9
Zisas ŋaarar wo farasegi 12 thɨgi ŋaara gumgi ga ndɨɨv mbe sasarigi.
Matiu 10.5-15; Mak 6.7-13
+Zisas wo farasegi 12 thɨgi ŋaara gumgir kamgim, mbe ana han zim, ana mbe fugi. Ana mbe fugap, za ŋiniŋgi mbatɨgi ga vharvharav, vhɨra mbarkɨrga rɨmrɨɨ vhɨzɨrga ne nzuav zɨ bakɨme gum ŋkasŋkan mbe ndɨɨi. Ana zɨ bakɨme gum ŋkasŋkan mbe nɨɨŋgip, mbe sararim, mbe ŋgɨp Fhe Bakɨme wo gumgi gu mbigi ganɨrim, mbe ana piin kɨrga buni vhuuiŋ bun mbe suaŋv, vhɨra gumgi gu mbigi rɨmrɨɨ vhɨzɨrga. +Ana kha suambarar mbe mbuav mbe ndim mbai, “Nde ŋgɨv bigi thari ndigip wari ŋgɨ thari. Nde ŋgɨv sɨga suigɨ thari, nde vhɨra mpaa thar thige rugɨ thari, nde mba thaneŋ ndi thari. Nde vhɨra kɨmararaŋ thueŋ suigɨ thari. Nde vhɨra fhava shaara mpugeni ndi thari, nde bagera sharav ŋgɨri. +Nde maaŋ muuŋgip ŋgɨv ŋgu then ŋgɨgɨrim, mbe phena then nden nɨɨŋgirim, nde mba phenara kɨv kɨv, mba ŋgu thav harigi ŋgun ŋgɨri. +Nde maaŋ muuŋgip ŋgɨp, ŋgu then ŋgɨgɨrim, mbe nde vuzvugi fhuv, mbe vhɨra nde nzuai buni mbararagi fhuv, nde khaŋ muuŋri! Nde mba ŋgu thav ŋgɨv, wari wo ŋkari shari nuiana pɨzgip, wari mba ŋgu thav ŋgɨri. Nde maaŋ muuŋgirim, mbe gangip kaŋgirga, mbe tɨvar vhuun nde muuŋgi fhuvara.” a +Ana maaŋ mbe suaŋgiap, mbe sarigim, mbe vui. Mbe vov, ŋgu mben vugap, Fhe Bakɨmen buni vhuuin mbe suaŋgiap, khavgiap, harigi nen vui. Mbe maaŋ mbua ruav, za mba rui ŋguir gumgi gu mbigi vhɨrver kurkurav mbe mbuim, mbe rɨmrɨɨ vhɨzgi.
Herot Zisas kaŋgi za mbui.
Matiu 14.1-2; Mak 6.14-16
+Zisas mba bigi vhɨrve ga mbuim, ana zɨ hɨgim, gumgi vhɨrve ana kaŋgi. Herot, Gariri gum Peria fhaiŋ gari guman pan ne mbararagiap, ndɨkndɨgi vhɨrve ga mbui. Ana gumgi mbari mbararagim, mbe khaŋ nzuai, “Zon Gumgi Ruai Guma, ana rimgiap taagia khavgi.” Mbe mbari khaŋ nzuai, “Iraiza taagia hɨgi.” Mbe mbari khaŋ nzuavra ki, “Khe fhum guarara kegi Fhe Bakɨmen kamthooŋ guma mbe ma. Ana rimgia kegap, taagia khavgi.” +Mbe mba khesharigi buni nzuaim, Herot khaŋ nzuai, “Gu Zon Gumgi Ruai Guma, gu ana fhɨra thugim, ana rimgi. The mbar ka mbuim, mbe ana bun nzuaim, gu ana mbararagi?” Ana ne suaŋgiap mparav, ana ganɨ za nzuai.
Zisas mban 5,000 gumgir kuambegi.
