11
Iesu ga haan laka Ierusalem
(Matiu 21.1-11; Luk 19.28-40; Ioanes 12.12-19)
1-2 Diet ga hanuat taar ta Betpasi ma Betani kaia huteta Ierusalem tano uladih Olip. Io, Iesu ga tulei airua ta ira nuna bulu na hausur ma ga tangai ta dir bia, “Mamur na haan taar tano taman manaluai ta mamur ma ing mamur na haan laka taar tano taman, kaikek at mamur na nas lah tiga sigara donki di ta kubus kahai tar ia. Taia baa tikai i kisi ia. Mamur na palas lah ia, io, mamur na sal hahuat ia ukai tagu.
3 Bia taring diet na tiri mamur bia, ‘Mamur gil hua warah?’, mamur na hasasei diet bia, ‘No Watong i nem ia ma namur dahina na tulei hahuat habalin ia.’ ”
4-5 Io, dir ga haan laah ma dir ga nas lah tiga sigara donki di ga kubus tar ia tano matanangas tiga hala ma ga tur taar tano ngaas. Bia dir ga palpalas ia, aring tunatuna ing diet ga turtur haan huteta diet ga tiri dir bia, “Mamur palpalas no sigara donki wara biha?”
6 Dir ga balu at diet hoing Iesu ga hasasei tar dir. Io, diet ga waak sei dir.
7 Dir ga sal hahuat no sigara donki taar ta Iesu, dir gaam bakar no tuhuna no donki ma aring ta ira nudir maal. Io, Iesu ga kawaas gaam kis korai tana.
8 A haleng tunatuna diet ga kap sei aring ta ira nudiet sigasigam, diet gaam palsei mur no ngaas manei. Aring diet ga palsei ira katangana dahai ing diet gata kato.
9 Diet ing diet ga luluai haan ma diet ing diet ga murmur haan diet bakut diet ga kukula haan bia,
“Pirlat Kalou!
I daan nong i hanuat wara gilgil haruatanei ira sinisip gar tano Watong!
10 Kalou i ta haidanei nong i hanuat wara kapkap no tamat na kinkinis tano hintubu dahat Dewit, no king.
Pirlat Kalou nong i kis aram naliu sakit.”
11 Io, Iesu ga haan laka taar tano tamat na pisa na hala Ierusalem gaam haan uram tano tamat na hala na lotu. Bia ga nas bakut tar ira linga kaia, Iesu ma ira nuna sangahul ma irua diet ga hansur uram Betani kanong ga matarahien rawarawa tuai um.
No ina fig
(Matiu 21.18-19)
12 Tano bung manamur bia diet ga haan laah makaia Betani, Iesu ga taburungan.
13 Iesu ga nanaas ma helik ma ga nas tiga ina fig ma ga guguhuan taar. Io, ga haan huteta gaam nas timaan ia kanong ga lik bia ga huai taar no ina dahai. Bia ga haan huteta ga nas bia a pakana dahai sena kanong pa ga pakana bung baa ta ira fig bia diet na huai.
14 Ma Iesu ga tangai tano ina fig bia, “Taia tikai na iaan balin taam.” Ma ira nuna bulu na hausur diet ga hadadei ing ga tangtangai.
No hala na lotu tano Watong
(Matiu 21.12-17; Luk 19.45-48; Ioanes 2.13-22)
15 Bia diet ga hanuat Ierusalem, Iesu ga haan laka tano tamat na hala na lotu gaam bat hasur diet ing diet ga susuhura ma diet ing diet ga kukul kaia. Ga pulek ira suuh ta ira tunatuna ing diet ga kikios ira kinewa, ma ga pulek mah ira kinkinis nudiet ira tunatuna ing diet ga suhsuhuranei ira maan na hartabar.
16 Iesu ga tigal mah diet bia pa diet na kap habalin ta linga ukaia narako tano hala na lotu.
17 Io, ga hausur ira tunatuna gaam tangai bia, “Muat nunurei timaan tar no nianga ta Kalou di ga pakat ia i tangai hoken: ‘No nugu hala na lotu, da kilam ia bia a hala na sinsaring ta ira kaba huntunaan bakut ta iakan ra ula hanua.’ Senbia muat ta gil balik ia hoing tiga munmun nudiet ira tena kikinau.”
