12
No angelo ga halangalanga sei Pita tano hala na harpidinau
1 Ta iakan ra pakana bung Herot, no king, ga palim kahai aring tunatuna tano lotu wara hagawai diet.
2 Ga hartulai, di gaam bu bing Jemes no tasi Ioanes ma ra hisa.
3 Ma ing ga nas bia ira Iudeia diet ga guama ta iakan, io, ga hartulai bia da palim kahai mah Pita. (Ga gil iakan tano bung na ienien no Nian na Beret Pai Lalat.)
4 Bia di gata palim kahai Pita, Herot ga tangai bia da bul ia tano hala na harpidinau. Ga hartulai mah bia aihat na huna umri diet na balaurei bat ia. Ma ga mon aihat na umri narako ta ira aihat na huna umri. Ma Herot ga liklik hani um bia na lam hasur Pita taar ra matmataan na haruat bia naga kurei ia namur bia no Nian na Hinahaan Sakit na pataam.
5 Io, di ga balaurei bat tar um Pita tano hala na harpidinau. Senbia ira mataniabar na lotu kana diet ga manga sasaring tupas Kalou uta Pita.
6 Io, ra bung um, tano bung manaluai ta nong Herot gaar hatur ia ra warkurai, Pita ga sua taar nalamin ta ira airua umri ma di gata his tar ia ma ra airua dadas na hidihidi sakit. Ma a mon umri mah diet ga tur bat tar no matanangas tano hala na harpidinau.
7 Ma kaikek a mon tiga angelo tano Watong ga puasa ma tiga lulunga ga murarang tano sibaan Pita ga kis taar tana. No angelo ga pasar hangun Pita tano binabatina ma ga tangai tana bia, “Taman tut gasien!” Ma kaikek at ira dadas na hidihidi sakit ga puka laah ta ira lima Pita.
8 Io, no angelo ga tangai tana bia, “Sigasigam ma u na paas lah ira num airua sendal.” Ma Pita ga gil at. Io, no angelo ga tangai mah tana bia, “U na pulus lah uga ma no num tamat na maal ma u na mur iau.”
9 Pita ga mur hasur lah ia talur no hala na harpidinau. Pa ga nunurei bia asa ing no angelo ga gilgil hani, ga hanuat tutuna iat. Ga liklik mon bia ga nasnas tiga ninaas.
10 Dir ga sakiit no luena ma no airua na harbalaurai ta ira umri, dir gaam a hanuat taar tano dadas na binanus sakit tano matanangas huat nong di la hanhansur tana taar tano pisa na hala. Ma no binanus ga tamapapos bia a mon ma dir gaam hansur. Dir ga mur lah tiga ngaas ma kaikek a mon no angelo ga haan talur Pita.
11 Io, Pita ga palai tano linga ga hanuat taar tana ma ga tangai bia, “Kaiken um iau ta nunurei timaan bia iakan ra linga i tutuna! No Watong i tulei no nuna angelo bia na halangalanga sei iau talur no dadas ta Herot ma ta ira linga bakut ira mataniabar na Iudeia diet liklik bia na ngan hua.”
12 Ing gata madaraas timaan lah um ta iakan ra linga, ga haan taar tano hala ta Maria, no puasi ne Ioanes nong di kilam mah ia bia Mak. Ma a haleng na mataniabar diet ga kis hulungai taar kaia ma diet ga saasaring.
13 Pita ga pipidil tano matanangas ma nataman ma tiga hinasik na tultulai, hinsana ne Roda, ga haan laah bia na papos.
14 Ing ga hadadei kilam lah no inga Pita, ga guama sakasaka pa gaam papos, senbia ga hilau tapukus gaam a tangai bia, “Pita ia ken tano matanangas!”
15 Diet ga tangai tana bia, “U ta ba dak kaikek!” Ing ga sisingit a baa bia a tutuna, diet ga balu ia bia, “No nuna angelo dak mon iakanong.”
16 Ma senbia Pita kana iat ga madung na pipidil. Ma ing um diet ga papos no matanangas ma diet ga nas ia, diet ga manga karup.
17 Senbia Pita ga ianga ma no limana bia diet na kis matien, gaam hapalainei diet ta hoeh no Watong ga halangalanga sei ia hua tano hala na harpidinau. Io, ga tangai ta diet bia, “Muat hasasei Jemes ma ira tasigu ta Karisito uta iakan.” Ma ing ga tangai tar hoken ga haan talur diet taar tiga mes na taman.
18 Ra malaan, ira umri diet ga pongpong sakasaka. Diet gaam hartiritiri bia, “Pita iakana ha?”
19 Io, Herot ga hartulai bia da nanaas timaan ta Pita, senbia pa di ga nas lah ia. Io, ga tiri murmur timaan ira umri ing diet ga balaurei bat tar Pita, gaam tar ra dadas na nianga bia da bu bing diet.
Herot ga maat
Io, Herot ga haan talur um Iudeia gaam a kis baa na Kaisaria.
20 Ma Herot ga manga ngalngaluan taar ta ira mataniabar ma Tair ma Saidon. Io hua, diet ga haan tikai laah diet gaam luena halawen lah Balastas bia na tur tikai ma diet. Ma ia nong ga harbalaurai taar tano hala ta Herot, no king. Io, diet ga haan taar ta Herot ma diet gaam saring ia bia a malum na kis nalamin ta diet ma ia. Diet ga sasaring hua kanong no nudiet hanua i la kapkap nian makaia tano hanua tano king.
21 Tano bung di gata kubus tar ia, Herot ga sigam lah ira sigasigam gar na king ma ga kis tano nuna kinkinis na king gaam ianga ta ira mataniabar.
22 Diet ga kakonga bia, “Iakan a ingana tiga god, pai gar tiga tunatuna mon.”
23 Kaikek at tiga angelo tano Watong ga bu ia kanong warah pa ga tar ira nudiet pirharlat uram ta Kalou. Ma ra nat na susui ga ien ia gaam maat.
24 Senbia no nianga ta Kalou ga huai ma ga haan harbasiai.
25 Ma ing Banabas ma Sol dir ga hapataam no nudir pinapalim dir ga tapukus ma Ierusalem. Ma dir ga lam Ioanes nong di la kilam mah ia bia Mak.