16
ማናኔ ኩራቾታ
1 ጊብጼፔ ኬዚዳ ናምኣንꬆ ኣጊናን፥ ታማኔ ኢቻሻንꬆ ጋላሳን ኢስራኤሌ ኣሳ ማባራይ ኩሜꬅ ኤላሜፔ ዴንዲ ቢዲ ኤላሜፔኔ ሲናፔ ጊዶን ዲዛ ሲኔ ጌቴቲዛ ባዞ ዪዳ።
2 ኢስራኤሌ ኣሳ ማባራይ ዉሪ ባዞን ሙሴ ቦላኔ ኣሮኔ ቦላ ዙዙሚዴስ፤
3 «ጎዳይ ኑና ጊብጼ ቢታን ባ ኩሼን ዎꬊዳኮ ሎኦኮሺን! ሄን ኑኒ ኣሾ ሚዛ ኬሬዛ ዩዪ ኣꬊ ኡቲዲ ኑኒ ኮዪዳ ማላ ካꬅ ካሊ ሚዶስ፤ ጊዶ ኣቲን ኢንቴ ኑና ሄፔ ኬሲዲ ሃይሳ ዴራ ኡባ ጋፋን ዎꬋናስ ሃ ባዞ ኤሂዴታ» ጊዳ።
4 ሂስቲን ጎዳይ ሙሴስ፥ «ታኒ ኢንቴስ ሳሎፔ ሚዛ ካꬅ ቡኪሳና፤ ኣሳይ ኡባ ጋላሲካ ኬዚዲ ሃቺስ ሃቺስ ጊዳናዝ ጻላላ ማጻና ኮሼስ። ኣሳይ ታ ኣዛዞ ካሊዛኮኔ ካሎንታኮ ታኒ ኢስታ ሄሳን ፓጫ ጼላና።
5 ኡሱፑንꬆ ጋላስ ኢስቲ ሃራ ዎዴ ማጺዛይሳስ ናምኡ ኩሼ ማጺዲ ካꬄቶ» ጊዴስ።
6 ሄሳ ጊሻስ ሙሴይኔ ኣሮኔይ ኢስራኤሌ ኣሳ ኡባስ፥ «ኢንቴና ጊብጼ ቢታፌ ኬሲዳይ ጎዳ ጊዲዳይሳ ሃች ኦማርስ ኢንቴ ኤራና።
7 ቃሴ ኢዛ ቦላ ኢንቴ ዙዙሚዳይሳ ኢዚ ሲዪዳ ጊሻስ ማላዶ ኢንቴ ጎዳ ቦንቾ ቤያና። ኢንቴ ኑ ቦላ ዙዙማናስ ኑኒ ኦኔ?» ጊዳ።
8 ሄሳፌ ጉዬ ሙሴይ፥ «ኢንቴ ኢዛ ቦላ ዙዙሚዳይሳ ኢዚ ሲዪዳ ጊሻስ ኢዚ ኢንቴስ ማናስ ኦማርስ ኣሾ ኢሚኮ ኢንቴ ኮዪዳ ማላ ሚዛ ኡኬꬃካ ኡባ ኢንቴስ ማላዶ ኢማና። ኑ ኦኔ? ኢንቴ ጎዳ ቦላ ዙዙሚዴታ ኣቲን ኑ ቦላ ዙዙሚቤኬታ» ጊዳ።
9 ሙሴይ ኣሮኔስ፥ «ኔኒ ኢስራኤሌ ኣሳ ማባራ ኡባ፥ ‹ጎዳይ ኢንቴ ዙዙንꬃ ሲዪዳ ጊሻስ ጎዳ ሲንꬅ ሺቂቴ› ጋ ዮታ» ጊዴስ።
10 ኣሮኔይ ኢስራኤሌ ኣሳ ማባራ ኡባስ ዮቲዳ ማላ ኣሳይ ባዞ ሲሚ ጼሊሺን ሄን ጎዳ ቦንቾይ ሻራራ ቆንጪዳይሳ ቤኢዳ።
