9
ኣꬎ ኤራቴꬂኔ ኤያቴꬅ
1 ኣꬎ ኤራቴꬃያ
ባስ ኬꬅ ኬጻዱስ፤
ኬꬃስ ላፑን
ቱሳታ ኤሳዱስ።
2 ኢዛ ሞꬎ ሜሄ ሹካዱስ፤
ዎይኔ ኡሹ ኣጋዱስ፤
ማዳካ ጊጊሳዱስ።
3 ሂስታዳ ኣሳ ጼይጋናስ
ባ ማጫ ኣይሌታ ኪታዱስ።
ኢዛ ካታማይፔ ꬎቃ ሶን
ኤቃዳ ጼይጋዱስ፤
4 «ኢንቴኖ! ኤራይ ፓጪዳይቶ
ሃ ጌሊቴ!» ጋዱስ።
ኤያታካ ኢዛ፥
5 «ሃ ዪዲ ታ ቁማ ሚቴ፤
ታኒ ኣጊዳ
ዎይኔ ኡሻካ ኡዪቴ!
6 ኢንቴ ኤያቴꬃ ኦጌዛ ኣጊቴ፤
ኢንቴ ሼምፖራ ፓጻ ዴኣና፤
ኣኬካ ኦጌን ሄሜቲቴ» ጋዱስ።
7 ቂልጪዛ ኣስ ሴሪዛ ኣሲ ኡባይ
ባስ ጫሼ ካላና፤
ኢታ ኣስ ዞሪዛዴይካ
ባስ ካዉያና።
8 ቂልጪዛ ኣስ ዞሮፓ፤
ኔ ኢዛ ዞሪኮ ኢዚ ኔና ኢጻና።
ኣꬎ ኤራንቻ ኣስ ሴራ፤
ኔ ኢዛ ሴሪኮ ኢዚ ኔና ዶሳና።
9 ኣꬎ ኤራንቻ ኣስ ታማርሳ፤
ሂስቲኮ ኢዚ ካሴይሳፌካ
ኣꬎ ኤራንቻ ጊዳና።
ጺሎ ኣስ ታማርሳ፤
ሂስቲኮ ኢዚ ኤራቴꬅ ጉጃና።
10 ኣꬎ ኤራቴꬃስ ኮይሮይ
ጎዳስ ያሻቴꬃ፤
ጌሻዛ ኤሮይካ ኣኬካ።
11 ታ ጋሶን ኔስ ባሬይ ኣዱቃና፤
ኔስ ዴኦ ላይꬃይካ ጉጄታና።
12 ኔኒ ኣꬎ ኤራንቻ ጊዲኮ
ጎኤታና፤
ኔ ቂልጪዛዴ ጊዲኮ ቆሄታና።
13 ኤያ ማጫሲ ዎጫማ ዳራዉስ፤
ኢዛ ባና ሃሩኩ፤
ኢዛ ኣይኮካ ኤሩኩ።
14 ኢዛ ባ ካሬን ኡታ ፔኣዉስ፤
ካታማ ጊዶን ꬎቃሶ
ኬዛ ኡታዉስ።
15 ሄራ ኣꬊ
ባ ኦጌ ቢዛይታ ጼይጋዉስ።
16 ኢዛካ ዎዚና ፓጬታስ፥
«ኢንቴኖ! ኣኬካይ ፓጪዳይቶ
ታኮ ሃ ዪቴ።
17 ካይሲ ኡዪዛ ሃꬂ ማልኤስ፤
ጌማን ሚዛ ቁማይካ
ሱኬሴስ» ጋዉስ።
18 ጊዶ ኣቲን ሃይቂዳ ኣሳይ
ሄን ዴኢዛይሳ፥
ኢዚ ኢማꬃቲካ ዱፎ ጊዶን
ዲዛይሳ ኢስቲ ኤሬቴና።