15
ሙሴ ዬꬃ
1 ሄ ዎዴ ሙሴይኔ ኢስራኤሌ ኣሳይ ሃይሳ ዬꬃዛ ጎዳስ ዬጺዴስ፤
«ቦንቾን ኢዚ ኬሂ
ꬎቁ ꬎቁ ጊዳ ጊሻስ፥
ታኒ ጎዳስ ዬꬃ
ዬጻና።
ፓራኔ ፓራ ቶጊዳ ኣሳ
ኣባ ጊዶን ዬጊዴስ።
2 ጎዳይ ታስ
ዎልቃኔ ዬꬃ፤
ኢዚ ታና ኣሺዴስ።
ኢዚ ታ ጾሳ፤
ታኒ ኢዛ ሳባና።
ኢዚ ታ ኣዋ ጾሳ፤
ታኒ ኢዛ
ꬎቁ ꬎቁ ሂስታና።
3 ጎዳይ ኦላንቻ፤
ኢዛ ሱንꬂካ ጎዳ።
4 ጊብጼ ካዎ ፓራ-ጋሬታኔ
ኢዛ ኦላንቻታ
ኣባን ዉርሲዴስ፤
ኡባፌ ኣꬊ ዶሬቲዳ
ጊብጼ ካዎ ሃላቃቲ፥
ዞኦ ኣባን ሚቴቲዳ።
5 ጪማ ሃꬂ
ኢስታ ካሚዴስ፤
ኢስቲ ሹቻꬆ
ጪማን ሚቴቲዳ።
6 «ኣቤት ጎዳዉ!
ኔ ኡሻቻ ኩሼይ
ዎልቃን ጎቢዴስ፤
ጎዳዉ ኔ ዎልቃማ
ኡሻቻ
ኩሼይ ሞርኬ
ሜንꬄሬꬂዴስ።
7 ኔ ጊታ ዎልቃን
ኔናራ ኤቄቲዳይታ
ኩንዲሳዳሳ።
ኤጺዛ ኔ ሃንቆ ኔ ዬዳዳሳ፥
ኢዚካ ኢስታ
ጋፌ ማላ ሚዴስ።
8 ኔ ፔኖይ
ሃꬃ ፑዴ ኤሲ ዶሪዴስ።
ጎጊዛ ሃꬂካ ጎዳ ማላ
ሚኒ ኤቂዴስ፤
ጪማ ጊዶን ዲዛ ሃꬂ
ኣባ ጊዶን ኢርኪዴስ።
9 «ሞርኬይ ጬቄቲሼ፥
‹ታኒ ኢስታ ዬዴꬃ ኦይካና።
ታኒ ኢስታ ሃሮ ሻካዳ፥
ታ ኮዪዳይሳ ኡባ ኤካና።
ታኒ ታ ጊꬃ
ማሻ ሾዳዳ፥
ኢስታ ꬋይሳና› ጊዴስ።
10 ጊዶ ኣቲን ኔኒ ኢስታ
ኔ ፔኖን ፑኒን፥
ኣባይ ኢስታ ካሚዴስ።
ኢስቲ ዎልቃማ ሃꬃን
ቢራታይ ሚቴቲዛ ማላ
ሚቴቲዳ።
11 «ኣቤት ጎዳዉ!
ኤቃ ጾሳታ ጊዶን
ኔ ማላይ ኦኔ?
ጌሻቴꬃን
ቦንቼቲዛይ፥
ቦንቾን ባቢሲዛይኔ፥
ማላሊሲዛ ሚሽ ኦꬂዛይ
ኔ ማላይ ኦኔ?
12 ኔኒ ኔ ኡሻቻ
ኩሼ ፒዲሳዳሳ፥
ቢታይካ ኢስታ ሚቲዴስ።
13 «ኔ ዎዚዳ ኔ ኣሳ
ዉሮንታ ኔ ሲቆን
ካሌꬃዳሳ።
ኔኒ ኔ ዎልቃን
ኢስታ ኔ ኣቂዛ
ጌሻ ሶ ጌልꬃዳሳ።
14 ዴሬ ኣሳይ
ሄሳ ሲዪዲ ኮኮሪዴስ።
ፊሊስጼሜ ቢታ ኣሳታካ
ሂርጋ ሚጻይ ኦይኪዴስ።
15 ሄ ዎዴ ኤዶሜ ቢታ
ሃላቃቲ ዳጋሚዳ።
ሞኣቤ ቢታ ሃሪዛይቲ
ሂርጋን ኮኮሪዳ።
ካናኔ ዴሬ ኣሳይ
ዉሪ ሴሪዴስ።
16 ኣቤት ጎዳዉ!
