4
Biturus u̱ Yohanna u̱
Mo̱ro̱g-du̱ u̱t-Ne̱nge̱n ne̱
1 A-to̱o̱g u̱ yu̱-shu̱ a e'-du̱ be-du̱ u̱r-shu̱'u̱t du̱ Wa-ko̱-uyan ne̱ u̱ Saduki-ne̱ e̱ haan u̱du̱ Biturus u̱ Yohanna da-u̱ e̱ o̱o̱ge̱ u̱s-rem u̱t-ne̱t ne̱.
2 E̱ hog u̱s-ryab remu̱ zu̱ a-To̱mu̱ Ye̱so̱ o̱ iis-u̱ u̱t-ne̱t u̱zu̱, remu̱ shin-m Ye̱so̱ i mare̱ e̱ de̱ u̱r-yu̱ne̱ u̱r-fat u̱ka Ye̱so̱ yu̱nte̱.
3 U̱n maste̱ Biturus e̱ Yohanna, u̱n tage̱ e̱ m-ha gas-du̱ is remu̱ zu̱ rim-mu̱ torog u̱ da-u o̱.
4 Tu̱msu̱ u̱t-ne̱t u-tát e̱ hog re̱m-su̱ Biturus ne̱ ware̱ e̱ ku̱b tu̱msu̱ ne̱t-tu̱ kabe̱ e̱ teeg campa-ne̱ u̱t-zo̱ngu u̱t-tan [5,000].
5 Da-u̱ is gase̱, a-shu̱ ne̱, u̱t-ne̱nge̱n ne̱, u̱ a-ko̱se̱-tu̱ u-bo̱r ne̱, e̱ mo̱ro̱g u̱ Urusharima.
6 Anas yu̱ yat-ya a-to̱o̱g, wa o̱ u̱ku̱n, u̱ Kayafa, u̱ Yohanna, u̱ Are̱kzanda, u̱ to̱ko̱n ne̱t-to̱ ne̱ tu̱ o̱ bu-u̱ yu̱ yat-ya a-to̱o̱g-ne̱.
7 U̱n wu̱ na haatu̱n Biturus e̱ Yohanna. U̱n no̱mu̱ u̱n u̱r-shu̱t u̱zu̱, <<¿Be̱b-u̱r wande̱ tu̱msu̱ dim-u̱r wande̱ no̱ o̱tte̱ no̱m-du̱ no̱m-u̱t tun-to̱?>>
8 Yar-u u-Ru̱ dor-u̱t Biturus, wa zu̱ u̱n, <<No̱ a-shu̱ u̱t-ne̱t ne̱, u̱ ne̱nge̱n-tu̱ Isra-ne̱,
9 ¿u̱ ya-o̱ no̱ o̱ u̱r-shu̱t remu̱ se̱ge̱-du̱ rya-mu̱ wa kume̱? ¿Tu̱msu̱ no̱ u̱t-sa na nap wu̱ ya' wu̱n m-yar?
10 It u̱t-sa no̱ be̱e̱t u̱ ne̱t-tu̱ Isra-ne̱ u̱t-be̱e̱t no̱ nap u̱zu̱, u̱ te̱k-u̱ dim-u̱r Ye̱so̱ Kiristi wa-Nazara. Wu̱ no̱ tare̱ u-kan, Ru̱-u̱ yu̱ns wa du̱gu̱ m-mar. Ye̱so̱ yaag wu̱n m-yar u̱ da-o̱ hen no̱ hyanu̱g se̱.
11 Ye̱so̱ wa na nomte̱ u̱s-rem u̱-me̱ rem-su̱ u-Ru̱ u̱zu̱,
<< <Ta'ar-du̱ u̱r-tak du̱ u-ma
du̱ a u-ma ne̱ gu̱gme̱,
de̱ shu̱'u̱te̱ ta'ar-du̱
ze̱ge̱ u̱r-zwar.>
12 Ru̱-u̱ to̱mgu̱n in ne̱t gan kyak wu̱ de̱ u̱kru̱ in du̱gu̱ ba'as-u̱t in, tu̱msu̱ dim-du̱ zaar u̱-me̱ dak-u uno̱ du̱ ko̱re̱ kwu̱m-du̱ u-u̱ku̱r da se̱ dim-u̱r Ye̱so̱.>>
13 Tu̱-shu̱ hu̱ mu̱rimmo̱ remu̱ hyan-du̱ be̱b-du̱ jab-u̱ Biturus e̱ Yohanna. E̱ haan e̱ nu̱p u̱zu̱ Biturus u̱ Yohanna e̱ za te̱k-u̱ ne̱t-u̱t yat-to̱ da tu̱msu̱ e̱ no̱ng m-karu̱nte̱ da. Du̱gu̱ da-u̱ o̱ u̱n nu̱p u̱zu̱ u̱n o̱o̱g u̱r-kot u̱ Ye̱so̱ ne̱.
