27
ጻርቂማላፔ ኦሴቲዳ ያርሾሶሆ
(ኬሳ 38፡1-7)
1 «ኦዶሮ ሚꬃፌ ያርሺዛሶ ኦꬃ። ሄ ያርሺዛሶዛ ꬎቃቴꬃይ ሄꬑ ዋꬋ፤ ጎምፓይኔ ኣዱሳቴꬃይ ኢሲ ማላ፥ ኢቻሹ ኢቻሹ ዋꬋ ጊዲዲ ኦይዱ ዞዜራ ዴዮ።
2 ኦይዱ ዞዜታ ዉርሴꬃ ጋጻን ጋጻን ኢሲ ኢሲ ካጬ ሜꬋ፤ ካጬቲ ያርሾሶዛፔ ኦሴቴቶ። ሂስታዳ ያርሺዛሶዛ ጻርቂማላ ቲያ።
3 ኢዛን ጎኤቲዛ ሚሻታ፥ ቢዲንꬅ ካሺዛ ሚሻታ፥ ካሼቲዳ ቢዲንꬃ ኬሲዛ ሚሻታ፥ ኬሬታ፥ ኣሾ ጺጺዛ ኮንጬታኔ ታማ ካቺዛኔ ኬሲዛ ሚሻታ ኡባ ጻርቂማላፔ ኦꬃ።
4 ሂስታዳ ኢዛስ ጻርቂማላፔ ዛይዛሬ ማላ ሚሺኔ ኦይዱ ጉላታ ቦላን ኦይዱ ሳጋዮታ ኦꬃ።
5 ሂስታዳ ያርሺዛሶዛስ ዳባ ቦላ ዎꬃ።
6 ኦዶሮ ሚꬃፌ ያርሺዛሶዛስ ቶሆ ሚꬃታ ኬሳዳ ጻርቂማላ ቲያ።
7 ያርሺዛሶዛ ቶኪዛ ዎዴ ማዳና ማላ ሄ ቶሆ ሚꬃታስ ናምኡ ሚሌራ ዲዛ ሳጋዮታን ኣꬃ።
8 ታኒ ኔና ዙማ ቦላን ቤሲዳ ማላ ያርሺዛሶዛ ሳንቃፌ ኦꬃዳ ጊዶዛ ዶያ ኣጋ።
ጾሳ ዱንካኔዛ ጊቤ
(ኬሳ 38፡9-20)
9 «ጾሳ ዱንካኔዛ ጊቤ ሎኢ ዳዴቲዳ ሊቆ ላይኖፔ ማጋላሻታ ጊጊሳ። ዱጌ ባጋራ ዲዛ ማጋላሻታ ኣዱሳቴꬃይ ጼቱ ዋꬋ ጊዶ።
10 ኢዛስ ናምኡ ታሙ ኤቆ ሚꬃቲኔ ኤቆ ሚꬃቲ ኢስታን ኤቂዛ ናምኡ ታሙ ኤቆሶታ ጻርቂማላፔ ኦꬃ፤ ኢስታ ሁኤን ቃሴ ካቆታኔ ቶሬ ሚꬃታ ሁኤ ቦላ ጊታ ሳጋዮታ ቢራፔ ኦꬃ።
11 ሄሳꬆካ ፑዴ ባጋ ኣዱሳቴꬃይ ጼቱ ዋꬋ፤ ቃሴ ናምኡ ታሙ ቶሬ ሚꬃቲኔ ኤቆ ሚꬃታስ ናምኡ ታሙ ጻርቂማላፔ ኦሴቲዳ ኤቆሶቲ ዴቶ። ሂስታዳ ቢራፔ ኦሴቲዳ ካቆታኔ ኤቆ ሚꬃታስ ሁኤ ቦላ ጊታ ሳጋዮታ ዎꬃ።
12 ኣርሼይ ዉሊዛ ባጋራ ኣኮቴꬃይ ኢቻሹ ታሙ ዋꬋ ጊዶ፤ ታሙ ቶሬ ሚꬃቲኔ ቶሬ ሚꬃታስ ታሙ ኤቆሶቲ ዲዛ ማጋላሻቲ ኢዛስ ዴቶ።