ዳጋማይኔ ሂርጋይ
ኢስታ ኦይካና።
ኢስቲ ኔ ዎልቃ
ጊታቴꬅ ቤኢዲ፥
ኔ ኣሳይ ኣꬋና ጋካናስ፥
ኔኒ ዎዚዳ ኣሳይ
ኣꬋና ጋካናስ፥
ሹቻ ማላ ቶሌቲ ኤቃና።
17 ኔኒ ኢስታ ኤሃዳ፥
ኔስ ቡዞ ቢታን ዲዛ
ዙማ ሁኤን ቶካና።
ኣቤት ሜርና ጎዶ፥
ሄ ሶሆይ
ኔኒ ኔስ ዴያናስ
ኦꬂዳ ሶሆኮ።
ኣቤት ጎዳዉ! ሄ ጌሻ ሶሆይ
ኔኒ ኔ ኩሼን
ሚንꬃ ኤሲዳ ሶሆኮ።
18 ጎዳይ ሜርናፔ
ሜርና ጋካናስ ካዎታና።»
19 ጊብጼ ካዎ ፓራቲ ዉሪ፥ ፓራ-ጋሬቲኔ ቶጋ ኣሳቲ ኣባን ጌሊዳ ዎዴ ጎዳይ ኢስታ ቦላ ኣባ ሃꬃ ጉዬ ዛሪ ኤሂዴስ፤ ጊዶ ኣቲን ኢስራኤሌ ኣሳይ ኣባ ጊዶራ ሜላ ቢታ ቦላራ ሄሜቲዲ ፒኒዴስ።
ማራሚ ዬꬃ
20 ኣሮኔ ሚቼያ፥ ናቤ ማራማ ካራቤ ኤካዱስ፤ ማጫሳይ ዉሪ ካራቤ ባቂዲ ዬጺሼኔ ጉፒሼ ኢዞ ካሊዴስ።
21 ማራማ ኢስታስ ዬꬃዛ ዬጻሼ፥
«ጎዳይ ኬሂ ꬎቁ ꬎቁ
ጊዳ ጊሻስ ኢዛስ ዬጺቴ።
ፓራኔ ፓራ ቶጊዳይታ
ኢዚ ኣባን ኦሊዴስ»
ጋ ዬጻዱስ።
ጫሞ ሃꬅ
22 ሄሳፌ ጉዬ ሙሴይ ኢስራኤሌ ኣሳ ዞኦ ኣባፌ ፒንꬂን ኢስቲ ሹራ ጌቴቲዛ ባዞ ቢዳ። ሄ ባዞን ኢስቲ ሃꬅ ዴሞንታ ሄꬑ ጋላስ ሄሜቲዳ።
23 ኢስቲ ማራ ጌቴቲዛሶ ጋኪዳ ዎዴ ማራ ሃꬂ ጫሞ ጊዲዳ ጊሻስ ኡያና ዳንዳይቤቴና፤ ሄሳ ጊሻስ ሄ ሶሆይ ማራ ጌቴቲዴስ።
24 ኣሳይካ፥ «ኑኒ ኣይ ኡያኔ?» ጊዲ ሙሴ ቦላ ዙዙሚዴስ።
25 ሙሴይ ጎዳስ ዋሲን ጎዳይ ኢዛ ኢሲ ሚꬅ ቤሲዴስ፤ ሙሴይ ሄ ሚꬃ ሃꬃን ዬጊን ሃꬃይ ማልኢዴስ።
ሄን ጎዳይ ኢስታስ ዎጋኔ ማራ ኬሲዴሲኔ ኢስታ ፓጪዴስ።
26 ኢዚ ኢስታስ፥ «ጎዳ ኢንቴ ጾሳይ ዮቲዛይሳ ኢንቴ ሎኤꬂ ሲዪኮ፥ ኢዛ ኣይፌ ሲንꬃን ሎኦ ኦꬂኮ፥ ኢንቴ ኢዛ ኣዛዞ ዎዚናን ዎꬂ ናጊኮ፥ ኢዛ ዎጋካ ኡባ ናጊኮ፥ ታኒ ጊብጼ ኣሳ ቦላ ኤሂዳ ሃርጌፌ ኢሳካ ኢንቴ ቦላ ኤሂኬ፤ ጋሶይካ ታኒ ኢንቴና ፓꬂዛ ጎዳ» ጊዴስ።
27 ሄሳፌ ኢስቲ ታማኔ ናምኡ ሃꬃ ፑልቶቲኔ ላፑን ታሙ ዛምባ ሚꬃቲ ዲዛሶ ኤላሜ ዪዲ ሄን ሃꬃ ዶናን ኡቲዳ።