19
Na vam Wa-ko-uyan
1 Da taase̱ u̱m hog na no̱ng u-gwu̱z u̱ka gwu̱z-u̱ u̱t-ne̱t u-tát u̱-me̱ do̱m u-ru̱, u̱n o̱ u̱t-jar:
<<Na vam Wa-ko-uyan!
U-u̱ku̱r tu̱msu̱ m-sek ne̱ u̱ u̱r-be̱b ne̱ shu̱'u̱t u̱du̱ Ru̱-u in,
2 remu̱ u̱zu̱ kwu̱p-du̱ u̱s-rem u̱ wa nip-to̱ tu̱msu̱ ho̱n-ho̱n.
Remu̱ wa no̱ngu̱ kaar-u yat-ya ya kwu̱p-du̱ u̱s-rem
wu̱ nase̱ u-dak u-be̱e̱t u̱ m-o̱.
Wa no̱ngu̱ wu̱n u-to̱p remu̱ u̱zu̱
wu̱n ho̱o̱g i no̱mu̱ wa m-to̱k.>>
3 Tu̱msu̱ u-yu̱ru̱mse̱ u̱n sur m-no̱m u̱t-jar,
<<Na vam Wa-ko-uyan!
M-fu̱'u̱t mu̱ bo̱-u o̱ do̱'e̱ u̱t-yu̱ne̱ u-ru̱ m-mo̱mmo̱!>>
4 Tu̱msu̱ ne̱nge̱n-u̱t to̱ u̱r-shik u̱t-nas u̱ no̱m-tu̱ u̱r-fat ne̱ u̱t-nas (24) u̱n he u-dak u̱n no̱me̱ u-Ru̱ u̱t-huuk wu̱ o̱ shu̱'u̱t u̱ do̱m-u̱ pora-du̱ u̱r-faru̱k. Tu̱msu̱ u̱n zu̱,
<<U̱ shu̱'u̱t iya! Na vam Wa-ko-uyan!>>
5 Se̱ cwar-yu̱ rwu̱u̱n du̱gu̱ pora-du̱ u̱r-faru̱k, ya zu̱,
<<Vamu̱n Ru̱-u in,
to̱kne̱ wa be̱e̱t,
i o̱o̱ge̱ u̱ gye̱r-u wa,
u̱ same̱ i-re̱k-e̱ u̱ i-yate̱.>>
6 Se̱ u̱m sur m-ho̱g u̱t-jar u̱ka jar-tu̱ u̱t-ne̱t u-tát, ko̱ sha-mu̱ gwu̱z-u̱ gi-yu̱ o̱ m-ja, ko̱ sha-mu̱ u-kagagag. U̱n zu̱,
<<Na vam Wa-ko-uyan!
Remu̱ Wa-ko-uyan in u-Ru̱ wu̱ zu̱ge̱ u̱r-be̱b
wa he̱se̱te̱ u̱r-faru̱k.
7 Yagu̱n in no̱mo̱n u̱r-so̱ u̱ me̱n-u̱t pus-to̱ ne̱,
tu̱msu̱ yagu̱n in ya' wu̱n m-sek.
Remu̱ da-u̱ teegu̱n u̱ mo̱ro̱g-du̱ u̱r-gu̱ du̱ Kag-u̱r U̱r-ca,
tu̱msu̱ gwu̱p u̱r-gu̱ wu̱n zo̱ngte̱ hi-u̱r wa.
8 Na yaag wa
kus-u̱t pus-to̱ tu̱ so̱-to̱ tu̱msu̱ tu̱ m-baku̱t ne̱ u̱ wa wa'.>>
Remu̱ kus-u̱t pus-to̱ tu̱ so̱-to̱ to̱ o̱ ees-mu̱ ank-m so̱-mo̱ mu̱ ne̱t-tu̱ u-Ru̱.
9 Se̱ wa-to̱m u-Ru̱ zu̱ me̱, <<Pan inya: <Nu-u so̱-o̱ u̱du̱ i na bane̱ u̱du̱ mo̱ro̱g-du̱ u̱r-gu̱ du̱ Kag-u̱r U̱r-ca!> >> Tu̱msu̱ wa sur m-zu̱, <<Sin-se̱ o̱ rem-su̱ u-Ru̱ su̱ u̱t-nip.>>
10 Da-u̱ u̱m ho̱ge̱ no̱m-u̱ wu̱n zu̱ye̱ se̱ u̱m he u-dak u̱t-jwu̱n u-shu̱ wu̱n u̱m no̱mu̱ wu̱n u̱t-huuk. Se̱di wa zu̱ me̱, <<A-bo̱ no̱m iya da! To̱k wa u̱m o̱o̱ge̱ u̱ bo̱ ne̱ tu̱msu̱ u̱ o̱r-u̱t rò ne̱ i o̱ jab-u̱ so̱-o̱ ne̱ u̱du̱ do̱nse̱-du̱ rem-su̱ mo̱t-u̱t Ye̱so̱. No̱me̱ u-Ru̱ u̱t-huuk! Remu̱ rem-su̱ mo̱t-u̱t Ye̱so̱ o̱ haatu̱n be̱b-du̱ warru̱ no̱m-u̱ do̱'e̱ u̱t-no̱m u-shu̱.>>
Wa sak-mu̱ do̱m-u̱ jwaak-u pus-ya
11 Se̱ u̱m hyu̱n u̱-me̱ do̱m u-ru̱ u̱r-hu̱k tu̱msu̱ jwaak-u pus-ya o̱ ees u̱ku̱n, tu̱msu̱ wu̱ o̱ m-sak u̱ do̱m-u̱ jwaak-u ya dim-u̱r wa o̱ye̱ Wa ya-du̱ jab-u̱ u̱ Wa-u̱t-nip ne̱. Wa nom kwu̱p-du̱ u̱s-rem ho̱n-ho̱n tu̱msu̱ wa nom m-gag ho̱n-ho̱n.