13 ቃሴ ኣርሼይ ሞኪዛ ባጋራ ኣኮቴꬃይ ኢቻሹ ታሙ ዋꬋ ጊዲዲ፥
14 ፔንጌዛፔ ኢሲ ባጋራ ታማኔ ኢቻሹ ዋꬋ ኣዱቂዛ ማጋላሻቲ ዴቶ፤ ኢስታስ ሄꬑ ኤቆ ሚꬃቲኔ ኢስታን ኤቂዛ ሄꬑ ኤቆሶቲ ዴቶ።
15 ሄሳꬆካ ሃንኮ ባጋራ ታማኔ ኢቻሹ ዋꬋ ኣዱቂዛ ማጋላሻቲ ዴቶ፤ ኢስታስ ሄꬑ ኤቆ ሚꬃቲኔ ኢስታን ኤቂዛ ሄꬑ ኤቆሶቲ ዴቶ።
16 «ፔንጌዛስ ናምኡ ታሙ ዋꬋ ኣዱቂዛ ማጋላሻ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሎኢ ሱቄቲዳ ላይኖፔ ዳዴቲዳ፥ ጺልፔን ሎኢዳ ማጋላሻ ጊጊሳ። ኢዛ ቱቂ ኦይካናስ ኦይዱ ኤቆ ሚꬃቲኔ ቶሬ ሚꬃቲ ኢስታን ኤቂዛ ኦይዱ ኤቆሶታ ጊጊሳ።
17 «ጊቤዛ ዩዪ ኣꬋናስ ዲዛ ኤቆ ሚꬃታ ኡባስ ቢራፔ ኦሴቲዳ ጊታ ሳጋዮቲ፥ ካቆቲኔ ጻርቂማላፔ ኦሴቲዳ ኤቆሶቲ ዴቶ።
18 ጊቤዛ ኣዱሳቴꬃይ ጼቱ ዋꬋ፥ ኣኮቴꬃይ ኢቻሽ ታሙ ዋꬋ ጊዶ፤ ꬎቃቴꬃይ ኢቻሹ ዋꬋ ጊዲዳ ሎኢ ሱቄቲ ዳዴቲዳ ላይኖፔ ኦሴቲዳ ማጋላሻቲ ዴቶ፤ ቃሴካ ጻርቂማላፔ ኦሴቲዳ ኤቆሶቲ ዴቶ።
19 «ጾሳ ዱንካኔዛ ኦሶስ ጎኤቲዛ ሚሻቲ፥ ዱንካኔዛኔ ጊቤዛ ቶሌ ꬊሽኬቲ ዉሪካ ጻርቂማላፔ ኦሴቴቶ።
ጾምፔ ዛይቴ
(ሌዌ 24፡1-4)
20 «ጾምፔይ ቶኦንታ ኤጺሼ ዳና ማላ ኢዛስ ኮሺዛ ዛይቴ ዎጋራ ሚꬃ ኣይፌ ጫዲ ጉምኢዲ ጺሎ ዛይቴ ኔስ ኤሃና ማላ ኢስራኤሌ ናይታ ኣዛዛ።
21 ኣሮኔይኔ ኢዛ ኣቱማ ናይቲ ጾምፔይ ጎዳ ሲንꬃን ቃሚዳ ጋዴይ ዎንታና ጋካናስ ፖኣና ማላ፥ ጾሳ ዱንካኔዛ ጊዶን፥ ጫቆ ቃላስ ማርካይ ኢዛ ጊዶን ዲዛ ታቦታ ሲንꬃን ዲዛ ማጋላሻፔ ካሬራ ኤꬄቶ። ሃይሲ ኢስራኤሌ ኣሳስ ሜርናስ ዎጋ ጊዲ ዴኦ።