1 De̱ku̱n ho̱-de̱ Biturus e̱ Yohanna e̱ o̱ ha-mu̱ be-du̱ u̱r-shu̱'u̱t du̱ Wa-ko̱-uyan u̱ da-u̱ u̱s-to̱o̱g, u̱s-kwam u̱s-tu̱t su̱ u-ho̱. 2 U̱ is-yu̱ na foge̱ Is-u So̱-ya, waku̱n ne̱t-wa o̱ro ryam du̱gu̱ da-u̱ na mate̱ wa. Ko mu̱ne̱ na hatu̱n wa u̱ Is-yu̱ be-du̱ u̱r-shu̱'u̱t du̱ Wa-ko̱-uyan, remu̱ wa no̱m-u̱t u̱s-ko̱n su̱ shik u̱du̱ i o̱ u̱r-cwa u̱ me̱. 3 Da-u̱ wa hyane̱ Biturus e̱ Yohanna u̱ mo̱ttu̱ cwa-du̱ kat-du̱ be-du̱ u̱r-shu̱'u̱t du̱ Wa-ko̱-uyan, se̱ wa kon u̱n shik. 4 Biturus e̱ Yohanna hu̱ gwat-du̱ wu̱n, Biturus zu̱, <<Gwat it!>> 5 Se̱ jab-u̱ ryam mu u̱du̱ u̱n, wa o̱ m-hyan u̱zu̱ e̱ ya wu̱n o̱ko̱n. 6 Biturus zu̱, <<U̱m zatte̱ shik da, se̱di no̱m u̱m o̱tte̱ o̱ u̱m de̱ yadu̱ bo̱. U̱ te̱k-u̱ dim-u̱r Ye̱so̱ Kiristi wa-Nazara, yu̱ne̱ bo̱ no̱m m-ha!>> 7 Se̱ Biturus ship kom u̱s-cwa rò, wa yu̱ns wu̱n. Za rem na-su̱ yu̱ne̱ m-kim u̱ is-tu̱ u̱s-na rò ne̱ se̱ nom u̱r-be̱b. 8 Wa tu̱ mak wa yu̱ne̱ u̱r-ees, wa he̱e̱se̱ m-ha. Wa dor Biturus ne̱ m-cwa u̱-me̱ kat-du̱ be-du̱ u̱r-shu̱'u̱t du̱ Wa-ko̱-uyan, wa o̱ m-ha u̱s-mak ne̱, wa o̱ vam-du̱ u-Ru̱. 9 U̱t-ne̱t u̱t-be̱e̱t e̱ hyen wu̱n wa o̱ m-ha, u̱ vam-tu̱ u-Ru̱ ne̱. 10 Ne̱t-tu̱ nu̱p u̱zu̱ wu̱na shu̱'u̱te̱ u̱ Is-u So̱-ya yu̱ be-du̱ u̱r-shu̱'u̱t du̱ Wa-ko̱-uyan u̱s-ko̱n. E̱ hu̱ mu̱rimmo̱ remu̱ no̱m-u̱ no̱me̱ u̱ wu̱n. 11 Da-u̱ rya-mu̱ wa o̱o̱ge̱ m-shu̱p u̱ Biturus ne̱ e̱ Yohanna, ne̱t-tu̱ ku̱smu̱n m-so̱m e̱ haan u̱ de̱ku̱n be-de̱ du̱ na zu̱ye̱ u̱ pyu̱-u̱ Suremanu e̱ o̱ mu̱rimmo̱. 12 Da-u̱ Biturus hyane̱ iya, se̱ wa no̱mu̱ ne̱t-ne̱ u̱s-rem wa zu̱, <<No̱ Isra-ne̱ ¿remu̱ yan-o̱ no̱ o̱tte̱ u̱ mu̱rimmo̱? ¿Remu̱ yan-o̱ no̱ o̱tte̱ madi-u̱r ite̱ se̱ bo̱ zu̱ be̱b-du̱ hi-du̱ war it de̱, ko na zu̱ wadu̱ jab-u̱ it de̱ u̱ dor u-Ru̱ de̱ wu̱te̱ campa-u inya m-ha? 13 Ru̱-u Ibrahi, u̱ Ishaku, u̱ Yakubu, Ru̱-u u̱so-tu̱ u̱so-u̱t in, wa ye' Ye̱so̱ m-sek. Wu̱na hen tu̱-shu̱ no̱ yaase̱, tu̱msu̱ no̱ gu̱gu̱m wa u̱ ke̱nu̱ Biratus, ko ba shu̱'u̱te̱ Biratus cwanu̱g wa rest wa. 14 Se̱di no̱ gu̱gu̱m Wa-u-He̱n, wa jab-u̱ so̱-o̱, no̱ kon na yage̱ wa ho̱-du̱ u̱t-ne̱t, 15 No̱ ho wu̱ de̱ keru̱ yadu̱ ne̱t fat-du̱ za u̱r-ma. Tu̱msu̱ Ru̱-u̱ yu̱ns wu̱n du̱gu̱ m-mar, in hyanu̱g wu̱n da-u̱ wa yu̱ne̱ du̱gu̱ marimari-ne̱, tu̱msu̱ it o̱ waru̱ no̱ sin-se̱. 16 U̱ remu̱ yadu̱ jab m-shin ne̱ mu̱ Ye̱so̱, ne̱t unwa no̱ hyane̱ tu̱msu̱ no̱ nu̱p o̱ wa kumte̱ m-yar. Remu̱ zu̱ it yaag u̱t-nip u̱ Ye̱so̱ o̱ wa'e̱ ne̱t unwa o̱tte̱ m-yar. No̱ be̱e̱t hen no̱ hyanu̱g.

