18
He̱'e̱ du̱ bo̱-u̱ Babira
1 Da taase̱ tu̱msu̱ u̱m hyu̱n waku̱n wa-to̱m u-Ru̱ wa cu̱zu̱n du̱gu̱ me̱ do̱m u-ru̱. U̱ be̱b-u̱r yat-de̱ ne̱ sok, wa o̱tte̱ shin-m yat-mo̱, tu̱msu̱ dak-u̱ no̱m m-zu̱n u̱ remu̱ sek-m wa.
2 Wa nom u̱t-jar u̱ cwar-yu̱ m-yat:
<<Babira o̱ hemu̱sse̱! Babira bo̱-u yat-o̱ hemu̱sse̱!
O̱ shu̱'u̱te̱ be-du̱ u̱r-pak du̱ ko̱-uyan go̱-du̱ no̱m u̱s-te ne̱
tu̱msu̱ be-du̱ u̱r-pak du̱ ko-uyan go̱-du̱ yar-u̱t yo̱-to̱
tu̱msu̱ be-du̱ u̱r-pak du̱ ko̱-uyan go̱-du̱ no za so̱-ye̱ ne̱
tu̱msu̱ be-du̱ u̱r-pak du̱ ko̱-uyan go̱-du̱ bisa-o̱
u̱ za u-he̱n tu̱msu̱ u̱ tu̱ u̱s-gu̱r ne̱.
3 U̱t-dak u̱t-be̱e̱t e̱ no̱ng u̱r-kot u̱ wa ne̱,
u̱ yu̱-du̱ m-o̱ u̱ wu̱n ne̱ u̱ka ne̱t wu̱ ke̱ ho̱ye̱.
Faru̱k-tu̱ u-dak to̱ no̱ng m-o̱ u̱ wu̱n ne̱,
tu̱msu̱ a-u-cerpa ne̱ i u-dak u-be̱e̱t shu̱'u̱te̱ a-u̱t-kwu̱m ne̱
so̱k remu̱ u̱zu̱ wu̱n kerge̱ o̱o̱du̱ nom-tu̱ shik u-tát.>>
4 Se̱ u̱m hog yaku̱n cwar-ya u̱s-fag du̱gu̱ me̱ do̱m u-ru̱,
<<Hatu̱n m-ra du̱gu̱-du̱ wu̱n, ne̱t-u̱t ri.
A no̱ same̱ u̱t-hi u̱ ba'as-u̱t wu̱n ne̱ da,
taas tu̱msu̱ na ya' no̱ u̱r-ko̱b u̱r-kot u̱ wu̱n ne̱.
5 Remu̱ ba'as-u̱t wu̱n no̱ng u-tát, u̱ka ta'ar-tu̱ na kargu̱sse̱ to̱ nom m-ja m-te̱ me̱ do̱m u-ru̱,
tu̱msu̱ Ru̱-u̱ baku̱ste̱ u̱ no̱m-u̱t yo̱-to̱ rò ne̱.
6 No̱mu̱ wu̱n u̱ka wu̱n nomte̱ u̱t-ne̱t. To̱p-u̱ wu̱n u-so yu̱r remu̱ no̱m-u̱t yo̱-to̱ ró.
U̱-me̱ ko̱k-du̱ du̱ wu̱n var-tu̱ e̱ke̱n ne̱,
varu̱n wu̱n ko̱wu̱n u-so u-yu̱r no̱m-u̱ wu̱n varu̱ e̱.
7 Ya' kaar-u ya u̱r-ko̱b tu̱msu̱ u̱ namu̱ jab ne̱
u̱ka m-sek tu̱msu̱ u̱ ho̱g-du̱ m-re̱me̱r ne̱
du̱ wu̱n ya'e̱ hi-u̱r wu̱n.
Wa no̱ng u̱t-u̱k u̱-me̱ jab-u̱ wa,
<U̱m shu̱'u̱te̱ u̱ka u-re̱n tu̱msu̱ u̱m zaar bomos da.
U̱m zaar u̱ tame̱-du̱ no̱m-du̱ namu̱ jab da.>
8 Remu̱ iya, no̱m-tu̱ haatu̱n swadu̱ u̱r-ko̱b tun-to̱ do̱'e̱ he̱e̱n u̱du̱ rò u̱r-ho̱ u̱r-gan:
m-mar u̱ namu̱ jab ne̱ u̱ u̱s-me̱r ne̱.
Ra-u̱ do̱'e̱ u̱ toksu̱ wu̱n,
remu̱ u̱zu̱ Wa-ko-uyan u-Ru̱ wu̱ do̱'e̱ kwu̱pu̱ wu̱n u̱s-rem
wa o̱ wa-u̱r-be̱b u-be̱e̱t.
