1 «ቃሴ ሎኤꬂ ሱቄቲዳ ቦꬃ ላይኖፔ ዳዴቲዳ ታሙ ማጋላሻታ ዱንካኔዛ ጊዶን ጊጊሳ። ቃሴካ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናራ ሄ ማጋላሻታ ቦላ ኢሲ ሂላን ኪሩቤታ ሚስሌ ኦሲሳ። 2 ማጋላሻቲ ዉሪ ኢሲ ጊና ጊዴቶ፤ ኢሳ ኢሳ ኣዱሳቴꬃይ ናምኡ ታማኔ ኦስፑን ዋꬋ፤ ጎምፓይ ቃሴ ኦይዱ ዋꬋ ጊዶ። 3 ኢቻሹ ማጋላሻታ ኢሲፌ ጋꬃ ሲካ፤ ሃንኮ ኣቲዳ ኢቻሹ ማጋላሻታካ ኢስታꬆካ ኦꬃ። 4 ኢሲፌ ጋጊ ሲኬቲዳ ማጋላሻታፔ ጋጻን ዲዛ ማጋላሻስ ባልጻንꬃ ቦላ ሳሎ ሚሳቲዛ ጫርቃፌ ሲꬌ ኦꬃ፤ ቃሴ ኢሲፌ ጋጊዲ ሲኬቲዳ ሃንኮ ማጋላሻንካ ሄሳꬆ ኦꬃ። 5 ኢሲፌ ጋጊዳ ኢሲ ማጋላሻ ቦላ ኢቻሹ ታሙ ሲꬌ ሚሳቲዛ ሚሽ፥ ቃሴ ኢሲፌ ጋጊዳ ሃንኮ ማጋላሻ ቦላካ ኢቻሽ ታሙ ሲꬌ ሚሳቲዛ ሚሽ ኦꬃ፤ ሄ ሲꬌ ሚሳቲዛ ሚሻቲ ዉሪካ ሄ ባጋራኔ ሃ ባጋራ ኢሳይ ኢሳራ ጊናን ዴቶ። 6 ሄሳፌ ጉዬ ዎርቃፌ ኢቻሽ ታሙ ቃጴታ ሜꬋዳ ጊዶ ዱንካኔዚ ኢሲኖ ጊዳና ማላ፥ ሄ ማጋላሻታ ማንጻኮታን ኢሳ ኢሳራ ኦይሴꬃ።

7 «ጊዶ ዱንካኔዛ ቦላራ ሃራ ዱንካኔ ኦꬃናስ ታማኔ ኢሲ ማጋላሻታ ዴይሻ ኢስኬፌ ዳዳ። 8 ታማኔ ኢሲ ማጋላሻቲካ ኢሲ ጊና ጊዴቶ፤ ኢሲ ኢሲ ማጋላሻ ኣዱሳቴꬃይ ሄꬑ ታሙ ዋꬋ፥ ጎምፓይ ቃሴ ኦይዱ ዋꬋ ጊዶ። 9 ኢቻሹ ማጋላሻታ ኢሲ ባጋራ ኡሱፑን ማጋላሻታ ቃሴ ሃንኮ ባጋራ ጋꬃ ሲካ። ኡሱፑንꬃ ማጋላሻይ ሲንꬃራ ሶ ባጋ ሲሚ ቃላምኤቶ። 10 ጋꬂ ሲኪዳ ማጋላሻታፔ ኢሲ ማጋላሻ ጋጻን ኢቻሽ ታሙ ሲꬌ ሚሳቲዛ ሚሻታ ኦꬃ፤ ቃሴ ጋꬂ ሲኪዳ ሃንኮ ማጋላሻታፔ ዉርሴꬃ ማጋላሻ ባልጻንꬃ ቦላ ኢቻሽ ታሙ ሲꬌ ሚሳቲዛ ሚሻታ ኦꬃ። 11 ጻርቂማላፔ ኢቻሹ ታሙ ቃጴታ ኦꬃዳ፥ ቃንጎ ሚሳቲዛ ሚሻታ ጊዶ ጌልꬃ፤ ሂስታዳ ቦላ ዱንካኔዛ ኢሲፌ ጋꬃ ኦይꬃ። ሂስቲኮ ሃ ናምኡ ኦይኬቲዳ ካማቲ ኢሲኖ ጊዳና። 12 ቦላ ዱንካኔዛ ማጋላሻታፔ ፓላሂዳ ባጋ ማጋላሻይ ጊዶ ዱንካኔዛስ ጉዬራ ኣላሌቶ። 13 ቦላ ዱንካኔዛ ማጋላሻቲ ናምኡ ባጋራካ ኢሲ ኢሲ ዋꬋ ማላ ፓላሂዲ ሄራ ሃራ ኣላሌቲዲ ጊዶ ዱንካኔዛ ካማና ማላ ናምኡ ባጋ ሚሌራ ኣላሌቶ።