14 Da-u̱ tu̱-shu̱ hyane̱ wu̱ kume̱ m-yar u̱ ees u̱du̱ Biturus u̱ Yohanna ne̱, e̱ kerge̱ zu̱-du̱ o̱ko̱n da.
15 E̱ nom u-shaura u̱ te̱k-u̱ me̱ u̱n u̱zu̱, Biturus ne̱ u̱ Yohanna e̱ yage̱ Mo̱ro̱g-du̱ u̱t-Ne̱nge̱n.
16 E̱ zu̱, <<¿Yan-o̱ in do̱'e̱ u̱t-no̱m u̱ ne̱t-u̱t tun-to̱ ne̱? Remu̱ zu̱ kowan u̱ Urusharima nak u̱zu̱ ne̱t-tu̱ hyanu̱g no̱m-tu̱ m-shin u̱du̱ ne̱t-u̱t tun-to̱, fu̱n zaar u̱ na do̱te̱ u̱t-zu̱, <Bise̱ da.>
17 Se̱di it o̱ gye̱r-u̱ rem-u̱s sin-se̱ cwa ko he̱ne̱, se̱ na nak u̱n u̱t-to̱, a u̱n no̱mu̱ waku̱n u̱s-rem da, ko u̱n no̱m u̱t-ko̱se̱ u̱ dim-u̱r Ye̱so̱ da.>>
18 Se̱ u̱n fagu̱n a-To̱m ne̱, u̱n nu̱k u̱n u̱t-to̱ u̱zu̱, a u̱n waru̱ waku̱n u̱s-rem, ko u̱n no̱m u̱t-ko̱se̱ u̱ dim-u̱r Ye̱so̱ da.
19 Biturus e̱ Yohanna shu̱s e̱ zu̱ u̱n, <<¿No̱ o̱ m-hyan u̱zu̱ Ru̱-u̱ u̱t-sa it ho̱g rem-u̱s no̱ m-ze̱g su̱ wa?
20 Remu̱ zu̱ it, it za keru̱ ho̱-du̱ u̱s-ram u̱ warru̱ no̱m-u̱ it ho̱ge̱ tu̱msu̱ it hyen da.>>
21 Tu̱-shu̱ u̱t-ne̱nge̱n sur m-nak u̱n u̱t-to̱ sok, da tase̱ u̱n rest u̱n. U̱n taag u̱ka u̱n do̱te̱ yadu̱ u̱n u̱r-ko̱b, remu̱ zu̱ u̱t-ne̱t u̱t-be̱e̱t to̱ o̱ no̱mu̱ u-Ru̱ m-sek remu̱ no̱mu̱ u̱ no̱me̱.
22 Ne̱t-u̱ wa wu̱ kume̱ m-yar mu̱ m-shin wa ze̱k u̱s-hak u̱t-shik u̱t-yu̱r [40].
23 Da-u̱ na reste̱ Biturus e̱ Yohanna, se̱ e̱ do̱'e̱ u̱du̱ o̱r-u̱t u̱n, u̱n waru̱ u̱n no̱m-u̱ i-yate̱ a-To̱o̱g u̱ u̱t-ne̱nge̱n ne̱ waru̱ u̱n.
24 U̱n hen da-u̱ u̱n ho̱ge̱ iya, u̱n jaku̱s cwar-u̱s u̱n u̱du̱ u-Ru̱ jab gan u̱n zu̱, <<Wa Ko-uyan, Wu̱ no̱me̱ do̱m u-ru̱ u-dak ne̱, m-sa ne̱, u̱ no̱m-tu̱ o̱ me̱ to̱.
25 Bo̱ no̱mu̱g u̱s-rem m-tumb ne̱ u̱ be̱b-du̱ Yar-u u-Ru̱ tu̱msu̱ remu̱ to̱k-u̱ ro, wato wu̱ mate̱ u̱so-u it Dawuda:
<< <¿Remu̱ yan-o̱
i za-yahuda-ne̱ da
nomte̱ u̱s-ryab?