18 Io, ira tamat na pris ma ira tena hausur ta ira warkurai tane Moses, diet ga hadadei iakan. Io, diet ga tur lah wara silsilhei tiga ngaas bia diet na bu bing Iesu hoeh kanong diet ga burtei ia. Ma diet ga burtei ia kanong ira mataniabar bakut diet ga karup ma diet ga manga urur tano nuna hausur.
19 Ma bia gata matmatarahien, Iesu ma ira nuna bulu na hausur diet ga haan talur um no tamat na pisa na hala.
No mangana sinsaring nong i tur tikai ma no nurnur
(Matiu 21.20-22)
20 Ra malaan bia diet ga hanahaan tano ngaas, diet ga nas lah no ina fig ma gata maranga bakut.
21 Io, Pita ga lik lah ira nianga Iesu ga tangai tar tano ina dahai, ma ga tangai ta Iesu bia, “Tena hausur, nas baa! No ina fig nong u bor bing ia, i ta maranga.”
22-23 Io, Iesu ga balu diet bia, “Iau manga nem bia muat na nurnur ta Kalou! Muat hadadei baa! I tale mah muat ta ira dadas na linga sakit hoken. Bia siga tikai na tangai ta iakan ra uladih, ‘Taman tut, ma u na tamaragat suur uram nalamana sakit,’ ma bia aram narako tutuna tana pai lilik harharua, senbia i nurnur taar at bia no linga i saring ia na hatur kahai ia, Kalou na tar ia tana.
24 A burena kaikek iau naga hasasei muat kaiken, bia ta mangana linga sa muat saring, muat na nurnur at bia muat ta kap no hunuena, io, na tar ia ta muat.
25 Ma bia muat sasaring ma muat mon bala ngungut taar tikai, muat na lik luban sei ing iakanong ga gil tar ta muat waing no numuat Tata kanam ra mawai na lik luban sei mah ira numuat magingin sakena.
26 [Ma ing bia pa muat na lik luban sei ing iakanong ga gil tar ta muat, no numuat Tata kanam ra mawai pa na lik luban sei mah ira numuat magingin sakena.]”
Iesu ga kap no nuna dadas maha
(Matiu 21.23-27; Luk 20.1-8)
27 Io, diet ga hanuat balin taar aram Ierusalem. Ma bia diet ga hanahaan haan narako tano tamat na hala na lotu aring ta ira tamat na pris, ma aring tena hausur ta ira warkurai tane Moses, ma aring tamat ta ira huntunaan diet ga haan huat taar tana.
28 Io, diet ga tiri Iesu “U ta kap ra tamat na dadas na warkurai maha kaikek gu gil kaiken ra linga, ma siga i bul hatamat uga kaikek gu gil hua?”
29 Iesu ga balu diet bia, “Iau na tiri muat tiga tinir, ma bia muat na balu iau, io, iau na hasasei muat bia siga i tar ra dadas tagu kaiken iau gi gil ken ra pinapalim.
30 Muat lik bia Ioanes ga kap no nuna pinapalim na bapitaiso maram ra mawai, bia makaia ta ira tunatuna mon? Muat balu iau!”
31 Diet ga worwor nalamin ta diet at hoken: “Bia dahat na tangai bia Ioanes ga kap no nuna pinapalim maram ra mawai, Iesu na tangai ta dahat bia, ‘Muat gaar ta nurnur mon ta ira nianga ta Ioanes.’
32 Ma pa dahat na tangai mah bia Ioanes ga kap no nuna dadas ta ira tunatuna mon.” (Diet ga tangai hua kanong diet ga burtei ira tunatuna, kanong a haleng ta diet, diet ga nurnur bia Ioanes ga tiga poropet tutuna.)
33 Io, diet ga balu Iesu bia, “Pa mehet nunurei.”
Ma Iesu ga tangai baal ta diet bia, “Iau mah, pa iau na hasasei muat bia iau kap no nugu tamat na dadas na warkurai maha, kaikek iau gi gil hoken.”