi aí mogona nene hamokó nenazo, Zuta vegená itó hetoka vegená mukitoka Izesunimú gele alévolé unikumule loko lihima mololetaminogo ive. Lá onoinazo, Ómasi eza nene Zuta vegená lelí Ómasigó nomive. Ómasi nene Zuta vegenaki hetoka vegenaki mukitó Ómasile noive. 31 Nenemú gele alévolé oaká gakó ale otekunike lo huka gakó pelesa zeaká noupe. Lá oko nomive, keké. Lo huka gakó nene hize lé oaká noune.
* 3:4 Age 51:4 * 3:10 Age 14:1-3, 53:1-3 * 3:13 Age 5:9, 140:3 * 3:14 Age 10:7 * 3:15 Isa 59:7-8 * 3:18 Age 36:1 * 3:20 Age 143:2; Gal 2:16 * 3:22 Gal 2:16 * 3:29-30 Gapo 6:4; Gal 3:20