¿Remu̱ yan-o̱ tu̱msu̱ ne̱t-tu̱
nomte̱ dorog-su̱ m-zan?
26 Farkina-ne̱ i u-dak
yu̱ne̱ e̱ zo̱ng m-gag,
tu̱msu̱ tu̱-shu̱ u̱t-ne̱t
same̱ u̱r-hi u̱ u̱n ne̱,
u̱n o̱ yu̱r yo̱-de̱ u̱ Yawe,
u̱ Kiristi ne̱ wu̱ Ru̱-u̱ dage̱
wa-u-u̱ku̱r in.>
27 Remu̱ u̱zu̱ nip-to̱, Here̱ Antipas u̱ Biratus samge̱ u̱t-hi u̱-me̱ bo̱-u uno̱ u̱ i za-yahuda-ne̱ da u̱ ne̱t-tu̱ Isra-ne̱. U̱n no̱ng zo̱ngu̱sse̱ remu̱ u̱n ho-u̱t Ye̱so̱, wu̱ bo̱ dage̱ u wa shu̱'u̱t to̱k-u u-he̱n ró.
28 Remu̱ zu̱ bo̱ o̱ m-shin ne̱, ne̱t-u̱t to̱ no̱mu̱g no̱mu̱ bo̱ zu̱ e̱ no̱m. No̱mu̱ bo̱ zo̱nge̱ u̱t-no̱m m-tumb ne̱ o̱ de̱ u̱t-shu̱'u̱t.
29 Wa-ko-uyan, ho̱g u̱ka u̱n o̱tte̱ rem-su̱ mo̱t-tu̱ yadu̱ it u̱r-ko̱b. Ya to̱k-ne̱ ro be̱b-du̱ jab du̱ warru̱ rem-u̱s ro za u-gye̱r.
30 Nabne̱ kom-u ró bo̱ hatu̱n m-yar u̱ no̱m-tu̱ wadu̱ ne̱t u̱ mu̱rimmo̱ u̱ no̱m-tu̱ m-shin ne̱, u̱ remu̱ dim-du̱ to̱k-u̱ ro Ye̱so̱, Wa-u-He̱n.>>
31 Da-u̱ e̱ no̱me̱ u̱s-to̱o̱g, be-du̱ e̱ mo̱ro̱gte̱ ru̱mu̱s. Se̱ Yar-u u-Ru̱ dor-u̱t u̱n be̱e̱t u̱, u̱n hu̱ warru̱ rem-su̱ u-Ru̱ za u-gye̱r.
32 Mo̱ro̱g-du̱ a-dor e̱ o̱ jab gan, waku̱n zaar wu̱ de̱ u̱t-zu̱, <<No̱m-u ri ya>> da, se̱di u̱n mot no̱m-u̱ u̱n o̱tte̱.
33 U̱r-be̱b ne̱ so̱k, a-To̱mu̱ Ye̱so̱ wu̱r u̱ka yu̱ne̱-du̱ Wa-ko-uyan Ye̱so̱ du̱gu̱ marimari-ne̱. Kowan u̱ te̱k-u̱ me̱ u̱n kum kom-u̱ u-Ru̱,
34 Tu̱msu̱ waku̱n zaar wu̱ tage̱ u̱ o̱ko̱n no̱m-o̱ u̱ te̱k-u̱ me̱ u̱n da. E̱ke̱n a-dor-ne̱ i o̱tte̱ u̱t-tak ko̱ u̱t-bu, o̱ko̱n da-o̱ e̱ bu̱b to̱ko̱n no̱m-to̱. Tu̱msu̱ e̱ hatu̱n shik-u̱ no̱m-tu̱ e̱ babe̱.
35 U̱n haatu̱n shik u̱-shu̱ a-To̱mu̱ Ye̱so̱ ne̱, na ye' kowan u̱ka wa o̱tte̱ u̱ssa.
36 Waku̱n o̱ro wu̱na zu̱ye̱ Yusuhu, wu̱ a-To̱mu̱ Ye̱so̱ te̱'e̱ u̱r-dim Baraba (wato, Wa'-u̱ wa shiriktin-mu̱ jab). Wa o̱ u̱ te̱k-u̱ me̱ ko̱-u̱r Re̱wi ne̱, tu̱msu̱ wa hagu̱n du̱gu̱ Gas-u̱ Sayifurus.
37 Baraba bu̱b o̱ko̱n tak-o̱ u̱ wa, wa haatu̱n shik-u̱ ke̱nu̱ a-To̱mu̱ Ye̱so̱.