102
ጬጪዳ ዎዴኔ ሜቶቲዳ ዎዴ ጾሳ ሲንꬃን ዎሲዳ ዎሳ
1 ኣቤት ጎዳዉ!
ታ ዎሳ ሲያ፤
ታ ዋሶይ ኔኮ ጋኮ።
2 ታ ሜቶቲዳ ጋላስ
ኔ ሲንꬃ ታፔ ጌንꬆፋ፤
ኔ ሃይꬃ ታኮ ዛራ፤
ታኒ ኔኮ ዋሲዛ ዎዴ
ታስ ኤሶን ኣላ።
3 ኣይስ ጊኮ ታ ላይꬃይ
ጩዋ ማላ ꬋዬስ፤
ታ ሜቄꬃይካ
ታማ ቦንቆ ማላ ኤጼስ።
4 ታ ዎዚናይ
ኣዋይ ላቢዳ ማታ ማላ ሃንዴስ፤
ታስ ቆꬌይ ካꬅ ኢጺዴስ።
5 ታስ ኦሌ ዳሮፔ ዴንዶይሳን
ሜቄꬂ ጻላ ኣቲዴስ።
6 ታኒ ባዞን ዲዛ ቢያ ካፎ
ዎይኮ ላሌቲዳ ኬꬃን
ዴኢዛ ጉቶ ማላ።
7 ታኒ ኢቺን ꬊስኮይ ዬና፤
ታኒ ኬꬃ ሁኤን
ባርካ ኡቲዳ ካፎ ማላ ጊዳዲስ።
8 ታ ሞርኬቲ ኡባ ጋላስ
ታና ጫዬቴስ፤
ታና ኢሴꬂዛይቲ ታ ሱንꬅ
ቃንጌቲዳ ማላ ቆዲዳ።
9 ታኒ ቢዲንꬅ ꬊሌ ማላ ቃምኣዲስ፤
ታ ኣፉንꬃካ
ኡሻራ ዋላካ ኡያዲስ።
10 ኔ ሃንቆ ጋሶኒኔ
ኔ ቦሻ ጋሶን
ኔ ታና ፑዴ ዴንꬆሶፔ
ዱጌ ኦላዳሳ።
11 ታ ዴኦ ላይꬃይ ኦማርሳ ዎዴ
ኩዋ ማላ፤
ታኒ ማታ ማላ ሜላዲስ።
12 ጊዶ ኣቲን ኣቤት ጎዳዉ!
ኔኒ ካዎቴꬃ ኣራታን
ሜርናስ ኡታዳሳ፤
ኔ ሱንꬃይካ ዬሌታፔ
ዬሌታ ጋካናስ ሃሳኤታና።
13 ኔኒ ጺዮኒስ
ኪያቴꬅ ኦꬂዛ ዎዴይ
ጋኪዳ ጊሻሲኔ
ዎዴዚካ ሃኢ ጊዲዳ ጊሻስ
ኔኒ ዴንዳዳ ኢዚስ ቃꬌታና።
14 ኔ ኦሳንቻቲ ኢዛን ዲዛ
ሹቻታ ዶሴቴስ፤
ቡꬌቲዳ ቢታስካ
ቃꬌቴቴስ።
15 ካዎቴꬃቲ ጎዳ
ሱንꬃስ ያያና፤
ሳኣ ካዎቲ ኡባይ
ኢዛ ቦንቻና።
16 ጎዳይ ጺዮኖ ዛሪ ኤሲዛ ዎዴ
ኢዚ ባ ጊታቴꬃ ቤሳና።
17 ኢዚ ሂዬሳታ ዎሳ ሲያና፤
ኢስታ ሾቤካ ካꬌና።
18 ቡሮን ዬሌታናይ
ጎዳ ጋላታና ማላ
ሃይሲ ዪዛ ዬሌታስ ጻፌቶ።
19 ጎዳይ ꬎቃን ዲዛ
ባ ጌሻ ሶሆፔ
ዱጌ ጼሊዴስ፤
ኢዚ ሳሎፔ ዱጌ
ሳኣ ቤኢዴስ።
20 ሄሲካ ቃሼቲዳ
ኣሳታ ዋሶ ሲያናሲኔ
ሃይቆስ ፒርዴቲዳ ኣሳታ
ቃሾፔ ቢርሻናሳ።
21 ሄሳ ጊሻስ ጎዳ ሱንꬂ
ጺዮኒን ዮቴታና፤
ኢዛ ጋላታይ
ዬሩሳላሜን ኣዋጄታና።
22 ዴሬቲኔ ካዎቲ ኢሲፌ ሺቂዲ
ጎዳስ ሄ ዎዴ ጎይናና።
23 ታኒ ናቴቴꬃን ዲሺን፥
ኢዚ ታ ሚኖቴꬃ
ኦጌን ኣሺዴስ፤
ታ ዳና ላይꬃካ
ቃንꬂዴስ።
24 ሂስቲን ታኒ፥
«ኣቤት ታ ጾሳዉ!
ታኒ ዳና ላይꬃ
ቡሮ ባጋሲሺን
ኔ ታና ኤኮፋ።
ኣቤት ጎዳዉ!
ኔኒ ዬሌታፔ ዬሌታ ጋካናስ
ዳሳ» ጋይስ።
25 ኔኒ ቤኒ ሳኣ ሜꬋዳሳ፤
ሳሎቲካ ኔ ኩሼ ኦሶ።
26 ሄይቲ ኡባይ ꬋያና፤
ጊዶ ኣቲን ኔኒ ሚና ዳና፤
ኢስቲ ኡባይካ
ኣፋላ ማላ ዉራና፤
ኔኒ ኢስታ ጫርቃ
ማላ ላማና፤
ኢስቲካ ኣꬋና።
27 ጊዶ ኣቲን ኣዉዴካ
ኔኒ ኔና፤
ኔ ላይꬃይ ሙሌካ ዉሬና።
28 ኔስ ኦꬂዛይታ ናይቲ
ሳሮቴꬃን ዳና፤
ኢስታ ዜሬꬃይካ
ኔ ሲንꬃን ሚኒ ኤቃና።