10
1 ኣቤት ጎዳዉ!
ኔ ኣይስ ሃካዳ ኤቃይ?
ሜቶ ዎዴንካ ኣይስ ጌማይ?
2 ኢታ ኣሳቲ ኦቶሬቴቴስ፤
ሂዬሳታካ ዬዴꬄቴስ፤
ኢስቲ ሃራስ ዎꬂዳ ዎጺማዴን
ዛሪ ኦይኬቴቶ።
3 ኢታ ኣሲ ባ ዎዚና
ኣሞን ጬቄቴስ፤
ዮራይ ጎዳ ጫዬሲኔ
ካዴስ።
4 ኢታ ኣሲ ኦቶሬቴꬃን
ጾሳ ኮዬና፤
ኢዛ ቆፋ ኡባን ጾሲ ዴና።
5 ኡባ ሚሺ ኢዛስ ኩሜስ፤
ኔ ዎጋይ ኢዛስ ጌሌና፤
ኦቶራንቻይ
ኔ ዎጋፔ ሃኬስ፤
ሄሳ ጊሻስ
ባ ሞርኬታ ቦላን
ኢዚ ቂልጬስ።
6 ባ ዎዚናን ኢዚ፥
«ታና ኣይኮይካ ቃꬄና፤
ታና ሙሌካ ሜቶይ ጋኬና»
ጊዲ ቆፔስ።
7 ኢዛ ዶናን ቃንጌꬂ፥
ዎርዶይኔ ማንዴይ ኩሚዴስ፤
ኢዛ ኢንጻርሳን ጌኔይኔ
ባሌꬆይ ዴስ።
8 ዴሬ ጊዶን ጌማሶን ዙጊ ኡቴስ፤
ማዶይ ባይንዳይታ
ꬋይሳናስ ናጌቴስ፤
ጺሎ ኣሳታ ጌማን ዎꬌስ።
9 ባ ቆቴቲዛሶን ጌሚዲ፥
ሂዬሳ ኦይካናዉ
ጋሞ ማላ ዙጌስ፤
ማዶይ ባይንዳይታ ባ ዎጺማዴን
ኦይኪዲ ጎቺ ኤፌስ።
10 ማዶይ ባይንዳይኔ
ሂዬሳይ ኢዛ ኩሼን ኩንዴስ፤
ኢዚካ ኢስታ
ኒፒ ሂስቲ ሜንꬄሬꬄስ።
11 ኢታ ኣሲ ባ ዎዚናን፥
«ጾሲ ታና ዶጊዴስ፤
ባ ሲንꬃ ታፔ ጌንꬂዴስ፤
ሙሌካ ኢዚ ታና ቤኤና» ጌስ።
12 ኣቤት ጎዳዉ! ዴንዳ።
ጾሶ! ኔ ኩሼዛ
ꬎቁ ሂስታ ዴንꬃ፤
ማዶይ ባይንዳ
ሜቶታንቻታ ዶጎፓ።
13 ኢታ ኣሲ ጾሳ ኣይስ ካꬊዜ?
ባ ዎዚናንካ፥
«ጾሲ ታና ቃጻዬና»
ኣይስ ጊዜ?
14 ጊዶ ኣቲን ጾሶ!
ኔኒ ሜቶዛኔ
ዋዬዛካ ቤያሳ፤
ኔኒ ኡባ ዎዴ
ማዳናስ ጊጋ ኡታዳሳ፤
ኔኒ ዪኦታ ማዳሳ፤
ማዶይ ባይንዳይቲካ
ባና ኔስ ሼꬌቴስ።
15 ጌኔ ኣሳታ ዎልቃ ሜንꬃ፤
ኢታ ኣሳታ ዎልቃካ ሊቂሳ፤
ኢስቲ ናምኣንꬆ
ኢታ ኦꬆንታ ማላ
ኢስታ ኦሶ ማላ ኢስታ ቃጻያ።
16 ጎዳይ ሜሪፔ ሜርናስ
ካዎቲዲ ዴስ፤
ሃራ ካዎቴꬃቲ
ኢዛ ቢታፌ ꬋያና።
17 ኣቤት ጎዳዉ!
ኔኒ ሂዬሳታ ኣሞ ኤራሳ፤
ኢስታ ዎሳካ ሲያዳ
ሚንꬄꬃሳ።
18 ኦኒካ ኢስታ ያሺሶንታ ማላ
ማዶይ ባይንዳይታሲኔ
ዪኦታስ ኔ ፒርዳ።