9
ና ሃይቆ ጊጊሶ ጌቴቲዛ ዬꬃን ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ታኒ ኔና ኩሜꬃ
ዎዚናፔ ጋላታና፤
ማላሊሲዛ ኔ ኦሶዛ
ኡባካ ታ ዮታና።
2 ታኒ ኔናን ኡፋዬታናኔ
ሃሹ ጋና።
ኡባፌ ꬎቃ ጾሳዉ!
ታኒ ኔ ሱንꬃስ
ጋላታ ማዛሙሬ ዬጻና።
3 ኔ ቆንጪዛ ዎዴ
ታ ሞርኬቲ ጉዬ ሲማና፤
ኔ ሲንꬃፌካ
ꬉጴቲ ꬋያና።
4 ኔኒ ታስ ጺሎ ፒርዳ ፒርዳዳሳ፤
ኔኒ ጺሎቴꬃን ፒርዳሼ
ኔ ካዎቴꬃ ኣራታን ኡታዳሳ።
5 ኔኒ ካዎቴꬃታ ሴራዳሳ፤
ኢታታካ ꬋይሳዳሳ፤
ኔኒ ኢስታ ሱንꬃ
ሜሪ ሜርናስካ ቁጫ ዲጋዳሳ።
6 ሞርኬቲ ሜሪ ሜርናስ ꬋይዳ፤
ኢስታ ካታማታካ
ሙሌራ ꬎቃላ ꬋይሳዳሳ፤
ኢስቲ ሙሌራ ዶጌቲ ኣቲዳ።
7 ጊዶ ኣቲን ጎዳይ
ሜርናስ ካዎቲዲ ዴስ፤
ኢዚ ፒርዳናስ
ባ ኣራታ ጊግሲዴስ።
8 ኢዚ ሃ ኣላሜዛ
ጺሎቴꬃን ፒርዳና፤
ካዎቴꬃታ ቦላካ
ቱማቴꬃን ፒርዳና።
9 ጎዳይ ኡንኤቲዳይታስ
ባቃቲ ኣቲዛሶ፤
ሜቶ ዎዴታንካ
ቆቴቲ ኣቲዛሶ።
10 ኔ ሱንꬃ ኤሪዛይቲ
ኔናን ኣማኔቴቴስ፤
ኣይስ ጊኮ ጎዳዉ!
ኔኒ ኔና ኮይዛይታ
ዬጋ ኣጋቤካ።
11 ጺዮኔን ካዎቲ ኡቲዳ ጎዳስ
ጋላታ ማዛሙሬ ዬጺቴ፤
ኢዚ ኦꬂዳ ኦሶ
ዴሬ ኡባስ ቆንጬን ዮቲቴ።
12 ኣይስ ጊኮ ሱꬅ ጉሲዛይታስ
ሃሎ ኬሲዛ ጾሲ
ናቄቲዳይታ ዋሶዛ
ኢዚ ዶጌና።
13 ኣቤት ጎዳዉ!
ታ ሞርኬቲ
ታና ዬዴꬂዛይሳ ቤኣ።
ኔኒ ታስ ቃꬌታዳ
ሃይቆፔ ታና ኣሻ።
14 ሄሲካ ታኒ ጺዮኔ ኣሳ ካሬን
ኤቃዳ ኔና ጋላታናሲኔ
ኔ ኣሺዳይሳን
ኬሃ ኡፋዬታናሳ።
15 ካዎቴꬃይ ባ ቦኪዳ
ኦላን ኩንዲዴስ።
ኢስቲ ቆቲ ዎꬂዳ ዎጺማዴይ
ኢስታ ቶሆ ኦይኪዴስ።
16 ጎዳይ ባ ጺሎ ፒርዳን ኤሬቲዴስ፤
ኢታ ኣሲ ባ ኩሼን ኦꬂዳ
ኦሶ ዎጺማዴን ኦይኬቲዴስ።
17 ኢታቲ ሲኦሌን ጌላና፤
ጾሳ ዶጊዛ ካዎቴꬃይ
ኡባይካ ኢስታ ማላ ሃናና።
18 ሂዬሳቲ ኣይዴካ
ዶጌቲ ኣቴቴና፤
ዎይኮ ማንቆታ ሂዶታይ
ጮ ሜርናስ ꬋዬና።
19 ኣቤት ጎዳዉ!
ካዎቴꬃቲ ባ ዎልቃን ዴንዲዲ
ኔ ቦላ ጬቄቶንታ ማላ
ኔኒ ኢስታ ቦላ ፒርዳ።
20 ኣቤት ጎዳዉ!
ኔ ኢስታ ዳጋንꬃ፤
ኢስቲ ኣስ ጊዲዳይሳ
ኔኒ ኢስታ ኤሪሳ።