103
ዳዊቴ ማዛሙሬ
1 ታ ሼምፖዬ!
ጎዳ ጋላታ!
ታ ኩሜꬃ ኣሳቴꬃይ
ኢዛ ጌሻ ሱንꬃ ጋላቶ።
2 ታ ሼምፖዬ! ጎዳ ጋላታ!
ኢዚ ኔስ ኦꬂዳ
ኪያቴꬃ ኡባ ዶጎፓ።
3 ኢዚ ኔ ናጋራ
ኡባ ኣቶ ጌስ፤
ኢዚ ኔ ሃርጌ ኡባፌ
ኔና ፓꬄስ።
4 ኢዚ ኔና
ዱፎን ጌሎንታ ማላ ኣሼስ፤
ሜርና ሲቆኒኔ ማሮታን
ኔና ኣንጄስ።
5 ጎሌ ካፎꬆ ኔኒ ኦራጻና ማላ
ኢዚ ኔ ኣሞ ኡባ
ሎኦ ሚሻን ኩንꬃና።
6 ጎዳይ ናቄቲዳይታስ
ጺሎ ኦꬄሲኔ
ሱሬ ፒርዳ ፒርዴስ።
7 ኢዚ ባ ኦጌ ሙሴ ቤሲዴስ፤
ባ ኦሶካ
ኢስራኤሌ ኣሳ ኤሪሲዴስ።
8 ጎዳይ ቃꬌቲዛዴኔ
ማሪዛዴ፤
ኢዚ ሃንቄታናስ ኤሶቶንታዴ፤
ኢዛ ሲቆይ ኬሂፔ ዳሮ።
9 ኢዚ ኡባ ዎዴ
ኑ ሞሮስ ሞቴና፤
ሜርናስካ ሃንቄቴና።
10 ኢዚ ኑ ናጋራ ማላ
ኑስ ኦꬂቤና፤
ኑ ኢታቴꬃ ማላ
ኑስ ዛሪቤና።
11 ሳሎይ ሳኣፔ ꬎቂዛ ማላ
ጎዳስ ያዪዛይታስ
ኢዛ ሲቆይ ጊታ።
12 ኣርሼይ ሞኪዛሶፔ
ዉሊዛሶይ ሃኪዛ ማላ
ጎዳይ ኑ ሞሮዛ
ኑፔ ሃሲዴስ።
13 ኣዋይ ባ ናይታስ
ቃꬌቲዛ ማላ
ጎዳይ ባስ ያዪዛይታስ ቃꬌቴስ።
14 ኑኒ ኣዛፔ ሜꬌቲዳኮ
ኢዚ ኤሬስ፤
ኑኒ ቢታ ጊዲዳይሳካ
ኢዚ ኣኬኬስ።
15 ኣሳ ዴኦይ ጊዲኮ ማታ ማላ፤
ኢዚ ባዞ ጪሻ ማላ ጪዬስ።
16 ጫርኮይ ጫርኪዛ ዎዴ
ቆቆፌቲ ꬋዬስ፤
ኢዚ ካሴ ዲዛሶይ
ሙሌካ ኤሬቴና።
17 ጊዶ ኣቲን ጎዳስ ያዪዛይታስ
ኢዛ ሲቆይ ሜርናፔ
ሜርና ጋካናሳ፤
ኢዛ ጺሎቴꬃይካ
ዬሌታፔ ዬሌታ ጋካናሳ።
18 ሄሲ ሃናናይ
ኢዛ ጫቆ ቃላ
ናጊዛይታሲኔ
ኢዛ ኣዛዞ ፖላናስ
ሚኔቲዛይታሳ።
19 ጎዳይ ባ ኣራታ ሳሎን ኤሲዴስ፤
ኢዛ ካዎቴꬃይ ኡባ ሃሬስ።
20 ኢንቴኖ ኢዛ ኪታንቻቶ!
ኢዛ ኣዛዞ ፖሊዛ ዎልቃማቶ!
ኢዚ ጊዛይሳ ኤዝጊዛይቶ!
ጎዳ ጋላቲቴ።
21 ኢንቴኖ ሳሎን ዴኢዛ ሚኖቶ!
ኢዛ ሼኔ ኦꬂዛ ኣይሌቶ!
ጎዳ ጋላቲቴ።
22 ኢንቴኖ ኢዚ ሃሪዛ ሶሆ
ኡባን ዴኢዛ ሜꬌታቶ!
ኡባይካ ጎዳ ጋላቲቴ።
ታ ሼምፖዬ! ጎዳ ጋላታ።