8
ኣꬎ ኤራቴꬃ ሳባ
1 ሲዪቴ! ኣꬎ ኤራቴꬃያ ባ ቃላ
ዶቁ ሂስታ ጼይጌኬ?
ኣኬካይካ ባ ጬንጉርሳ
ꬎቁ ሂስታ ሲሴኬ?
2 ኦጌ ዶናን ዴኢዛ
ዙምቡላታ ቦላኔ
ዳጋላ ኦጌታን ኤቃዉስ።
3 ጊምቤዛ ላንቄን ካታማታ
ጌሊዛ ፔንጌን ኤቃዳ
ባ ቃላ ꬎቁ ሂስታዳ፥
4 ሃይቶ ኣሳቶ!
ታኒ ኢንቴና ጼይጋይስ፤
ታኒ ኣሳ ዜሬꬅ ኡባ ጼይጋይስ።
5 ኢንቴኖ ኣኬካይ ፓጪዳይቶ!
ዎዚናማ ጊዲቴ፤
ኢንቴኖ ኤያቶ ኣኬካ ዴሚቴ።
6 ታኒ ጎኢዛ ሚሽ
ዮቲዛ ጊሻስ ኤዝጊቴ፤
ታ ዶናፔ ሱሬ ዮኦይ ኬዜስ።
7 ታ ዶናይ ቱማ ሃሳዬስ፤
ታ ሜቴርሻቲካ
ኢታ ሚሽ ኢጼቴስ።
8 ታ ዶናፔ ኬዚዛ ቃላቲ
ኡባይ ቱማ፤
ጌላ ዎይኮ ቦካ ጊዴቴና።
9 ኣኬካይ ዲዛ ኣሳስ
ታ ሃሳያይ ሊኬ፤
ኤራቴꬂ ዲዛይታስ
ታ ሃሳያን ዎርዶይ ዴና።
10 ቢራፔ ኣꬂዲ ታ ዞሬ ኤኪቴ፤
ሙሩታ ዎርቃፌ ኣꬂዲ
ኤራቴꬅ ዶሪቴ።
11 ኣይስ ጊኮ፥ «ታኒ ኣꬎ ኤራቴꬂ
ዞኦ ኢንቁፌካ ኬሃ ኣልኣይስ፤
ኔኒ ኣሞቲዛ ሚሽ ኡባይካ
ታናራ ጊናታናስ ዳንዳዬና።
12 ታኒ ኣꬎ ኤራቴꬂ
ኣኬካራ ዳይስ፤
ኤራቴꬂኔ ዎዚናማቴꬂ
ታ ሚሻታ።
13 ጎዳስ ያሻቴꬂ ኢታ ኢጾ፤
ታኒ ኦቶሮኔ ሃላጫ፥
ሜንጼ ኢታቴꬂኔ
ጌላ ሃሳያ ኢጻይስ።
14 ዞሬይኔ ሎኦ ፒርዳይ ታይታ፤
ታስ ኣኬካይኔ ዎልቃይ ዴስ።
15 ካዎቲ ታናን ካዎቴቴስ፤
ዴሬ ኣይሲዛይቲ
ሱሬ ዎጋ ኬሴቴስ።
16 ዳናቲ ታኒ ማዲን
ዴራ ኣይሴቴስ፤
ዴራ ሃሪዛ ጊታ ኣሳቲ
ኡባይ ሃሬቴስ።
17 ታና ሲቂዛይታ ታኒ ሲቃይስ፤
ሚኒ ኮይዛይቲ ታና ዴማና።
18 ዱሬቴꬂኔ ቦንቾይ
ታ ማታን ዴቴስ፤
ዉሮንታ ኣቆታይኔ
ኢንጄይ ታ ማታና።
19 ኢንቴ ታፔ ዴሚዛ ጎኣይ
ሙሩታ ዎርቃፌ ኣꬌስ፤
ታ ኢሞታይካ
ሴሪሲ ኬሲዳ ቢራፔ ዳሬስ።
20 ታኒ ጺሎቴꬃ ኦጌን ሄሜታይስ፤
ሱሬ ፒርዳ ካላይስ።
21 ታና ሲቂዛይታስ
ታኒ ዱሬቴꬅ ኢማና፤
ኢስታ ሚንጃ ኬꬃካ
ታኒ ኩንꬃና።
22 «ጎዳይ ታና ባ ኦሶ ኡባፌ
ኮይሮ ሜꬊዴስ፤
ቤኒፔካ ኢዛ ኦሳስ
ኮይሮይ ታና።
23 ሳሎይኔ ሳኣይ
ሜꬌታናፔ ካሴ
ቤኒ ሜርናሶፌ ታኒ ሹሜታዲስ።
24 ዎጋ ጊታ ኣባቲ ባይንዳ ዎዴ፥
ሃꬃ ፑልቶቲ ꬉቃናፔ ካሴ
ታኒ ዬሌታዲስ።
25 ዙማቲኔ ዙምቡላቲ
ሜꬌታናፔ
ካሴ ታኒ ዬሌታዲስ።
26 ጎዳይ ሳኣኔ
ሳኣ ቦላ ዲዛ ዴምባታ
ዎይኮ ኣላሜ ቦላ ዲዛ ጉዱላታ
ሜꬋናፔ ካሴ ታኒ ዬሌታዲስ።
27 ጎዳይ ሳሎታ ሚጪዳ ዎዴኔ
ጊታ ኣባታፔ ቦላራ
ሳሎ ጉፋንꬆ ጊግሲዳ ዎዴ
ታኒ ሄን ዴኣይስ።
28 ጎዳይ ሻራታ ቦላን
ዎꬂዳ ዎዴ፥
ጊታ ኣባ ፑልቶታ
ꬉሲዳ ዎዴ፥
29 ኣባ ሃꬃቲ
ባንታስ ኢሜቲዳ ዛዋፔ
ፒኒዲ ኣꬎንታ ማላ
ዛዋ ዎꬂዳ ዎዴ፥
ሳኣስ ዮች ዬጊዳ ዎዴ፥
30 ሄ ዎዴ ታኒ ኢዛ ማታን
ዋና ኦሳንቻ፤
ኡባ ጋላስ ታኒ
ኡፋይሳን ኩማይስ፤
ታኒካ ኢዛ ሲንꬃን ኡፋዬታይስ።
31 ኢዛስ ጊዲዳ ኣላሜ ኡባን
ታ ኡፋዬታይስ፤
ኣሳ ናይታንካ ታ ኡፋዬታይስ።
32 «ሃኢካ ታ ናይቶ!
ታኒ ጊዛይሳ ኤዝጊቴ፤
ታ ኦጌ ናጊዛይቲ ኣንጄቲዳይታ።
33 ታ ቲሚርቴ ሲዪቴ፤
ኣꬎ ኤራንቻታ ጊዲቴ፤
ዉዳ ꬋዮፒቴ።
34 ታኒ ዮቲዛይሳ ሲዪዛ ኣሲ፥
ሃች ሃች ታ ፔንጌን ቤቲዛ ኣሲ፥
ታሶ ጌሊዛሶንካ
ናጊዛ ኣሲ ኣንጄቲዳዴ።
35 ታና ዴሚዳይ ዴኦ ዴሜስ፤
ጎዳፔ ኢዚ ሳባ ዴሜስ።
36 ጊዶ ኣቲን ታና
ዴሞንታ ኣጊዳ ኣሲ
ባና ቆሄስ፤
ታና ኢጺዛ ኡባቲ
ሃይቆ ሲቄቴስ» ጋዱስ።