25
ጾሳ ዱንካኔ ኦꬃናስ ኢሜቲዳ ኢሞታ
1 ጎዳይ ሙሴስ ሂዝጊዴስ፥
2 «ታስ ኢሞታ ኤሃና ማላ ኔኒ ኢስራኤሌ ናይታስ ዮታ፤ ታስ ኢማናስ ኢዛ ዎዚናይ ኢዛ ኢማ ኢማ ጊን ኢሚዛ ኣሳ ኢሞታ ኡባ ኔ ታስ ኤካ።
3 ኢንቴ ኢስታፌ ኤካና ኢሞታይ ሃይታንታ፤ ዎርቃ፥ ቢራ፥ ጻርቂማላ፥
4 ሳሎ ሚሳቲዛ ቃጪና፥ ኦቻ ቴራ ሚሳቲዛ ቃጪና፥ ጼቃ ዞኦ ቃጪናኔ ቦꬃ ሊቆ ላይኖ፥ ዴይሻ ኢስኬ፥
5 ꬋርሾ ኢቴ ዞኦ ቃላሜን ዬጊ ኬሲዳይሳ፥ ኣባ ጊዶን ዲዛ ኢሲ ዶኣ ጋልባ፥ ኦዶሮ ሚꬅ፥
6 ጾምፔስ ዎጋራ ዛይቴ፥ ቲዬቲዛ ዛይቴሲኔ ኤጻኔስ ሳዊሲዛ ቂማሜ፥
7 ኤፉዴኒኔ ቲራ ቦላን ዲዛ ኪሴታ ጊዶን ዎꬂዛ ማርጊዴ ጌቴቲዛ ሹቻታኔ ሃራ ኣልኦ ሹቻታ።
8 «ሂስቲዲ ታኒ ኢስታ ጊዶን ኣቃና ማላ ኢስቲ ታስ ዱማ ጎይኒዛ ሶ ጊጊሴቶ።
9 ጾሳ ዱንካኔዛኔ ኢዛ ጊዶን ዲዛ ሚሻታ ታኒ ኔና ቤሲዛ ሌሚሶዛ ማላ ኦꬂቴ።
ጫቆ ቃላ ታቦታ
(ኬሳ 37፡1-9)
10 «ኢስቲ ኦዶሮ ሚꬃፌ ኣዱሳቴꬃይ ናምኡ ዋꬋኔ ባጋ፥ ጎምፓይ ኢሲ ዋꬋኔ ባጋ፥ ꬎቃቴꬃይ ቃሴ ኢሲ ዋꬋኔ ባጋ ጊዲዛ ታቦታ ኦꬄቶ።
11 ሶ ባጋኔ ካሬ ባጋ ዋላካይ ባይንዳ ዎርቃን ሜሻ፤ ኢዛ ዩዪ ኣꬋናስ ቦላ ባጋ ጻንጻ ዎርቃራ ዩሻ ኣꬃ ኦꬃ።
12 ታቦታስ ኦይዱ ዎርቃ ሳጋዮታ ኦꬃዳ ኦይዱ ቶሆታን ኢሲ ባጋራ ናምኡ ሳጋዮታ፥ ቃሴ ሃንኮ ባጋራ ናምኡ ሳጋዮታ ኣꬃ።
13 ሄሳፌ ጉዬ ኦዶሮ ሚꬃፌ ቶሆ ሚꬃታ ኬሳዳ ዎርቃ ቲያ።
14 ታቦታ ቶካና ማላ ታቦታዛ ሚሌን ዲዛ ሳጋዮታን ቶሆ ሚꬃታ ጌልꬃ።
15 ቶሆ ሚꬃቲ ታቦታ ሳጋዮታ ጊዶን ዴቶ፤ ኢስቲ ሄፔ ሙሌካ ኬዞፔቶ።
16 ታኒ ኔስ ኢሚዛ ጫቆ ቃላ ማርካ ታቦታ ጊዶን ዎꬃ።
17 «ሃራራ ዋላኬቶንታ ዎርቃፌ ጻላላ ናምኡ ዋꬋኔ ባጋ ኣዱቂዛ፥ ኢሲ ዋꬋኔ ባጋ ኣኪዛ ማሮቴꬃ ካማ ኦꬃ።
18 ካማዛ ጼራ ናምኡ ባጋራ ቆጻዳ ናምኡ ኪሩቤታ ዎርቃፌ ኦꬃ።
19 ኢሲ ኪሩቤዛ ኢሲ ባጋ ጋጻን፥ ናምኣንꬆ ኪሩቤዛ ሃንኮ ባጋ ጋጻን ናምኣታካ ማሮቴꬃ ካማዛራ ጋꬃ ኦꬃ።
20 ኪሩቤቲ ባ ቄፌ ዴንꬂዲ ማሮቴꬃ ካማ ቦላራ ካሜቶ፤ ቃሴ ኢሶይ ኢሳኮ ሲሚ ኡቲዲ ካማዛኮ ጼሌቶ።
21 ታኒ ኔስ ኢሚዛ ጫቆ ቃላ ማርካ ታቦታ ጊዶን ዎꬃ፤ ቃሴ ካማዛ ታቦታስ ቦላ ባጋራ ዎꬃ።