Matiu 14.13-21; Mak 6.30-44; Zon 6.1-13
10 Zisas mba farasegi 12 thɨgi ŋaara gumgi ga sarigi. Mbe vega kegap, taagia zegap, Zisas han wari fugi. Mbe wari fugap, mba ruav muuŋgi bigi gum, mba gumgi gu mbigi khɨvav mbe suaŋgi bigi, mbe nta bun Zisas ga nzuai. Mbe mba bigi bun ana suaŋgim, ana mben kov, mbe nduarira ŋgu mben vegi. Mba ŋgu zɨ khare, Betsaida. 11 Ana mben kov vugim, mba gumgi gu mbigi, mbe Zisas vugi ŋaneŋ kaŋgiap, mbe ana zɨn vegi. Mbe ana zɨn vegim, ana mbe gangiap, mben ndikndigap, mbaram Fhe Bakɨme won gumgi gu mbigi ganɨnga, mbe ana piin kɨrga buni vhuuiŋ bun mbe nzuai. Ana mba bunin mbe nzuav, mba rɨmrɨɨ ki gumgi gu mbigi, ana mben kurkurav, mbe rɨmrɨɨ vhɨzi.
12  +Zisas maaŋ mbe mbuav kim, ra verav vhɨzim, ana mba farasegi 12 thɨgi ŋaara gumgi ana han zav khaŋ ana nzuai, “Ndu kha gumgi gu mbigi ga sararim, mbe kha fhain ki ŋgui gum ruari ŋguivigen ŋgɨp, wari ga suaŋv mba vhezɨp mbɨv, wari ga suaŋv ŋkuur ŋani ndi ganɨnga. Khe gumgi ki fhuv ŋanen khare.”
13 Mbe nen ana nzuaim, ana mbe ŋgarkarav khaŋ mbe nzuai, “Nde mbɨv mben kurmbɨ.”
Mbe ana ŋgarkarav khaŋ nzuai, “Nza meeŋthɨgi vikntuuveŋra mbɨgama shɨɨŋ mpuani phorga khar ki. Ndu vuzvugi, nza ŋgɨp za kha gumgir tuktɨgɨp mba vhezgirie?” 14 Mbe 5,000 gumgi, mbe zegap maaŋ ki.
Ana thav khaŋ wo phorga rui gumgi ga nzuai, “Nde mba gumgi gu mbigi ga suaŋrim, mbe khaŋ muuŋgip phogir vhov pigɨri. Mbe 50 thɨgi ntɨɨri phok then pigɨri, mbe 50 thɨgi thari phok then pigɨri, mbe mbara muuŋv phogir pigɨri.” 15 Ana wo phorga rui gumgi ga suaŋgim, mbe ana suaŋgi kamara zɨn vov mbe nzuaim, mbe mbara muuŋgia piigi. 16 Mbe piigim, Zisas mbaram mba meeŋthɨgi vikntuuveŋ ndigap, mbaram, mba mbɨgama shɨɨŋ mpuani phorgap ndigap, khoga buiva garav, Fhe Bakɨme ndikndigap ana phorga suaŋgiap, nta phɨra sui. Ana nta phɨra suav, wo phorga rui gumgi ga nzuaim, mbe nta shama mbuav, mba gumgi gu mbigi ga ndɨɨi. 17 Mba gumgi gu mbigi za mbegap, za ndavi givigi. Mba Zisas phorga rui gumgi, mbe mba ndavi givav thagi mban tɨvi, mbe nta ndiav 12 thɨgi kɨra ga vhuigim, nta za givigi.
Pita Zisas bun nzuai.
Matiu 16.13-19; Mak 8.27-29
18  +Tuga mben Zisas wo phorga rui gumgir kov, mbe nduarira wari hiav ŋana mueŋ kav, Zisas Fhe Bakɨme phorga nzuai. Ana Fhe Bakɨme phorga nzuav kav, wo phorga rui gumgir nzarigi, “Kha gumgi gu mbigi vhɨrve then na rɨgi?”