12 Is-u̱ wa o̱ u̱ka rem-du̱ u-ra, tu̱msu̱ u̱ do̱m-u̱ hi-u̱r wa to̱p-tu̱ u̱r-faru̱k o̱ró u-tát. Dim-du̱ o̱ro m-pan u̱ do̱m-u̱ wa waku̱n ke̱rge̱ nap-du̱ de̱ da se̱ wa hi-u̱r wa.
13 Wa o̱ m-wa u̱t-cwu̱ ne̱ tu̱ na mase̱ u̱-me̱ m-hyu̱, tu̱msu̱ dim-u̱r wa na foge̱ Rem-su̱ u-Ru̱.
14 Ban-du̱ karma-ne̱ i o̱ me̱ do̱m u-ru̱ o̱ do̱rru̱ wu̱n, tu̱msu̱ e̱ o̱ m-sak u̱ jwaak-u puse̱ tu̱msu̱ m-wa u̱ kus-u̱t pus-to̱ ne̱ tu̱msu̱ u̱s-myak ne̱.
15 Du̱gu̱ me̱ nu-u wa van-u̱ m-wu̱r rwu̱u̱n yu̱ o̱ m-re̱ ne̱ remu̱ wa ho̱ru̱sse̱ hu̱u̱b-u̱t yo̱-to̱ tu̱ u-Ru̱ du̱gu̱ ko̱-u̱-he̱ dak-o̱. <<Wa do̱'e̱ no̱m-du̱ faru̱k-u̱r u̱n u̱ ko̱m-yu̱ u-kwam.>> Wa do̱'e̱ jangu̱sse̱ be-du̱ rew-mu̱ inabi, du̱ o̱o̱ge̱ ees-mu̱ ryab-su̱ u-Ru̱ wu̱ zu̱ge̱ u̱r-be̱b u-be̱e̱t.
16 Wa o̱tte̱ dim-u̱r wa m-pan u̱-do̱mu̱ to̱ggo̱-u wa tu̱msu̱ u̱-do̱mu̱ kut-u wa ne̱:
FARU̱K-U FARU̱KINA NE̱ TU̱MSU̱ WA-KO-UYAN WU̱ A KO-UYAN NE̱.
17 Se̱ u̱m hyu̱n wa-to̱m u-Ru̱ u̱ ees u̱-me̱ u̱r-ho̱, wa o̱ u̱t-jar m-yat u̱du̱ no i o̱o̱ge̱ u̱r-yu̱ne̱ u̱t-kap u̱-do̱m u-ru̱, <<Haanu̱n! Kargu̱n u̱r-be u̱r-gan remu̱ u̱zu̱ ho̱-du̱ mo̱ro̱g-du̱ re̱-du̱ no̱m-u̱ u̱t-re̱ du̱ yat-de̱ du̱ u-Ru̱ zo̱nge̱.
18 Haanu̱n no̱ tu̱ war-tu̱ u̱t-faru̱k, u̱ i-yate̱ karma-ne̱, u̱ be̱b-ne̱ i m-gag. Tu̱'u̱n ap-mu̱ jwaak u̱ a sakmu̱ jwaak ne̱, tu̱msu̱ u̱ ap-mu̱ u̱t-ne̱t ne̱ u̱t-be̱e̱t, u̱ same̱ to̱k-ne̱ tu̱msu̱ i zaare̱ m-to̱k ne̱ da, i-re̱k-e̱ u̱ i-yate̱ ne̱.>>
19 Se̱ u̱m hyu̱n bisa-u yo̱-o̱ ya u̱ faru̱k-tu̱ dak-u̱ u-be̱e̱t ne̱ tu̱msu̱ u̱ a-m-gag ne̱ e̱ karu̱gte̱ u̱r-be u̱r-gan remu̱ e̱ nom-u̱t m-gag u̱ wu̱ o̱ m-sak do̱m-u u-jwaak ne̱ u̱ a-m-gagu̱ wa ne̱.
20 Se̱di na maas bisa-u yo̱-o̱ ya, tu̱msu̱ u̱r-kot u̱ wa ne̱ u̱ wa-warru̱ rem-su̱ u-Ru̱ ne̱ i u̱s-bi i no̱me̱ no̱m-tu̱ m-shin u-tát u̱ ees-m wa. U̱ nap-u̱s se̱ wa e̱ngu̱sse̱ u̱t-ne̱t u-tát i kabe̱ nap-su̱ bisa-u yo̱-ya ya, tu̱msu̱ u̱n no̱me̱ ma-u̱ o̱o̱ge̱ sha-mu̱ bisa-u yo̱-ya ya u̱t-huuk. U̱n yu̱r na gun u̱n u̱r-fat ne̱ u̱-me̱ u̱r-kaw du̱ u-ra u̱ do̱'e̱ u̱t-wa u̱ kwam-tu̱ u̱'e̱.
21 Na ho̱ru̱sse̱ karma-ne̱ wa be̱e̱t u̱ van-u̱ m-wu̱r u̱ rwu̱u̱ne̱ du̱gu̱ me̱ nu-u̱ wu̱ o̱ye̱ m-sak u̱ jwaak-u pus-ya. Tu̱msu̱ sagra tu̱'u̱s ap-mu̱ u-u̱t u̱n se̱ da-u̱ e̱ shige̱.