11-12 ጎዳይ ሙሴስ፥ «ታኒ ኢስራኤሌ ናይታ ዙዙንꬃ ሲያዲስ፤ ኔኒ ኢስታስ፥ ‹ኢንቴ ኦማርሳ ዎዴ ኣሾ ማና፤ ማላዶ ኡኬꬅ ካላና፤ ሄ ዎዴ ታኒ ጎዳ ኢንቴ ጾሳ ጊዲዳይሳ ኢንቴ ኤራና› ጋዳ ዮታ» ጊዴስ።
13 ሄ ጋላሳ ኦማርሳ ዎዴ ኩራቾቲ ዪዲ ኢስራኤሌ ኣሳይ ዲዛሶን ኩሚዳ፤ ቃሴ ማላዶ ኢስቲ ዲዛሶ ዩሾን ጻዛይ ማይኢ ኡቲዴስ።
14 ጻዛይ ጾስኪሺን ቢታ ቦላን ቦꬃ ሻች ሚሳቲዛ ሊቆ ሚሺ ቤቲዴስ።
15 ኢስራኤሌ ኣሳይ ሄሳ ቤኢዲ ባ ጋርሳን ኢሶይ ኢሳ፥ «ሃይሲ ኣዜ?» ጊዳ። ኣይስ ጊኮ ኢስቲ ኢዚ ኣዛኮ ኤሪቤቴና።
ሂስቲን ሙሴይ ኢስታስ፥ «ኢንቴስ ማናስ ጎዳይ ኢሚዳ ካꬂ ሃይሳኮ።
16 ጎዳይ፥ ‹ኣሳይ ኢሶይ ኢሶይ ባስ ማናስ ኮሺዛ ማላ ሺሾ፤ ኢንቴ ሶ ኣሳስ ሁኤን ሁኤን ኢሲ ኢሲ ኪሎኔ ባጋ ኤኪቴ› ጊ ኣዛዚዴስ» ጊዴስ።
17 ኢስራኤሌ ኣሳይ ሙሴይ ኢስታስ ዮቲዳ ማላ ኦꬂዴስ፤ ባጋይ ዳርሲዲ ባጋይ ቃሴ ጉꬂዲ ሺሺዳ።
18 ሺሺዲ ኢስቲ ማኪን ዳርሲዲ ሺሺዳይሳስ ፓላሂቤና፤ ጉꬅ ሺሺዳይሳስካ ፓጪቤና፤ ዉሪካ ኢሶይ ኢሶይ ባስ ጊዲዛ ማላ ሺሺዴስ።
19 ሄሳፌ ጉዬ ሙሴይ ኢስታስ፥ «ኦኒካ ኢዛፔ ዎንቶስ ኣሾፎ» ጊዴስ።
20 ጊዲኮካ ኢስታፌ ባጋይ ሙሴይ ዮቲዛይሳ ኤኮንታ ኣጊዲ ኣቲዳይሳ ዎንቶ ማላዶ ጋካናስ ዎꬂዳ፤ ዎꬂዳይሲካ ጉጹኒዲ ጺንቂዴስ። ሄሳ ጊሻስ ሙሴይ ኢስታ ሃንቄቲዴስ።
21 ማላዶ ማላዶ ኣሳይ ዉሪ ባስ ኮሺዛይሳ ላጌ ሺሺዴስ፤ ኣርሼይ ሚቺዛ ዎዴ ቢታን ኣቲዳይሲ ማዪዴስ።
22 ኡሱፑንꬃ ጋላሳን ኢስቲ ካሴይሳስ ናምኡ ኩሼ ኢሲ ኢሲ ኣሳስ ሄꬑ ኪሎ ሺሺዳ። ሂስቲን ማባራ ሃላቃቲ ዉሪ ዪዲ ሄሳ ሙሴስ ዮቲዳ።
23 ኢዚ ኢስታስ፥ «ጎዳይ ኣዛዚዳይሲ ሃይሳ፤ ዎንቶይ ሼምፖ ጋላሳ፥ ጎዳስ ጌሻ ሳምባታ። ሄሳ ጊሻስ ኢንቴ ኡካናይሳ ኡኪቴ፤ ኢንቴ ዶይሳናይሳካ ዶይሲቴ፤ ፓላሂዳይሳ ዎንቶስ ኣሺቴ» ጊዴስ።