19  +Mbe ana ŋgarkarav khaŋ ana nzuai, “Mbe vhɨrve khaŋ nzuai, ‘Ndu Zon Gumgi Ruai Guma ma.’ Mbe mbari khaŋ nzuai, ‘Ndu Fhe Bakɨme kamthooŋ guma Iraiza ma, ana taagia hɨgi.’ Mbe mbari khaŋ nzuavra ki, ‘Mba fhum guarara kegi Fhe Bakɨmen kamthooŋ guma mbe ma. Ana rimgia kegap taagia khavgi.’ ”
20  +Mbe maaŋ nzuaim, Zisas wom mben nzarigi, “Mbe maaŋ nzuaim, nde ram mbui ndɨkndɨgar na mbui? Nde then na rɨgi?”
Ana ne nzuaim, Pita mbaram ana ŋgarkarav khaŋ nzuai, “Ndu Krais, Fhe Bakɨme taagia kha gumgi gu mbigi ndir zav farasarigi guma ma.”
Zisas wo rimgip, kegɨp, taagi khavɨrga ne bun nzuai.
Matiu 16.20-28; Mak 8.30–9.1
21 Pita ne nzuaim, Zisas mbaram mbe goriruav, khaŋ mbe nzuai, “Nde na bun harigi guma the suaŋ thari.” 22  +Zisas maaŋ mbe nzua vov khaŋ nzuai, “Fhe Bakɨme Guma Guar zaagi vhɨrve ndirga. Mba gumgi ruu gum, mba Fhe Bakɨme rotu gari gumgir pani gum, mba Zudaiŋ tɨvi vhuuiŋ kaŋgi gumgi, mbe zam ana shashagip kɨr ana segɨrga. Mbe ana shogirim, ana rimgirga, ra phuni khegene vhɨzgirim, ana taagi khavgirga.”
23  +Ana nen mbe nzuav khaŋ za mbe nzuai, “Guma the na zɨn zɨr saŋv, ana wo vuzvugi mbevav, zazera wo rɨmɨnga khanarareŋ phufhurav, na zɨn zɨri. 24  +Guma the wora ndɨkndɨgɨrga, anan tum zumgum za fhɨrgi rɨgɨrga. Guma the na ndɨrɨgɨp won tuma sharga, anan tum zazera mbara muuŋgip kɨrga. 25  +Khe tɨvar vhuuŋ e? Guma the wora ndɨkndɨgɨv, za kha nuianan ki bigi, ana zam nta ndigɨp, ntan muuŋv kɨv rimgirga. Ana zumgum vhava bakɨmen ŋgɨgɨp zaa mbatɨga ndirga, mba bigi ram muuŋgip ana tuman kurarie? 26  +Nde mbarara, nde guma the ntigem na zɨ gum na buni vhuuin mbergi, Fhe Bakɨme Guma Guar, ana zumgum won Ndia han Hevenan kegɨp, ana won ŋkasŋka vhava ŋaara gum, Fhe Bakɨme ŋkasŋka vhava ŋaar gum, Fhe Bakɨmen enserir ŋaari ŋkasŋka vhava ŋaar, ana mbe phorgɨ zirɨrga. Ana vhɨra mba tugen, mba guman mbergirga.” 27 Zisas mba bunin mbe nzua vov, khaŋ mbe nzuai, “Gu guigira khar nde nzuai, nde ntige khar thivgia ki ntɨɨri, nde thari vhɨzgirga fhu. Nde khara muuŋgip kɨv ganɨrim, Fhe Bakɨme wo gumgi gu mbigi ganɨrim, mbe ana piin kɨrga tuk hɨgɨrga.”
Zisas fhav harigi kheshara hɨgi.