17 <<U̱ da-o̱ o̱r-u̱t ri, u̱m nak no̱mu̱ no̱ no̱mu̱ Ye̱so̱ u̱ tu̱-shu̱ no̱ ne̱, no̱ no̱mu̱g u̱ remu̱ zu̱ no̱ nak u̱zu̱ wu̱na o̱ Kiristi da. 18 Se̱di u̱ remu̱ iya o̱ Ru̱-u̱ shu̱u̱ste̱ no̱m-u̱ wa ware̱ u̱ nu-tu̱ a-warru̱ rem-su̱ u-Ru̱ u̱zu̱, Ru̱-u̱ de̱ to̱mnu̱ Kiristi u remu̱ wa u̱ku̱rte̱ ne̱t-u̱t wa, tu̱msu̱ wa de̱ swadu̱ u̱r-ko̱b. 19 Remu̱ iya yagu̱n u̱t-ba'as, no̱ byu̱ru̱n u̱du̱ u-Ru̱, remu̱ wa jaaste̱ ba'as-u̱t no̱. 20 A no̱ no̱me̱ iya, Wa-Ko̱-uyan de̱ mutu̱ jab-u̱s no̱ u̱ pose̱, Wa de̱ to̱mnu̱ Kiristi u̱du̱ no̱ tun du̱gu̱ u̱r-taku̱n, wato Ye̱so̱. 21 Nip-to̱ Ye̱so̱ wa shu̱'u̱te̱ u̱ do̱m u-ru̱, har da-u̱ wa de̱ mutu̱ ko-uyan u̱ po-o̱, u̱ka Ru̱-u̱ zu̱tte̱ du̱gu̱ u̱r-taku̱n u̱ nu-tu̱ a-warru̱ rem-su̱ u-Ru̱ ne̱ i u-he̱n. 22 Mosa zu̱u̱g, <Yawe Ru̱-u no̱ de̱ to̱mtu̱n no̱ waku̱n wa-warru̱ rem-su̱ u-Ru̱ u̱ te̱k-u̱ me̱ no̱, u̱ka na tomtu̱ me̱. Ku̱mge̱ hen no̱ ho̱g no̱m-u̱ wa de̱ waru̱ no̱. 23 U̱t-shu̱'u̱t hen wu̱ gu̱gme̱ ho̱g-du̱ wa-warru̱ rem-su̱ u-Ru̱ wa, na de̱ rutu̱ wa te̱k-u̱ me̱ u̱t-ne̱t.>* 24 Iya o̱ hen te̱k-u̱ a-warru̱ rem-su̱ u-Ru̱ ne̱ be̱e̱t i no̱me̱ u̱s-rem, du̱gu̱ da-u Samaira u̱ haan u̱ i haane̱ u̱-dim, e̱ no̱ng u̱s-rem u̱ remu̱ ho̱-u̱t tun-to̱. 25 Rem-su̱ u-Ru̱ su̱ a-warru̱ rem-su̱ u-Ru̱ ne̱ no̱me̱, remu̱ no̱ o̱ na nomte̱, tu̱msu̱ no̱ de̱ re̱-du̱ este̱du̱ u̱s-rem su̱ Ru̱-u̱ no̱me̱ u̱ u̱so-tu̱ u̱so-u̱t in ne̱, u̱ wa zu̱tte̱ Ibrahi, <U̱ me̱ ko̱-u̱r rò de̱ rem-tu̱ dak-u uno̱ u-be̱e̱t de̱ kwu̱m-du̱ kom-u̱ u-Ru̱.>† 26 Da-u̱ Ru̱-u̱ yu̱nse̱ to̱k-u̱ wa, wa tom wa u̱r-taku̱n m-ha du̱ no̱ u̱ wa wa-u̱ no̱ kom-u̱ so̱-o̱ u̱ wa muutu̱ no̱ u̱ yage̱-du̱ fu̱n-u̱s yo̱-se̱ no̱.>>