4
Reg-m Ye̱so̱
(Mark 1:12-13; Ruka 4:1-13)
1 Se̱ Yar u-Ru̱ dor-u̱t Ye̱so̱ m-cwa u̱t-kanda u̱ remu̱ faru̱k-u̱ no̱m u̱s-te no̱m-tu̱ wa m-reg.
2 Da-u̱ Ye̱so̱ no̱me̱ u-swaat m-roog u̱t-shik u̱t-yu̱r u̱t-ho̱ ne̱ u̱t-shik u̱t-yu̱r, se̱ wa hog u̱s-me̱r.
3 Faru̱k-u̱ no̱m u̱s-te haan u̱du̱ ro wa zu̱, <<Abite̱ Wa'-u̱ u-Ru̱ wa bo̱ o̱ye̱, zu̱ ta'ar-u̱r rinde̱ de̱ mu no̱m u̱t-re̱.>>
4 Ye̱so̱ shu̱s wa zu̱, <<Rem-su̱ u-Ru̱ zu̱u̱g, a-no̱m u̱t-re̱ u̱ war-o̱ ne̱t do̱te̱ u̱r-fat da, se̱ rem-su̱ rwu̱ne̱ du̱gu̱ nu-u̱ u-Ru̱.>>
5 Faru̱k-u̱ no̱m u̱s-te ku̱b wu̱n m-ha u̱ bo̱-u̱ Urusharima bo̱-u̱ u-he̱n, se̱ wa du̱u̱t wu̱n u̱ be-du̱ m-ja be-du̱ u̱r-shu̱'u̱t du̱ Wa-ko̱-uyan.
6 Tu̱msu̱ wa zu̱ wu̱n, <<Abite̱ Wa'-u̱ u-Ru̱ wa bo̱ o̱ye̱, tane̱ tari mak bo̱ he̱e̱n u-dak. Remu̱ zu̱ na panu̱g u̱zu̱,
<< <Ru̱-u̱ de̱ wadu̱ a-to̱mu̱ wa, e̱ 'e̱ bo̱,
E̱ e̱r bo̱ u̱ kom-u̱t e̱,
Taas u̱ na-u ro u̱ gap u̱r-ta'ar da.>>>
7 Ye̱so̱ shu̱s wa zu̱, <<Na panu̱g u̱zu̱, <A-bo̱ no̱mu̱ Wa-ko-uyan Ru̱-u ro m-reg da.> >>
8 Se̱ faru̱k-u̱ no̱m u̱s-te ku̱b wu̱n m-ha ro̱r-du̱ zege̱ m-ja, wa ko̱se̱ wu̱n faru̱k-tu̱ dak-u uno̱, u̱ zwar-u̱r wa ne̱.
9 Se̱ wa zu̱, <<Me̱ ya u̱ bo̱ no̱m-u̱t to̱ u̱t-be̱e̱t, a-bo̱ no̱mu̱ me̱ u̱t-huuk.>>
10 Se̱ Ye̱so̱ zu̱ wu̱n, <<Faru̱k-u̱ no̱m u̱s-te, hate̱ du̱gu̱ kit-u̱ ri, remu̱ na panu̱g u̱zu̱, <Bo̱ no̱mu̱ Wa-ko-uyan Ru̱-u ró u̱t-huuk, tu̱msu̱ wa bo̱ do̱'e̱ u̱t-do̱r, wa u-gan.> >>
11 Faru̱k-u̱ no̱m u̱s-te yage̱ wu̱n, se̱ a-to̱m u-Ru̱ haan, e̱ no̱mu̱ wu̱n u̱r-se̱ge̱.
Ye̱so̱ he̱e̱ste̱ bu̱t-tu̱
Rem-su̱ u-Ru̱ u̱ Gariri
(Mark 1:14-15; Ruka 4:14-15)
12 Da-u̱ Ye̱so̱ ho̱ge̱ u̱zu̱ Here̱ Faru̱k Antipas wa'ag Yohanna wa-u̱t-yu̱bu̱sse̱ m-bu̱ u̱ bu-u̱ m-to̱k, se̱ wa mu u̱ dak-u̱ Gariri.
13 Ye̱so̱ yage̱ bo̱-u̱ Nazara wa do̱'e̱ wa shu̱'u̱t u̱ Kapanahum, u̱ dap-su̱ m-sa mu̱ Gariri u̱-me̱ dak-u̱ Ze̱be̱run u̱ Naptari-ne̱.