Matiu 17.1-13; Mak 9.2-13
28  +Zisas mba bunin mbe suaŋgim, sɨgarathɨgi rari vhɨzgim, ana Pita, Zon gum Zems, ana mbera kov Fhe Bakɨme phorgɨ suan zav mbɨkshɨman ndagi. 29 Ana mbe kov ndav kav, Fhe Bakɨme phorga nzuai. Ana ana phorga nzuav kim, ana khom harigi khesharav hɨgim, ana mba sharigi shagi, nta guigira hurgiap ŋgara gari. 30-31  +Ana khom gum bigi maaŋ muuŋgim, guma phunini hav, ana phorga thɨgap, ana phorga buni nzuai, Moses gum Iraiza. Mani Fhe Bakɨme ŋkasŋka vhava ŋaara phorga zav ana phorga nzuai. Mani ana Zerusareman ŋgirgɨp, mba Fhe Bakɨme mpuun muun zav ana farasarigi ŋaara bakɨme ana mba ŋaara simtɨga ndirga ne nzuav mani ana phorga nzuai. b
32  +Mani ana phorga nzuaim, Pita gum mba ana phorga ndagi guma phunini, mbe ŋkuu mbe muuŋgim, mbe kuav ki. Mbe kuav kav semsegap za Zisas ŋkasŋkar vhava ŋaara garav, mba gumani garim, mani Zisas phorga thɨgap ki. 33 Mba guma phunini Zisas thav ŋgɨr zav mbuim, Pita mbaram khaŋ Zisas ga nzuai, “Guman Rum, nza nzerara khaŋ ndagi. Nza mpɨkava phuni khegene muuŋgirga, ndu suaŋv thevi Moses ga suaŋv thevi, Iraiza ga suaŋv thevi.” Pita suanga buni kakagia fhura ne suaŋgi.
34 Pita ne Zisas ga nzuaim, buiva hur hav, mbe vharigi. Mba buiva hur hav mbe vharigim, mbe guigira rivgi. 35  +Mbe rɨvim, Fhe Bakɨme mba buiva hurige vhen kav khaŋ mbe nzuai, “Khe nan Kam ma! Gu won ŋaarar muun zav ana farasarigi, nde ana nzuai buni mbararari!” 36 Fhe Bakɨme maaŋ mbe suaŋgim, mbe garim, mba guma phunini fhura mbar vugim, Zisas nduara thɨgap ki. Mba Zisas phorga rui guma phuni khegene mba bigeŋ gangiap, mbe nen warira khɨga ki. Mbe mba tugen ne bun harigi guma the suaŋgi fhuvara.
Zisas tara mbe tɨn ŋina mbatɨga mbe vharigim, ana taagia nzerigi.
Matiu 17.14-21; Mak 9.14-29
37 Zisas mba mbɨkshɨman kegap, mbe mɨtimanera taagia zeri. Mbe zerigim, gumgi gu mbigi vhɨrve zav Zisasan purigi. 38 Mba gumgi gu mbigi vhɨrve rɨgar, guma mbe kama hegap, khaŋ tɨgap Zisas ga nzuai, “Guman Rum, gu khaŋ muuŋgiap ndu nzuai, ndu zɨv nan kama ganɨ, gu mba kama bavira. 39 Ŋina mbatɨga mbe ana vhen kav, zazera ana shogim, ana nzɨɨv, ninɨga suigap, phuvun ana kamaŋɨni thivi. Mba ŋina mbatɨk guigira anan farfav, tugi babara ana thamthagi, ana fhura ki. 40 Gu ana vharvhara zav khaŋ tɨgap ndu phorga rui gumgi ga nzuai, mbe ana vharvharargen mbovaragi.”
41 Ana nen Zisas ga nzuaim, Zisas mbaram ana ŋgarkarav khaŋ nzuai, “Nde ntige kha tugen vhuuŋgia ki gumgi gu mbigi, nde Fhe Bakɨme mbui bigi khothivi fhuvara. Nden ndɨkndɨgi gum nden tɨvi guigira nzerigi fhuvara. Gu khara muuŋgip nde phorgɨ kɨv, nden simtɨgi ndirie?” Zisas ne mbe suaŋgiap, mbaram khaŋ mba guma ga nzuai, “Ndu won kama ndigi khar zɨ.”
42 Zisas ne nzuai, mba tara ndia ana kov Zisas han zim, mba ŋina mbatɨk taagiap mba tara shogim, ana rɨgap ninɨga mbatɨga mbui. Zisas mbaram mba ŋina mbatɨga vhegim, ana mba tara thav kɨrar hɨgim, mba tar taagia nzerigi. Zisas mbaram mba tara nzuaim, ana taagia khavgiap, won ndia han vui. 43 Ana wo ndia han vuim, mba gumgi gu mbigi zam, Fhe Bakɨme ŋkasŋka bakɨme gangiap guigira ŋgava mbatɨga muuŋgi.