22 ጫቆ ቃላ ማርካይ ኢዛን ዲዛ ታቦታ ካማ ቦላ ዲዛ ናምኡ ኪሩቤታፔ ጊዶን ታኒ ኔናራ ጋጋዳ ኢስራኤሌ ኣሳስ ኢሚዛ ኣዛዞ ኡባ ሄን ታ ኔስ ኢማና።
ጾሳስ ሺቂዛ ኡኬꬅ ኢዛን ዎꬂዛ ጻራጴዛ
(ኬሳ 37፡10-16)
23 «ኦዶሮ ሚꬃፌ ኣዱሳቴꬃይ ናምኡ ዋꬋ፥ ጎምፓይ ኢሲ ዋꬋ፥ ꬎቃቴꬃይ ቃሴ ኢሲ ዋꬋኔ ባጋ ጊዲዛ ኢሲ ጻራጴዛ ኦꬃ።
24 ሂስታዳ ዋላካይ ባይንዳ ዎርቃን ቲያ፤ ቃሴ ኢዛ ዩሾን ዎርቃ ጻንጻ ዩሻ ኣꬃ።
25 ሄሳꬆካ ቃሴ ኣሆቴꬂ ታꬋኮ ጊዲዛ ጻንጻ ኢዛ ቦላ ዩሻ ኣꬃ። ሂስታዳ ኢዛ ቦላ ዎርቃ ባልጻንꬅ ዩሻ ኣꬃ።
26 ጻራጴዛዛስ ኦይዱ ዎርቃ ሳጋዮታ ሜꬋዳ፥ ጻራጴዛ ቶሆቲ ዲዛ ኦይዱ ባጋራ ኦይꬃ።
27 ጻራጴዛ ቶካናስ ቶሆ ሚꬅ ኢዛ ጊዶራ ኣꬂዛ ሳጋዮቲ ጻራጴዛዛስ ጻንጻ ማታን ዴቶ።
28 ሄ ቶኪዛ ሚꬃታ ኦዶሮ ሚꬃፌ ኬሳዳ፥ ዎርቃ ቲያዳ ኢስታራ ጻራጴዛዛ ቶካ።
29 ሄሳꬆካ ቃሴ ሳኔታኔ ፒልኦታ፥ ዱቃና ጻሮታኔ ኬሬታ ዋላካይ ባይንዳ ዎርቃፌ ኦꬃ።
30 ታ ሲንꬅ ኣꬊዛ ጌሻ ኡኬꬃይ ኡባ ዎዴካ ጻራጴዛ ቦላፌ ꬋዮፖ።
ጾምፔ ኢስታ ቦላ ዎꬂዛ ባላታ
(ኬሳ 37፡17-24)
31 «ዎርቃፌ ጻላ ቆጻዳ ጾምፔ ኢስታ ቦላ ዎꬂዛ ባላታ ኬሳ፤ ቃሴካ ኢዛ ቆጻዳ ጾምፔዚ ኢዛን ኤቂዛ ቶሆ፥ ጊዶ ቶማኔ ቶማዛ ኩሬታ፥ ꬌሞታኔ ጪሻታ ኡባ ኦꬃ።
32 ኢሲ ሚሌራ ሄꬑ ባላቲ፥ ኢሲ ሚሌራ ቃሴካ ሄꬑ ባላቲ ኢሲ ቦላ ኡሱፑን ሃጋቲ ኢዛስ ዴቶ።
33 ኡሱፑን ባላታስካ ኢሳስ ኢሳስ ꬌሞይኔ ጪሻይ ኢዛን ዲዛ ኦቾሎኔ ጌቴቲዛ ሚꬃ ጪሽ ሚሳቲዛ ሄꬑ ኩሬቲ ዴቶ።
34 ጾምፔዛ ጊዶ ቶማይ፥ ꬌሞቲኔ ጪሻቲ ኢዛን ዲዛ ኦቾሎኔ ጌቴቲዛ ሚꬃ ጪሽ ሚሳቲዛ ኦይዱ ኩሬቲ ዴቶ።
35 ናምኣይ ናምኣይ ኢሲፌ ዋꬃን ዲዛ ሄꬑ ባላታፔ ጋርሳራ ኢሲ ኢሲ ꬌሞይ ዴኦ።
36 ꬌሞቲኔ ባላቲ ዉሪ ጊዶ ቶማዛፔ ቆጼቲዲ ዋላካይ ባይንዳ ዎርቃፌ ኦሴቴቶ።
37 «ሄሳፌ ጉዬ ጾምፔ ዎꬂዛሶዛስ ላፑን ኤጺዛሶ ጊጊሳዳ ጾምፔቲ ሲንꬃ ባጋ ፖኣና ማላ ኦይꬃ።
38 ጾምፔዛ ቦላ ኤጺሼ ቃሚዳ ሻሎታ ኬሲዛ ቃጴታኔ ጺጻ ዎꬂዛ ሳኔታ ዋላካይ ባይንዳ ዎርቃፌ ኦꬃ።
39 ጾምፔዚኔ ኢዛ ሚሻቲ ዉሪ ሄꬑ ታማኔ ኢቻሹ ኪሎ ጊራሜ ጊዲዛ ዋላካይ ባይንዳ ዎርቃፌ ኦሴቴቶ።
40 ታኒ ኔና ዙማ ቦላ ቤሲዳ ሌሚሶዛ ካላዳ ኣኬካን ኦꬃ።