14 No̱m-u̱ wu̱te̱ wu̱n m-ha u̱ku̱n, remu̱ wa hyen-u̱t no̱mu̱ Ishaya Wa-warru̱ rem-su̱ u-Ru̱ zu̱ na u̱t-no̱m, na no̱m o.
15 <<Dak-u̱ Ze̱be̱run u̱ dak-u̱ Naptari-ne̱,
o̱ do̱m-u̱ fu̱n-yu̱ o̱ dapu̱s sa-mu̱ u̱ gas-u̱ u-do̱m u̱ gi-yu̱ Yodan,
Dak-to̱ u̱-me̱ dak-u̱ Gariri be-tu̱ i za-Yahuda-ne̱ zegte̱ u-tát da.
16 Ne̱t-tu̱ o̱ u̱r-yu̱ u̱-me̱ u-cwu̱m,
e̱ hyanu̱g zu̱n-m yat-mo̱.
U̱du̱ i o̱o̱ge̱ u̱r-yu̱ u̱-me̱ dak-u̱ yara-mu̱ m-mar.
Zu̱n-mu̱ rwu̱gu̱n e̱.>>
17 Du̱gu̱ da-u o̱ Ye̱so̱ he̱e̱se̱ u̱t-bu̱t, u̱zu̱, <<Yagu̱n u̱t-ba'as no̱ byu̱ru̱n u̱du̱ u-Ru̱, remu̱ zu̱ da-u̱ Ru̱-u̱ de̱ u̱r-faru̱k o̱ u̱t-mo̱r.>>
Ye̱so̱ fak a-doru̱ wa ne̱
nas u̱r-taku̱n
(Mark 1:16-20; Ruka 5:1-11)
18 Da-u̱ Ye̱so̱ o̱o̱ge̱ m-ha u̱ dapu̱s m-sa mu̱ Gariri, se̱ wa hyen ne̱t-ne̱ yu̱r, u̱ Simo̱n wu̱na foge̱ Biturus u̱ o̱r-u̱ wu̱n ne̱ Andarawus, e̱ o̱ gwu̱n-du̱ no̱m-tu̱ masu̱ jan, u̱-me̱ m-sa, remu̱ zu̱ u̱n a masu̱ jan ne̱ e̱.
19 Ye̱so̱ zu̱ u̱n, <<Dornu̱n me̱, me̱ mutu̱ no̱ a naknu̱ u̱t-ne̱t u̱ haan u̱du̱ ri.>>
20 Za rem, u̱n yage̱ no̱m-tu̱ masu̱ jan-u̱ u̱n, u̱n dor wa.
21 Da-u̱ wa re̱ shu̱ m-ha ne̱, se̱ wa hyen e̱ke̱n ne̱t-ne̱ yu̱r, u̱ Yakubu e̱ Yohanna ya'ag-u̱ Zabadi. E̱ o̱ u̱-me̱ u-hat u̱ u̱so-u u̱n ne̱ Zabadi, e̱ o̱ mangu̱ no̱m-tu̱ masu̱ jan-u̱ e̱. Ye̱so̱ fog u̱n.
22 Za rem u̱n yage̱ u-hat u̱ u̱so-u u̱n ne̱, u̱n dor wa.
Ye̱so̱ haste̱ u̱t-ne̱t u̱s-go̱m
(Ruka 6:17-19)
23 Ye̱so̱ rigu̱sse̱ dak-u̱ Gariri wa o̱ no̱mu̱ u̱n u̱t-ko̱se̱ u̱-me̱ bu-u̱ u̱t-ko̱se̱ u̱ Yahuda-ne̱, wa o̱ no̱mu̱ u̱n u̱t-bu̱t tu̱ Rem-su̱ m-Re̱me̱r su̱ Faru̱k-du̱ u-Ru̱, tu̱msu̱ u̱ has-tu̱ ne̱t-ne̱ u̱s-go̱m m-re̱ ne̱.
24 Rem-su̱ no̱m-tu̱ Ye̱so̱ no̱me̱ nu̱ru̱s dak-u̱ Suriya u-be̱e̱t, Ne̱t-tu̱ hu̱ haatu̱n wu̱n a u̱s-go̱m u̱ a-ko̱b-du̱ m-yar ne̱, u̱ a swadu̱ u̱r-ko̱b ne̱ m-re̱, u̱ a-no̱m u̱s-te ne̱, u̱ i o̱tte̱ go̱m-su̱ u̱r-he̱'e̱, u̱ a remu̱ swadu̱ ne̱t-ne̱ u̱t-be ne̱, se̱ wa yu̱' e̱ m-yar.
25 Mo̱ro̱g-du̱ u̱t-ne̱t du̱gu̱ Gariri, u̱ Dikaporis, u̱ Urusharima, u̱ Gas-u̱ Yahudiya, tu̱msu̱ u̱ gas-u̱ gwu̱g-du̱ gi-yu̱ Yodan dor wu̱n.