14 «ቦላ ባጋ ዱንካኔዛ ቦላራ ካማናስ ዞኦ ቃላሜን ጌሊ ኬዚዳ ꬋርሾ ኢቴ ጊጊሳ፤ ቃሴ ኢዛ ቦላራ ካማናስ ሃꬃ ጊዶ ዶኣ ጋልባፌ ሃራ ካማ ጊጊሳ።

15 «ጊዶ ዱንካኔዛ ቶሌ ሚꬃታ ኦዶሮ ሚꬃፌ ኦꬃ። 16 ኢሲ ኢሲ ቶሌ ሚꬃስ ኣዱሳቴꬃይ ታሙ ዋꬋ፥ ጎምፓይ ኢሲ ዋꬋኔ ባጋ ጊዶ። 17 ኢሲ ቶሌ ሚꬃስ ኢሲ ቦላ ኦይኬቲ ኡቲዳ ናምኡ ቶሆታ ኦꬃ። ጊዶ ዱንካኔዛ ቶሌ ሚꬃታ ኡባካ ሄሳꬆ ኦꬃ፤ 18 ጊዶ ዱንካኔዛስ ዱጌ ባጋራ ናምኡ ታሙ ቶሌ ሚꬃታ ኬሳዳ፥ 19 ኢሲ ኢሲ ቶሌ ሚꬃስ ናምኡ ኤቆሶ፥ ሙሌራ ኦይዱ ታሙ ኤቆሶ ቢራፔ ጊጊሳ። 20 ጊዶ ዱንካኔዛስ ፑዴሃ ባጋራ፥ ናምኡ ታሙ ቶሌ ሚꬃታ ኬሳዳ፥ 21 ኢሲ ኢሲ ቶሌ ሚꬃስ ናምኡ ኤቆሶ፥ ሙሌራ ኦይዱ ታሙ ኤቆሶ ቢራፔ ጊጊሳ። 22 ቃሴ ጊዶ ዱንካኔዛስ ጉዬራ ኣርሼይ ዉሊዛ ባጋራ ኡሱፑን ቶሌ ሚꬃታ ኬሳዳ፥ 23 ጉዬ ባጋራ ዲዛ ዞዜታስ ናምኡ ቶሌ ሚꬃታ ጊጊሳ። 24 ጉዬ ባጋራ ዲዛ ቶሌ ሚꬃቲ ዉሪ ጻጶፔ ጼራ ጋካናስ ኢሲ ቦላ ጋጊ ኦይኬቲዲ፥ ጼራን ኢሶይ ኢሳራ ሳጋዮን ኦይኬቴቶ፤ ሄሳꬆካ ናምኡ ዞዜታ ቦላ ዲዛ ናምኡ ቶሌ ሚꬃቲካ ሃራ ቶሌ ሚꬃታራ ኦይኬቴቶ። 25 ኢሲ ኢሲ ቶሌ ሚꬃስ ጋርሳራ ናምኡ ናምኡ ቶሌ ኤቆሶይ ዴኦ፤ ሙሌራ ኦስፑን ቶሌ ሚꬃቲኔ ቢራፔ ኦሴቲዳ ታማኔ ኡሱፑን ኤቆሶይ ዴዮ።