9 <<Tu̱msu̱ faru̱k-tu̱ u-dak u̱t-be̱e̱t tu̱ no̱me̱ m-o̱ u̱ wu̱n ne̱ u̱ yu̱-du̱ ho̱g-du̱ m-re̱me̱r u̱ wu̱n ne̱ e̱ do̱'e̱ no̱m-du̱ u̱s-kan u̱ namu̱ jab ne̱ da-u̱ u̱n hyane̱ m-fu̱'u̱t mu̱ o̱ yu̱ne̱ du̱gu̱ ra-u̱ o̱o̱ge̱ tok-du̱ wu̱n.
10 E̱ do̱'e̱ u̱t-ees m-ra, e̱ ho̱g u-gye̱r u̱ remu̱ swa-u̱ u̱r-ko̱b wu̱n. Tu̱msu̱ u̱n do̱'e̱ u̱t-zu̱,
<< <No̱m-tu̱ u̱r-o̱n! No̱m-tu̱ u̱r-o̱n u̱du̱ ró Bo̱-u Yat-o̱,
Babira bo̱-u yat-o̱!
Remu̱ u̱zu̱ u̱-me̱ u-kwam u-gan
kwu̱p-du̱ u̱s-rem su̱ u-Ru̱ he̱e̱gu̱n u̱du̱ rò.>
11 <<A-u-cerpa ne̱ i u-dak u-be̱e̱t e̱ no̱m u̱s-kan u̱ namu̱ jab ne̱ rem-u wu̱n, remu̱ u̱zu̱ waku̱n zamu̱n wu̱ do̱'e̱ u̱ o̱o̱du̱ cwu̱-u̱t e̱ da.
12 Cwu̱-tu̱ u̱n o̱o̱ge̱ u̱t-bab to̱ o̱o̱ge̱, kwam-tu̱ bu̱-mu̱ u̱t-ró tu̱ shik, ta'ar-tu̱ pus-to̱ ne̱ tu̱ shik ne̱, ta'ar-tu̱ shik ne̱, u̱ uz ne̱ i shik, tu̱msu̱ u̱ cwu̱-tu̱ u̱s-ke̱e̱r ne̱ tu̱ so̱-to̱, u̱ kus-tu̱ bu̱-mu̱ u̱r-ge̱ ne̱, u̱ tu̱ jas-to̱, kus-tu̱ m-baku̱t ne̱, u̱s-katako̱ ne̱ su̱ te-yu̱ Sitiru, tu̱msu̱ no̱m-tu̱ na no̱me̱ du̱gu̱ nin u-rwag, u̱ katako-su̱ shik ne̱, kwam-tu̱ bu̱-mu̱ u-dak ne̱ tu̱ shik, kwam-u̱t rim-to̱ ne̱ tu̱msu̱ ta'ar-tu̱ m-baku̱t ne̱,
13 u̱ u̱t-kirfa, u̱ u̱t-po̱-u̱g ne̱, u̱ no̱o̱g-mu̱ wu̱s u-haku̱n ne̱, u̱ m-no̱o̱g ne̱ u̱ mur ne̱, u̱ no̱o̱g-mu̱ mang u-war ne̱, u̱ ke̱ ne̱, u̱ no̱o̱g-mu̱ inabi ne̱, u̱ hyu̱-mu̱ fat ne̱, u̱ hyu̱-mu̱ bur ne̱, u̱ na ne̱, u̱ ca ne̱, u̱ jwaak ne̱, u̱ ke̱ke̱-su̱ jwaak ne̱, u̱ to̱k-ne̱ wata, u̱ fat-tu̱ u̱t-ne̱t ne̱.
14 <<U̱n do̱'e̱ u̱t-zu̱, <Ya-tu̱ u̱s-te tu̱ bo̱ tumbe̱ u̱t-sa bo̱ kum to̱ haag m-ha. Cwu̱-tu̱ shik ró u̱t-be̱e̱t u̱ no̱m-tu̱ bo̱ zu̱ge̱ u̱t-cwan ne̱ to̱ e̱nkte̱ bo̱, bo̱ zamu̱n u̱ kwu̱m-du̱ to̱ da m-mo̱mmo̱.>
15 A-u-cerpa ne̱ i shu̱'u̱te̱ a-u̱t-kwu̱m ne̱ u̱ remu̱ babu̱ wu̱n no̱m-u̱t tun-to̱ e̱ do̱'e̱ u̱t-ees m-ra, e̱ o̱ ho̱g-du̱ u-gye̱r u̱ remu̱ swa-u̱ u̱r-ko̱b ró. E̱ do̱'e̱ no̱m-du̱ u̱s-kan u̱ namu̱ jab ne̱.
16 << <No̱m-tu̱ u̱r-o̱n! No̱m-tu̱ u̱r-o̱n, u̱du̱ bo̱-u yat-o̱ uno̱!
Wu̱ o̱ m-wa' u̱ kus-u̱t so̱-to̱ ne̱ tu̱ u̱s-ke̱e̱r,
u̱ tu̱ bu̱-mu̱ u̱r-ge̱ ne̱ tu̱msu̱ tu̱ jas-to̱ ne̱,
tu̱msu̱ u̱t-u̱k ne̱ tu̱ kwam-tu̱ bu̱-mu̱ u̱t-ró tu̱ shik,
u̱ ta'ar-tu̱ shik ne̱ tu̱msu̱ uz ne̱ i shik!
