No Luena
Pakpakat ta
IOANES
Ioanes no apostolo ga pakat kan ra pakpakat ma ra haleng na nianga narako tana i manga haruat ma ira nianga da nas tano Tahut na Hinhinawas nong Ioanes ga pakat ia. Ira haleng na tena mintota diet lik bia Ioanes ga kis aras Esia ing ga pakat kan ra pakpakat ma ga pakpakat tupas ira lotu kinas Esia. Ioanes ga wara hatumarang diet ira tena nurnur kanong ira tena hausur bisbis (nas 1 Ioanes 2.26) diet ga tangtangai bia ira linga da nas tano ula hanua ma ira palatamai dahat i sakena ma ira tanua dahat i tahut. Io, diet ga tangtangai bia pataia ta linga bia dahat gil ira sakena ta ira sakana palatamai dahat, ma ing no tunatuna Iesu ga maat, pai Karisito no Nati Kalou nong ga maat. Iasen Ioanes ga manga harhus sei no nudiet mangana lilik hua. Ga tangai ing bia dahat gil ra sakena dahat lakai ira warkurai ta Kalou (3.4), ma diet ira nati Kalou pa diet sala gilgil ira sakena (2.28-3.12). Ioanes ga manga nem bia dahat na tiktikai ma Iesu ma no ana Sus narako ta ira magingin na madaraas. Iakan no suruna ta iakan ra pakpakat, bia ira tena nurnur diet na murmur ira magingin na madaraas (1.5-7). Pai tale tikai bia na tangai bia i ta nurnur ta Karisito ma sen i la murmur ira sakana magingin na kankado. Iasen bia siga tikai i tartaram ira warkurai ta Kalou i kis taar ta Kalou (3.24) ma no suruna ta ira warkurai ta Kalou hoken, bia dahat na marsei ira mesa ma dahat na nurnur ta Iesu Karisito no Nati Kalou (3.23). Ioanes ga nem bia dahat naga palai bia no tunatuna Iesu (1.1; 4.2-3), ia no Mesaia (nong di kilam ia bia ‘Karisito’; 2.22; 5.1), no Nati Kalou (2.23; 3.23; 4.9-10; 4.14-15; 5.5-13; 5.20), ma ia at ga maat wara uta dahat bia na halon dahat (5.4-8). Ioanes ga nem bia dahat naga manga palai bia dahat ta kap iakan ra nilon hathatikai ing bia dahat ta nurnur tano Nati Kalou (5.13).
1
No Nianga na Nilon
1 Mehet hasasei muat uta nong ga kis taar manaluai tano hathatahun, nong mehet ga hadadei ma mehet ga nas ia ma ira mata mehet. Io, mehet ga nasnas ia ma mehet ga sigirei ia ma ira lima mehet. Ma iakan a mon mehet hasasei muat utana, no Nianga na Nilon.
2 Ma iakan ra nilon ga hanuat puasa ma mehet hasasei muat uta iakan ra nilon hathatikai. Mehet ga nas ia ma mehet hatutuna ia ta muat. Naluai ga kis tikai ma Mama ma i hanuat puasa taar ta mehet.
3 Ma mehet hasasei mah muat uta nong mehet gata nas ma mehet gata hadadei ing muat mah muat naga tiga bala tikai ma mehet. Ma mehet tiga bala tikai at ma Mama ma no Natina, Iesu Karisito.
4 Ma mehet pakat tar kaiken ra nianga ta muat ing naga kidilona no nudahat gungunuama.
Dahat na hanahaan tano madaraas
5 Io, iakan no hinhinawas mehet ga hadadei lah ia ta Iesu Karisito ma mehet hasasei muat uranai hoken: Kalou i haruat ma ra lulunga ma pataia tutun at ta kankado i kis tana.
6 Ing bia dahat tangai bia dahat tiktikai ma ia senbia dahat hanahaan ra kankado, io, dahat bisbis ma ira nudahat magingin pai haruat ma ira tutuna Kalou i ta hapuasnei.
7 Iasen bia dahat hanahaan tano madaraas hoing ia at i kis tano madaraas, io, dahat tiga bala hargilaas ta dahat ma no gapi ne Iesu no Natina i hagamgamatien dahat ta ira sakana magingin bakut.
8 Ing bia dahat tangai bia pataia nudahat ta sakana magingin dahat bis baal at dahat ma dahat lik bia iakano bisbis i tutuna senbia ira tutuna ta Kalou pai kis ta dahat.
9 Iasen bia dahat na hinawas palai ta ira nudahat magingin sakena, io, Kalou na gil haruat ta ira nuna kunubus ma na gil ra takodas hoken: na lik luban sei ira nudahat sakena ma na hagamgamatien dahat talur ira magingin bakut pai takodas.
10 Ing bia dahat tangai bia pa dahat gil ta sakena, io, dahat kilam Kalou bia a tena bisbis ia ma no nuna nianga pai kis ta dahat.