26 «ቃሴ ሜጋ ሚꬃታ ኦዶሮ ሚꬃፌ ኬሳ። ጊዶ ዱንካኔዛስ ኢሲ ባጋ ሚሌን ዲዛ ቶሌ ሚꬃታስ ኢቻሹ ሜጋ ሚꬃታ፥ 27 ቃሴ ሃንኮ ባጋ ሚሌን ዲዛ ቶሌ ሚꬃታስ ሃኢካ ኢቻሹ ሜጋ ሚꬃታ ጊጊሳ። ሄሳꬆካ ጊዶ ዱንካኔዛስ ጉዬራ ኣርሼይ ዉሊዛ ባጋራ ዲዛ ቶሌ ሚꬃታስ ኢቻሹ ሜጋ ሚꬃታ ጊጊሳ። 28 ጊዶ ሜጋ ሚꬃቲ ቶሌ ሚꬃታስ ጊዶራ ሃ ጋጻፔ ሄ ጋጻ ጋካናስ ካንꬂ ኬዛናስ ቤሴስ።

29 «ቶሌ ሚꬃታ ዎርቃን ቲያዳ ሜጋ ሚꬃቲ ኢስታ ጊዶራ ኣꬊዛ ሳጋዮታ ዎርቃፌ ኦꬃ፤ ቃሴ ሜጋ ሚꬃታካ ዎርቃን ቲያ። 30 ጊዶ ዱንካኔዛ ታኒ ኔና ዙማ ቦላን ቤሲዳ ሌሚሶዛ ማላ ቶካ።

31 «ሳሎ ሚሳቲዛፔ፥ ኦቻ ቴራ ሚሳቲዛ ቃጪናፔኔ ጼቃ ዞኦ ቃጪናፔኔ ሎኢ ሱቄቲዳ ሊቆ ላይኖፔ ኢሲ ማጋላሻ ኦꬃ፤ ሄ ማጋላሻዛ ቦላ ኪሩቤታ ሚስሌ ሲኪ ሜꬊዛ ሂላን ኦሲሳ። 32 ሂስታዳ ኦዶሮ ሚꬃፌ ኦሴቲዲ ዎርቃን ቲዬቲዳ ኦይዱ ኤቆ ሚꬃታ ቦላ ዲዛ ዎርቃፌ ኦሴቲዳ ካቆታን ካቃ። ሄ ኦይዱ ኤቆ ሚꬃቲ ቢራፔ ኦሴቲዳ ኤቆሶታን ጌሌቶ። 33 ሄ ማጋላሻዛ ጊዶ ዱንካኔዛ ካራን ዲዛ ቃጴታፔ ጋርሳራ ካቃዳ፥ ጫቆ ቃላስ ማርካ ጊዲዳ ታቦታ ማጋላሻዛፔ ጋꬃ ባጋራ ዎꬃ፤ ሂስቲኮ ሄ ማጋላሻዚ ጌሽ ጌቴቲዛ ሶሆዛ ኡባፌ ዱማቲዛ ቆልኣፌ ጊዶን ሻካና። + 34 ማሮቴꬃ ካማ ኡባፌ ዱማቲዳ ቆልኣን ዲዛ ጫቆ ቃላስ ማርካ ጊዲዳ ታቦታ ቦላ ዎꬃ። 35 ጻራጴዛዛ ማጋላሻፔ ካሬራ ፑዴ ባጋራ ዎꬃ፤ ጾምፔ ዎꬂዛ ባላ ቃሴ ኢዛ ጊናን ዱጌ ባጋራ ዎꬃ።

36 «ዱንካኔዛን ጌሊዛ ፔንጌዛስ ሳሎ ሚሳቲዛ ቃጪናፔ፥ ኦቻ ቴራ ሚሳቲዛ ቃጪናፔ፥ ጼቃ ዞኦ ቃጪናፔኔ ሎኢ ሱቄቲዳ ሊቆ ላይኖፔ ጺልፔን ኣሌቂሲ ኦሴቲዳ ማጋላሻ ጊጊሳ። 37 ማጋላሻዛስ ኢቻሹ ኤቆ ሚꬃታ ኦዶሮ ሚꬃፌ ኬሳዳ፥ ዎርቃን ቲያ፤ ኢስታ ካቆቲካ ዎርቃፌ ኦሴቲዳ ጊዴቶ፤ ኤቆ ሚꬃታስ ጻርቂማላፔ ኦሴቲዳ ኢቻሹ ኤቆሶ ጊጊሳ።