17 U̱-me̱ u-kwam u-gan kwu̱m-u̱t yatto̱ to̱ natu̱sse̱!>
<<Ko̱yu̱he̱ yu̱ yat-ya hat-su̱ m-bu̱ u̱ i nome̱ m-ha u̱-me̱ m-sa ne̱, u̱ ne̱t-tu̱ nak-du̱ u̱s-hat ne̱ tu̱msu̱ u̱ i kume̱ shik-u̱ e̱ ne̱ du̱gu̱ u̱-me̱ m-sa e̱ do̱'e̱ u̱t-ees m-ra.
18 Da-u̱ u̱n hyane̱ m-fu̱'u̱t du̱gu̱ be-du̱ wu̱n o̱tte̱ m-tok u̱n do̱'e̱ no̱m-du̱ u̱t-jar u̱n zu̱ <He̱ne̱ o̱ o̱ko̱n bo̱-o̱ o̱tte̱ u̱ o̱ yat-o̱ u̱ka bo̱-u uno̱?>
19 Tu̱msu̱ e̱ do̱'e̱ u̱s-kan u̱ namu̱ jab ne̱ u̱ as-du̱ m-huug ne̱ u̱ hi-u̱t e̱ remu̱ e̱ ko̱ste̱ namu̱ jab e̱. Tu̱msu̱ e̱ do̱'e̱ u̱t-jar,
<< <No̱m-tu̱ u̱r-o̱n! No̱m-tu̱ u̱r-o̱n u̱du̱
ró uno̱ bo̱-u yat-o̱ o̱!
I o̱tte̱ u̱s-hat e̱ shu̱'u̱t a-u̱t-kwu̱m ne̱
remu̱ pu̱st-du̱ kwu̱m-u̱t wu̱n m-bu̱.
U̱-me̱ u-kwam u-gan, to̱ aru̱kte̱ u̱t-be̱e̱t!
20 Cwar-yu̱ re u̱-shu̱ u̱t-zu̱ du̱gu̱ me̱ do̱m-u̱ u-ru̱,
No̱mo̱n u̱r-so̱ u̱ remu̱ Babira no̱ ne̱t-tu̱ o̱ me̱ do̱m u-ru̱!
No̱mo̱n u̱r-so̱, ne̱t-tu̱ u-Ru̱ u̱ a-to̱mu̱ Ye̱so̱ ne̱
u̱ a-warru̱ rem-su̱ u-Ru̱ ne̱!
Ru̱-u̱ no̱mgu̱ wu̱n kwu̱p-du̱ u̱s-rem u̱ka wu̱n no̱m-tu̱ no̱.> >>
21 Se̱ wa-to̱m u-Ru̱ wu̱ u̱r-be̱b ku̱b ta'ar-u yat-o̱ u̱ka ta'ar-u̱r du̱ u̱r-na tu̱msu̱ wa gun de̱ u̱-me̱ m-sa, wa o̱ u̱t-zu̱,
<<I ya-o̱ bo̱-u yat-o̱ Babira na do̱te̱ u̱ gwu̱n-du̱ wa-u̱r-be̱b
tu̱msu̱ na zamu̱n u̱ hyan-du̱ o̱ da.
22 Na zamu̱n u̱t-sur m-ho̱g wan-tu̱ u̱s-mo̱ro̱, u̱ a u̱t-se̱p ne̱, u̱r-tu̱kku̱rma ne̱, tu̱msu̱ u̱s-kar ne̱ u̱-me̱ ró da.
Tu̱msu̱ na zamu̱n u̱t-sur m-kwu̱m waku̱n
wa no̱m-du̱ u-cerpa u̱-me̱ rò da.
Na zamu̱n tu̱msu̱ u̱t-sur m-ho̱g wan-tu̱ u̱r-na u̱-me̱ ró da.
23 Zu̱n-mu̱ u-hitirra
zamu̱n u̱t-mo̱k u̱-me̱ ró da.
Cwar-yu̱ gwu̱p u̱r-gu̱ u̱ zwar u̱r-gu̱ ne̱
na zamu̱n u̱t-sur m-ho̱g u̱-me̱ ró da.
A-u̱t-kwu̱m ne̱ ró e̱ o̱o̱ge̱ i-yate̱ u-dak u-be̱e̱t,
rem u̱zu̱ bo̱ e̱ngu̱sse̱ u̱t-dak u̱t-be̱e̱t u̱ gwat-u̱ bo̱ nome̱.
24 U̱-me fu̱n-u̱s rò na byu̱k-u̱t hyu̱-mu̱ a-warru̱ rem-su̱ u-Ru̱ ne̱ u̱ ne̱t-tu̱ u-Ru̱ ne̱
tu̱msu̱ u̱ hyu̱-mu̱ u̱t-ne̱t u̱t-be̱e̱t tu̱ na ho̱ye̱
ne̱ u̱-me̱ u-dak u-be̱e̱t.>>