Zisas wom phenatɨtɨga wo rɨmɨngeŋ bun nzuai.
Matiu 17.22-23; Mak 9.30-32
Mbe mba Zisas muuŋgi bigi, mbe za nta gangiap, ŋgava mbatɨga mbuim, Zisas mbaram khaŋ wo phorga rui gumgi ga nzuai, 44  +“Nde ntige thukhɨngira, gu khar nde suan za mbui buneŋ mbararagiri. Fhe Bakɨme Guma Guar, mbe ana thuuŋ dorgɨp, ana suav kama shɨrav, ana ndim gumgi farve khɨngirga.” 45  +Ana ne nzuaim, ana phorga rui gumgi, mbe mba buna nɨɨeŋ kaŋgi fhu. Mbe ana mbararagim, ana mba buna nɨɨeŋ sigasarav, mbe suaŋgi fhuvara. Fhe Bakɨme mba buna nɨɨen mbe vhagi. Mbe maaŋ muuŋgiap kakagiap, anan nzan zav mbov, mbe anan rivgiap wari thagi.
The nzan rɨgar zɨ ki?
Matiu 18.1-5; Mak 9.33-37
46  +Zisas phorga rui gumgi mbe khueŋ nzuav hegap wari daav wari ga nzuai, the mbe rɨgar zɨ kɨrie? 47 Mbe ne nzuav wari ga nzuaim, Zisas mbe ndɨkndɨgi kaŋgiap, mbaram tara bisaŋ maneŋ ga nzuai, ana zav ana han thɨgi. 48  +Ana mbaram khaŋ mbe nzuai, “Guma the na zɨn khaŋ muuŋgi tara then kurarga, ana vhɨra nan kurigi. Guma the nan kurarga, ana vhɨra nara kurigi fhuvara. Ana vhɨra mba na sharigi nen kurigi. Guma nde rɨgar wo mbevav zɨ ki fhu, ana nde rɨgar zɨ ki.”
Guma panan nde kegi fhu, ana nden kɨvntok ma.
Mak 9.38-40
49  +Zisas mba kamen mbe nzuaim, Zon mbaram khaŋ ana nzuai, “Guman Rum, nza guma mbe garim, ana ndu zɨn panan ŋiniŋgi mbatɨgi ga vharvharigi. Nza khueŋ nzuav ana thɨvi. Ana nza phorga rui ne fhuvara.” 50  +Zisas mbaram khaŋ ana nzuai, “Ana thɨvɨ thari. Guma the panan nde kegi fhu, ana nden kɨvntok ma.”
Zisas wo phorga rui gumgir kov, mbe Zerusareman ndai.
Samariaiŋ wo ŋgun ŋgɨrgen Zisas thɨvigi.
51  +Zisas Fhe Bakɨme taagip ana ndigip Hevenan naanga tuk han mbarigim, ana ndɨkndɨk bavira mbov Zerusareman nan za mbui. 52 Ana nan zav, ana fharav gumgi mbari ga sarigim, mbe fhara ana nɨma tɨga ana suaŋv bigi bevahɨr zav ndagi. Mbe nda vov, Samaria ŋgu mbe vugap, ana nzuav bigi bevahɨr zav mbui. 53  +Mbe maaŋ ana nzuav bigi bevahɨr zav mbuim, mba ŋgun ki gumgi, mbe wo ŋgun Zisas thɨvigi, mbe ana vuzvugi fhuvara. Mbe thav khaŋ nzuai, “Zisas khaŋ zi fhuvara, ana Zerusareman ndai.” c 54  +Mba Samarian ki gumgi, mbe mba tɨvar Zisas ga muuŋgim, mba Zisas phorga rui guma phunini, Zems gum Zon, mani mba tɨva gangiap kha nzambaran Zisas ga muuŋgi, “Guman Rum, ndu nza vuzvugirim, nza Hevenan Fhe Bakɨmen kamɨrim, ana vhava sararim, ana zɨrɨv kha gumgi shigirim, mbe vhɨzgirga?” 55-56 Mani ne nzuaim, Zisas dorga mani garav, mani ga vhegap, mbe maaŋ thav, harigi ŋgun vui.