24 ሄሳ ጊሻስ ኢስቲ ሙሴይ ኣዛዚዳ ማላ ዎንቶስ ዎꬂን ጺንቂቤና ዎይኮ ጉጹኒቤና።
25 ዎንቴꬃ ጋላስ ሙሴይ ኢስታስ፥ «ሃይሳ ሃች ሚ ዉርሲቴ፤ ኣይስ ጊኮ ሃች ጎዳ ሳምባታ፤ ኢንቴ ኢዛ ሃች ዴምባን ዴሜኬታ።
26 ኢንቴ ኡሱፑን ጋላሳን ኢዛ ሺሺቴ፤ ጊዶ ኣቲን ላፑንꬃ ጋላሳይ ሳምባታ ጊዲዳ ጊሻስ ኣይኮይካ ዴና» ጊዴስ።
27 ጊዶ ኣቲን ኢሲ ኢሲ ኣሳቲ ላፑንꬃ ጋላሳን ሺሻናስ ኬዚዳ ሺን ኣይኮካ ዴሚቤቴና።
28 ጎዳይ ሙሴስ፥ «ኢንቴ ታ ኣዛዞታኔ ታ ዎጋታ ናጎዛ ኣይዴ ጋካናስ ኢጻኔ?
29 ታ ኢንቴስ ሳምባታ ኢሚዳይሳ ኣኬኪቴ፤ ኡሱፑንꬃ ጋላሳን ታ ኢንቴስ ናምኡ ጋላሳስ ካꬅ ኢሚዛይሲ ሄሳ ጊሻሳ። ላፑንꬃ ጋላስ ዉሪካ ባ ዲዛሶን ዲዛሶን ታኮ፤ ኦኒካ ኣዋካ ቦፖ» ጊዴስ።
30 ሄሳ ጊሻስ ኣሳይ ላፑንꬃ ጋላሳን ሼምፒዴስ።
31 ኢስራኤሌ ኣሳይ ሄ ካꬃዛ ማና ጊ ሱንꬂዴስ። ኢዚካ ዴቦ ኣይፌ ማላ ጊዲዲ ቦꬃ፤ ኤሳራ ኡኬቲዳ ኡኬꬃ ማላ ማልኤስ።
32 ሙሴይ ኢስራኤሌ ኣሳስ፥ «ጎዳይ ኣዛዚዳይሲ ሃይሳ፥ ‹ታኒ ኢንቴና ጊብጼ ቢታፌ ኬሲዳ ዎዴ፥ ባዞን ሚዚዳ ካꬃ ኢስቲ ቤያና ማላ፥ ማናፌ ኢሲ ኢሲ ኪሎኔ ባጋ ኢንቴ ሲንꬃፌ ያና ዬሌታታስ ኣሺ ዎꬂቴ› ጊ ኣዛዚዴስ» ጊዴስ።
33 ሂስቲን ሙሴይ ኣሮኔ፥ «ኢሲ ጻሮ ኤካዳ ኢሲ ኪሎኔ ባጋ ጊዲዛ ማና ኢዛን ቆላ፤ ሂስታዳ ያና ዬሌታታስ ሚንጃና ማላ ጎዳ ሲንꬃን ዎꬃ» ጊዴስ።
34 ጎዳይ ሙሴ ኣዛዚዳ ማላ ሚንጃናስ፥ ኣሮኔይ ማና ጎዳ ማርካ ታቦታ ሲንꬃን ዎꬂዴስ።
35 ኢስራኤሌ ኣሳይ ባ ዳና ቢታ ቢ ጋካናስ ኦይዱ ታሙ ላይꬅ ኩሜꬅ ማና ሚዳ፤ ኢስቲ ካናኔ ቢታ ዛዋ ጋካናስ ማና ሚሼ ዴኢዳ።
36 ኢሲ ኪሎይኔ ባጋይ ሄ ዎዴ ማኪዛ ጊታ ማካ ሚሻስ ታማፌ ኢሲ ኩሼኮ።