Zisas guma ana phorgɨ rur saŋv muunga tɨvi bun nzuai.
Matiu 8.19-22
57 Zisas maaŋ thav harigi ŋgun vui tuav thɨga vuim, guma mbe khaŋ ana nzuai, “Gu ndu phorgɨv ndu mba vui ŋani, gu zam ntan rurga.” 58 Ana maaŋ nzuaim, Zisas mbaram ana ŋgarkarav khaŋ ana nzuai, “Ruaŋruaŋgi feiŋ, nta kui thoori ki, kha vun gaa rui korigi, nta vhɨra kui khoni ki. Kha Fhe Bakɨme Guma Guar, ana thogɨp wo pana ndim tɨgɨrga ŋana thueŋ ki fhuvara.” 59 Zisas maaŋ mba guma ga nzuav, mbaram khaŋ harigi guma ga nzuai, “Ena, ndu zɨ na phorgɨ ŋka rurga.” Ana nen mba guma ga nzuaim, mba guma ana ŋgarkarav khaŋ ana nzuai, “Guman Rum, ndu fharav na khɨrarim, gu ŋgɨ wo ndia ganɨv, ana ndi mbogar tɨgɨp, za zɨv ndu phorgɨ rurga.” 60 Ana ne nzuaim, Zisas khaŋ ana nzuai, “Mba vhɨzgi fara muuŋgia ki gumgi, mbe ŋaar ki fhu. Mbe mbar mba vhɨzi gumgi ndiv, mbogir rɨgɨ. Ndu zɨv Fhe Bakɨme wo gumgi gu mbigi ganɨrim, mbe ana piin kɨrga bunin vhuuiŋ bun gumgi gu mbigi ga suaŋv ru.”
61  +Zisas ne mba guma ga nzuaim, Guma mbe hɨgap khaŋ ana nzuai, “Guman Rum, gu ndu phorgɨ rurga. Ndu fharav na khɨrarim, gu ŋgɨv, wo ndia gum niamuuŋ, won fegutari ganɨv, mben harin suigip, zɨv, ndu phorgɨ rurga.” 62 Mba guma ne nzuaim, Zisas mbaram ana ŋgarkarav khaŋ ana nzuai, “Guma na phorgɨ rur zav, na zɨn zav, ana zazera kɨsfɨga zɨ gari guma, mba guma Fhe Bakɨme wo gumgi gu mbigi ganɨrim, mbe ana piin kɨrga ŋaarar muuŋgirga tuktɨgi fhu.”
+ 9:1 Mt 10.1; Mk 3.13-15 + 9:3 Ru 10.4-11 + 9:4 Mt 10.11; Mk 6.10 + 9:5 Mt 10.14; Mk 6.11; FG 13.51 a 9:5 Mbe Zudaiŋ, mbe ŋkari shari nuiana pɨzi. Nza Kiriiŋ, nzan tɨv khare. Nza mba ŋgun vugim, mbe tɨva mbatɨgar nza muuŋgim, nza mba ŋgu thav vov, nza khira phɨrav tuap hurav vui. Nza maaŋ muuŋgirga, mba ŋgu gumgi gu mbigi gangip kaŋgirga, mbe tɨvar vhuun kheiŋ ga muuŋgi fhuvara. Mbe taagip nza ŋgun zegɨrga tuktɨgi fhuvara. Khe nza Kiriiŋ, nza tɨv ma. Mbe Zudaiŋ, mbe tɨv mbure, mbe ŋkari shari nuiana pɨzi. + 9:6 Mk 6.12 + 9:7 Mt 16.14; Mk 8.28; Ru 9.19 + 9:9 Ru 23.8 + 9:12 Mt 14.15; Mk 6.35-36; Zo 6.5 + 9:18 Mt 16.13; Mk 8.27 + 9:19 Mt 14.1-2; Mk 6.14-15; Ru 9.7-8 + 9:20 Mt 16.15-16; Mk 8.29; Zo 6.68-69 + 9:22 Mt 16.21; 17.22; Mk 8.31; 9.31; Ru 9.44; 18.32-33 + 9:23 Mt 10.38; 16.24; Mk 8.34; Ru 14.27 + 9:24 Mt 10.39; Ru 17.33; Zo 12.25 + 9:25 Mt 16.26; Mk 8.36 + 9:26 Mt 10.33; Mk 8.38; Ru 12.9; 2 T 2.12 + 9:28 2 Pi 1.17-18 + 9:30-31 Mt 17.3; 17.9; Mk 9.4; 9.9; Ru 9.22; 13.33 b 9:30-31 Kha ves nin ki kameŋ ne nɨɨeŋ khaŋ muuŋgi. Ne khaŋ nzuai thagi ŋana muen kegap ne thav vui. Mbe Grik kaman mba kaman nɨɨeŋ maaŋ nzuai. Kha kameŋ ne guigira mba Isreriŋ Idzɨvan kegi ne vhunama si buneŋ ma. Mbe Isreri, mbe fhum Idzɨvan kav simtɨga bakɨme ndiav kav, mba ana thav harigi ŋanen vugap, mbe nzerara ki, mbe wom simtɨga ndi fhu. Mbe mba simtɨgi thav mborgi. Zisas vhɨra ana mba simtɨgi ndiv rimgirga. Ana rimgip taagi khavgirga, ana mborgi, ana wom rɨmɨnga fhu. Ana maaŋ muuŋgirga, nza vhɨra, ana nza nzuav tuava muuŋgi. Nza mba tɨvi mbatɨgi nza kegɨrim, nza nta bɨnan kegɨrga tuktɨgi fhuvara. Nza mborgi, nza zazera mbara muuŋgip kɨrga bɨɨŋbɨɨŋ kama ndigi. Nza wom tɨvi mbatɨgi nza kegɨrim, nza nta bɨnan kegɨrga tuktɨgi fhu. Nza zazera mbara muuŋgip Fhe Bakɨme phorgɨ kɨrga. Maaŋ muuŋgip, kha Zisas rimgi ne khaŋ muuŋgi, ana za rimgi fhuvara. Ana kha nuianan simtɨgi thav, ana Hevenan vui. Ana ŋgɨgɨp, ana, zazera mbara muuŋgi kɨrga. Ana wom kha nuianan simtɨgi ana kegɨrim, ana nta bɨnan kegɨrga tuktɨgi fhuvara. + 9:32 Mt 17.2-3; Mk 9.2-4; Zo 1.14; 2 Pi 1.16-18 + 9:35 Ais 42.1; Mt 3.17; 12.18; 17.5; Mk 1.11; 9.7; Ru 3.22 + 9:44 Mt 16.21; 17.22; Mk 8.31; 9.31; Ru 9.22; 18.32-33 + 9:45 Mk 9.32; Ru 2.50; 18.34 + 9:46 Ru 22.24 + 9:48 Mt 10.40; 23.11-12; Mk 9.37; Ru 10.16; Zo 12.44; 13.20 + 9:49 Nam 11.28; Mk 9.38 + 9:50 Mt 12.30; Ru 11.23 + 9:51 Mk 10.32; 16.19 + 9:53 Zo 4.9 c 9:53 Mbe Samariaiŋ, mbe Gerisim mbɨkshɨman wari won phogi ga vhuav, wari won ofari ga mbuav, vhɨra wari won tugi bakɨvir Fhe Bakɨme rotu ga mbui. Mbe Zudaiŋ, mbe Zerusareman ndav wari won Fhe Bakɨme rotu mbui. Ndu Zon 4.20 ganɨri. Mbe Samariaiŋ, mbe kha ndɨkndɨgar Zudaiŋ ga mbui, mbe tɨvar vhuuŋ zɨn vov Fhe Bakɨme rotu mbui fhuvara. Maaŋ muuŋgiap, mbe mba tugen Zisasan kurkurargeŋ thagi. + 9:54 2 Kin 1.9-16 + 9:61 1 Kin 19.20